ພະນັກງານກູ້ຣະເບີດ ຈະໄດ້ ເງິນເດືອນ

ຈໍາປາທອງ
2019-06-27
ອີແມວລ໌
ຄໍາເຫັນ
Share
ພິມ
ເຄື່ອງໝາຍ ເຂດລະເບີດຕົກໃສ່ ໃນສມັຍສົງຄາມ
ເຄື່ອງໝາຍ ເຂດລະເບີດຕົກໃສ່ ໃນສມັຍສົງຄາມ
RFA/VS

ທາງການລາວ ຈະຈ່າຍເງິນເດືອນ ໃຫ້ພະນັກງານ ເກັບກູ້ຣະເບີດ ບໍ່ທັນແຕກ ແຂວງຈຳປາສັກ ແລະ ອັດຕະປື 200 ປາຍຄົນພາຍໃນ ອາທິດໜ້າ ຫຼືໄວທີ່ສຸດແມ່ນຕອນແລງຂອງມື້ວັນທີ 27 ມິຖຸນາ ນີ້ ຫລືບໍ່ກໍແມ່ນມື້ອື່ນ ພາຍຫຼັງທີ່ພະນັກງານ ຈຳນວນດັ່ງກ່າວ ບໍ່ໄດ້ຮັບ ຈາກກອງເກັບກູ້ຣະເບີດ ບໍ່ທັນແຕກແຫ່ງຊາດລາວ ຫລື UXO ລາວ ຂອງຣັຖບານ ທີ່ຮັບເງິນຊ່ອຍເຫລືອ ຈາກ ສະຫະປະຊາຊາດ ມາເປັນເວລາ 6 ເດືອນ ຄືນັບຕັ້ງແຕ່ມື້ວັນທີ 1 ມົກກະຣາ ມາຮອດປັດຈຸບັນ, ຕາມຄຳເວົ້າ ຂອງ ເຈົ້າໜ້າທີ່ ພາກສ່ວນທີ່ກ່ຽວຂ້ອງ ຢູ່ນະຄອນຫລວງວຽງຈັນ ຕໍ່ວິທຍຸເອເຊັຽເສຣີ ໃນມື້ວັນທີ 27 ມິຖຸນາ ນີ້:

"ອັດຕະປື ນີ້ກໍມີແຕ່ 5 ທິມ ຂອງອອສຕາລີ ຊ່ວຍເຫລືອ ຈຳປາສັກ ຄືກັນ ມັນກໍບໍ່ມີບັນຫາ ຫຍັງດອກ ຖືວ່າເງິນສິໄດ້ໝົດແລ້ວ ຄິດວ່າ ຊ້າສຸດ ອາທິດສິມາຈະຕ້ອງໄດ້ເບີກຈ່າຍເງິນເດືອນ ຫັ້ນໜ່າ ຊ່າງວ່າບາງເທື່ອມື້ອື່ນອາດຈະໄດ້ ຫລືແລງມື້ນີ້ອາຈໄດ້ no problem no problem ໜ່າ, I think everything to be OKAY."

ທ່ານກ່າວວ່າ ສາເຫດທີ່ພາໃຫ້ທິມພະນັກງານ ເກັບກູ້ຣະເບີດບໍ່ທັນແຕກ ຢູ່ແຂວງຈຳປາສັກ ແລະອັດຕະປືຈຳນວນ 200 ປາຍຄົນບໍ່ທັນ ໄດ້ຮັບເງິນເດືອນເປັນເວລາ 6 ເດືອນ ນັ້ນແມ່ນເປັນຍ້ອນວ່າ ເງິນທີ່ຈະນຳມາເບີກຈ່າຍນັ້ນ ຕ້ອງໄດ້ຜ່ານຫຼາຍຂັ້ນ ຫຼາຍຕອນ ບໍ່ຄືແຕ່ກ່ອນ ທີ່ UXO ລາວ ເຊັນຮັບເງິນມາຈາກຜູ້ໃຫ້ທຶນ ຕ່າງປະເທດແລ້ວ ກໍເອົາເງິນມານຳໃຊ້ ຕາມແຜນການໄດ້ໂລດ ແຕ່ໃນປີນີ້ຕ້ອງໄດ້ຜ່ານ ກະຊວງການເງິນ, ການຄັງ, ທະນາຄານກາງ, ທະນາຄານ ທຸຣະກິດ ແລະອື່ນໆ ດັ່ງທີ່ທ່ານ ກ່າວວ່າ:

"ດຽວນີ້ມັນບໍ່ໄດ້ນຳໃຊ້ງ່າຍແນວນັ້ນ ຕ້ອງໄປຜ່ານກະຊວງການເງິນ ການຄັງພຸ້ນກ່ອນ ເພີ່ນຈະພິຈາຣະນາ ໃຫ້ເຮົາເປີດບັນຊີພຸ້ນກ່ອນ ມີເຫັນດີແລ້ວ ເຮົາຈັ່ງຄ່ອຍສາມາດ ໄປເປີດບັນຊີໄດ້ຢູ່ ທະນາຄານກາງ ຜ່ານບັນຊີທະນາຄານກາງ ແລ້ວເຮົາຈັ່ງຄ່ອຍ ໄປເປີດບັນຊີຢູ່ ທະນາຄານທຸຣະກິດ ມັນມີຫລາຍຂັ້ນຕອນ ບາດນີ້ເມື່ອໄດ້ເງິນ ມາແລ້ວເຮົາຕ້ອງໄດ້ເອົາແຜນ ໄປຜ່ານຄັງເງິນແຫ່ງຊາດອີກ ເຫັນດີແລ້ວ ເຮົາຈະຕ້ອງໄປຫາ ທະນາຄານກາງ ອີກບາດນຶ່ງ ຈາກທະນາຄານແລ້ວ ແລ້ວຈັ່ງຕ້ອງເອົາໄປສົ່ງໃຫ້ ທະນາຄານທຸຣະກິດ ເປັນວຽກໃໝ່ ບໍ່ເຄີຍເຮັດແບບນີ້."

ທ່ານກ່າວຕື່ມວ່າ ນອກຈາກຂັ້ນຕອນການເປີດບັນຊີ ທີ່ຫຼາຍຂັ້ນຕອນແລ້ວ ເຈົ້າໜ້າທີ່ UXO ລາວ ຍັງພົບກັບບັນຫາການ ປະກອບ ເອກກະສານ ການເງິນຕື່ມອີກ ເປັນຕົ້ນແມ່ນເຣຶ່ອງແບບຟອມ ແລກປ່ຽນເງິນຕຣາ. ຖ້າຫາກ UXO ລາວ ຕ້ອງການນຳໃຊ້ ເງິນໄປໃຫ້ ແຂວງຕ່າງໆ UXO ລາວ ກໍຕ້ອງໄດ້ເອົາເອກກະສານ ທີ່ກະຊວງການເງິນ ຮັບຮອງ ແລະຕ້ອງມີອັດຕຣາ ແລກປ່ຽນເງິນຕຣາ ຂອງມື້ ທີ່ຈະຖອນເງິນ ໄປແຈ້ງໃຫ້ ທະນາຄານທຸຣະກິດ ທີ່ເປີດບັນຊີ ກ່ອນທີ່ຈະສາມາດຖອນເງິນ ໄປໃຊ້ໄດ້.

ຫາກອັດຕຣາແລກປ່ຽນ ເງິນຕຣາ ໃນເອກກະສານ ຂອງກະຊວງຮັບຮອງມາ ບໍ່ກົງກັບທະນາຄານ ກໍຕ້ອງໄດ້ແກ່ຍາວໄປມື້ໃໝ່ ຍ້ອນ ເອກກະສານ ທີ່ນຳມາສເນີນັ້ນ ໃຊ້ການບໍ່ໄດ້.

ເຈົ້າໜ້າທີ່ທ່ານດຽວກັນນີ້ ກ່າວຕື່ມອີກວ່າ ລາວໄດ້ຮັບທຶນຊ່ອຍເຫລືອ ເພື່ອສຳຣວດ ເກັບກູ້ ແລະໂຄສະນາກ່ຽວກັບ ຄວາມສ່ຽງຈາກຣະເບີດ ບໍ່ທັນແຕກ ຕື່ມອີກ ຈາກສະຫະຣັຖອາເມຣິກາ ແລະອັງກິດ ຈຳນວນ 21 ລ້ານ 46 ພັນໂດລາ ສະຫະຣັຖ ແຕ່ປີ 2019 ຫາປີ 2020 ທີ່ ຍານາງ ໃບຄຳ ຂັດທິຍະ ຮອງຣັຖມົນຕຣີ ກະຊວງແຮງງານ ແລະສະຫວັດດິການສັງຄົມ ໄດ້ລົງນາມຮັບເອົາ ຈາກທູດ ຂອງສອງປະເທດ ດັ່ງກ່າວ ໃນມື້ວັນທີ 25 ມິຖຸນານີ້.

ແຕ່ທ່ານກໍບໍ່ຮູ້ວ່າ ທຶນຊ່ວຍເຫລືອ ຂອງສະຫະຣັຖອາເມຣິກາ ແລະອັງກິດ ທີີ່ວ່ານັ້ນ ຈະຖືກນຳໃຊ້ຢູ່ແຂວງຈຳປາສັກ ແລະອັດຕະປື ຫລືບໍ່ ຍ້ອນວ່າຍັງບໍ່ທັນເຫັນ ແຈ້ງການອອກມາ ເຖິງແມ່ນ ບົດບັນທຶກຄວາມເຂົ້າໃຈກັນ ຣະບຸວ່າ ທຶນດັ່ງກ່າວ ຈະຖືກນຳໃຊ້ຢູ່ 4 ແຂວງພາກໃຕ້ ຂອງລາວ ຄື ແຂວງສາລະວັນ, ຈຳປາສັກ, ເຊກອງ ແລະແຂວງອັດຕະປື ແລ້ວກໍຕາມ.

ເຕັມຫນ້າ