ໂຄງການເຂື່ອນຫຼວງພຣະບາງ ສ້າງ ຄວາມກັງວົນ

ມະນີຈັນ
2019-11-11
ອີແມວລ໌
ຄໍາເຫັນ
Share
ພິມ
ທ່ານ ອານຸລັກ ກິດຕິຄຸນ ຫົວໜ້າຝ່າຍ ຍຸທສາດ ແລະ ຫຸ້ນສ່ວນ ຄນະກັມມາທິການ ແມ່ນໍ້າຂອງ ຫລື MRC
ທ່ານ ອານຸລັກ ກິດຕິຄຸນ ຫົວໜ້າຝ່າຍ ຍຸທສາດ ແລະ ຫຸ້ນສ່ວນ ຄນະກັມມາທິການ ແມ່ນໍ້າຂອງ ຫລື MRC
RFA/PN

ທ່ານ ຫານນະຣົງ ເຍົາວະເລີດ ປະທານມູນນິທິ ເພື່ອການບໍຣິຫານຈັດການນໍ້າ ແບບບູຣະນະການ ຂອງໄທ ທີ່ເຂົ້າຮ່ວມກອງປະຊຸມ ແຈ້ງການຮັບຮູ້ໂຄງການພັທນາ ເຂື່ອນໄຟຟ້າ ຫລວງພຣະບາງ ເມື່ອວັນທີ 5 ຫາທີ 6 ພຶສຈິກາ ນີ້ທີ່ນະຄອນຫຼວງວຽງຈັນ ໃຫ້ສັມພາດ RFA ວ່າໃນໄລຍະ 6 ເດືອນ ທີ່ມີການຮັບຟັງຄວາມຄຶດ ຄວາມເຫັນ ແລະ ຂໍ້ສເນີຈາກຜູ້ມີສ່ວນໄດ້ສ່ວນເສັຽ ຊຶ່ງມີເຖິງ 100 ບັນຫານັ້ນ ຄົງອາດຈະບໍ່ໄດ້ຮັບການແກ້ໄຂ ທັງໝົດ:

"ທ່ານເຫັນວ່າໄລຍະເວລາ 6 ເດືອນ ທີ່ມີການຮັບຟັງ ເຂົາບໍ່ໄດ້ສຶກສາ ໃຫ້ເຮົາເຫັນ ໃນປະເດັນທີ່ເຮົາທ້ວງ ເຊັ່ນກໍຣະນີເຂື່ອນ ໄຊຍະບູຣີ ມີຄວາມເຫັນທັງໝົດ 800 ປາຍປະເດັນ ເພື່ອໃຫ້ຄນະກັມມາທິການ ແມ່ນໍ້າຂອງ ນໍາໄປປຶກສາຫາຣື ແລະແກ້ໄຂ ແຕ່ສຸດທ້າຍ ກໍເລືອກ ແກ້ໄຂ ບາງປະເດັນເທົ່ານັ້ນ ເປັນຕົ້ນເຣື່ອງການໄຫລ ຂອງ ຝຸ່ນຕົມ ເຣື່ອງທາງປາຜ່ານ. ສ່ວນເຣື່ອງຂຶ້ນລົງ ຂອງຣະດັບນໍ້າ ທີ່ຜິດປົກກະຕິ ຢູ່ທ້າຍເຂື່ອນ ການເປີດ-ປິດເຂື່ອນ, ຕາຝັ່ງເຈື່ອນ ແລະ ອີກຫລາຍປະເດັນ ບໍ່ມີການແກ້ໄຂ ແລະບໍ່ມີໃຜ ຮັບຜິດຊອບ."

ດຣ. ສົມກຽດ ປະຈໍາວົງ ເລຂາທິການສໍານັກງານ ຊັພຍາກອນນໍ້າ ແຫ່ງຊາດ ຂອງໄທ ໃຫ້ສໍາພາດ RFA ໃນມື້ດຽວກັນນັ້ນວ່າ ການພັທນາ ເຂື່ອນໄຟຟ້າ ແມ່ນໍ້າຂອງ ທີ່ເປັນແມ່ນໍ້າສາກົນ ນັ້ນ ຜູ້ຮັບຜິດຊອບໂຄງການ ແລະປະເທດຜູ້ໃຫ້ສໍາປະທານ ຄືລາວ ຈະຕ້ອງໄດ້ສຶກສາ ຜົນກະທົບ ດ້ານສິ່ງແວດລ້ອມ ແລະສັງຄົມ ໂດຍສະເພາະປະຊາຊົນ ໃນພື້ນທີ່ ເຂື່ອນ ຕ້ອງໃຫ້ມີຜົນກະທົບໜ້ອຍທີ່ສຸດ:

"ທ່ານກ່າວວ່າສິ່ງທີ່ຈະເກີດຂຶ້ນ ໂດຍສະເພາະ ຈາກການພັທນາ ເຂື່ອນ ໃນລໍາແມ່ນໍ້າຂອງ ຊຶ່ງທາງລາວ ໄດ້ສເນີໃຫ້ມີການສ້າງການຮັບຮູ້ ເຣື່ອງການກໍ່ສ້າງເຂື່ອນ ຫຼວງພຣະບາງ ຊຶ່ງຈະຕ້ອງ ມີຜົນກະທົບໜ້ອຍທີ່ສຸດ ໂດຍສະເພາະຢ່າງຍິ່ງຕໍ່ສິ່ງແວດລ້ອມ ແລະປະຊາຊົນໃນ ພື້ນທີ່."

ທາງດ້ານທ່ານ ອານຸລັກ ກິດຕິຄຸນ ຫົວໜ້າຝ່າຍຍຸທສາດ ແລະຫຸ້ນສ່ວນ ຄນະກັມມາທິການ ແມ່ນໍ້າຂອງ ຫລື MRC ກໍໃຫ້ສໍາພາດ RFA ຢູ່ນອກກອງປະຊຸມ ເທື່ອນີ້ວ່າ ຜູ້ມີສ່ວນໄດ້ສ່ວນເສັຽທັງ 4 ປະເທດ ຄື ໄທ ວຽດນາມ ກັມພູຊາ ແລະລາວ ໄດ້ສເນີ ກົງກັນວ່າໃຫ້ປະເມີນ ຄືນເຣື່ອງ ຜົນກະທົບຂ້າມຊາຍແດນ ເຣື່ອງພັນປາ ໃນແມ່ນໍ້າຂອງ ເຣື່ອງສິ່ງແວດລ້ອມ ແລະສັງຄົມ ເຣື່ອງມາຕການ ແລະຄວາມປອດພັຍ. ດັ່ງທີ່ທ່ານ ກ່າວວ່າ:

"ຫລັງຈາກນີ້ເຮົາສິປະເມີນວ່າ ມັນສິມີຜົນກະທົບໜັກສໍາລັບ ໂຄງການຕົວນີ້ ໂດຍສະເພາະ ເຣື່ອງຂ້າມຊາຍແດນ ມີການກະທົບ ໃນເຣື່ອງປາ ເຣື່ອງສິ່ງແວດລ້ອມ ເຣື່ອງສັງຄົມ ເຣື່ອງຄວາມປອດພັຍ ຂອງເຂື່ອນ ທີ່ວ່າເປັນສໍາຄັນທີ່ວ່າເພິ່ນ ເປັນຫ່ວງ."

ທ່ານ ອານຸລັກ ກິດຕິຄຸນ ກ່າວອີກວ່າຫລັງຈາກທີ່ ໄດ້ຮັບພັງ ຄວາມເຫັນ ແລະຂໍ້ສເນີໃຫ້ປັບປຸງຈາກ ຜູ້ມີສ່ວນໄດ້ສ່ວນເສັຽ ທັງໝົດ ໃນ ເບື້ອງຕົ້ນແລ້ວ ທາງ MRC ກໍຈະເອົາຂໍ້ສເນີທັງໝົດນີ້ ໃຫ້ຣັຖບານລາວແລະ ບໍຣິສັດຜູ້ພັທນາໂຄງການ ນໍາໄປປັບປຸງ ແກ້ໄຂ.

MRC ຈັດກອງປະຊຸມປຶກສາຫາຣື ແລະໃຫ້ຂໍ້ມູນຣະດັບ ພູມີພາກ ໃນມື້ວັນທີ 5 ຫາທີ 6 ພຶສຈິກາ ທີ່ນະຄອນຫລວງວຽງຈັນ ໂດຍໄດ້ ແຈ້ງການຮັບຮູ້ ໂຄງການພັທນາເຂື່ອນໄຟຟ້າ ຫລວງພຣະບາງ ຕໍ່ທັງ 4 ປະເທດສະມາຊິກ ແລະຜູ້ມີສ່ວນໄດ້ສ່ວນເສັຽ ເປັນຄັ້ງທໍາອິດ ເຖິງໂຄງການ ເຂື່ອນນັ້ນ ໄດ້ເລີ່ມເຂົ້າສູ່ ຂະບວນການປຶກສາຫາຣື ລ່ວງໜ້າ ມາແຕ່ວັນທີ 8 ຕຸລາ ທີ່ຜ່ານມາ ແລະ ຈະສິ້ນສຸດລົງ ໃນມື້ວັນທີ 7 ເມສາ 2020.

ເຕັມຫນ້າ