ຣັຖບານລາວໃຫ້ຣັຖກອນ ເຮັດວຽກ ຢູ່ບ້ານ

ມະນີຈັນ
2020-03-30
ອີແມວລ໌
ຄໍາເຫັນ
Share
ພິມ
ສໍານັກງານ ນາຍົກຣັຖມົນຕຣີ ທີ່ ນະຄອນຫຼວງວຽງຈັນ ສປປ ລາວ
ສໍານັກງານ ນາຍົກຣັຖມົນຕຣີ ທີ່ ນະຄອນຫຼວງວຽງຈັນ ສປປ ລາວ
RFA

ທ່ານ ທອງລຸນ ສີສຸລິດ ນາຍົກຣັຖມົນຕຣີ ໄດ້ອອກຄໍາສັ່ງວ່າດ້ວຍການເພີ່ມທະວີ ມາຕການສະກັດກັ້ນການຣະບາດ ຄວບຄຸມ ແລະຕຣຽມ ຄວາມພ້ອມ ຮອບດ້ານເພື່ອຕ້ານໂຄວິດ-19 ໂດຍໃຫ້ພະນັກງານ ຣັຖກອນ ຢຸດເຮັດວຽກ ຢູ່ຫ້ອງການ ນັບຕັ້ງແຕ່ວັນທີ 30 ມີນາ ເຖິງ ວັນທີ 19 ເມສາ 2020 ຍົກເວັ້ນຜູ້ທີ່ໄດ້ຮັບມອບໝາຍ ໃຫ້ປະຕິບັດໜ້າທີ່ ໃນການຄວບຄຸມ ແລະປ້ອງກັນໂຄວິດ-19 ແລະ ເຈົ້າໜ້າທີ່ ຮັກສາຄວາມປອດພັຍ, ດັ່ງເຈົ້າໜ້າທີ່ປະຕິບັດງານ ຄະນະສະເພາະກິດຄວບຄຸມໂຄວິດ-19 ທ່ານນຶ່ງກ່າວຕໍ່ RFA ໃນມື້ວັນທີ 30 ມີນາ ນີ້ວ່າ:

“ມີຄໍາສັ່ງອອກເດ໋ ມື້ວານ ມີຖແລງການ ປະຕິບັດຈົນຮອດວັນທີ 19 ເດືອນ 4 ມີແຕ່ພວກທີ່ຈໍາເປັນນະ, ຄັນພວກໃດທີ່ຈໍາເປັນຣັຖບານສັ່ງ ກະໄດ້ເຮັດໜ້າທີ່ຕໍ່ ໂຕໃດບໍ່ຈໍາເປັນກໍພັກກ່ອນ ເພິ່ນກໍບອກ ຢູ່ໃສກະ ໃຫ້ເຝົ້າຣະວັງຕິດຕາມ ຄືກັນໝົດທຸກຄົນ ຫັ້ນແຫລະ ທຸກພາກສ່ວນ.”

ທ່ານເວົ້າວ່າ ຜູ້ທີ່ຍັງໄປເຮັດວຽກຢູ່ຫ້ອງການ ຄືທະຫານ,ຕໍາຣວດ ເຈົ້າໜ້າທີ່ດັບເພີງ ພະນັກງານໄຟຟ້າ ນໍ້າປະປາ ສື່ສານ ທະນາຄານ ສະຖາບັນການເງິນ ຕລາດຫລັກຊັບ ແພດ-ໝໍ ອາສາສມັກ ແລະ ພະນັກງານ ທີ່ໄດ້ຮັບມອບໝາຍ ຈາກຂັ້ນສູນກາງ ແລະ ຂັ້ນທ້ອງຖິ່ນ. ສ່ວນຜູ້ອື່ນໆ ໃຫ້ເຮັດວຽກຢູ່ເຮືອນ ຂອງຕົນເອງ.

ສໍາລັບພະນັກງານຣະດັບສູງ ຂອງກະຊວງຕ່າງໆ ທີ່ຕ້ອງມາເຮັດ ເປັນຕົ້ນ ກະຊວງສາທາຣະນະສຸຂ ທີ່ຕ້ອງມາຕິດຕາມ ກວດກາວຽກງານ ການເຝົ້າຣະວັງໂຄວິດ-19, ກະຊວງອຸດສາຫະກັມແລະການຄ້າ ຕິດຕາມກວດກາເຣື່ອງຣາຄາສິນຄ້າ, ກະຊວງແຮງງານ ແລະສວັດດິການ ສັງຄົມ ຕິດຕາມ ກວດກາຄົນງານລາວ ແລະຕ່າງປະເທດ ທີ່ໄດ້ຮັບຜົລກະທົບ ຈາກ ໂຄວິດ-19.

ເຈົ້າໜ້າທີ່ກະຊວງແຜນການ ແລະການລົງທຶນ ທ່ານນຶ່ງກ່າວຕໍ່ RFA ໃນມື້ດຽວກັນນີ້ວ່າ ນັບແຕ່ວັນທີ 30 ມິນາ ນີ້ເປັນຕົ້ນໄປ ພະນັກງານ ຣັຖກອນ ສ່ວນຫລາຍບໍ່ໄດ້ ໄປເຮັດວຽກ ຢູ່ຫ້ອງການ ຈົນຮອດວັນທີ 19 ເມສາ:

“ຊ່ວງນີ້ເພິ່ນພັກຕາມທີ່ວ່າເພິ່ນ ແຈ້ງການຫັ້ນນະ ປະມານໄລຍະ ວັນທີ 20 ເດືອນ 4 ເພິ່ນ ສິແຈ້ງການອອກມາໃໝ່.”

ປັດຈຸບັນ ໂຮງງານຕັດຫຍິບ, ໂຮງງານອື່ນໆ ແລະໂຄງການໃຫຍ່ ທີ່ມີຄວາມສ່ຽງຕໍ່ການຣະບາດຂອງ ໂຄວິດ-19 ຖືກສັ່ງໃຫ້ປິດ, ຍົກເວັ້ນ ໂຮງງານຜລິດສິນຄ້າ ບໍຣິໂພກ, ຢາປົວພຍາດ, ເຄຶ່ອງປ້ອງກັນການ ຣະບາດ ແລະອຸປະກອນການແພດ ແຕ່ຕ້ອງປະຕິບັດຕາມມາຕການ ປ້ອງກັນຂອງຄະນະສະເພາະກິດ.

ເຈົ້າຂອງໂຮງງານທີ່ຖຶກສັ່ງໃຫ້ປິດ ຕ້ອງມີການຄຸ້ມຄອງຄົນງານ ໃຫ້ພັກຢູ່ທີ່ພັກຂອງຕົນ ແລະປະຕິບັດນະໂຍບາຍ ສວັດດິການ ໃຫ້ແກ່ຄົນ ງານເຫລົ່ານັ້ນ ໃນໄລຍະພັກວຽກນີ້.

ເຕັມຫນ້າ