ໂຮງໝໍເມືອງຂາດເຄື່ອງມື ກວດເຊື້ອ ໂຄວິດ-19

ອຸ່ນແກ້ວ ສຸກສະຫວັນ
2020-03-31
ອີແມວລ໌
ຄໍາເຫັນ
Share
ພິມ
ໂຮງໝໍປະຈໍາ ແຂວງອັດຕະປື
ໂຮງໝໍປະຈໍາ ແຂວງອັດຕະປື
RFA/VS

ໂຮງໝໍເມືອງ ຢູ່ແຂວງຕ່າງໆບໍ່ມີເຄື່ອງມີ ແລະອຸປກອນການແພດ ສຳລັບກວດພຍາດໂຄວິດ-19, ເຮັດໃຫ້ປະຊາຊົນ ທີ່ຢູ່ຫ່າງໄກມີຄວາມ ສ່ຽງ. ໂຮງໝໍເມືອງ ສາມັກຄີໄຊ ແຂວງອັດຕະປື ກໍບໍ່ມີເຄື່ອງກວດ ແລະ ຖ້າເຈົ້າໜ້າທີ່ສາທາ ພົບຄົນເຈັບທີ່ສົງໃສວ່າຕິດເຊື້ອ ກໍຈະສົ່ງໄປ ຫາໂຮງໝໍແຂວງ. ເຈົ້າໜ້າທີ່ຫ້ອງການ ສາທາຣະນະສຸຂ ເມືອງສາມັກຄີໄຊ ໄດ້ກ່າວຕໍ່ເອເຊັຽເສຣີ ວ່າ:

"ບໍ່ມີກະມີແຕ່ວ່າ ຜູ້ໃດມີອາການສົງໃສຫັ້ນນ່າ ເພິ່ນກະເກັບໂຕຢ່າງ ສົ່ງໄປໂຮງໝໍແຂວງ [ອັດຕະປື] ສາທາເມືອງສາມັກຄືໄຊ ບໍ່ມີໂຮງໝໍ ມີແຕ່ສຸຂສາລາ ຄັນວ່າ ກວດກໍມີແຕ່ໂຮງໝໍແຂວງ ທາງສາທາ [ເມືອງ] ມີແຕ່ລົງໃຫ້ຄຳແນະນຳຊື່ໆ."

ເຈົ້າໜ້າທີ່ທ່ານນີ້ ກ່າວຕື່ມວ່າ ປະຊາຊົນໃນເມືອງສາມັກຄີໄຊ ທີ່ໄດ້ຍິນຂ່າວກໍຕ້ອງການ ກວດຫາເຊື້ອໂຄວິດ-19 ເພື່ອຄວາມສະບາຍໃຈ ແລະ ຄົນອ້ອມຂ້າງ, ແຕ່ໃນເມືອງສາມັກຄີໄຊ ມີແຕ່ສຸຂສາລາ ແຕ່ບໍ່ມີ ແພດ-ໝໍ ແລະ ມີອຸປກອນທັນສະໄໝ.

ເຈົ້າໜ້າທີ່ຈະແນະນຳປະຊາຊົນ ຜູ້ທີ່ມີຄວາມສ່ຽງ ແລະ ມີອາການ ໃຫ້ໄປກວດຢູ່ໂຮງໝໍແຂວງ, ແຕ່ເຂົາເຈົ້າກໍມີຄວາມຫຍຸ້ງຍາກໃນການ ເດີນທາງ ແລະ ຕ້ອງໃຊ້ເວລາຫລາຍມື້ ກ່ອນທີ່ຜົນກວດຈະອອກມາ.

ຖ້າວ່າຜູ້ໃດຕິດພຍາດໂຄວິດ-19 ຕ້ອງໄປປິ່ນປົວຢູ່ໂຮງໝໍ ແຂວງຈຳປາສັກ ຍ້ອນວ່າເປັນໂຮງໝໍໃຫຍ່ ແລະ ມີແພດຊ່ຽວຊານ ເຝົ້າຕິດຕາມ ອາການຢ່າງໃກ້ຊິດ. ໂຮງໝໍເມືອງຈຳພອນ ແຂວງສວັນນະເຂດ ກໍບໍ່ມີເຄື່ອງກວດ ໂຄວິດ-19 ແລະ ຜູ້ໃດມີຄວາມສ່ຽງ ຕ້ອງໄປກວດຢູ່ ແຂວງໝໍແຂວງສວັນນະເຂດ. ເຈົ້າໜ້າທີ່ໂຮງໝໍເມືອງຈຳພອນ ໄດ້ກ່າວຕໍ່ເອເຊັຽເສຣີ ວ່າ:

"ກວດໂຄວິດ ມັນກະບໍ່ມີລະວ້າ, ເຂົາກໍເຂົ້າໄປກວດຢູ່ໃນນີ້ແຫລະ ຢູ່ໃນໂຮງໝໍນີ້ແຫລະ ກະເບິ່ງຕາມອາການມັນຫັ້ນແຫຼະ ສົ່ງເຊື້ອໄປກວດ ຢູ່ແຂວງ ແລ້ວກໍສົ່ງແຂວງ ຄັນວ່າອັນນັ້ນແລ້ວກະດີ [ມີຄວາມສ່ຽງ]."

ທ່ານກ່າວວ່າ ບໍ່ຮູ້ຄືກັນວ່າ ເຊື້ອໄວຣັສໂຄວິດ-19 ນີ້ເປັນແນວໃດແທ້ ໄດ້ແຕ່ເບິ່ງຕາມອາການ ຂອງຄົນເຈັບ ຖ້າມີອາການໄຂ້ ໄອ ປວດຫົວ ໂຕຮ້ອນຫລາຍ ທ່ານ ໝໍ ກໍຈະເບິ່ງອາການກ່ອນ ແຕ່ຖ້າຮ້າຍແຮງ ກໍຈະສົ່ງຄົນເຈັບໄປ ໂຮງໝໍແຂວງ.

ເຈົ້າໜ້າທີ່ໂຮງໝໍເມືອງຫົງສາ ແຂວງໄຊຍະບູຣີ ທ່ານນຶ່ງ ກ່າວຕໍ່ເອເຊັຽເສຣີ ໃນວັນດຽວກັນວ່າ ຍັງບໍ່ມີຜູ້ສົງໃສຕິດພຍາດ ໂຄວິດ-19.

"ໂດຍແມ່ນແຫລະ ບໍ່ໆ ບໍ່ມີເທື່ອ ຍັງບໍ່ມີ ບໍ່ພົບເທື່ອ ແຕ່ມັນບໍ່ມີຜູ້ສົງໃສເທື່ອ."

ໂຮງໝໍແຂວງເປັນພຽງແຕ່ບ່ອນກັ່ນຕອງ ຫາເຊື້ອພຍາດໂຄວິດ-19 ໃນເບື້ອງຕົ້ນ ຖ້າພົບວ່າໃຜມີຄວາມສ່ຽງ ທ່ານໝໍຈະແນະນຳໃຫ້ກັກຕົວ ເຝົ້າລະວັງເບິ່ງອາການ ແຕ່ຖ້າມີຄົນຕິດພຍາດ ໂຄວິດ19 ບຸກຄົນ ນັ້ນຈະຖືກສົ່ງໄປປິ່ນປົວຢູ່ໂຮງໝໍ ໃນນະຄອນຫລວງວຽງຈັນ ຍ້ອນວ່າ ໂຮງໝໍມີເຄື່ອງມື, ແພດ ແລະ ໝໍ ທີ່ຊ່ຽວຊານ. ດັ່ງເຈົ້າໜ້າທີ່ ປະຕິບັດການ ຄະນະສະເພາະກິດ ຄວບຄຸມໂຄວິດ19 ໄດ້ກ່າວຕໍ່ ເອເຊັຽ ເສຣີ ໃນວັນທີ 30 ມີນາ ວ່າ:

"ບ່ອນກັ່ນຕອງ ເຂົາມີໝົດ ເຂົາເຮັດໝົດ ຄັນວ່າໃນຢູ່ໃນເກນຂອງ ອະນາມັຍໂລກ ບອກວ່າ ລະເອີ ໄດ້ກັກເລີຍ, ບັນດາໂຮງໝໍໃຫຍ່ໆ ໂຮງໝໍ103 ໂຮງໝໍ150 ຕຽງ ໂຮງໝໍມະໂຫສົດ."

ຄວາມຄືບໜ້າຫຼ້າສຸດ ໃນວັນທີ 31 ມີນາ ຈຳນວນຜູ້ທີ່ຕິດເຊື້ອໂຄວິດ19 ມີທັງໝົດ 9 ຄົນ ແລະສະພາບແຜ່ລະບາດໃນລາວ ຢູ່ໃນຂັ້ນ 3 ອີງຕາມຂໍ້ມູນຈາກ ຄະນະສະເພາະກິດ ຄວບຄຸມໂຄວິດ19.

ເຕັມຫນ້າ