ສະພາແຫ່ງຊາດລາວ ໄຂປະຊຸມ ຄັ້ງທີ 8 ຊຸດທີ 8

ຈໍາປາທອງ
2019-11-07
ອີແມວລ໌
ຄໍາເຫັນ
Share
ພິມ
ຍານາງ ປານີ ຢ່າທໍ່ຕູ້ ປະທານ ສະພາແຫ່ງຊາຕ ສປປລາວ
ຍານາງ ປານີ ຢ່າທໍ່ຕູ້ ປະທານ ສະພາແຫ່ງຊາຕ ສປປລາວ
ຮູບພາບຈາກ : ວີດີໂອ ຂ່າວສານ ປະເທດລາວ

ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດລາວ ຊຸດທີ 8 ເປີດຂຶ້ນໃນມື້ວັນທີ 7 ພຶສຈິການີ້. ກອງປະຊຸມ ຈະໄດ້ຮັບຟັງ, ພິຈາຣະນາ ແລະຕົກລົງຮັບຮອງເອົາ ຫຼາຍບັນຫາຂອງຣັຖບານ ເປັນຕົ້ນ ການຮັບຮອງເອົາ ການແຕ່ງຕັ້ງ ສະມາຊິກ ຣັຖບານ, ການຈັດຕັ້ງ ປະຕິບັດວຽກງານ ພົ້ນເດັ່ນ ປະຈໍາປີ 2019 ແລະ ທິດທາງແຜນວຽກ ຈຸດສຸມ ປະຈໍາປີ 2020, ການຈັດຕັ້ງປະຕິບັດ ແຜນພັທນາເສຖກິດ -ສັງຄົມ, ການແກ້ໄຂ ສະພາບຄວາມຫຍຸ້ງຍາກ ທາງດ້ານເສຖກິດ ມະຫາພາກ, ແຜນງົບປະມານ ແຫ່ງຣັຖ, ຜົນກະທົບ ຈາກພັຍນ້ຳຖ້ວມ.

ພ້ອມກັນນັ້ນກໍແມ່ນວຽກງານຂອງ ອົງການກວດສອບແຫ່ງຣັຖ, ອົງການກວດກາຣັຖບານ, ຂອງຄນະປະຈໍາສະພາແຫ່ງຊາດ ແລະ ກັມມາທິການ ສະພາແຫ່ງຊາດ, ຂອງອົງການໄອຍະການ ປະຊາຊົນສູງສຸດ ແລະສານປະຊາຊົນສູງສຸດ ດັ່ງ ຍານາງ ປານີ ຢາທໍ່ຕູ້ ປະທານ ສະພາແຫ່ງຊາດ ໄດ້ກ່າວໃນພິທີເປີດ ກອງປະຊຸມສະພາ ຕອນນຶ່ງວ່າ:

"ກອງປະຊຸມສມັຍສາມັນເທື່ອທີ 8 ຂອງສະພາແຫ່ງຊາດ ຊຸດທີ 8 ຄັ້ງນີ້ ເປັນກອງປະຊຸມ ທ້າຍປີ ສະນັ້ນ ຈະໄດ້ພິຈາຣະນາຕົກລົງຫຼາຍ ບັນຫາສຳຄັນ ພື້ນຖານຂອງປະເທດຊາດ ດັ່ງນີ້, ພິຈາຣະນາເອົາການສເນີ ແຕ່ງຕັ້ງສະມາຊິກ ຣັຖບານ ຕາມການສເນີ ຂອງ ທ່ານນາຍົກ ຣັຖມົນຕີ."

ກອງປະຊຸມສະພາແຫ່ງຊາດເທື່ອນີ້ ຈະພິຈາຣະນາ ແລະຮັບຮອງເອົາຮ່າງກົດໝາຍໃໝ່ ແລະກົດໝາຍສະບັບປັບປຸງ ທັງໝົດ 8 ສະບັບ ຊຶ່ງໃນນັ້ນມີຮ່າງກົດໝາຍ ສ້າງໃໝ່ 2 ສະບັບ ຄືຮ່າງກົດໝາຍວ່າດ້ວຍ ຮູບເງົາ ແລະຮ່າງກົດໝາຍວ່າດ້ວຍ ຄວາມສະເໝີພາບ ຍິງ-ຊາຍ ແລະມີຮ່າງກົດໝາຍ ສະບັບປັບປຸງ 6 ສະບັບ ຄືຮ່າງກົດໝາຍ ວ່າດ້ວຍການລົ້ມລະລາຍ ຂອງວິສາຫະກິດ, ວ່າດ້ວຍການອະນາມັຍ, ກັນພຍາດ ແລະສົ່ງເສີມສຸຂພາບ, ວ່າດ້ວຍການປະກັນພັຍ, ວ່າດ້ວຍຫຼັກຊັບ, ວ່າດ້ວຍ ກິລາ-ກາຍກັມ ແລະຮ່າງກົດໝາຍ ວ່າດ້ວຍການ ສົ່ງເສີມ ການລົງທຶນ.

ກ່ຽວກັບກອງປະຊຸມສະພາເທື່ອນີ້ ຊາວນະຄອນຫລວງວຽງຈັນ ທ່ານນຶ່ງເວົ້າວ່າ ຕົນຈະຄອຍຕິດຕາມ ຂ່າວກອງປະຊຸມ ໃນຫົວຂໍ້ຕ່າງໆ ຢູ່ເລື້ອຍໆ ແລະຈະໂທຣະສັບ ສາຍດ່ວນ ໄປຮ້ອງຮຽນ ກ່ຽວກັບບັນຫາຂັດແຍ່ງທີ່ດິນ ເພື່ອໃຫ້ ສະພາແຫ່ງຊາດ ຮັບເອົາໄປ ພິຈາຣະນາ ແກ້ໄຂ ດັ່ງທີ່ທ່ານກ່າວຕໍ່ວິທຍຸເອເຊັຽເສຣີ ໃນມື້ວັນທີ 7 ພຶສຈິການີ້ວ່າ:

"ວັນຈັນ ວັນອັງຄານ ເຮົາສິສົ່ງຂ່າວໄປສະພາແໜ່ ເພາະວ່າດຽວນີ້ເພິ່ນ ກະຫາເປີດແດ່ ຢາກເວົ້າເຣຶ່ອງສ່ວນໂຕ ນີ້ດອກ ເຣຶ່ອງດິນນີ້ນະ ເຮົາມີໃບຕາດິນຂອບຄຳ ຢ່າງຄັກແນ່ ມັນຍັງບໍ່ທັນໄດ້ ຮັບການແກ້ໄຂ."

ໃນຂນະດຽວກັນ ນັກວິຊາການລາວ ຜູ້ຂໍສງວນຊື່ທ່ານນຶ່ງ ກໍໄດ້ກ່າວວ່າ ກອງປະຊຸມສະພາແຫ່ງຊາດ ເທື່ອນີ້ ເປັນກອງປະຊຸມ ສມັຍສາມັນ ທີ່ເປີດຂຶ້ນຕາມແຜນການ ບໍ່ໄດ້ມີຫຍັງໂດດເດັ່ນ ໄປກວ່າກອງປະຊຸມ ເທື່ອທີ່ຜ່ານມາ ແຕ່ຢ່າງໃດ:

"ມັນກະສມັຍສາມັນ ລະກະສມັຍວິສາມັນ ສມັຍສາມັນ ແມ່ນເຂົາເປີດຕາມແຜນການ ວິສາມັນກະແບບວ່າ ມີເຫດການຫຍັງເກີດຂຶ້ນ ກະຕາມແຜນມັນແຫລະ ສົມມຸດວ່າໂຄງການ ທາງຣົດໄຟສິຜ່ານເຂດ ທາງລົດໄຟ ສະພາບໍ່ເຫັນດີ ກະບໍ່ໄດ້ເຮັດ ລະກະກົດໝາຍ ຄືກັນ ກົດໝາຍໂຕໃດ ບໍ່ຜ່ານກໍບໍ່ໄດ້ ໂຕໃດຜ່ານກະຜ່ານໄປ."

ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດລາວ ຊຸດທີ 8 ເປີດຂຶ້ນໃນມື້ວັນທີ 7 ພຶສຈິກາ ແລະຈະປິດລົງໃນມື້ວັນທີ 6 ທັນວາ 2019. ກອງປະຊຸມເທື່ອນີ້ ກໍຄືກັນກັບກອງປະຊຸມສະພາ ເທື່ອທີ່ຜ່ານໆມາ ມີໜ່ວຍງານ ຮັບຜິດຊອບ ໂທຣະສັບ ສາຍດ່ວນ ເພື່ອຮັບຟັງຄຳຄິດເຫັນ ແລະຄຳຮ້ອງຮຽນກ່ຽວກັບ ບັນຫາຕ່າງໆ ໂດຍກົງຈາກ ປະຊາຊົນ ທີ່ສົ່ງໄປຫາກອງປະຊຸມ ສະພານັ້ນ.

ຄໍາເຫັນ (1)
Share

(

ປະຊູມອີກແລ້ວເປືອງພາສີ ຂອງປະຊາຊົນຊື່ໆເອົາເງີນຈໍານວນນີ້ ມາແກ້ໄຂຄວາມທຸກຍາກຂອງປະຊາຊົນສິດີກ່ວາ, ເບິ່ງແລ້ວສະມາຊິກຜູ້ແທນ ຫຼືຕົວແທນຂອງປະຊາຊົນ ເປັນຮ້ອຍສອງຮ້ອຍບາດຜູ້ທີເຮັດວຽກ ໄຫ້ປະຊາຊົນເຫັນມີພຽງສອງສາມຄົນເທົ່ານັ້ນ ແລະ ມີແຕ່ຜູ້ແທນຄົນເກົ່າ ແລະເຫັນເພີ່ນຕັ້ງຄໍາຖາມທຸກໆເທື່ອເມື່ອມີການປະຊຸມ ແລະສັງເກດເຫັນຜູ້ແທນຄົນອື່ນໆນັ້ນແມ່ນ ບໍ່ມີປະຕິກິລິຍາໄດໆແລະບໍ່ກະຕືລືລົ້ນ ແລະສົນໃຈຫັຽງກັບກອງປະຊູມເລີຍ, ອັນນີ້ມັນສແດງໄຫ້ເຫັນວ່າຂາດປະສິດທິພາບ, ຂາດຄວາມສາມາດຂອງຜູ້ແທນ, ຂາດແລະດ້ອຍການສຶກສາ ຂອງຜູ້ທີ່ຈະມາເປັນຜູ້ແທນເວົ້າລວມໆແລ້ວ ກໍຄືຜູ້ທີ່ມາເປັນຜູ້ແທນນັ້ນບໍ່ແມ່ໄດ້ມາຈາກການເຫັນພ້ອມ ຂອງປະຊາຊົນນັ້ນເອັງ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 20, 2019 06:38 AM

ເຕັມຫນ້າ