ທາງການເລັ່ງກວດກາ ຜູ້ຍົກຍ້າຍ ເຂົ້າມາລາວ ຜິດກົດໝາຍ

ມະນີຈັນ
2019-08-01
ອີແມວລ໌
ຄໍາເຫັນ
Share
ພິມ
ໝູ່ບ້ານຂອງຊາວວຽດນາມ ທີ່ ເຂົ້າມາຕັ້ງຖິ່ນຖານ ຢູ່ໃນດິນລາວ ແຂວງຜົ້ງສາລີ
ໝູ່ບ້ານຂອງຊາວວຽດນາມ ທີ່ ເຂົ້າມາຕັ້ງຖິ່ນຖານ ຢູ່ໃນດິນລາວ ແຂວງຜົ້ງສາລີ
RFA/TP

ທາງການລາວ ເລັ່ງແກ້ໄຂບັນຫາ ຜູ້ໂຍກຍ້າຍ ຕັ້ງພູມລໍາເນົາ ແລະສ້າງຄອບຄົວ ແບບບໍ່ຖືກຕ້ອງຕາມກົດໝາຍ ຫລາຍພັນຄົນ ຢູຕາມເຂດ ຊາຍແດນ ລາວ-ວຽດນາມ ຣະຫວ່າງ ແຂວງເຊກອງ ແຂວງອັດຕະປື ແລະແຂວງກອນຕຸມ ເພື່ອຄວາມເປັນຣະບຽບ ຮຽບຮ້ອຍໃນສັງຄົມ ບໍ່ໃຫ້ຢູ່ອາສັຍແບບຊະຊາຍ, ຕາມຄໍາເວົ້າຂອງເຈົ້າໜ້າທີ່ ຜແນກ ກະສິກັມ ແລະ ປ່າໄມ້ແຂວງເຊກອງ ຕໍ່ RFA ໃນວັນທີ 1 ສິງຫາ ນີ້:

"ໂຄງການຈັດສັນພູມລໍາເນົາ ນີ້ແຫລະ ກໍບໍ່ແມ່ນວຽດນາມ ສ່ວນຫລາຍແມ່ນຊົນເຜົ່າເຮົາຫັ້ນແລ້ວ ຢູ່ຕາມຊາຍແດນ ເຮືອນຖາວອນນີ້ ສິບໍ່ມີ ສັມມະໂນຄົວ ສິບໍ່ໄດ້ເຮັດເລີຍແຫລະ."

ທ່ານເວົ້າວ່າປັດຈຸບັນ ມີກຸ່ມຊົນເຜົ່າ ທີ່ອາສັຍຢູ່ເຂດຊາຍແດນ ລາວ-ວຽດນາມ ໂດຍບໍ່ມີສໍາມະໂນຄົວ ແລະ ບໍ່ມີເຮືອນຢູ່ຖາວອນ, ດັ່ງນັ້ນ ທາງການລາວ ຈຶ່ງຕ້ອງໄດ້ເຂົ້າໄປພິສູດ ຫລັກຖານວ່າແມ່ນຄົນລາວແທ້ ຫລືເປັນຄົນວຽດນາມ ທີ່ລັກເຂົ້າມາຢູ່ລາວ ເພື່ອອອກໃບຢັ້ງຢືນ ສໍາມະໂນຄົວ ແລະ ຈັດສັນບ່ອນຢູ່ອາສັຍໃຫ້ຖາວອນ.

ໃນຂນະດຽວກັນ ເຈົ້າໜ້າທີ່ຫ້ອງວ່າການ ປົກຄອງແຂວງເຊກອງ ກໍກ່າວໃນທໍານອງດຽວກັນວ່າ ສາເຫດທີ່ຍັງບໍ່ສາມາດ ແກ້ໄຂບັນຫານີ້ ໃຫ້ໝົດໄປໄດ້ເທື່ອນັ້ນ ກໍຍ້ອນກຸ່ມຊົນເຜົ່າ ກະຈາຍກັນຢູ່ ບໍ່ໄດ້ຢູ່ເປັນກຸ່ມບ້ານ ແລະຈໍານວນນຶ່ງ ກໍເປັນຄົນວຽດນາມ ທີ່ເຂົ້າມາຕັ້ງຖິ່ນຖານ ຕາມຊາຍແດນລາວ ແບບບໍ່ຖືກຕ້ອງຕາມກົດໝາຍ ຊຶ່ງຈະຕ້ອງໄດ້ພິສູດຫລັກຖາມ ໄປຕາມຂັ້ນຕອນ ແລະຕ້ອງໃຊ້ເວລາແດ່ກວ່າຈະຮູ້ຜົລ:

"ພວກເຮົາມັນຢູ່ຕິດກັບຊາຍແດນ ວຽດນາມ ການລັກລອບສ່ວນຫລາຍກໍມັກມີຫັ້ນແຫລະ ມັກເຂົ້າມາພວກເຮົາກໍໄດ້ອາສັຍ ກອງກໍາລັງ ທະຫານ ຊາຍແດນຫັ້ນແຫລະ ຊ່ວຍພວກເຮົາ."

ທ່ານເວົ້າວ່າ ທາງການລາວ ເພີ່ມມາຕການກວດກາ ຢ່າງເຂັ້ມງວດຕາມຊາຍແດນ ໂດຍໃຊ້ກໍາລັງທະຫານ ເພື່ອບໍ່ໃຫ້ຄົນວຽດນາມ ເຂົ້າມາຕັ້ງພູມລໍາເນົາ ແບບຜິດກົດໝາຍ ຢູ່ໃນລາວ ແລະບໍ່ໃຫ້ຄົນລາວໄປຕັ້ງພູມລໍາເນົາ ຢູ່ຝັ່ງວຽດນາມ ແຕ່ກໍຍັງເຮັດ ບໍ່ສໍາເຣັດເທື່ອ ຍ້ອນມີກໍາລັງໜ້ອຍ ບໍ່ສາມາດກວດກາໄດ້ທົ່ວເຖິງທຸກຈຸດ ຕາມແນວຊາຍແດນ ທີ່ຍາວ 100 ປາຍ ກິໂລແມັຕ.

ແຕ່ເຖິງຢ່າງໃດກໍຕາມ ການແກ້ໄຂບັນຫາ ຜູ້ຍົກຍ້າຍພູມລໍາເນົາ ແລະສ້າງຄອບຄົວແບບບໍ່ຖືກຕ້ອງ ຕາມຣະບຽບກົດໝາຍນີ້ ທາງການລາວ ກໍໄດ້ອອກສໍາມະໂນຄົວ ໃຫ້ກຸ່ມຊົນເຜົ່າລາວ ໄດ້ທັງໝົດ 13 ຄອບຄົວ ນັບຕັ້ງແຕ່ປີ 2015 ມາ.

ເຕັມຫນ້າ