ນາງຄໍາພຸດບໍ່ໄດ້ກໍ່ອາຊຍາກັມ

ສົມເນ
2015-07-01
ອີແມວລ໌
ຄໍາເຫັນ
Share
ພິມ
ເຈົ້າໜ້າທີ່ ອົງການ ສິ້ງຊອມ ສິດທິມະນຸດ ກ່າວວ່າ ນາງຄໍາພຸດ ບໍ່ໄດ້ກໍ່ ອາຊຍາກັມ
ເຈົ້າໜ້າທີ່ ອົງການ ສິ້ງຊອມ ສິດທິມະນຸດ ກ່າວວ່າ ນາງຄໍາພຸດ ບໍ່ໄດ້ກໍ່ ອາຊຍາກັມ
HRW

ເຈົ້າໜ້າທີ່ ອົງການ ສິດທິ ມະນຸດ  ກ່າວວ່າ ບໍ່ມີ ເຫດຜົນ ທີ່ ເໝາະສົມ ໃດໆ, ທີ່ຕ້ອງ ກ່າວ ອ້າງວ່າ ການ ກະທໍາ ຂອງ ນາງ ຄໍາພຸດ ມີຕັນ, ຊຶ່ງ ພຽງແຕ່ ຖ່າຍຮູບ ເຈົ້າໜ້າທີ່ ຕໍາຣວດ ທີ່ ສົງໄສ ວ່າ, ຖາມ ເອົາເງິນ ຈາກ ຄົນຂັບຣົດ, ແລ້ວ ໝູ່ ຂອງລາວ ນໍາໄປ ເຜີຍແພ່ ໃນ ສື່ສັງຄົມ ເຟສບຸກ ນັ້ນ, ຖືວ່າ ເປັນ ການກໍ່ ອາຊຍາກັມ. ນາງ ຄວນ ຖືກປ່ອຍ ຕົວ ຈາກຄຸກ ໃນ ທັນທີ. ຕາມ ຄໍາເວົ້າ ຂອງ ທ່ານ Phil Robertson ຮອງ ຜູ້ ອໍານວຍການ ອົງການ ສິ້ງຊອມ ສິດທິ ມະນຸດ ເຂດ ເອເຊັຽ ປາຊິຝິກ, ໃນ ວັນທີ 30 ມີຖຸນາ ນີ້:

"ທ່ານວ່າ, ເປັນໜ້າ ປະຫລາດໃຈ ທີ່ສຸດ ທີ່ ເຈົ້າໜ້າທີ່ ຕໍາຣວດ ໃຊ້ ມາຕການ ຈໍາກັດ ທຸກ ວິທີ ທາງ ຕໍ່ ສິດ ເສຣີພາບ, ໃນການ ສະແດງ ອອກ ເພື່ອ ປົກປິດ ອາຊຍາກັມ ຂອງ ຕົນເອງ ໃນການ ຖາມ ເອົາເງິນ ຈາກ ປະຊາຊົນ ທັມມະດາ ສາມັນ. ຄວາມຈິງ ທີ່ ທາງການ ລາວ ປົກປ້ອງ ພຶດຕິກັມ ຂອງ ເຈົ້າໜ້າທີ່ ຕໍາຣວດ, ສະແດງ ເຖິງ ການ ປາບປາມ ສິດທິ ຂອງ ມະນຸດ ແລະ ຄວາມ ເຊື່ອມຊາມ ດ້ານ ຄຸນນະທັມ ຂອງ ທາງການ. ທ່ານວ່າ, ທາງການ ລາວ ໃຊ້ ການ ນາບຂູ່່ ຈັບຄົນ ເຂົ້າຄຸກ ເພື່ອ ບັງຄັບ ປະຊາຊົນ ບໍ່ ໃຫ້ປາກ ໃຫ້ເວົ້າ ຍ້ອນ ຖ້າວ່າ, ປະຊາຊົນ ສາມາດ ປາກເວົ້າ ໄດ້ ແລະ ບໍ່ມີການ ແກ້ແຄ້ນ ຄືນ, ຕໍ່ໄປ ຈະມີຄົນ ຕໍານິ ຕິຕຽນ ຣັຖບານ ຫຼາຍຂຶ້ນ. ຊຶ່ງ ມັນ ສະແດງ ເຖິງຄວາມ ລົ້ມແຫລວ ຂອງ ຣັຖບານ ໃນການ ປົກປ້ອງ ສິດ ເສຣີພາບ ຂອງ ປະຊາຊົນ".

ທ່ານວ່າ, ທາງການ ລາວ ຢ້ານ ແລະ ກັງວົນ ທີ່ ປະຊາຊົນ ໃຊ້ ອິນເຕີເນັດ ໃນການ ແລກປ່ຽນ ຂ່າວສານ ແລະ ເຜີຍແພ່ ຂໍ້ມູນ ການໃຊ້ ອໍານາດ ເກີນ ຂອບເຂດ ຂອງ ຜູ້ນໍາ ໃນຣະດັບ ສູນກາງ ແລະ ຣະດັບ ແຂວງ.

ເຖິງເວລາ ແລ້ວ ທີ່ ປະເທດ ໃຫ້ການ ຊ່ວຍເຫລືອ ແກ່ ສປປ ລາວ ທັງຫຼາຍ, ຕ້ອງ ອອກມາ ເວົ້າວ່າ, ເກີນພໍ ແລ້ວ ແລະ ຂໍໃຫ້ ຍຸຕິ ການ ຣະເມີດ ສິດທິ ມະນຸດ ແບບເປັນ ຣະບົບ ໃນ ສປປລາວ, ໂດຍ ຮຽກຮ້ອງ ໃຫ້ ຍຸຕິ ການ ປາບປາມ ນາງ ຄໍາພຸດ ແລະ ຄົນອື່ນໆ ອີກ.

ຄວາມ ເປັນມາ ຂອງ ເຣື້ອງນີ້ ກໍຄື: ຕໍາຣວດ ເມືອງພຽງ ແຂວງ ໄຊຍະບູຣີ ຈັບ ນາງ ຄໍາພຸດ ອາຍຸ 26 ປີ ເຂົ້າຄຸກ ຫລັງຈາກ ລາວ ໄດ້ ຖ່າຍຮູບ ເຈົ້າໜ້າທີ່ ຕໍາຣວດ ທີ່ ສົງໄສ ວ່າ ຂົ່ມຂູ່ ເອົາເງິນ ນໍາຄົນ ຂັບຣົດ ເມື່ອວັນທີ່ 21 ພຶສພາ ຜ່ານມາ. ປັດຈຸບັນ ນາງ ຄໍາພຸດ ຍັງຖືກ ຂັງຢູ່.

ເຕັມຫນ້າ