ເຈົ້າເມືອງວ່າຜູ້ຖ່າຍ ວິດິໂອ ນັ້ນມີຄະດີ

ມະນີຈັນ
2020-04-10
ອີແມວລ໌
ຄໍາເຫັນ
Share
ພິມ
ທ່ານ ຄໍາແພງ ເພັດທຸມພອນ ເຈົ້າເມືອງອາດສະພອນ ໄດ້ກ່າວຕໍ່ສື່ມວນຊົນ ວ່າໄດ້ສຶກສາອົບຮົມຜູ້ກ່ຽວຂ້ອງກັບ ການຈັດງານບຸນນັ້ນແລ້ວ ສ່ວນຜູ້ທີ່ເປັນຄົນຖ່າຍທອດສົດນັ້ນ ແມ່ນຈະຖືກດໍາເນີນຄະດີ
ທ່ານ ຄໍາແພງ ເພັດທຸມພອນ ເຈົ້າເມືອງອາດສະພອນ ໄດ້ກ່າວຕໍ່ສື່ມວນຊົນ ວ່າໄດ້ສຶກສາອົບຮົມຜູ້ກ່ຽວຂ້ອງກັບ ການຈັດງານບຸນນັ້ນແລ້ວ ສ່ວນຜູ້ທີ່ເປັນຄົນຖ່າຍທອດສົດນັ້ນ ແມ່ນຈະຖືກດໍາເນີນຄະດີ
ພາບຈາກ : ວີດີໂອ ນັກຂ່າວພົລເມືອງ

ອໍານາດການປົກຄອງ ເມືອງ ອາດສະພອນ ແຂວງສວັນນະເຂດ ໄດ້ສັ່ງໃຫ້ພາກສ່ວນທີ່ກ່ຽວຂ້ອງ ຕິດຕາມໂຕຊາວບ້ານ ທີ່ເປັນຜູ້ຖ່າຍ ວິດິໂອສົດ ຜ່ານທາງເຟສບຸກ ຢູ່ໃນງານບຸນເຂດ ບ້ານໂພໄຊ ເມື່ອວັນທີ 4 ເມສານີ້ ມາດໍາເນີນຄະດີ ຕາມຣະບຽບກົດໝາຍ ຍ້ອນເປັນ ການຣະເມີດສິດທິ ໃນການໃຊ້ສື່ສັງຄົມອອນລາຍ. ຕໍ່ຄໍາສັ່ງດັ່ງກ່າວ ຊາວລາວຈໍານວນນຶ່ງ ບໍ່ເຫັນພ້ອມນໍາ ໂດຍໃຫ້ເຫດຜົລວ່າ ຄວນໄປ ຈັບຜູ້ເປັນ ຕົ້ນຕໍ ອະນຸຍາດ ໃຫ້ຈັດງານ ຈຶ່ງຈະເໝາະສົມກວ່າ, ດັ່ງຊາວບ້ານທ່ານນຶ່ງ ເວົ້າຕໍ່ RFA ໃນມື້ວັນທີ 10 ເມສາ ນີ້ວ່າ:

“ກໍບໍ່ສົມຄວນຫັ້ນແຫລະ ມັນກະຕ້ອງຫາຕົ້ນປາຍສາຍເຫດ ມັນເກີດຂຶ້ນຈາກຫຍັງ ມັນບໍ່ແມ່ນສິມາເອົາຄົນ ທີ່ຖ່າຍຄລິບຊື່ໆ. ເປັນໄປບໍ່ໄດ້ ດອກ ກ່ອນສິເຮັດບຸນໃນຊ່ວງນີ້ ມັນກະຕ້ອງໄດ້ຂໍອະຸຍາດໝົດ. ຄັນຜູ້ໃດອະນຸຍາດ ຜູ້ນັ້ນແຫລະເປັນຄົນຕົ້ນຕໍ ຄິດວ່າຂະເຈົ້າຖ່າຍ ເພື່ອ ຕັກເຕືອນແລ້ວກະແລ້ວສາ ບໍ່ຕ້ອງໄປຄິດວ່າຂະເຈົ້າປະຈານ ປະມານນັ້ນ ສິດີກວ່າ ບໍ່ມີໃຜຜິດດີກວ່າ.”

ແລະຊາວລາວອີກທ່ານນຶ່ງ ກໍເວົ້າວ່າ ການທີ່ຊາວບ້ານຄົນນັ້ນ ຖ່າຍທອດສົດ ກໍເປັນພຽງການຖ່າຍພາບກ່ຽວກັບ ບັນຍາກາດງານມ່ວນຊື່ນ, ບໍ່ໄດ້ມີເນື້ອຫາໂຈມຕີພັກ-ຣັຖ ແລະບໍ່ໄດ້ຂັດກັບຣະບຽບກົດໝາຍ ຄວບຄຸມການໃຊ້ສື່ອອນລາຍແຕ່ຢ່າງໃດ ດັ່ງນັ້ນຈຶ່ງບໍ່ສົມຄວນຖືກຈັບ:

“ບໍ່ຜິດອັນນີ້ນະ ອັນນີ້ຖືກຕ້ອງ ອັນນີ້ໃຊ້ສິດທິເຮົາ. ຖ້າວ່າເຮົາຖ່າຍສະພາບ ທີ່ມັນບໍ່ກ່ຽວກັບກົດໝາຍ ຫລືວ່າກ່ຽວກັບຣັຖ ນີ້ບໍ່ເປັນຫຍັງ. ກົດໝາຍຄຸມທາງສື່ອອນລາຍນີ້ນະ ເຫັນແຕ່ເຂົາລາຍສົດຕລອດ.”   

ກ່ຽວກັບເຣຶ່ອງທີ່ວ່ານີ້ ເຈົ້າໜ້າທີ່ແນວສ້າງຊາດ ທ່ານນຶ່ງ ຊີ້ແຈງວ່າ ການຖ່າຍທອດສົດວິດິໂອ ຜ່ານທາງເຟສບຸກນັ້ນ ທາງການໄດ້ມີຂໍ້ຫ້າມ, ແຕ່ຖ້າບໍ່ເປັນການຖ່າຍທອດ ເຫດການແນວບໍ່ດີ ຫລື ຕໍ່ຕ້ານ ພັກ-ຣັຖ ກໍບໍ່ມີບັນຫາຫຍັງ. ແຕ່ກໍຣະນີທີ່ເກີດຂຶ້ນຢູ່ເມືອງອາດສະພອນ ນັ້ນ ກໍຂຶ້ນຢູ່ກັບການພິຈາຣະນາ ຂອງເຈົ້າໜ້າທີ່ກ່ຽວຂ້ອງ ດັ່ງທີ່ທ່ານກ່າວວ່າ:

“ມັນກະບໍ່ມີບັນຫາຫຍັງດອກ ເພິ່ນກະບໍ່ມີການຈໍາກັດຫຍັງ ອັນນີ້ກະຖືວ່າການລົງຂ່າວ ຖ່າຍທອດສົດຫຍັງຄັນຖ້າວ່າ ມີຄວາມຈິງກະບໍ່ໄດ້ ຫ້າມຫຍັງດອກ.”

ກ່ອນໜ້ານີ້ ທ່ານ ຄໍາແພງ ເພັດທຸມພອນ ເຈົ້າເມືອງອາດສະພອນ ໄດ້ກ່າວຕໍ່ສື່ມວນຊົນທາງການລາວ ກ່ຽວກັບການແກ້ໄຂບັນຫາດັ່ງກ່າວ ວ່າໄດ້ສຶກສາອົບຮົມຜູ້ກ່ຽວຂ້ອງ ກັບການຈັດງານບຸນນັ້ນແລ້ວ. ສ່ວນຜູ້ທີ່ເປັນຄົນຖ່າຍທອດສົດນັ້ນ ແມ່ນຈະຖືກດໍາເນີນຄະດີ:

“ເວລາປະມານ 22 ໂມງ ທາງເຈົ້າໜ້າທີ່ໄດ້ຮັບການຣາຍງານ ວ່າມີການຊຸມນຸມກັນ ແລະເປີດເຄື່ອງສຽງເນືອງນອງ ສ່ວນບຸກຄົນທີ່ໄດ້ເຜີຍ ແຜ່ພາບສົດຜ່ານສື່ສັງຄົມອອນລາຍ ແມ່ນໄດ້ມອບໃຫ້ເຈົ້າໜ້າທີ່ ປກສ ເມືອງ ເຊີນເອົາຜູ້ກ່ຽວມາເພື່ອດໍາເນີນ ຄະດີຕາມຣະບຽບກົດໝາຍ.”

ເພື່ອຄວາມກະຈ່າງແຈ້ງ ກ່ຽວກັບກໍຣະນີ ທີ່ວ່ານີ້ RFA ໄດ້ພຍາຍາມຕິດຕໍ່ ຫາເຈົ້າໜ້າທີ່ອໍານາດການປົກຄອງ ເມືອງອາດສະພອນ ແລະ ເຈົ້າໜ້າທີ່ຕໍາຣວດປ້ອງກັນ ຄວາມສງົບ ເມືອງອາດສະພອນ, ແຕ່ພວກເພິ່ນບໍ່ສະດວກ ທີ່ຈະໃຫ້ຄໍາເຫັນ.

ແຕ່ເຖິງຢ່າງໃດກໍຕາມ ຄໍາຊີ້ແຈງ ຂອງເຈົ້າເມືອງອາດສະພອນ ກ່ຽວກັບຜູ້ໃຊ້ສື່ອອນລາຍ ນັ້ນຫຼາຍຄົນບໍ່ເຫັນພ້ອມນໍາ ຍ້ອນຜູ້ກ່ຽວບໍ່ໄດ້ ຮັດຫຍັງຜິດ ຕໍ່ຣະບຽບກົດໝາຍແນວໃດ, ຄວນດໍາເນີນ ຄະດີ ຜູ້ຈັດງານ ທີ່ເຮັດໃຫ້ມີຄວາມສ່ຽງ ຕໍ່ການແຜ່ຣະບາດຂອງ ໂຄວິດ-19 ນັ້ນຫລາຍກວ່າ ເພາະເປັນການຝ່າຝືນຄໍາສັ່ງ ຂອງນາຍົກຣັຖມົນຕຣີ.

ເຕັມຫນ້າ