ນັກສຶກສາລາວໂຕນໜີ ກັບມາ ລາວ

ສິດນີ
2020-08-10
ອີແມວລ໌
ຄໍາເຫັນ
Share
ພິມ
ທີ່ດ່ານສາກົລນໍ້າພາວ ເມືອງຄໍາເກີດ ແຂວງບໍລິຄໍາໄຊ ນັກສຶກສາລາວ ຕຽມອອກເດີນໄປວຽດນາມ ໃນວັນທີ 17 ມິຖຸນາ 2020 ຫຼັງຈາກ ຣັຖບານວຽດນາມ ປະກາດວ່າບໍ່ມີການຣະບາດ ຂອງ ເຊື້ອພຍາດໂຄວິດ-19
ທີ່ດ່ານສາກົລນໍ້າພາວ ເມືອງຄໍາເກີດ ແຂວງບໍລິຄໍາໄຊ ນັກສຶກສາລາວ ຕຽມອອກເດີນໄປວຽດນາມ ໃນວັນທີ 17 ມິຖຸນາ 2020 ຫຼັງຈາກ ຣັຖບານວຽດນາມ ປະກາດວ່າບໍ່ມີການຣະບາດ ຂອງ ເຊື້ອພຍາດໂຄວິດ-19
ນັກຂ່າວພົລເມືອງ

ນັກສຶກສາລາວ ຢູ່ວຽດນາມ 54 ຄົນ ໂຕນຫນີຈາກຫໍພັກ ກັບຄືນເຂົ້າມາລາວ ຍ້ອນການຣະບາດຂອງ ໂຄວິດ-19 ຮອບໃຫມ່ ໃນວຽດນາມ ແລະ ກໍເປັນຕອນປິດເທີມແລ້ວ.

ທາງການລາວໄດ້ກວດການັກສຶກສາລາວ ຈາກວຽດນາມ ຈຳນວນ 54 ຄົນ ກໍຣະນີໂຕນຫນີ ອອກຈາກຫໍພັກ ວິທຍາລັຍແພດສາດ ຢູ່ເມືອງ ດົງຫ່າ ແຂວງກວາງຈີ ປະເທດວຽດນາມ ເບື້ອງຕົ້ນບໍ່ພົບເຫັນຜູ້ໃດຕິດໂຣຄ ໂຄວິດ-19 ແຕ່ກໍໄດ້ກັກໂຕ 14 ວັນ ຕາມມາການເຝົ້າຣະວັງ. ເຈົ້າຫນ້າທີ່ສູນກັກໂຕ ຢູ່ນະຄອນ ໄກສອນ ພົມວິຫານ ແຂວງສວັນນະເຂດ ທ່ານນຶ່ງ ກ່າວຕໍ່ ເອເຊັຽ ເສຣີ ໃນວັນທີ 10 ສິງຫາ ນີ້ວ່າ:

“ກະໄດ້ເອົາເຂົ້າມາສູນ ກັກກັນຢູ່ສູນ ແມ່ນ, ກະຕ້ອງເອົາມາກວດ ຄົນລາວນີ້ເດ ບໍ່ແມ່ນຄົນວຽດນາມ ຜ່ານຜົລກວດແລ້ວ ບໍ່ມີ, ບໍ່ມີເຊື້ອ ຫລັງຈາກ 14 ວັນ ແລ້ວກະປ່ອຍ ກະອອກມາ ປົກກະຕິ.”

ນັກສຶກສາລາວຈາກວຽດນາມຜູ້ນຶ່ງ ກ່າວວ່າຫວ່າງວັນທີ 8 ເດືອນສິງຫາ ຜ່ານມາ ເຈົ້າຫນ້າທີ່ໄດ້ເອີ້ນນັກສຶກສາ ທັງຫມົດໄປຣາຍງານໂຕ ຢູ່ສູນກັກກັນ ຫລັກ 4 ນະຄອນໄກສອນ ພົມວິຫານ ສ່ວນໃຫຍ່ ເປັນນັກສຶກສາ ຢູ່ ແຂວງສວັນນະເຂດ ຮອງລົງມາແມ່ນ ແຂວງຄຳມ່ວນ ແລະ ແຂວງສາຣະວັນ ຊຶຶ່ງຖືກກັກໂຕຢູຸ່ທີ່ນັ້ນ ແຕ່ບໍ່ມີຜູ້ໃດຕິດເຊື້້ອ ໂຄວິດ-19, ສຳລັບ ນັກສຶກສາຈາກແຂວງສວັນນະເຂດ ກໍປ່ອຍໃຫ້ ກັບບ້ານ ແລະ ກັກໂຕຢູ່ບ້ານ ບໍ່ໃຫ້ອອກໄປໃສ.

“ມື້ຊືນນີ້ ທາງຜແນກເອີ້ນນ້ອງຈຳນວນທັງຫມົດມາ ໄດ້ເກືອບເດືອນແລ້ວ ເຂົ້າໄປຢູ່ຫລັກ 4 ບ່ອນກັກໂຕກວດສຸຂພາບໃຫ້ ແລະ ເພີ່ນກະ ມາເບິ່ງຕິດຕາມພວກນ້ອງເປັນແນວໃດ ພວກນ້ອງ ບໍ່ໄດ້ຕິດເຊື້ອອີ່ຫຍັງ ເພີ່ນກະອະນຸຍາດ ໃຫ້ເມືອ ແຕ່ພາຍໃນ 28 ມື້ ບໍ່ໃຫ້ໃກ້ໃຜເລີຍ ໃຫ້ຢູ່ສ່ວນໂຕຫັ້ນນ່າ."

ນາງວ່າ ພວກເຮົານັກຮຽນພາກັນກັບບ້່ານ ຍ້ອນເສັງແລ້ວ ປິດເທີມ ກໍຢາກກັບມາບ້ານຫາຄອບຄົວ ກໍໄດ້ຂໍຫນັງສືເດີນທາງ ຈາກໂຮງຮຽນ ແຕ່ທາງໂຮງຮຽນບໍ່ໃຫ້ ແລະ ໄດ້ເຮັດເອກສານ ເຖິງກົງສູນລາວ ແຕ່ໄດ້ຄຳຕອບວ່າ ທາງການບໍ່ອະນຸຍາດ ໃຫ້ກັບເຂົ້າລາວ ຍ້ອນດ່ານ ສາກົນຍັງປິດຢູຸ່.

“ໂຮງຮຽນນ້ອງໄດ້ພັກແລ້ວ ເພີ່ນບໍ່ໃຫ້ມາ ກົງສູນລາວຫັ້ນກໍບໍ່ຍອມຮັບ ພວກນ້ອງກະເລີຍລັກເຂົ້າມາ ກັບມາປະມານວັນທີ 16 ບໍ່ມີອັນໃດ ເລີຍຂີ່ຣົດຈັກຂ້າມ ລື້ງຄົນແຖວນັ້ນ ໃກ້ດ່ານກໍມີ ການກວດອຸນນະພູມ ພວກນ້່ອງກະກວດທຸກຄົນ ເຂົາກະໃຫ້ຜ່ານ ເຂົາກະບໍ່ຮູ້ວ່າພວກ ນ້ອງລັກມາ ເພາະວ່າ ຄັນຄົນແຖວນັ້ນຫັ້ນ ເຂົ້າມາກິິນເຂົ້າກິນນ້ຳ ຕາມຊາຍແດນ ແມ່ນຜ່ານໄປໄດ້ ຕາມປົກກະຕິ."

ນາງກ່າວຕື່ມວ່າ ປັດຈຸບັນ ໂຣຄໂຄວິີດ-19 ໄດ້ຣະບາດຢູ່ເມືອງດົງຫ່າ ທາງໂຮງຮຽນກໍໂທມາຫາ ບອກວ່າ ບໍ່ຕ້ອງກັບໄປວຽດນາມເທື່ອ ເພາະທາງການໄດ້ປິດເມືອງແລ້ວ ແລະ ຫ້າມ ນັກສຶກສາ ທີ່ຍັງຄ້າງຢູ່ປະມານ 40 ຄົນ ບໍ່ໃຫ້ອອກຈາກຫໍພັກ ເພື່ອປ້ອງກັນການຕິດເຊື້ອ ໂຄວິດ-19 ເບື້ອງຕົ້ນເຈົ້າຫນ້າທີ່ລາວ ບອກວ່າ ຈະຊ່ອຍຜູ້ທີ່ຍັງຄ້າງຢູ່ ກັບຄືນມາລາວ ແຕ່ຕ້ອງ ເບີ່ງຕາມສະຖານະການ ຢູ່ວຽດນາມ ແລະຄວາມເຫມາະສົມກ່ອນ.

ກົງສູນໃຫຍ່ ສປປລາວ ປະຈຳເມືອງດານັງ ປະເທດວຽດນາມ ໄດ້ແຈ້ງໃຫ້ກະຊວງຕ່າງປະເທດລາວ ຮັບຮູ້ກ່ຽວກັບນັກສຶກສາລາວ 54 ຄົນ ຈາກວິທຍາລັຍແພດສາດ ເມືອງດົງຫ່າ ແຂວງ ກວາງຈີ ໂຕນຫນີຈາກຫໍພັກກັບຄືນມາລາວ ໃນນັ້ນ 39 ຄົນ ບໍ່ມີຫນັງສືເດີນທາງ ສ່ວນທີ່ ເຫລືອ 15 ຄົນ ມີໜັງສືເດີນທາງ ສ່ວນໃຫຍ່ເປັນນັກສຶກສາ ຈາກ ແຂວງສວັນນະເຂດ ຄຳມ່ວນ ແລະ ສາຣະວັນ ທາງການລາວ ກໍໄດ້ ຮັບຮູ້ ແລະ ລົງກວດກາກ່ຽວກັບເຣື້ອງນີ້.

“ແມ່ນລະເພິ່ນຣາຍງານມາແລ້ວ ມີຣາຍຊື່ເຂົາເຈົ້າຢູຸ່ສວັນນະເຂດເນາະ ອັນນີ້ ເຮົາຍັງບໍ່ຮູ້ນະ ເພາະເຮົາມີຄະນະສະເພາະກິດ ຕ່າງຫາກ ດຽວນີ້ ເພິ່ນກະຣາຍງານໃຫ້ຂັ້ນເທິງ.”

ໄລຍະຜ່ານມາ ຫວ່າງວັນທີ 9 ເດືອນເມສາ  ກໍມີນັກສຶກສາລາວຈາກ ວຽດນາມ ຈຳນວນ 115 ຄົນ ຫນີຈາກຫໍພັກ ກັບມາລາວ ຊຶ່ງໃນ ເວລານັ້ນເປັນຊ່ວງການຣະບາດຂອງ ໂຣຄໂຄວິດ-19 ຢ່າງຫນັກ ໂດຍບໍ່ມີການກັກໂຕ ແຕ່ຈາກການກວດກາ ບໍ່ມີຜູ້ໃດຕິດເຊື້ອໂຄວິດ-19 ໃນກຸ່ມນັກສຶກສາ ກັບບ້ານໃນເວລານັ້ນ.

ປັດຈຸຸບັນ ວຽດນາມກຳລັງປະເຊີນກັບການຣະບາດຂອງໂຣຄ ໂຄວິດ-19 ຮອບສອງໃນຫລາຍເມືອງ ຊື່ງທາງການວຽດນາມ ຍັງບໍ່ຮູ້ສາເຫດ ວ່າມາຈາກໃສ ມີແຕ່ຮູ້ວ່າເມືອງດານັງ ເປັນ ສູນກາງການຣະບາດ ແລະ ມີຜູຸ້ຕິດເຊື້ອຣາຍໃຫມ່ ມີຜູ້ເສັຍຊິວິດຣາຍແຣກ ຈາກວັນທີ 31 ກໍຣະກະດາ ຮວມສອງອາທີດ 10 ສົບ ເຈົ້າຫນ້າທີ່ວຽດນາມ ໄດ້່ປິດເມືອງດານັງ ເມືອງດົງຫ່າ ແລະ ເມືອງອື່ນໆໃກ້ຄຽງ.

ສ່ວນທາງການລາວ ຍັງປິດດ່ານສາກົນ ແລະ ຮ້ານບັນເທີງ ທຸກແຫ່ງທົ່ວປະເທດຢູ່ ທ່ານ ທອງລູນ ສີສຸລິດ ນາຍົກຣັຖມົນຕຣີລາວ ຍັງເນັ້ນໃຫ້ ຄະນະສະເພາະກິດ ຄວບຄຸມປ້ອງກັນ ແກ້ໄຂການແຜ່ຣະບາດ ຂອງ ໂຣຄໂຄວິດ-19 ແລະ ເຂັ້ມງວດການ ເຂົ້່າ-ອອກ ປະເທດ ຂອງຄົນລາວ ແລະ ຄົນຕ່າງຊາດ, ຖ້າພົບເຫັນກໍຣະນີ ຄົນລັກເຂົ້າເມືອງ ແບບບໍ່ຖືກຕ້ອງ ກໍໄດ້ນຳໂຕໄປກວດຫາເຊື້ອ ແລ້ວ ກັກບໍຣິເວນ 14 ມື້ ໃນສູນກັກໂຕ ທີ່ທາງການຈັດໃຫ້ ຫລັງຈາກນັ້ນ ຈື່ງປ່ອຍໂຕອອກໄປໄດ້.

ເຕັມຫນ້າ