ປ້າຍໂຄສະນາພາສາຈີນ ຖືກຖອນ

ມະນີຈັນ
2020-06-05
ອີແມວລ໌
ຄໍາເຫັນ
Share
ພິມ
ທາງຫ້ອງການ ເມືອງຕົ້ນເຜິ້ງ ແຂວງບໍ່ແກ້ວ ໄດ້ອອກໄປຕາມ ຮ້ານຄ້າຮ້ານຂາຍ ເພື່ອ ຮື້ຖອນປ້າຍໂຄສະນາ ທີ່ເປັນພາສາຈີນ ພາສາລາວ ເກືອບບໍ່ມີ
ທາງຫ້ອງການ ເມືອງຕົ້ນເຜິ້ງ ແຂວງບໍ່ແກ້ວ ໄດ້ອອກໄປຕາມ ຮ້ານຄ້າຮ້ານຂາຍ ເພື່ອ ຮື້ຖອນປ້າຍໂຄສະນາ ທີ່ເປັນພາສາຈີນ ພາສາລາວ ເກືອບບໍ່ມີ
ນັກຂ່າວພົລເມືອງ

ເມື່ອວັນທີ 3 ມິຖຸນາ ນີ້ທາງການເມືອງຕົ້ນເຜິ້ງ ແຂວງບໍ່ແກ້ວ ໄດ້ເລີ່ມລົງພື້ນທີ່ ຮື້ຖອນປ້າຍໂຄສະນາ ເປັນພາສາຈີນ ທີ່ບໍ່ຖືກຕ້ອງຕາມກົດ ຣະບຽບທັງພາຍໃນເຂດເມືອງຕົ້ນເຜິ້ງ ແລະຢູ່ໃກ້ເຂດເສຖກິດພິເສດ ສາມຫລ່ຽມຄໍາ. ປ້າຍທີ່ວ່ານັ້ນ ສ່ວນໃຫຍ່ ເປັນປ້າຍໂຄສະນາ, ປ້າຍ ໂຮງແຮມ ເຮືອນພັກ ຮ້ານອາຫານ ທີ່ຂຽນພາສາຈີນ ຢູ່ເທິງ ແຕ່ຂຽນພາສາລາວຢູ່ລຸ່ມ ແລະປ້າຍທີ່ຂຽນເປັນພາສາຈີນ ໃຫຍ່ກວ່າພາສາລາວ.

ການຮື້ຖອນປ້າຍເຫລົ່ານັ້ນ ເຮັດໃຫ້ຊາວເມືອງຕົ້ນເຜິ້ງ ຫລາຍໆຄົນຮູ້ສຶກດີໃຈ ເພາະເປັນການເໝາະສົມກັບ ຄວາມເປັນປະເທດລາວ, ດັ່ງ ຊາວເມືອງຕົ້ນເຜິ້ງ ທ່ານນຶ່ງກ່າວຕໍ່ RFA ໃນມື້ວັນທີ 5 ມິຖຸນານີ້ ວ່າ:

“ອັນນີ້ມັນເປັນປະເທດລາວ ຕາມຄວາມໝາຍຕາມຄວາມເຂົ້າໃຈ ຕາມຄໍາອິທິບາຍ ເພິ່ນກໍຕ້ອງເອົາໜັງສືລາວ ຂຶ້ນກ່ອນ ແລ້ວກໍເອົາໜັງສື ຈີນ ຕາມໄປຫັ້ນເດ໋. ເຂົາຢ້ານເປັນປະເທສຈີນຫັ້ນນະ ເພາະມີບ່ອນອື່ນ ຂະເຈົ້າ ກະມາຕິວ່າເມືອງລາວ ແທ້ໆ ຄືຂຽນໂຕໜັງສືຈີນໝົດ ກົດຣະບຽບເພິ່ນບອກ ແຕ່ດົນແລ້ວ.”

ຊາວເມືອງຕົ້ນເຜິ້ງ ອີກທ່ານນຶ່ງເວົ້າວ່າ ຕົນຮູ້ສຶກເຫັນດີນໍາ ການປະຕິບັດ ມາຕການດັ່ງກ່າວ ຂອງທາງການ ຍ້ອນທີ່ຜ່ານມາ ເຫັນຮ້ານ ທຸຣະກິດຂອງຄົນຈີນ ຫລາຍໆຮ້ານ ຂຽນປ້າຍຊື່ຮ້ານ ເປັນພາສາຈີນ ໂຕໃຫຍ່ ແລະ ຂຽນພາສາລາວ ໂຕນ້ອຍໆ ຊຶ່ງພວກເຈົ້າຂອງຮ້ານ ຕ້ອງໄດ້ເຮັດປ້າຍຮ້ານໃໝ່ ຕາມຄໍາຊີ້ນໍາຂອງທາງການ:

“ເພິ່ນຢາກໃຫ້ເອົາພາສາລາວ ຂຶ້ນເທິງເນາະ ເອົາພາສາຈີນໄວ້ທາງກ້ອງເນາະ ເພາະວ່າເຈົ້າມາເຮັດທຸຣະກິດ ຢູ່ຝັ່ງລາວ ຢູ່ໃສກະຕ້ອງ ປະຕິບັດ ຕາມຣະບຽບຂອງປະເທສນັ້ນໆກໍ້ ຕາມຄິດເບິ່ງວ່າກະແມ່ນ ເໝາະສົມແລ້ວ ເພາະວ່າສ່ວນຫລາຍ ແມ່ນມັນເອົາພາສາຈີນ ໂຕບັກໃຫຍ່ຂຶ້ນເລີຍ.”

ຜູ້ປະກອບການເຮືອນພັກ ແຫ່ງນຶ່ງ ຢູ່ເມືອງຕົ້ນເຜິ້ງ ເວົ້າວ່າ ປ້າຍເຮືອນພັກຂອງຕົນ ບໍ່ໄດ້ຖືກຮື້ຖອນ ຍ້ອນເຮັດປ້າຍເປັນພາສາລາວ ກັບ ພາສາອັງກິດ. ສ່ວນຮ້ານອື່ນໆທີ່ຖືກເຈົ້າໜ້າທີ່ ຮື້ຖອນນັ້ນ ກໍເຫັນວ່າ ເໝາະສົມແລ້ວ ເພື່ອເຮັດໃຫ້ຖືກ ກົດຣະບຽບ ຂອງລາວ:

“ບໍ່ ຂອງເອື້ອຍແມ່ນພາສາລາວ ກັບພາສາ ອັງກິດ. ຂະເຈົ້າໃຫ້ເອົາ ພາສາລາວ ຂຶ້ນເທິງນະ ພາສາລາວຂຶ້ນເທິງກ່ອນ ແລ້ວກໍພາສາຈີນ ຈະຕ້ອງ ນ້ອຍກວ່າພາສາລາວ ພາສາລາວ ຕ້ອງໃຫຍ່ກວ່າ, ຖ້າວ່າໂຕ ໜັງສືຈີນຢ່າງດຽວ ຖືກຮື້ຖອນອອກ.”

ຜູ້ປະກອບການ ຮ້ານບັນເທີງແຫ່ງນຶ່ງທີ່ຖືກຮື້ຖອນ ປ້າຍໜ້າຮ້ານອອກ ກໍຮູ້ສຶກເສັຽໃຈ ທີ່ເຈົ້າໜ້າທີ່ ບໍ່ໄດ້ມາຊີ້ແຈງ ກ່ອນລ່ວງໜ້າເລີຍ ແລະ ຮູ້ສຶກກັງວົນວ່າ ຄັນເຮັດປ້າຍໃໝ່ແລ້ວ ອາຈເຮັດໃຫ້ມີລູກຄ້າຄົນຈີນ ໜ້ອຍລົງ ເນື່ອງຈາກຕໍ່ໄປ ຄົນຈີນອາຈເບິ່ງຊື່ຮ້ານໄດ້ ບໍ່ແຈ້ງ:

“ຂ້ອຍກະບໍ່ຮູ້ແຫລະ ເຂົາບໍ່ໄດ້ແຈ້ງບໍ່ໄດ້ຫຍັງ ມີແຕ່ເຂົ້າມາຖອນ ແບບເສິກໄປເລີຍ ບໍ່ໄດ້ມີແຈ້ງການແມ່ນຫຍັງ ກະຮູ້ສຶກເສັຽໃຈແຫລະເນາະ ເພາະວ່າ ທາງປ້າຍຮ້ານຂອງຂ້ອຍນີ໊ ໄດ້ໄປເສັຽທໍານຽມແມ່ນຫຍັງ ໄປຖາມທໍານຽມ ແມ່ນຫຍັງຮຽບຮ້ອຍດອກ ຂ້ອຍຈຶ່ງມາຕັ້ງສ້າງນະເຮົາ ກະຕ້ອງຮັບແຂກ ເປັນຄົນຈີນທັມດາ ຖ້າມາຖອນແບບນີ້ ຂະເຈົ້າກະຕ້ອງບໍ່ຮູ້ແຫລະເນາະ.”

ກ່ຽວກັບເຣື່ອງນີ້ ເຈົ້າໜ້າທີ່ໃນຄະນະຮັບຜິດຊອບ ການຮື້ຖອນປ້າຍ ຊີ້ແຈງຕໍ່ RFA ວ່າໃນໄລຍະຜ່ານມາ ທາງການໄດ້ປະຕິບັດມາຕການ ນັ້ນມາແລ້ວ 3-4 ເທື່ອ ແຕ່ກໍຍັງມີ ຜູ້ປະກອບການ ຫລາຍໆຄົນທີ່ເຮັດ ປ້າຍຂຶ້ນໃໝ່ ໂດຍບໍ່ຜ່ານທາງການ ເຈົ້າໜ້າທີ່ ຈຶ່ງຕ້ອງມາຮື້ ຖອນຕື່ມ ແລະ ກໍຈະປະຕິບັດຕໍ່ໄປ ຈົນກວ່າຈະໝົດ ທຸກບ່ອນ, ທ່ານກ່າວ:

“ໄລຍະຜ່ານມານີ໋ ພວກເຮົາໄດ້ຮື້ຖອນ 3-4 ເທື່ອແລ້ວ ແຕ່ວ່າຜູ້ປະກອບການຕ່າງໆ ທີ່ເຂົາເຮັດປ້າຍຂຶ້ນມາຫັ້ນ ມັນບໍ່ໄດ້ຜ່ານຂແນງການ ຂອງເຮົາ. ປ້າຍທີ່ບໍ່ຖືກ ຕາມຣະບຽບ ໂຕນີ້ ຂອງຕ່າງປະເທດນີ໊ ມັນໃຫຍ່ກວ່າ ໜັງສືລາວ ແລ້ວກໍຢູ່ເທິງ ຕາມຣະບຽບມັນນີ໋ ໂຕໜັງສືລາວ ຕ້ອງຢູ່ເທິງກ່ອນໜັງສື ຕ່າງປະເທສ ຕ້ອງໃຫຍ່ກວ່າ 3 ສ່ວນ 2 ຂອງຕ່າງປະເທດ.”

ທ່ານກ່າວອີກວ່າ ຫລັງຈາກການກວດກາ ແລະຮື້ຖອນປ້າຍອອກ ໃນເທື່ອນີ້ແລ້ວ ຫາກຍັງກວດພົບວ່າ ຮ້ານໃດເຮັດປ້າຍຂຶ້ນມາໃໝ່ ແຕ່ຍັງຜິດກົດຣະບຽບ ຂອງທາງການຢູ່ ກໍຈະປັບໃໝ 5 ລ້ານກີບ ພ້ອມທັງ ຮື້ຖອນປ້າຍອອກ ແລະ ຫາກຍັງເຮັດຜິດຣະບຽບ ຕື່ມອີກ ກໍຈະຖືກປັບໃໝເພີ່ມເປັນ 2 ເທົ່າ.

ເມື່ອວັນທີ 3 ຕຸລາປີ 2019 ທາງການເມືອງຕົ້ນເຜິ້ງ ໄດ້ຮື້ຖອນປ້າຍໂຄສະນາ ທີ່ບໍ່ຖືກຣະບຽບຈໍານວນ 62 ປ້າຍ ຫລັງຈາກໄດ້ແຈ້ງເຕືອນ ໄປຫາຜູ້ປະກອບການຕ່າງໆ ເມື່ອເດືອນມົກຣາ ເພື່ອໃຫ້ແກ້ໄຂປ້າຍ ຢ່າງຖືກຕ້ອງ.

ຄໍາເຫັນ (1)
Share

LaoGuy

That how you do it and I absolutely agree with the authorities. Laos should better yet, partner with USA as far as the securities of the country and of its people concerns. USA will help leveraging with China in Laos otherwise China will keep taking advantage of Laos.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 10, 2020 07:23 PM

ເຕັມຫນ້າ