3 ຍິງສາວເຜົ່າມົ້ງ ຫາຍສາບສູນ

ສຸພັດຕາ
2020-08-27
ອີແມວລ໌
ຄໍາເຫັນ
Share
ພິມ
ເມືອງໂພນສວັນ ແຂວງຊຽງຂວາງ
ເມືອງໂພນສວັນ ແຂວງຊຽງຂວາງ
ນັກຂ່າວພົລເມືອງ

ຍິງສາວຊົນເຜົ່າມົ້ງ 3 ຄົນຢູ່ບ້ານນໍ້າກະ ເມືອງຜາໄຊ ແຂວງຊຽງຂວາງ ໄດ້ຫາຍສາບສູນແຕ່ວັນທີ 13 ສິງຫາ 2020 ຊຶ່ງໃນມື້ນັ້ນ ຍິງສາວ ທັງ 3 ຄົນ ໄດ້ໄປຢ້ຽມຢາມແມ່ເຖົ້າ ຢູ່ບ້ານ ໂພນສະຫວັນ, ເມືອງແປກ ແຂວງຊຽງຂວາງ. ຈາກນັ້ນໃນເວລາຕອນເຊົ້າ ພວກນາງ ກໍບອກ ແມ່ເຖົ້າວ່າ ຈະອອກໄປຕລາດ ແລ້ວກໍຫາຍສາບສູນ ໄປເລີຍ ບໍ່ເຫັນກັບມາເຮືອນ, ເຊິ່ງທາງ ຄອບຄົວກໍເປັນຫ່ວງຫຼາຍ ຢ້ານວ່າຈະຖືກຕົວະ ໄປຂາຍຢູ່ຈີນ ເພາະທີ່ຜ່ານມາ ເຄີຍເຫັນຂ່າວ ວ່າມີແມ່ຍິງຊົນເຜົ່າມົ້ງ ຖືກຕົວະໄປຈີນ ຈໍານວນຫຼາຍ, ອີງຕາມຄວາມເວົ້າ ຂອງຜູ້ເປັນພໍ່ ທີ່ມີ ລູກສາວ 1 ໃນຈໍານວນ 3 ຄົນ ທີ່ຫາຍສາບສູນ ຕໍ່ວິທຍຸເອເຊັຽເສຣີ ໃນວັນທີ 26 ສິງຫາ ນີ້ວ່າ:

“ຍັງບໍ່ເຫັນ ບໍ່ໄດ້ຕິດຕໍ່ທາງພໍ່ແມ່ ຍາດພີ່ນ້ອງເລີຍເດີ້ ກ່ອນຈະຫາຍ ມັນໄດ້ຂໍແມ່ເຖົ້າ ວ່າໄປຕລາດ ແລ້ວ 3 ເອື້ອຍນ້ອງລະວ່າ ໄດ້ຍ່າງໄປ ໄປແນວໃດກໍບໍ່ເຫັນກັບມາ ເຮົາຢ້ານເຂົາຈະ ເອົາໄປຂາຍໃຫ້ຈີນນີ້ແຫຼະ ຈີນນີ້ ມັນມັກຊື້ຂາຍຄົນເດ້ ຕາມທີ່ຜ່ານມາ ຄົນເຄີຍເສັຍຫາຍນີ້ ແມ່ນສ່ວນຫຼາຍນີ້ ແມ່ນໄປຂາຍໃຫ້ຈີນ.”

ຜູ້ເປັນພໍ່ ກ່າວຕື່ມວ່່່າ ທັງ 3 ຄົນ ທີ່ຫາຍສາບສູນ ນີ້ ພວກນາງ ມີຊື່ວ່າ: 1- ນາງ ປ່າເຫີ່ ອາຍຸ 17 ປີ, 2- ນາງເຢັ້ງຢ່າງ ອາຍຸ 16 ປີ ແລະ 3- ນາງ ຍື້ວ່າງ ອາຍຸ 15 ປີ.

ພວກນາງຮຽນໜັງສື ຢູ່ຊັ້ນ ມໍ 5, ມໍ 6 ຢູ່ໂຮງຮຽນ ເມືອງຜາໄຊ, ແຂວງຊຽງຂວາງ ທັງສາມຄົນ ເປັນຍາດພີ່ນ້ອງກັນ, ເປັນຄົນໜ້າຕາດີ ຢ້ານວ່າມີ ຄົນບໍ່ດີ ມາຕົວະຍົວະໄປ ກໍເປັນໄດ້, ຊຶ່ງໃນເບື້ອງຕົ້ນທາງຄອບຄົວ ກໍບໍ່ຮູ້ວ່າຈະຕິດຕາມຫາແນວໃດ, ແຕ່ໄດ້ໄປແຈ້ງ ເຈົ້າໜ້າທີ່ ຕໍາຣວດ ຢູ່ເມືອງຜາໄຊ ແລ້ວ, ຜ່ານໄປຫຼາຍມື້ ກໍຍັງບໍ່ມີຂ່າວຄາວ ຄວາມຄືບໜ້າ ໃນການຕິດຕາມ ຊອກຫາລູກຫຼານ ທັງສາມຄົນນີ້ເລີຍ.

ກ່ຽວກັບເຣື້ອງນີ້ ເອເຊັຽເສຣີ ໄດ້ຕິດຕໍ່ໄປຫາ ປກສ ເມືອງຜາໄຊ ແຕ່ຍັງບໍ່ສາມາດຕິດຕໍ່ໄດ້ ເພາະບໍ່ມີໃຜຮັບ ໂທຣະສັບ ຈຶ່ງໄດ້ຕິດຕໍ່ໄປຫາ ປກສ ເມືອງແປກ ເຈົ້າໜ້າທີ່ຕໍາຣວດ ບອກວ່າ ຍັງບໍ່ຮູ້ຂໍ້ມູນ ເພາະບໍ່ມີໃຜມາແຈ້ງຄົນ ຫາຍເທື່ອ:

“ໂຕນີ້ຍັງບໍ່ຮູ້ເດີ້ ຍັງບໍ່ມີຄົນມາແຈ້ງ ຈຸດປະຈໍາການ ອັນນີ້ມີແຕ່ວ່າໃຫ້ຜູ້ຖືກເສັຍຫາຍຫັ້ນເນາະ ຫຼືວ່າເປັນຜູ້ປົກຄອງຕ່າງໆຫັ່ນ ເຂົ້າມາແຈ້ງ ຄວາມເບິ່ງ.”

ຂນະທີ່ ເຈົ້າໜ້າທີ່ສະຫະພັນແມ່ຍິງ ທີ່ເບິ່ງແຍງກ່ຽວກັບວຽກງານ ປົກປ້ອງແມ່ຍິງ ໃນການຖືກຄ້າມະນຸດ ທ່ານນຶ່ງ ກ່າວວ່າ ຍັງບໍ່ຮູ້ຂໍ້ມູນ ຍ້ອນບໍ່ມີຜູ້ໃດ ແຈ້ງເຣື່ອງດັ່ງກ່າວມາເທື່ອ ແລະ ຈາກນີ້ ກໍຈະປະສານຫາໜ່ວຍງານ ທີ່ກ່ຽວຂ້ອງ ແລະ ຄອບຄົວຂອງແມ່ຍິງທັງ 3 ຄົນ ທີ່ຫາຍສາບສູນໄປນັ້ນ ເພື່ອຊ່ອຍຕາມຫາ, ດັ່ງທ່ານກ່າວວ່າ:

“ກະຍັງບໍ່ທັນຮູ້ ແລະກໍຍັງບໍ່ທັນໄດ້ເຫັນຂ່າວ ກະຍັງບໍ່ທັນໄດ້ແຈ້ງເນາະ ພວກເຮົາຈະລອງຖາມເບິ່ງ ເພາະວ່າພວກເຮົາກະມີຫຼາຍໜ່ວຍງານ ໃຫ້ການຊ່ວຍເຫຼືອທາງດ້ານນີ້ນ່າ ເພາະພວກເຮົາ ຈະປະສານງານກັນຢ່າງຣະອຽດກ່ອນ ພວກເຮົາກໍຕ້ອງຫາຂໍ້ມູນກ່ອນ.”

ດ້ານເຈົ້າໜ້າທີ່ ສະຫະພັນແມ່ຍິງ ເມືອງແປກ ກໍເວົ້າວ່າ ກໍຍັງບໍ່ຮູ້ເຣື່ອງດັ່ງກ່າວຄືກັນ ວ່າແມ່ຍິງ 3 ຄົນ ຫາຍສາບສູນ ເພາະຍັງບໍ່ມີໃຜແຈ້ງ ເຣື່ອງມາ, ດັ່ງທ່ານກ່າວວ່າ:

“ບໍ່ຮູ້ 3 ຄົນຫາຍ ບໍ່ມີຂໍ້ມູນ ມີແຕ່ວ່າ ຄັນເຈົ້າໜ້າທີ່ມາພົວພັນ ຈັ່ງຊິຮູ້ອັນນີ້ນ່າ ຄັນເຂົາເຈົ້າມາຫາ ມາຂໍຄວາມຊ່ວຍເຫຼືອຈັ່ງຊິນະເນາະ ຈະສືບຕໍ່ໃຫ້.”

ຊາວບ້ານ ໃນແຂວງຊຽງຂວາງ ທ່ານນຶ່ງ ກໍໄດ້ໃຫ້ຄວາມເຫັນກ່ຽວກັບ ເຣື່ອງນີ້ ວ່າ ບາງເທື່ອ ກໍອາຈຖືກຄົນຈີນ ຕົວະໄປກໍເປັນໄດ້ ເພາະກໍເຄີຍ ມີແມ່ຍິງຊົນເຜົ່າມົ້ງ ຖືກຕົວະໄປຈີນ ລັກສນະ ເປັນບ່າວ-ສາວ ຮັກກັນ ກໍຊວນແມ່ຍິງໄປຢູ່ຈີນນໍາ ໂດຍເອົາເງິນເອົາ ຄວາມສະບາຍ ມາຫຼອກລໍ້:

“ມັນກະເຄີຍມີເຫດການແນວນີ້ ກະຄືແບບວ່າ ລົມຄົນຈີນເນາະ ເຂົາເຈົ້າກະຍົວະໄປຢູ່ຈີນນໍາ ໄດ້ໄປແລ້ວ ບາງທີກະຕິດຕໍ່ບໍ່ໄດ້ເລີຍ ມັນມັກຮັກກັນ ກະຄືແບບເຈົ້າກະຢູ່ນໍາຂ້ອຍ ຢູ່ຈີນ ແນວນີ້ແນວນັ້ນ ມີອັນນີ້ໃຊ້ ສ່ວນຫຼາຍ ຈະບໍ່ມີນາຍໜ້າ ສ່ວນຫຼາຍ ນ່າຈະຢູ່ໃນ ໂຕເມືອງແຫຼະ ບໍ່ໄດ້ໄປໃສ ຊາຍແດນເຂົາກະບໍ່ເປີດ ເປັນທາງການ.”

ຊາວບ້ານອີກຄົນນຶ່ງ ກໍເວົ້າວ່າ ຕາມປະເພນີ ຂອງຊົນເຜົ່າມົ້ງ ຫາກຜູ້ບ່າວ ຜູ້ສາວ ມັກຮັກກັນ ກໍຕ້ອງໄປຕິບັດຕາມປະເພນີ ແຕ່ຫາກ ບໍ່ແມ່ນຄົນມົ້ງ ນໍາກັນ ກໍອາຈຜິດປະເພນີ ຫຼື ອາຈໜີ ຕາມກັນໄປກໍມີ:

“ຄັນວ່າຄົນມົ້ງ ກັບຄົນມົ້ງ ໄປນໍາກັນຄືຈະບໍ່ຜິດດອກ ແຕ່ຍາມນີ້ ບໍ່ຮູ້ວ່າ ຈະເປັນຫຼືບໍ່ ຜູ້ສາວ ຜູ້ບ່າວມັກກັນ ບາງທີກໍເປັນໄປບໍ່ໄດ້ ເຂົາ ເຈົ້າກະໄປ ນໍາຜູ້ບ່າວ ຕາມຮີດຕາມຄອງ ເຂົາເຈົ້າຫັ້ນນ່າ ໜ້າຈະຢູ່ໃສສັກແຫ່ງ.”

ເຖິງຢ່າງໃດກໍຕາມ ອີງຕາມຄວາມເວົ້າ ຂອງເຈົ້າໜ້າທີ່ ສະຫະພັນແມ່ຍິງ ເມືອງຜາໄຊ ແລະເມືອງແປກ ແລ້ວແມ່ນວ່າ ຢາກໃຫ້ທາງ ຄອບຄົວຂອງ ແມ່ຍິງທັງ 3 ຄົນທີ່ຫາຍສາບສູນ ນັ້ນ ເຂົ້າແຈ້ງຄວາມ ກັບເຈົ້າໜ້າທີ່ທາງການ ທີ່ກ່ຽວຂ້ອງ ເປັນຕົ້ນ ໜ່ວຍງານສະຫະພັນ ແມ່ຍິງຂັ້ນເມືອງ ແລະ ປສກ ຂັ້ນເມືອງ ເຊິ່ງແຈ້ງຂໍ້ມູນ ໃຫ້ທັງເມືອງແປກ ແລະ ເມືອງຜາໄຊ ເພື່ອ ເຈົ້າໜ້າທີ່ກ່ຽວຂ້ອງ ຈະໄດ້ມີຂໍ້ມູນ ໃນການສືບຫາບຸກຄົນ ທີ່ຫາຍສາບສູນ.

ເມື່ອປີ 2016 ແມ່ຍິງລາວ ຊົນເຜົ່າມົ້ງ ຊື່ນາງ ຕາຢ່າງ ໄຊເຍັ່ງ ອາຍຸ 15 ປີ ຢູ່ບ້ານຍອດຄາ ເມືອງໜອງແຮດ ແຂວງຊຽງຂວາງ ກໍຕົກເປັນເຫຍື່ອ ຂອງພວກຄ້າມະນຸດ ໄປປະເທດຈີນ.

ເຕັມຫນ້າ