ແມ່ຍິງລາວຈາກຈີນ 4 ຄົນ ຕົກໃນ ເຄືອຂ່າຍ ຄ້າມະນຸດ

ສຸພັດຕາ
2019-11-04
ອີແມວລ໌
ຄໍາເຫັນ
Share
ພິມ
ແຂວງຈໍາປາສັກ
ແຂວງຈໍາປາສັກ
RFA/

ແມ່ຍິງລາວ ທີ່ຖືກຊ່ອຍມາໄດ້ຈາກ ຈີນ 4 ຄົນ ຢູ່ແຂວງຈໍາປາສັກ ນັ້ນ ເຂົ້າໃນເຄືອຂ່າຍ ການຄ້າມະນຸດ ຍ້ອນວ່າ ຖືກຄົນຈີນກັກຂັງ ໜ່ວງໜ່ຽວ ບໍ່ໃຫ້ຕິດຕໍ່ຫາຍາດພີ່ນ້ອງ ແລະມີການທໍາຮ້າຍຮ່າງກາຍນໍາດ້ວຍ, ອີງຕາມຄໍາເວົ້າ ຂອງເຈົ້າໜ້າທີ່ວຽກງານ ຕໍ່ຕ້ານການ ຄ້າມະນຸດ ແຂວງຈໍາປາສັກ ຕໍ່ວິທຍຸເອເຊັຽເສຣີ ໃນວັນທີ 4 ພຶສຈິກາ ນີ້:

“ໄປພຸ້ນແລ້ວຖືກບັງຄັບ ຫຼືວ່າເປັນທາດເຂົາຫັ້ນແຫຼະເນາະ ທໍາຮ້າຍຮ່າງກາຍກະຕີຫັ້ນແຫຼ້ວ ແລ້ວກະຮັບໃຊ້ໃນຄອບຄົວຫັ້ນແຫຼະ ມີກັກຂັງ ບໍ່ໃຫ້ອອກໃຫ້ເຂົ້າ ບໍ່ໃຫ້ຮູ້ພາຍນອກນິແຫຼະ ໃຫ້ຢູ່ແຕ່ໃນເຮືອນໃນຊານ ແລ້ວກະບໍ່ພົວພັນ ຫາຄອບຄົວ.”

ທ່ານກ່າວຕື່ມວ່າ ແມ່ຍິງທັງ 4 ຄົນ ຖືກຊ່ອຍເຫຼືອມາໄດ້ ປະມານ 2 ເດືອນແລ້ວ ແລະຢູ່ຄົນລະເມືອງ ຄືເມືອງບາຈຽງ, ປາກຊ່ອງ, ສຸຂຸມມາ ແລະເມືອງຊະນະສົມບູນ ພວກເຂົາເຈົ້າ ຖືກນາຍໜ້າຄົນລາວ ຕົວະໃຫ້ແຕ່ງດອງກັບຄົນຈີນ ໂດຍຈ່າຍຄ່າດອງໃຫ້ ກັບພໍ່ແມ່ ຈາກນັ້ນ ກໍພາແມ່ຍິງແລ່ນເອກກະສານ ໄປຢູ່ຈີນ ໃນຖານະເມັຽ:

“ຄົນຢູ່ແຂວງຈໍາປາສັກເຮົານິ່ເນາະ ຕົກລົງກັນໄວ້ ນາຍໜ້າ ແຫລະຮອດບ້ານ ຮອດເຮືອນເນາະ ມາຕົວະຍົວະເອົາໄປ ເປັນເມັຽຫັ້ນແຫຼະ ກັບຄົນຕ່າງປະເທດ ກັບຈີນຫັ້ນແຫຼະເນາະ ແຕ່ງງານ ແບບວ່່າບໍ່ໄດ້ມັກຮັກກັນນິແຫຼະເນາະ ເຂົາກໍເອົາໄປ.”

ເຈົ້າໜ້າທີ່ທ່ານນີ້ ກ່າວເພີ້ມວ່າ ບໍ່ຮູ້ວ່າ ແມ່ຍິງດັ່ງກ່າວນີ້ ພາກັນໜີມາໄດ້ແນວໃດ ປກສ ເປັນຜູ້ສອບສວນ ຮູ້ແຕ່ວ່າ ທາງສະຖານທູດຈີນ ເປັນຄົນສົ່ງແມ່ຍິງ 4 ຄົນ ດັ່ງກ່າວ ມາຫາສູນກາງແມ່ຍິງລາວ ແລະເຈົ້າໜ້າທີ່ ປກສ ກ່ຽວຂ້ອງ ຈາກນັ້ນທາງການ ໄດ້ປະສານຫາ ໜ່ວຍງານປົກປ້ອງການຄ້າມະນຸດ ແຂວງຈໍາປາສັກ ໃຫ້ໄປຮັບໂຕ ແມ່ຍິງທັງ 4 ຄົນນັ້ນ ເພື່ອສົ່ງກັບບ້ານຫາຄອບຄົວ ຂອງເຂົາເຈົ້າ.

ປັດຈຸບັນ ແມ່ຍິງທັງ 4 ຄົນ ໄດ້ເຮັດໄຮ່ເຮັດນາ ຢູ່ກັບຄອບຄົວ ໂດຍມີອໍານາດການປົກຄອງບ້ານ ຊ່ອຍດູແລເບິ່ງແຍງ ເຈົ້າໜ້າທີ່ເຊື່ອວ່າ ຍັງມີແມ່ຍິງ ທີ່ຖືກຕົວະຍົວະໄປຈີນ ອີກຈໍານວນຫຼາຍ ແຕ່ຍັງບໍ່ຮູ້ໂຕເລຂ ທີ່ແນ່ນອນ, ດັ່ງເຈົ້າໜ້າທີ່ ສະຫະພັນແມ່ຍິງ ແຂວງຈໍາປາສັກ ທ່ານນຶ່ງ ໄດ້ກ່າວຕໍ່ວິທຍຸເອເຊັຽເສຣີ ເມື່ອວັນທີ 29 ຕຸລາ ຜ່ານມາ ວ່າ:

ປີນີ້ ຖືວ່າເຮົາກະໄດ້ຊ່ອຍເຫຼືອເດັກນ້ອຍ ທີ່ໄດ້ຖືກເຄາະຮ້າຍ ມາຢູ່ ສາມ, ສີ່, ຄົນ ມັນມີລັກສນະ ແບບວ່າ ມີນາຍໜ້າມາຫາ ຄືມີ ຄົນລາວເຮົາບໍ ຈັ່ງຊີ້ ສາມາດເວົ້າຈີນໄດ້ ກໍມາລົມວ່າ ຢາກໄດ້ຜົວຈີນບໍ ອິຫຍັງຊັ້ນເນາະ ຂະເຈົ້າກໍມາແຕ່ງງານ ເອົາກັບ ພໍ່ກັບແມ່ ແລ້ວກໍພາໄປຈີນ.

ຄໍາເຫັນ (1)
Share

ບົວ​ພັນ

ຈາກ ​ອຸ​ດົມ​ໄຊ

ໃນກໍລະນີ ແມ່ຍິງລາວ ຕົກເປັນເຫຍື່ອການຄ້າມະນຸດ ບໍ່ວ່າ ຈະຢູ່ປະເທດໄທ ຫລື ປະເທດຈີນ ກໍດີ ບໍ່ຮູ້ວ່າ ບັນດາ ເຈົ້າໜ້າທີ່ ໃນຫ້ອງການສະຫະພັນແມ່ຍິງ ແລະ ຊາວໜຸ່ມ ຄິດແນວໃດ ແລະ ບັນດາ ເມຍຂອງການນຳລະດັບສູງ ຕັ້ງແຕ່ ທ່ານບຸນຍັງ ທ່ານທອງລຸນ ລົງມາຮອດບັນດາລັດຖະມົນຕີທັງຫລາຍ ມີຄວາມຄິດແນວໃດແດ່ ເພາະວ່າ ບັນຫາ ແມ່ນເກີດມາຈາກການບໍລິຫານປະເທດ ທີ່ເຮັດໃຫ້ ປະເທດຊາດທຸກຍາກຂາດແຄນ ເຂົ້າຂາດແລງແກງຂາດໝໍ້ ຈຶ່ງເຮັດໃຫ້ຄົນໃນປະເທດເຮົາ ຕ້ອງໄດ້ອອກໄປຫາກິນ ຢູ່ນອກປະເທດ ແລະ ຄິດວ່າ ປະເທດອື່ນ ຈະມີຊີວິດ ທີ່ດີກ່ອນ. ແລະ ແມ່ຍິງບາງຄົນ ກໍໄດ້ເອົາຕົວເອງ ແລກປ່ຽນກັບ ເງິນຄຳຕ່າງໆ. ໃນເມື່ອມາເບິ່ງ ສະພາບ ແລະ ຖານະຄອບຄົວ ຍາດພີ່ນ້ອງ ຂອງການນຳແລ້ວ ພັດຢູ່ກິນແບບຮາຍໂຊຫລູຫລາ ສົມພໍ ເພິ່ນຈຶ່ງບໍ່ຫົວຊາ ນຳປະຊາຊົນລາວ. ອີກປະການນຶ່ງ ກໍບໍ່ຄວບຄຸມ ການເຂົ້າມາ ຕົວະຍົວະເອົາແມ່ຍິງລາວ ໄປປະເທດຈີນເລີຍ ເຖິງແມ່ນວ່າ ຈະມີຂ່າວອອກມາ ຈົນໜາຫູກໍຕາມ ແມ້ແຕ່ ປະຊາຊົນທຳມະດາ ກໍຍັງເປັນຫ່ວງ ແລະ ເຫັນໃຈ ແມ່ຍິງລາວ ທັງຫລາຍ ທີ່ຕົກເປັນເຫຍື່ອ ຜູ້ຢາກເປັນຄົນທີ່ມີອຳນາດເດ້ ຈຶ່ງຈະສາມາດ ຊ່ອຍເຫລືອແມ່ຍິງລາວເຫລົ່ານັ້ນ ຊ່ອຍເຫລືອ ປະຊາຊົນລາວ ແລະ ຊ່ອຍເຫລືອປະເທດຊາດ ທີ່ຍັງທຸກຍາກລຳບາກຢູ່ນີ້. ດັ່ງນັ້ນ ຜູ້ໃດທີ່ຢູ່ໃນໜ້າທີ່ຕຳແໜ່ງ ພໍທີ່ຈະຊ່ອຍໄດ້ ກໍຂໍໃຫ້ພາກັນຊ່ອຍແດ່ເດີ ເວລາ ກໍຜ່ານໄປຜ່ານໄປ ແຕ່ປະເທດຊາດຍັງທຸກຍາກຢູ່.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 07, 2019 05:45 AM

ເຕັມຫນ້າ