ຄົນງານຫາປາລາວ ຄ້າງຢູ່ ອິນໂດເນເຊັຽ ຈະຖືກ ສົ່ງກັບບ້ານ

ນັກ​ຂ່າວ ວິ​ທ​ຍຸ ເອ​ເຊັຽ ເສ​ຣີ
2019-10-31
ອີແມວລ໌
ຄໍາເຫັນ
Share
ພິມ
ທ້າວ​ແຫລ້ ທີ່​ຕົກ​ເປັນ​ເຫ​ຍື່ອ ຄ້າ​ມະ​ນຸດ ໃນ​ເຮືອ​ຫາ​ປາ​ໄທ​ຍ ທີ່​ປະ​ເທດ​ອິນ​ໂດ​ເນ​ເຊັຽ
ທ້າວ​ແຫລ້ ທີ່​ຕົກ​ເປັນ​ເຫ​ຍື່ອ ຄ້າ​ມະ​ນຸດ ໃນ​ເຮືອ​ຫາ​ປາ​ໄທ​ຍ ທີ່​ປະ​ເທດ​ອິນ​ໂດ​ເນ​ເຊັຽ
RFA

ທ້າວແຫລ້ ຄົນງານລາວ ຊຶ່ງໄດ້ເຮັດວຽກ ຢູ່ເຮືອປະມົງໄທຍ ແຕ່ຄ້າງຢູ່ ເກາະຕ່ວນ ປະເທດອິນໂດເນເຊັຽ ດ້ວຍຄວາມລຳບາກແທ້ ເປັນເວລາ 10 ປາຍປີນັ້ນ ຈະໄດ້ກັບຄືນບ້ານ ທີ່ປະເທດລາວ ປະ​ມານວັນທີ 10 ພຶສຈິການີ້ ຍ້ອນການຊ່ອຍເຫລືອ ຂອງທາງການ ອິນໂດເນເຊັຽ, ມູລນິທິ ສົ່ງເສີມ ຄຸນນະພາບ ຊີວິດ ຄົນງານ ຫລື LPN ຂອງໄທຍ ແລະ ສະຖານທູດລາວ ຢູ່ກຸງຈາກາຕາ.

ທ່ານ ສະໝັກ ທັບທານີ, ຫົວໜ້າຜແນກ ຄຸ້ມຄອງແຮງງານ ຂອງມູລນິທິ ສົ່ງເສີມ ຄຸນນະພາບ ຊີວິດ ຄົນງານ ກ່າວ​ຕໍ່​ວິ​ທ​ຍຸ ເອ​ເຊັຽ ເສ​ຣີ ທີ່​ບາງກອກ ຜ່ານທາງ​ໂທ​ຣະ​ສັບ ຈາກ​ອິນ​ໂດ​ເນ​ເຊັຽ ວ່າ:

“ຕອນ​ນີ້ ​ດ້ານ​ປະ​ສານ​ງານ ໜ່ວຍ​ງານ​ພາກ​ຣັດ​ເອງ ທາງ​ສະ​ຖານ​ທູດ​ເອງ ກໍ​ໄດ້​ຢືນ​ຢັນ ເຣື່ອງ​ການ​ເຮັດ​ຂໍ້​ມູນ ແລະ ການປະ​ສານ​ງານ ມາ​ຍັງ ຜູ້​ເສັຽ​ຫາຍ ຜູ້​ກ່ຽວ​ຂ້ອງວ່າ ເອກ​ສານ ກະ​ພ້ອມ​ແລ້ວ ເຫຼືອ​ແຕ່ ການ​ປະ​ສານ​ງານ ຂອງ​​ອິນ​ໂດ​ເນ​ເຊັຽ ທີ່​ຈະວາງ​ແຜນ​ການ​ເດີນ​ທາງ ເຂົ້າ​ມາ​ຮັບ​ໂຕ ຊຶ່ງ​ຊິບໍ່​ດົນ​ອີກ 5 ມື້ 10 ມື້. ໜ້າ​ຊິ​ເປັນ​ສິ່ງ​ທີ່​ດີ  ແລະ​ເຣື່ອງ​ການ​ວາງ​ແຜນ ການ​ເດີນ​ທາງ ອາດ​ຈະ​ເປັນ​ໜ້າ​ທີ່ ຂອງຣັດ ທີ່​ຈະ​ຮັບ​ຜິດ​ຊອບ​ໂດຍ​ກົງ, ຊຶ່ງ​ທາງ​ຣັດ​ເອງ ຢືນ​ຢັນ ວ່າ ​ເປັນການ​ຮັບ​ຜິດ​ຊອບ ​ຂອງ​ໜ່ວຍ​ງານ ພາກ​ຣັດ ຂອງ​ໜ່ວຍ​ງານຣັດ​ເອງ ຂອງ​ຣັ​ຖ​ບານ​ລາວ ທີ່​ໃຫ້​ຄວາມ​ສຳ​ຄ​ັນ ກັບ​ທ້າວ​ແຫລ້.”

ໃນ​ຂະ​ນະ​ດຽວ​ກັນ ທ້າວ ແຫລ້ ຜູ້​ທີ່​ຈະ​ໄດ້​ເດີນ​ທາງ​ກັບ​ບ້ານ ໃນ​ຕົ້ນ​ເດືອນ​ພຶ​ສ​ຈິ​ກາ​ນີ້ ກໍ​ໄດ້ກ່າວຕໍ່ ວິທຍຸ ເອເຊັຽ ເສຣີ ຜ່ານທາງໂທຣະສັບວ່າ ຕົນດີໃຈຫລາຍ ທີ່ຈະໄດ້ກັບບ້ານ ແລະ ກໍຈະບໍ່ກັບມາ ເຮັດວຽກ ຢູ່ປະເທດໄທຍອີກ:

“ດີໃຈດີໃຈ ຢາກກັບບ້ານ ດົນລະຢາກກັບບ້ານ ມັນລໍາບາກໂພດ ໄປໃສກະບໍ່ໄດ້ ຢາກກັບບ້ານຢ່າງດຽວ ຄິດຮອດພໍ່ແມ່ ສິເຮັດນາ ທໍານາປູກເຂົ້າ ເທົ່ານັ້ນ.”

ທ້າວ ແຫລ້ ໄດ້ທົບທວນເຖິງ ຕອນທີ່ເຮັດວຽກ ຢູ່ໃນເຮືອປະມົງໄທຍນັ້ນວ່າ ຕົນຖືກທຳຮ້າຍ ຮ່າງກາຍ ຢູ່ເລື້ອຍ ຈາກເຈົ້າຂອງເຮືອ ເຮັດໃຫ້ຕົນ ຮູ້ສຶກວ່າ ສມອງບໍ່ປົກກະຕິ ເປັນຄົນເສັຽເສັ້ນ ໄປແລ້ວ ແລະ ບໍ່ຄ່ອຍຈໍາຫຍັງໄດ້. ຖ້າເຮັດວຽກບໍ່ໄດ້ ຕາມຄຳສັ່ງ ຫຼື ເຮັດວຽກ ບໍ່ຖືກໃຈ ພວກເຂົາ ຕົນກໍຖືກທາຣຸນ ຖືກຕົບຕີ.

“ລໍາບາກ ແລ້ວເຮົາ ໂດນຕີ ຕີຖ້າເຮົາບໍ່ເຮັດງານ ກໍໂດນຕີ ເຂົາກໍຕີ ເຂົາກໍໄລ່ຕີ ເຂົາຕີ ພວກໝູ່ເຮົາ ເບິ່ງບໍ່ໄດ້ ເຂົາເຮັດງານ ຕໍ່ໄປ ເຂົາກໍກົວ [ຢ້ານ] ເຂົາກໍໂດດໜີໃດ໊ ໂດດຂຶ້ນຝັ່ງໃດ໊ ເຂົາກົວ [ຢ້ານ].”

ແລະ ພ້ອມດຽວກັນນັ້ນ, ທ້າວ ແຫລ້ ຜູ້ໃຫ້ຄໍາໝັ້ນວ່າ ຈະບໍ່ກັບໄປເຮັດວຽກ ຢູ່ໄທຍອີກນັ້ນ ກໍຂອບອົກຂອບໃຈ ພາກສ່ວນ ຕ່າງໆຢ່າງສຸດຊຶ້ງ ເປັນຕົ້ນມູລນິທິ ສົ່ງເສີມ ຄຸນນະພາບ ຊີວິດຄົນງານ ຂອງໄທຍ, ສະຖານທູດລາວ ແລະ ເຈົ້າໜ້າທີ່ ອິນໂດເນເຊັຽ ທີ່ຊ່ອຍໃຫ້ຕົນ ໄດ້ກັບບ້ານ ທີ່ປະເທດລາວ ໃນທີ່ສຸດນັ້ນ.

“ໜ່ວຍງານ ພີ່ໂກ້ຫັ້ນລະ ທີ່ຊ່ອຍ LPN ຂອບໃຈ ສະຖານທູດຫລາຍໆເດີ ຂອບໃຈຫລາຍໆ ທີ່ຊ່ອຍກັບບ້ານ ບໍ່ມາອີກແລ້ວ ເຂັດລະອິນໂດ ບໍ່ມາ ເຂັດແລ້ວ.”

ຣາຍງານ ຣະບຸວ່າ ຍັງມີ ຄົນງານຕ່າງດ້າວ ຫລາຍຄົນ ທີ່ຕິດຢູ່ ເກາະຕ່ວນ ບ່ອນດຽວກັບ ທ້າວແຫລ້ ຢູ່ນັ້ນ ຕ້ອງການ ກັບບ້ານ ຂອງຂະ​ເຈົ້າ ແຕ່ຕ້ອງໄດ້ ພິສູດສັນຊາດກ່ອນ. ໃນຈຳນວນນັ້ນ ມີຄົນງານ ຈາກພະມ້າ 44 ຄົນ, ໄທຍ 8 ຄົນ ແລະ ກັມພູຊາ 4 ຄົນ. ສ່ວນຄົນງານລາວນັ້ນ ມີແຕ່ທ້າວ ແຫລ້ ຄົນດຽວ.

ທ້າວ ແຫລ້ ອາຍຸ 27 ປີ, ເບື້ອງຕົ້ນເວົ້າວ່າ ເປັນຄົນ ຈາກເມືອງໄກສອນ ແຂວງສວັນນະເຂດ, ແຕ່ພາຍລຸນມາ ບອກວ່າ ເປັນຄົນ ແຂວງຄໍາມ່ວນ ຊຶ່ງເຮັດໃຫ້ເຈົ້າໜ້າທີ່ ທາງການລາວ ຊອກຫາພໍ່ແມ່ພີ່ນ້ອງ ໄດ້ຍາກ. ທ້າວແຫລ້ ເປັນຄົນງານລາວ ທີ່ຕົກເປັນເຫຍື່ອ ການຄ້າມະນຸດ ໃນເຮືອປະມົງ ຂອງໄທຍ ແລ້ວຖືກປະໄວ້ ຢູ່ເກາະຕ່ວນ ປະເທດອິນໂດເນເຊັຽ ຕັ້ງແຕ່ປີ 2004 ເປັນຕົ້ນມາ.

ເຕັມຫນ້າ