ຣັຖບານ ລາວ-ຈີນ ຮ່ວມມື ຕ້ານການຄ້າມະນຸດ

ມະນີຈັນ
2019-12-30
ອີແມວລ໌
ຄໍາເຫັນ
Share
ພິມ
ເດັກນ້ອຍ ​ແມ່ຍິງລາວ ​ໃນແຂວງພາກເໜືອ ຖ້າບໍ່ຮັກສາ ລູກຫຼານ​ ຂອງຕົນໃຫ້ດີ ໃຫ​ຍ່ມາ ອາຈຕົກເປັນເຫ​ຍື່ອ ​ຂອງການ ຄ້າມະນຸດ ​ໄປຈີນ (ຮູບຖ່າຍເມື່ອ​: ເດືອນກັນຍາ 2019)
ເດັກນ້ອຍ ​ແມ່ຍິງລາວ ​ໃນແຂວງພາກເໜືອ ຖ້າບໍ່ຮັກສາ ລູກຫຼານ​ ຂອງຕົນໃຫ້ດີ ໃຫ​ຍ່ມາ ອາຈຕົກເປັນເຫ​ຍື່ອ ​ຂອງການ ຄ້າມະນຸດ ​ໄປຈີນ (ຮູບຖ່າຍເມື່ອ​: ເດືອນກັນຍາ 2019)
RFA/Chareunsouk

ຣັຖບານ ສາທາຣະນະຣັຖ ປະຊາທິປະໄຕ ປະຊາຊົນລາວ ແລະ ສາທາຣະນະຣັ​ຖ ປະຊາຊົນຈີນ ປາກົດວ່າ ມີການ ຮ່ວມມືກັນ ຫຼາຍຂຶ້ນ ນັບມື້ ໃນ​ການ​ ແກ້​ໄຂ ​ບັນ​ຫາ ​ການ​ຄ້າ​ມະ​ນຸດ ໃນຂນະທີ່ ແມ່ຍິງລາວ ຢູ່ເຂດ ແຂວງຕ່າງໆ ທົ່ວປະເທດ ຖືກຕົວະຍົວະ ໃຫ້ແຕ່ງດອງ ກັບຜູ້ຊາຍຈີນ ແລະ ໄປ​ຢູ່​ຈີນ, ເຊິ່ງມີຂ່າວ ອອກມາ ຫຼາຍຂຶ້ນ ຢູ່ໃນ ປັດຈຸບັນນີ້.  ໃນການ ຮ່ວມມື​ກັນ ​ຣະ​ຫວ່າງ 2 ປະ​ເທດ ຕ້ານການ ຄ້າມະນຸດ ທີ່ວ່າ ນັ້ນ, ກໍມີທັງ ການຜັດປ່ຽນກັນ ເປັນເຈົ້າພາບ ຈັດກອງປະຊຸມ ຕ້ານການ ຄ້າມະນຸດ ຮວມຢູ່ດ້ວຍ.

ຍົກຕົວຢ່າງ, ກອງປະຊຸມ ສລຸບຜົລງານ ການຈັດຕັ້ງ ປະຕິບັດ ສັນຍາ ຣະຫວ່າງ ຣັຖບານ ຂອງ 2 ປະເທດ ລາວ-ຈີນ ທີ່ນະຄອນ ປາກເຊ ແຂວງຈໍາປາສັກ ໃນມື້ ວັນທີ 6 ພຶສຈິກາ ທີ່ຜ່ານມາ, ໂດຍມີທ່ານ ພັນ ຕຳ​ຣວດເອກ ເພັງສະຫວັນ ທິບພະວົງໄຊ, ຮອງເອກ​ອະ​ທິ​ບໍ​ດີ ກົມໃຫຍ່ຕໍາຣວດ  ກະຊວງປ້ອງກັນ ຄວາມສງົບ, ຫົວໜ້າ ກອງ​ເລ​ຂາ ຄນະກັມການ ຕ້ານການຄ້າມະນຸດ ຣະດັບຊາຕ, ຫົວໜ້າ ຄນະຜູ້ແທນ ຝ່າຍລາວ ແລະ ຝ່າຍຈີນ ກໍມີທ່ານ ກົງ-ຟູຢົງ, ຮອງເອກ​ອະ​ທິ​ບໍ​ດີ ກົມສືບສວນ ສອບສວນ ຄດີອາຍາ, ກະຊວງ ສັນຕິບານ ເຂົ້າຮ່ວມ, ອີງຕາມ ຣາຍງານຂ່າວ ຂອງທາງການລາວ ເມື່ອໄວໆ ມານີ້.

ໃນກອງປະຊຸມນັ້ນ, ຄນະຜູ້ແທນ ທັງ 2 ຝ່າຍ ໄດ້ຣາຍງານ ກ່ຽວກັບ ການປະຕິບັດ ສັນຍາ ຕ້ານການ ຄ້າມະນຸດ ໃນໄລຍະ 1 ປີ, ເຊິ່ງຣັ​ຖບານ ທັງ 2 ປະເທດ ລາວ-ຈີນ ໃຫ້ຄວາມສໍາຄັນ ໃນເຣື່ອງ ອາຊຍາກັມ ຄ້າມະນຸດ ທີ່ຖືກັນວ່າ ເປັນການ ລະເມີດສິດ ແລະ ຜົລປໂຍດ ຂອງຜູ້ຖືກ ເຄາະຮ້າຍ, ເຣື່ອງເພີ້ມທະວີ ຄວາມຮູ້, ເຣື່ອງປະຕິບັດ ກົດໝາຍ ແລະ ລົງໂທສ ຜູ້ກະທໍາຜິດ ໃນ​ຄ​ດີ ຄ້າມະນຸດ ແລະ​ ໃຫ້​ຄວາມ ຊ່ອຍເຫຼືອ ອັນຈໍາເປັນ ແກ່ຜູ້ ເຄາະຮ້າຍ.

ຂ່າວນັ້ນ ເວົ້າຕື່ມ ອີກວ່າ ໃນຣະຫວ່າງ ປີ 2018 ຫາ ປີ 2019, ມີຄົນຈີນ ຮວມ​ທັງ​ ຄົນ​ງານ ເຂົ້າມາ ຢູ່ລາວ, ໄດ້ຂຶ້ນ ທະບຽນ ແລະ ໄດ້ອອກບັດ ອະນຸຍາດ​ ເຮັດ​ວຽກ ​ໃຫ້ ແລະ ​ທັງອາສາສມັກ, ນັກສຶກສາ, ວິຊາການ, ນັກທຸຣະກິຈ ທີ່​ມາຄ້າຂາຍ ຈຳ​ນວນ 46 ພັນ 600 ປາຍຄົນ. ​ທາງ​ການ​ລາວ ໄດ້ອະນຸມັດ​ ໃຫ້ແຕ່ງດອງ ກັບພົລເມືອງລາວ 301 ຄົນ. ພ້ອມ​ກັນ​ນັ້ນ​, ກໍ​ມີ​ຄົນ​ລາວ ຖືກເຄາະຮ້າຍ ຈາກ​ຜູ້​ຊາຍ​ຈີນ 83 ຄົນ, ເຊິ່ງໃນ​ນັ້ນ, ​ເປັນຍິງ 82 ຄົນ. ທາງ​ການ​ລາວ ໄດ້ຮັບ ກຸ່ມສ່ຽງ ແລະ ຜູ້ຖືກເຄາະຮ້າຍ ຈາກການ ຄ້າມະນຸດ ຢູ່ຈີນ ທີ່ສົ່ງ ກັບຄືນລາວ 169 ຄົນ ເປັນຍິງ 168 ຄົນ. ​ທາງ​ການ​ລາວ ໄດ້​ຂໍ​ ຄວາມຊ່ອຍເຫຼືອ ຈາກ​ ທາງ​ການ​ຈີນ ໃນ​ການ​ສົ່ງ ຜູ້ເຄາະຮ້າຍລາວ 35 ຄົນ ກັບຄືນລາວ, ເປັນແມ່ຍິງ ທັງໝົດ ແລະ ທາງ​ຝ່າຍ​ລາວ ໄດ້ປະສານ ສົມທົບ ກັບພາກສ່ວນ ທີ່ກ່ຽວຂ້ອງ ຂອງ​ທາງ​ການ​ຈີນ ຮວມ​ທັງ ອຳ​ນາດ ​ການ​ປົກ​ຄອງ ທ້ອງຖິ່ນຈີນ ແລະ​ ທັງສະຖານທູຕ ແລະ ສະຖານ ກົງສູນ ຂອງລາວ ປະຈໍາ ປະເທດຈີນ ໃນ​ການ ຊ່ອຍເຫຼືອ ແມ່ຍິງລາວ ທີ່ຖືກ ນາຍໜ້າ ຕົວະຍົວະ ຫຼອກລວງ ໄປແຕ່ງດອງ ກັບຄົນຈີນ ແບບບໍ່ ຖືກຕ້ອງ ຕາມ​ຣະ​ບຽບ ​ກົດ​ໝາຍ ຫຼື ແຕ່ງດອງ ແບບແອບແຝງ ກັບຄືນ ປະເທດລາວ 138 ຄົນ. ໃນກອງປະຊຸມ ຄນະຜູ້ແທນ ທັງ 2 ຝ່າຍ ລາວ-ຈີນ ໄດ້ຮ່ວມກັນ ລົງ​ນາມ ​ໃນສັນ​ຍາ ສືບຕໍ່ຮ່ວມມື ໃນວຽກງານ ສະກັດກັ້ນ ແລະ ຕ້ານ ການຄ້າມະນຸດ.

ເວົ້າເຣື່ອງ ການຮ່ວມມື ຣະຫວ່າງ ລາວ ແລະ ຈີນ ໃນ​ການ ສະກັດກັ້ນ ການຄ້າມະນຸດ ກໍມີ ຮວມ​ທັງ ກໍຣະນີ ຕໍາຣວດສາກົລ ຈີນ ຈັບນາງ ດວງຈັນ, ຄົນແຂວງຫຼວງນໍ້າທາ ທີ່ເປັນນາຍໜ້າ ຄ້າມະນຸດ ທີ່ຕົວະຍົວະ ຫຼອກລວງ ແມ່ຍິງລາວ ຊົນເຜົ່າຂະມຸ ແລະ ຊົນເຜົ່າມົ້ງ  4 ຄົນ ໄປຂາຍ ໃຫ້ຄົນຈີນ ຢູ່ປະ​ເທດຈີນ ແລ້ວສົ່ງໃຫ້ ຕໍາຣວດ ແຂວງຫຼວງນໍ້າທາ ດໍາເນີນຄດີ ຕາມຣະ​ບຽບ ກົດໝາຍລາວ,  ອີງຕາມ ຄໍາເວົ້າ ຂອງເຈົ້າໜ້າທີ່ ອັຍການ ປະຊາຊົນ ແຂວງຫຼວງນໍ້າທາ ຕໍ່ RFA ໃນມື້ ວັນທີ 19 ພຶສຈິກາ ທີ່​ຫາ ​ກໍຜ່ານມານີ້.

“ເຮົາປະສານ ທາງການຈີນ. ຈີນເຂົາເຂົ້າຈັບ ນາງອັນນີ້ ຊື່ນາງ ດວງຈັນ, ແຕ່ຫາກ ເອົາຜົວຈີນ ແລ້ວຮູ້ພາສາຈີນ ມາເຄື່ອນໄຫວ ຕົວະຍົວະ ຫຼອກລວງ ເອົາຊາວລາວ ຊາວມົ້ງ, ຊາວຂະມຸ ໄປ.”

ນາງ ດວງຈັນ ຖືກສານ ຕັດສິນ ລົງໂທສຈໍາຄຸກ 15 ປີ ແລະ ປັບໃໝ​ອີກ 100 ລ້ານກີບ.

​ເມື່ອ​ເວົ້າ​ເຖິງ ​ແມ່​ຍິງ​ລາວ ທີ່​ຕົກ​ ເປັນ​ເຫຍື່ອ ​​ຄື​ດັ່ງ​ກ່າວ ໄດ້​ງ່າຍ, ອີງຕາມ ຄໍາເວົ້າ ຂອງເຈົ້າໜ້າທີ່ ທີ່ກ່ຽວຂ້ອງ ຂອງທາງການລາວ ແມ່ນຍ້ອນ ແມ່ຍິງ ໃນ​ຄອບ​ຄົວ ​ທຸກ​ຍາກ ​ຂາດ​ເຂີນ ເປັນ​ຕົ້ນ ​ແມ່​ຍິງຊົນເຜົ່າ ຮວມທັງ ຊົນເຜົ່າມົ້ງ ຢູ່ບ້ານ ແສນລາດ, ເມືອງໄຊ ແຂວງອຸດົມໄຊ, ເຊິ່ງສ່ວນໃຫຍ່່ ບໍ່ໄດ້ຮຽນ ໜັງສື, ສະພາບ ຄອບບຄົວ ທຸກຍາກ, ບໍ່ມີ ຣາຍໄດ້ ເປັນປະຈໍາ, ຢູ່ເຂດ ຫ່າງໄກ. ແມ່ນແຕ່ຄົນ ແປກໜ້າ ກໍ​ມາ ຕົ​ວະຍົວະ ຫຼອກ​ລວງ​ ໄດ້ຢ່າງ ງ່າຍດາຍ.

​ແຕ່ສຳ​ລັບ ແມ່ຍິງລາວ 2 ຄົນ: ຜູ້​ນຶ່ງ ອາຍຸ 17 ປີ ຈາກບ້ານ​ທົ່ງ ເມືອງປາກຊັນ ແຂວງບໍຣິຄໍາໄຊ ແລະ ​ອີກ​ຜູ້​ນຶ່ງ ອາຍຸ 22 ປີ ຈາກບ້ານ​ທົ່ງ​ຫົວ​ເມືອງ​ເໜືອ, ນະຄອນໄກສອນ ພົມວິຫານ ແຂວງສວັນນະເຂດ ​ແມ່ນຖືກຕົວຍົວະ ໄປເຮັດວຽກ ຢູ່ຈີນ. ແຕ່ເມື່ອ​ ໄປ​ຮອດ​ຈີນ​ແລ້ວ, ຖືກເກັ້ຽກ່ອມ ໃຫ້ຖືພາ ອອກລູກໃຫ້ ຄົນຈີນ, ແຕ່ໂຊກດີ ມີໂອກາດ ໄດ້ໄປ​ ຂໍ​ຄວາມ​ຊ່ອຍ​ເຫຼືອ ຈາກເຈົ້າໜ້າທີ່ ຕໍາຣວດ ຈີນ, ອີງ​ຕາມ​ຄຳ​ເວົ້າ ​ຂອງ​ນັກ​ສຶກ​ສາ​ລາວ ຂັ້ນ​ປະ​ຣິນ​ຍາ​ໂທ ຢູ່​ເມືອງ ​ເຫີ​ໜານ ​ຕໍ່ RFA ໃນ​ມື້​ວັນ​ທີ 14 ພຶ​ສ​ຈິ​ກາ ​ທີ່​ຜ່ານ​ມາ ​ນີ້.

“ເຂົາ​ຣາຍ​ງານ ​ມາ​ບອກວ່າ ເດັກ​ນ້ອຍ 2 ຄົນ​ນີ້, ຖືກ​ຕົວ​ະ ​ໃຫ້​ໄປ ​ເຮັດ​ວຽກ, ແຕ່​ວ່າ ​ໄປ​ຮອດ​ແລ້ວ ໃຫ້​ໄປ​ ຮັບ​ຈ້າງ​ຖື​ພາ ​ຊີ້​ນ່າ. ອູ້ມ​ທ້ອງ​ຊີ້​ນ່າ.”​

ແລະເຈົ້າໜ້າທີ່ ຕໍາຣວດຈີນ ກໍໄດ້ຕິດຕໍ່ ມາຫາ ເຈົ້າໜ້າທີ່ລາວ ແລະ ບອກວ່າ ແມ່​ຍິງ​ລາວ 2 ຄົນ​ນັ້ນ, ຢູ່ໃນ ຄວາມດູແລ ຂອງພ​ວກ​ຕົນແລ້ວ ໃນມື້ ວັນທີ 7 ພຶສຈິກາ 2019 ນີ້ ແລະ ຈະຊ່ອຍ ໃຫ້ພວກນາງ ໄດ້ກັບ ຄືນລາວ ພາຍຫຼັງ ປະ​ກອບ ເອກະສານແລ້ວ. ແຕ່ມາຮອດ ມື້ນີ້ ກໍຍັງບໍ່ທັນ ໄດ້ກັບບ້ານເທື່ອ.

ແລະ​ອີ​ງຕາມ ຣາຍງານ ຂອງຄນະກັມ​ມະການ ຕ້ານການຄ້າມະນຸດ ຣະດັບຊາດ ໃນກອງປະຊຸມ ກ່ຽວ​ກັບ ວຽກງານ ຕ້ານການ ຄ້າມະນຸດ ປະຈໍາປີ 2018, ແມ່ຍິງລາວ ຖືກຕົວະຍົວະ ໄປຈີນ ປະມານ 3,000 ຄົນ. ທີ່ຜ່ານມາ ມີແມ່ຍິງລາວ ໄດ້ຕິດຕໍ່ມາ ຫ້ອງການ ກົງສູນໃຫຍ່ ຂອງລາວ ຢູ່​ປະ​ເທດຈີນ ເພື່ອຂໍ ຄວາມຊ່ອຍເຫຼືອ ແລະ ໄດ້​ຖືກ​ສົ່ງ ກັບລາວ ປະມານ 600 ຄົນ, ​ອີງຕາມ ໂຕເລຂ ທີ່ບໍ່ເປັນ ທາງການ. ​ໃນບົດຣາຍງານ ຍັງໄດ້​ ເວົ້າ​ເຖິງ ສາເຫຕ ຂອງ​ການ​ ເຮັດ​ໃຫ້​ ແມ່​ຍິງ​ລາວ ຖືກ​ຕົວະ​ຍົວະ ຫຼອກ​ລວງ​ ໄປ​ຈີນ, ເຊິ່ງສ່ວນຫຼາຍ ແມ່ນຖືກ ຕົວະຍົວະ ໃຫ້ແຕ່ງດອງ ກັບຄົນຈີນ, ໄປຢ້ຽມຢາມ ຄອບຄົວ ຝ່າຍຊາຍ ກ່ອນແຕ່ງດອງ, ໄປທ່ອງທ່ຽວ, ໄປອອກແຮງງານ ວ່າ​ເຮັດ​ວຽກ​ງ່າຍ, ​ໄດ້​ເງິນ​ດີ ແລະ ​ອື່ນໆ.

ແມ່​ຍິງ​ລາວ ​ທີ່ຖືກ ຕົວະ​ຍົວະ ຫຼອກ​ລວງ ​ໄປ​ຈີນ ແລະ ​ຕົກ​ເປັນ ​ຜູ້ເຄາະຮ້າຍ ສ່ວນຫຼາຍ ແມ່ນ​ຄົນ ຢູ່ແຂວງຫົວພັນ, ບໍຣິຄໍາໄຊ ແລະ ແມ່ນ​ແຕ່ ​ຢູ່ ນະຄອນຫຼວງວຽງຈັນ ກໍ​ຫຼາຍ. ແຕ່ບໍ່ມີຣາຍງານ ເຖິງ​ຈຳ​ນວນ ​ຜູ້​ເຄາະ​ຮ້າຍ ວ່າ ແຕ່ລະແຂວງ ມີເທົ່າໃດ ແລະ ແຕ່ປີໃດ ຫາປີໃດ.

ເຕັມຫນ້າ