ຂ.ຊຽງຂວາງແມ່ແລະເດັກ ຢູ່ໃນເກນ ສົມບູນ

ໄມຊູລີ
2020-03-10
ອີແມວລ໌
ຄໍາເຫັນ
Share
ພິມ
ແມ່ຍິງລາວ ທີ່ຖືພາ ກໍາລັງໄດ້ຮັບ ການກວດສຸຂພາບ ຈາກນາງໝໍ ທີ່ອຸປຖັມໂດຍ ອົງການ ສະຫະປະຊາຊາດ
ແມ່ຍິງລາວ ທີ່ຖືພາ ກໍາລັງໄດ້ຮັບ ການກວດສຸຂພາບ ຈາກນາງໝໍ ທີ່ອຸປຖັມໂດຍ ອົງການ ສະຫະປະຊາຊາດ
unfpa

ອັດຕຣາການເສັຽຊີວິດ ຂອງແມ່ແລະເດັກ ທົ່ວແຂວງຊຽງຂວາງ ໃນປີ 2019 ຫລຸດລົງຈາກປີ 2018, ຄືແມ່ເສັຽຊີວິດຍ້ອນເກິດລູກ 11 ຄົນ ໃນປີ 2018 ຫລຸດລົງເຫລືອ 4 ຄົນໃນປີ 2019, ແລະ ເດັກເກິດໃໝ່ ເສັຽຊີວິດ 32 ຄົນ ຫລຸດລົງເຫລືອ 30 ຄົນ ໃນປີ 2019. ອິງຕາມ ຄໍາເວົ້າຂອງ ເຈົ້າໜ້າທີ່ ຜແນກສາທາຣະນະສຸກ ແຂວງ ໃນວັນທີ່ 10 ມີນານີ້:

“2018-2019 ອັດຕຣາການຕາຍ ຂອງເດັກນນ້ອຍປະມານ 32 ກໍຫລຸດລົງ 30 ອັດຕຣາ ແມ່ຕາຍຕາຍຄື 11 ຄົນແລ້ວ ໄປຕາຍ ຫລຸດລົງ 4 ຄົນ ອັດຕຣາການຕາຍ ຂອງເດັກຫລຸດລົງ ປະຊາຊົນໄດ້ຮັບ ການບໍຣິການເພີ້ມຂື້ນ”

ເຈົ້າໜ້າທີ່ ທ່ານນີ້ກ່າວວ່າ ຕັ້ງແຕ່ປີ 2010 ຈົນຮອດປັຈຈຸບັນ ຣັຖບານເກົາຫລີໃຕ້ ຮ່ວມມືກັບອົງການ ອະນາມັຍໂລກ ໄດ້ມາຊ່ວຍເຫລືອ “ໂຄງການ ການເບີ່ງແຍງສຸຂພາບ ແມ່ແລະເດັກ ທົ່ວແຂວງ” ໂຄງການນີ້ ເຂົ້າເຖິງທຸກພື້ນທີ່ ໂດຍສະເພາະ ບ້ານທີ່ຢູ່ເຂດຫ່າງໄກສອກຫຼີກ ຈິ່ງເຮັດໃຫ້ ອັດຕຣາ ການເສັຽຊີວິດ ຂອງ ແມ່ແລະເດັກ ຢູ່ແຂວງຊຽງຂວາງ ຫລຸດລົງ.

ຣາຍງານວ່າ ທີ່ຜ່ານມາ ແມ່ມານຖືພາ ແລະ ເດັກນ້ອຍເກີດໃໝ່ ຢູ່ເຂດຫ່າງໄກສອກຫລີກ ມີຄວາມສ່ຽງຊີວິດສູງ ຍ້ອນມັກເກີດລູກຢູ່ເຮືອນ ແລະ ບໍ່ມັກໄປຝາກທ້ອງ ໃນເວລາຖືພາ ຢູ່ໂຮງໝໍ ແລະ ສຸກສາລາ ເນື່ອງຈາກພວກເຂົາເຈົ້າ ໄປເຮັດໄຮ່ເຮັດນາ, ໂຄງການຂອງເກົາຫລີໃຕ້ ແມ່ນໄດ້ເລັ່ງ ເຫັນເຖິງຄວາມສໍາຄັນ ຈີ່ງເລັ່ງໃສ່ການບໍຣິການ ດ້ານສຸຂພາບ ໃຫ້ແມ່ແລະເດັກ 3 ກິຈກັມ ຫລັກ ໂດຍບໍ່ເສັຍຄ່າ ຄື; ກິຈກັມ ເກີດລູກຝາກທ້ອງ, ແລະ ສັກຢາວັດຊິນ ໃຫ້ເດັກນ້ອຍເກິດໃໝ່ ເຖິງ 3 ປີ.

ເມື່ອ ປິ 2010 ອັດຕຣາຝາກທ້ອງ ຂອງແມ່ແລະເດັກມີບໍ່ຮອດ 50 ເປີເຊັນ, ແຕ່ປັຈຈຸບັນແມ່ແລະເດັກ ເຂົ້າເຖິງການບໍຣິການດ້ານສຸຂພາບ ຫຼາຍກ່ວາ 80 ເປີເຊັນ ທ່ານກ່າວຕື່ມວ່າ:

“2010 ຝາກທ້ອງເກິດລູກນີ້ ແມ່ນບໍ່ໄດ້ຮອດ 50 ເປີເຊັນຊໍ້າ ແຕ່ຕອນນີ້ເຮົາກໍເພີ້ມຂື້ນ ແມ່ນຝາກທ້ອງເກິດລູກນີ້ເກືຶຶອບ 100 ເປີເຊັນເຮົາ ກໍເກີນຄາດໝາຍທີ່ວ່າ ຣັຖສະພາເພິ່ນກໍານົດ ໃຫ້ 80 ປາຍເປີເຊັນແລ້ວ ໂຄງການຊ່ວຍຫລາຍປີ ຕອນນັ້ນແມ່ນຜ່ານ ອານາມັຍໂລກເດ້ ມາຕັ້ງແຕ່ປີ 2010 ຫັ້ນແຫລະ.”

ທ່ານກ່າວຕື່ມວ່າ ນອກຈາກນີ້ ໂຄງການເບິ່ງແຍງສຸຂພາບ ແມ່ແລະເດັກ ປະເທດເກົາຫລີໃຕ້ ຍັງມອບເຄື່ອງມື ທາງການແພດ ເພື່ອການ ເກີດລູກ ເພື່ອຝາກທ້ອງໃຫ້ກັບໂຮງໝໍ ແລະສຸກສາລາທົ່ວແຂວງນໍາອີກ, ທັ້ງຍັງຂຍາຍຫ້ອງເກິດລູກ ໃຫ້ໂຮງໝໍແຂວງເພື່ອໃຫ້ຖືກສຸຂພາບ ອະນາມັຍ ປອດເຊື້ອ ແລະ ຍົກຣະດັບຄວາມຮູ້ ໃຫ້ທິມແພດ ໃຫ້ມີຄວາມຮູ້ສາມາດຊ່ວຍເຫລືອ ແມ່ແລະເດັກ ຫລຸດພົ້ນຈາກຄວາມຕາຍ.

ເຕັມຫນ້າ