ສານພິດອັນຕລາຍຕົກຄ້າງ ໃນຜັກ

ສຸພັດຕາ
2018-11-15
ອີແມວລ໌
ຄໍາເຫັນ
Share
ພິມ
ຕລາດຜັກສົດ ໃນແຕ່ລະບ້ານ ໃນແຕ່ລະເມືອງ ຢູ່ລາວ
ຕລາດຜັກສົດ ໃນແຕ່ລະບ້ານ ໃນແຕ່ລະເມືອງ ຢູ່ລາວ
RFA/SS

ຜແນກກະສິກັມ ແລະປ່າໄມ້ ຂແນງປູກຝັງ ແຂວງບໍຣິຄຳໄຊ ໄດ້ລົງກວດສານພິດປົນເປື້ອນໃນຜັກ ແລະໝາກໄມ້ ທີ່ຕລາດອິນໂດຈີນ, ຕລາດ ປາກຊັນເກົ່າ ແລະຕລາດແສນອຸດົມ ພົບສານພິດ ຕົກຄ້າງໃນຜັກ ແລະໝາກໄມ້ ເຖິງ 11 ຊນິດ ຄື: ມັນຝຣັ່ງ, ຫົວຜັກບົ່ວໃຫຍ່, ຜັກກະລໍ່າດອກ, ໝາກເດັ່ນ, ຜັກກາດນາ, ຫອມບົ່ວໃບ, ຫົວກະທຽມ, ຜັກກາດຊອມ, ໝາກແຕງ, ໝາກເຜັດ ແລະໝາກແອັບເປີ້ນ. ດັ່ງ ເຈົ້າໜ້າທີ່ ຂແນງປູກຝັງ ແຂວງບໍຣິຄຳໄຊ ກ່າວຕໍ່ວິທຍຸ ເອເຊັຍເສຣີ ໃນວັນທີ 15 ພຶສຈິກາ ນີ້ວ່າ:

“ເລື່ອງສານຕົກຄ້າງຢູ່ໃນພຶດຜັກໝາກໄມ້ ກໍ່ຫຼາຍຢູ່ ພົບປະລິມານຫຼາຍ 11 ໂຕຢ່າງ ມີມັນຝລັ່ງ ຫົວຜັກບົ່ວໃຫຍ່ ກະລໍ່າດອກ ໝາກເລັ່ນ ຫອມບົ່ວນ້ອຍ ຄະນ້າ ຫົວກະທຽມ ຜັກກາດຊອມ ໝາກແຕງກົວ ໝາກເຜັດ ແອັບເປິ້ນ ເຮົາກໍ່ມີການແຈ້ງຜົນ ໃຫ້ສັງຄົມຮັບຊາບທົດລອງ ຫຼືບໍ່ຄວນຮັບປະທານຜັກ ແລະໝາກໄມ້ທີ່ກວດພົບສານພິດນັ້ນ.“

ທ່່ານກ່າວຕື່ມວ່າ ຜັກແລະໝາກໄມ້ ທີ່ກວດພົບສານພິດຕົກຄ້າງ ດັ່ງກ່າວ ແມ່ນນຳເຂົ້າມາຈາກປະເທດໄທ ແລະວຽດນາມ ແຕ່ກໍບໍ່ສາມາດ ຮັບປະກັນໄດ້ ທັງໝົດວ່າຜັກ ແລະໝາກໄມ້ທີ່ນໍາເຂົ້າມາຂາຍ ໃນຕລາດ ຈະມີສານພິດຕົກຄ້າງໝົດ ເພາະເຈົ້າໜ້າທີ່ ສຸ່ມກວດສະເພາະຜັກ ແລະໝາກໄມ້ ບາງຊນິດເທົ່ານັ້ນ, ຫາກເປັນໄປໄດ້ ຢາກໃຫ້ປະຊາຊົນຫຼີກຫຼ້ຽງການບໍຣິໂພຄ ຜັກແລະໝາກໄມ້ ທີ່ກວດພົບສານພິດຕົກຄ້າງ ເພາະຫາກກິນເຂົ້າໄປແລ້ວ ອາດສົ່ງຜົນກະທົບ ຕໍ່ສຸຂພາບໄດ້ ດັ່ງທ່ານກ່າວວ່າ:

“ສຳພາດເອົານໍາແມ່ຄ້າ ຈຳນວນນຶ່ງເອົາມາຈາກໄທ, ວຽດນາມ ບາງຕົວຢ່າງທີ່ກວດພົບເຫັນ ເຮົາກໍ່ບໍ່ກະລັນຕີ ເອົາມາຈາກໄທ 100 ຈາກ ວຽດ 100 ແລ້ວກິນບໍ່ໄດ້ ເຮົາບໍ່ກາລັນຕີ, ໂຕທີ່ມີສານຕົກຄ້າງກໍ່ມີ ເຮົາເວົ້າສະເພາະຕົວຢ່າງກວດ 11 ຕົວຢ່າງ ເປັນໄປໄດ້ ກໍ່ຢາກໃຫ້ ຫຼີກລ້ຽງ ໃນໄລຍະຍາວ ມີຜົນກະທົບຕໍ່ສຸຂພາບ.”

ກ່ອນໜ້ານີ້ ເຈົ້າໜ້າທີ່ແຂວງເຊກອງ ແລະ ແຂວງສວັນນະເຂດ ກໍກວດພົບສານພິດຕົກຄ້າງໃນຜັກ ແລະໝາກໄມ້ຫຼາຍຊນິດເຊັ່ນກັນ.

ເຕັມຫນ້າ