ຈີນຊ່ອຍເຫຼືອລາວ ຕ້ານ ໂຄວິດ-19

ອຸ່ນແກ້ວ ສຸກສະຫວັນ
2020-03-26
ອີແມວລ໌
ຄໍາເຫັນ
Share
ພິມ
ຣັຖບານ ສປຈີນ ໄດ້ສົ່ງທີມແພດ-ຊ່ຽວຊານ ພ້ອມອຸປກອນການແພດ ຫຼາຍຢ່າງມາປະຈຳ ຢູ່ໂຮງໝໍ 103, ໂຮງໝໍ ມິຕພາບ 150 ຕຽງ, ແລະ ໂຮງໝໍມະໂຫສົດ.
ຣັຖບານ ສປຈີນ ໄດ້ສົ່ງທີມແພດ-ຊ່ຽວຊານ ພ້ອມອຸປກອນການແພດ ຫຼາຍຢ່າງມາປະຈຳ ຢູ່ໂຮງໝໍ 103, ໂຮງໝໍ ມິຕພາບ 150 ຕຽງ, ແລະ ໂຮງໝໍມະໂຫສົດ.
ຮູບຈາກ : ນັກຂ່າວພົລເມືອງ

ຫລ້າສຸດຣັຖບານຈີນ ໄດ້ສົ່ງທີມ ແພດ-ຊ່ຽວຊານ ພ້ອມອຸປກອນ ການແພດຫຼາຍຢ່າງ ມາປະຈຳຢູ່ໂຮງໝໍ 103, ໂຮງໝໍມິຕພາບ 150 ຕຽງ, ແລະໂຮງໝໍມະໂຫສົດ. ເຈົ້າໜ້າທີ່ ກະຊວງສາທາຣະນະສຸຂ ໄດ້ກ່າວຕໍ່ ເອເຊັຽເສຣີ ໃນວັນທີ 26 ມີນາ ວ່າ:

"ພວກຊ່ຽວຊານ ຂະເຈົ້າຊ່ຽວຊານ ທາງດ້ານການແພດໂຮງໝໍ 103 ໂຮງໝໍ 150 ຕຽງ ໂຮງໝໍມະໂຫສົດ ກາຄືກັນແຫລະ ເຮົາກະດາຍ ຂັ້ນບໍ່ໄດ້ຮັບການຊ່ວຍເຫລືອ ຈາກຕ່າງປະເທດກະດາຍ ອັນນີ້ ຕ້ອງໄດ້ ຊ່ວຍກັນ ກໍຕ້ອງໄດ້ພ້ອມກັນປາບປາມ ນຳກັນຫັ້ນແຫຼະ ເລື້ອງ ພຍາດນີ້."

ທ່ານຕື່ມອີກ ວ່າຫລັງຈາກ ທີ່ປະເທດລາວ ກວດພົບກໍຣະນີ ຜູ້ຕິດເຊື້ອໂຄວິດ-19 ລວມທັງໝົດ 6 ຄົນນັ້ນ ຣັຖບານຈີນມີແຜນສົ່ງ ແພດ- ຊ່ຽວຊານ ທີ່ມີປະສົບການໃນການຕ້ານ ໂຄວິດ-19 ເຂົ້າມາຊ່ວຍ ໃນການ ປິ່ນປົວຄົນເຈັບ ພ້ອມກັບອຸປກອນການແພດ ແລະ ຢ່າປິ່ນປົວ ຈຳນວນນຶ່ງ ເຂົ້າມາຊ່ວຍລາວເພີ້ມຕື່ມ. ເຈົ້າໜ້າທີ່ທ່ານນີ້ ກ່າວຕື່ມອີກວ່າ:

"ເລື້ອງປ້ອງກັນຂອງລາວຫັ້ນ ບໍ່ຕ້ອງຫ່ວງເຂົາກັນໄວ້ ເກີດມື້ແຮກ ມື້ສອງໄດ໋ເຮີຍ ຢາຈີນ ເອົາມາໃຫ້ແລ້ວ ເຄິ່ງເດືອນແລ້ວ ໄດ້ສອງອາທິດ ລະຈີນເອົາໃຫ້ ລາວ ນະ ເຄື່ອງມືທັນສະໄໝ ເຄື່ອງໄມ້ ເຄື່ອງມື ທີ່ມັນທັນສະໄໝ ຂອງຈີນ ຫັ້ນກະເອົາມາເມືອງລາວ."

ກ່ຽວກັບເລື້ອງນີ້, ປະຊາຊົນຢູ່ນະຄອນຫລວງວຽງຈັນ ກ່າວຕໍ່ເອເຊັຽເສຣີ ໃນມື້ດຽວກັນວ່າ ຕ່າງປະເທດ ໄດ້ສົ່ງການຊ່ອຍເຫຼືອເຂົ້າມາໃຫ້ລາວ ຮຽບຮ້ອຍແລ້ວ.

"ພວກຈີນສົ່ງມາບັກຫລາຍໆ ໝໍກໍສົ່ງມາ 30-40 ຄົນ ຢາກໍພວກຈີນສົ່ງມາຫຼາຍ ເງິນເຂົາກໍຍັງຊ່ວຍເຫລືອໄດ໋ ເມືອງລາວຫັ້ນ ບໍ່ທັນເປັນເຂົາ ກໍຊ່ວຍເຫລືອກ່ອນ."

ເຈົ້າໜ້າທີ່ສາທາຣະນະສຸຂ ຍັງກ່າວຕໍ່ເອເຊັຽເສຣີ ຕື່ມອີກວ່າ ການຊ່ອຍເຫລືອ ປະເທດລາວ ເພື່ອຄວບຄຸມ ແລະ ປ້ອງກັນ ກາລະບາດຂອງ ໂຄວິດ-19 ຂອງຕ່າງປະເທດ ເປັນສິ່ງທີ່ໜ້າຊື່ນຊົມ ຍິນດີ ເພາະວ່າ ບໍ່ສະເພາະແຕ່ປະເທດຈີນ ເທົ່ານັ້ນ ທີ່ເຂົາມາຊ່ວຍເຫລືອ ແຕ່ຍັງມີ ປະເທດ ສະຫະຣັຖ ອາເມຣິກາ ແລະ ຍັງມີປະເທດໄທ ລວມເຖີງອົງການຈັດຕັ້ງສາກົນ ປະຈຳລາວນຳອີກ.

ກ່ອນໜ້ານີ້ ຣັຖບານສະຫະຣັຖອາເມຣິກາ ໄດ້ມອບເງິນ 2 ລ້ານ ໂດລາ ໃຫ້ແກ່ຣັບຖານລາວ ເພື່ອຄວບຄຸມ ແລະ ຕ້ານພຍາດໂຄວິດ-19 ໂດຍຜ່ານອົງການ USAID ປະຈຳລາວ.

ນອຈາກນີ້ ຍັງມີອົງການອານະມັຍໂລກ ແລະ ອົງການຢູນິເຊຟ ປະຈຳລາວ ໃຫ້ການຊ່ວຍເຫລືອ ເພື່ອວາງແຜນສຸກເສີນ ຕາມຈຸດຕ່າງໆ ໃຫ້ແກ່ລາວ ໂດຍ ການຝຶກອົບຮົມ ສ້າງຄວາມສາມາດ ໃຫ້ແກ່ເຈົ້າໜ້າທີ່ ສາທາຣະນະສຸຂ  ໃນການຮັບມືກັບການລະບາດ ແລະ ກວດຫາ ຜູ້ຕິດເຊື້ອ.

ຄໍາເຫັນ (1)
Share

ລູກໄກສອນ

ຈາກ ສະຫວັນະແຂກ

ການຊ່ວຍເຫລືອ ຂອງ ສປຈິນ ກໍ່ເປັນບາດກ້າວທີ່ ຢາກກືນກີນລາວ ເພາະປະຊາຊົນຈິນ ຜູ້ຕົກທຸກໄດ້ຍາກ ທີ່ຕີດພຍາດໂຄວີດຍັງບໍ່ໄດ້ຮັບການຊ່ວຍເຫລືອ ແຕ່ຢ່າງໃດເລີຍ. ເມືອກ່ອນທີ່ປະທານປະເທດ ສປປລາວເຮົາ ທ່ານບຸນຍັງວໍລະຈິດ ໄປກົ້ມຫົວເຊັນສັນຍາມອບດິນລາວ ໃຫ້ ສປຈິນ ມາມີອິທິ່ຜົນ ຮອບດ້ານຢູ່ສປປລາວ ແລ້ວ, ຈິນໄດ້ເອົາໃຈໃສຫລັງໄຫລ ມາລາວແບບສະດວກສະບາຍ. ຫລັງຈາກ ນັ້ນຜູ້ນຳການທະຫານ ຂອງສປຈິນ ໄດ້ມາພົບກັບ ທ່ານພົນເອກ ຈັນສະໝອນຈັນຍະລາດ ຢູ່ວຽງຈັນ ທັງສອງຝ່າຍໄດ້ເຊັນສັນຍາ ສອງພັກສອງຝ່າຍ ທັງດ້ານຍຸທະສ່າດ ແລະທ່ານຈັນສະໝອນ ກໍ່ສະໜັບສະໜູນ ການຂະຫຍາຍອານາເຂດໃນທະເລຈິນໃຕ້ ຂອງຈິນຢ່າງຮອບດ້ານ. ສປປລ່າວກໍ່ພະຍາຍາມ ຈະເປັນຫົວເມືອງຂື້ນກັບຈິນ ແລະຈະແຍກຕົວອອກຈາກ ສສຫວຽດນາມໄປ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]


Mar 27, 2020 12:55 PM

ເຕັມຫນ້າ