ຫຼາຍໂຮງຮຽນຂາດອຸປກອນ ຕ້ານ ໂຄວິດ-19

ສຸພັດຕາ
2020-06-04
ອີແມວລ໌
ຄໍາເຫັນ
Share
ພິມ
ນັກຮຽນລຽນແຖວຍາວຢຽດ ເພື່ອກວດອຸນຫະພູມ ຮ່າງກາຍ ກ່ອນເຂົ້າຫ້ອງຮຽນ
ນັກຮຽນລຽນແຖວຍາວຢຽດ ເພື່ອກວດອຸນຫະພູມ ຮ່າງກາຍ ກ່ອນເຂົ້າຫ້ອງຮຽນ
ນັກຂ່າວພົລເມືອງ

ນັກຮຽນມັທຍົມ ເມືອງໄຊ ແຂວງອຸດົມໄຊ ເຖິງເຄິ່ງນຶ່ງ ຂອງນັກຮຽນທັງໝົດ 1,000 ປາຍຄົນ ບໍ່ໄດ້ຮັບການວັດແທກອຸນຫະພູມກ່ອນເຂົ້າ ຫ້ອງຮຽນ ຍ້ອນມີເຄື່ອງວັດແທກອຸນນະພູມ ພຽງ 2 ອັນ, ໄດ້ແຕ່ລ້າງ ມືດ້ວຍສະບູ ບໍ່ມີນໍ້າຢາຂ້າເຊື້ອ ແລະ ນັກຮຽນສ່ວນຫຼາຍ ກໍບໍ່ມີຜ້າ ປິດປາກ. ອີກທັງນັກຮຽນທຸກຄົນ ນັ່ງຮຽນໂຕ໊ະ ລະ 2 ຄົນ ຄືເກົ່າ ຍ້ອນວ່າຫ້ອງຮຽນ ແລະນາຍຄຣູ ບໍ່ພຽງພໍ ທີ່ຈະປະຕິບັດ ມາຕການ ຮັກສາ ໄລຍະຫ່າງ 1-2 ແມັດ, ອີງຕາມຄໍາເວົ້າ ຂອງນາຍຄຣູ ໂຮງຮຽນມັທຍົມແຫ່ງນຶ່ງ ຢູ່ເມືອງໄຊ ໃນວັນທີ 3 ມິຖຸນາ ນີ້ວ່າ:

“ເຄື່ອງເອົາມາກະມີແຕ່ 2 ເຄື່ອງ ກວດມັນບໍ່ທັນ, ເລື່ອງການຂຶ້ນຫ້ອງຫັ້ນ ກໍຄືວ່າແຫຼະ ຊິໃຫ້ເຂົາເຈົ້າ ຢູ່ໄລຍະຫ່າງບໍ່ໄດ້. ຜ້າອັດປາກນີ້ ເບື້ອງຕົ້ນນີ້ ຈະແມ່ນທາງໂຮງຮຽນເຮົາແຈກໃຫ້ ແຕ່ວັນທີ 2 ມານີ້ ມັນແຈກບໍ່ໄດ້ແລ້ວ ແນະນໍາຜູ້ປົກຄອງຫັ່ນ ຊ່ອຍປະກອບສ່ວນໃຫ້ ລູກຫານໂຕເອງຫັ່ນ.”

ທ່ານກ່າວຕື່ມວ່າ ທີ່ຜ່ານມາ ໂຮງຮຽນໄດ້ຮັບການຊ່ອຍເຫຼືອ ເຄື່ອງປ້ອງກັນ ໂຄວິດ-19 ເປັນຕົ້ນ ເຄື່ອງວັດແທກອຸນຫະພູມ, ຜ້າອັດປາກ ແລະ ເຈວລ້າງມື ຈາກນັກທຸຣກິຈ ພາຍໃນແຂວງ ແຕ່ເຄື່ອງປ້ອງກັນ ດັ່ງກ່າວ ໃຊ້ພຽງ 2-3 ມື້ ກໍໝົດແລ້ວ. ຫຼັງຈາກນັ້ນ ກໍບໍ່ມີໃຫ້ໃຊ້ຕື່ມ, ຫາກເອົາງົບປະມານ ບໍຣິຫານມາຈັດຊື້ເຄື່ອງປ້ອງກັນ ດັ່ງກ່າວ ກໍມີງົບບໍ່ພຽງພໍ, ອີກທັງ ຖ້າຫາກໃຫ້ນັກຮຽນ ໄປນັ່ງຮຽນຕາມຮົ່ມໄມ້ ກໍ ເປັນໄປບໍ່ໄດ້ ຍ້ອນວ່າ ນາຍຄຣູສອນມີຈໍານວນຈໍາກັດ.

ນາຍຄຣູ ຢູ່ໂຮງຮຽນມັທຍົມ ໃນນະຄອນຫຼວງວຽງຈັນ ກໍກັງວົນ ຖ້າມີການຕິດເຊື້ອ ກໍອາຈຄວບຄຸມບໍ່ໄດ້ ເນື່ອງຈາກວ່າ ນັກຮຽນພາຍໃນ ໂຮງຮຽນ ຈໍານວນ 3 ພັນປາຍຄົນ ແລະ ມີເຄື່ອງວັດແທກອຸນຫະພູມ ທີ່ໄດ້ມາຕຖານພຽງ 10 ອັນ ຕໍ່ນັກຮຽນ 3 ພັນປາຍຄົນ ບາງເທື່ອ ນັກຮຽນເຖິງ 80% ກໍບໍ່ໃສ່ຜ້າອັດປາກ, ອັດດັງ, ດັ່ງທ່ານກ່າວໃນມື້ດຽວກັນນີ້ວ່າ:

“ຜ້າອັດປາກ ບາງນັກຮຽນກໍວ່າ ອາຈານຫັນໃຈຍາກ. ຫັນໃຈຍາກກໍຕ້ອງໄດ້ໃສ່, ເຂົາເປັນໝູ່ກັນເນາະ ເຂົາກໍບໍ່ຢ້ານກັນ ການຮັກສາໄລຍະ ຫ່າງຍັງບໍ່ໄດ້ ນັກຮຽນຍັງເຫຼີງຢູ່ ຍັງບໍ່ໄດ້ມາຕການ ເວລາເຮົາວັດແທກ ອຸນຫະພູມຮ່າງກາຍ ນັກຮຽນ ມັນຕືດ ຕືດ ມັນຕາຍ ມັນອິຫຍັງ. ເຈວລ້າງມືນີ່ ແມ່ນຢາກວ່າ ບໍ່ຢາກມີຫັ້ນແຫຼະ ເພາະວ່າ ພວກເຮົາໄດ້ເຮັດສະຖານທີ່ ອ່າງລ້າງມື ງົບປະມານຊື້ເຈວມັນແພງ ກໍເຮັດໃຫ້ ນັກຮຽນ ບໍ່ດູດດື່ມ ບໍ່ຕິດໃຈ ກ່ຽວກັບໄປລ້າງມື ໃສ່ສະບູຫັ່ນນະ.”

ທ່ານກ່າວຕື່ມວ່າ ສໍາລັບການຮັກສາໄລຍະຫ່າງ 1-2 ແມັດ ໃນຫ້ອງຮຽນນັ້ນ ຖືວ່າໂຮງຮຽນປະຕິບັດໄດ້ ຄືແບ່ງຕາຕະລາງຮຽນ ເປັນວັນຈັນ, ພຸດ, ສຸກ ແລະອັງຄານ, ພະຫັດ, ເສົາ ໝາຍຄວາມວ່າ ເດັກນ້ອຍນັກຮຽນ ຄົນນຶ່ງ ຈະບໍ່ໄດ້ຮຽນທຸກມື້ ມາຮຽນອາທິດລະ 3 ມື້.

ໃນຂນະດຽວກັນ ນັກຮຽນຊັ້ນມັທຍົມສຶກສາ ປີທີ 5 ຢູ່ນະຄອນຫຼວງວຽງຈັນ ກໍດີໃຈ ທີ່ໄດ້ກັບຄືນໄປຮຽນ:

“ນ້ອງບໍ່ກັງວົນໃຈຫຍັງ ເພາະວ່າ ຄວາມແບບດີໃຈ ທີ່ວ່າໄດ້ເຂົ້າໂຮງຮຽນ ໄດ້ເຫັນໜ້າໝູ່ ຄວາມຢ້ານແບບນັ້ນ ກໍຕ້ອງຫາຍໄປ ແມ່ນບໍ່ລ່ະ ມັນແບບ ມັນບໍ່ການແຜ່ເພີ້ມຂຶ້ນຫຼາຍມື້ ຫຼາຍເດືອນແລ້ວເດ້. ນ້ອງກໍຕ້ອງປ້ອງກັນແຫຼະ ໃສ່ຜ້າປິດປາກ ລ້າງມືຕລອດ ນ້ອງກໍມີເຈວລ້າງມື ຕລອດຊິ່ນ່າ ຂ້າແອວກໍຮໍ ຕລອດ.”

ສ່ວນຜູ້ປົກຄອງນັກຮຽນຊັ້ນມັທຍົມ ປີທີ 5 ຢູ່ເມືອງອາດສະພັງທອງ ແຂວງສວັນນະເຂດ ກ່າວວ່າໂຕເອງກໍໃຫ້ລູກ ໄປໂຮງຮຽນແບບບໍ່ມີ ຜ້າອັດປາກ ເນື່ອງຈາກວ່າຜ້າອັດປາກ ຢູ່ເຂດຊົນນະບົດເຂົາຂາຍ ຣາຄາແພງແຜ່ນນຶ່ງ 5 ພັນກີບ ບໍ່ມີເງິນຊື້ໃຫ້ລູກ:

“ກໍບໍ່ມີຜ້າອັດປາກ ເດັກນ້ອຍເນາະ ເຂົາໃສ່ເຂົາກໍປະ ແຜ່ນນຶ່ງຣາຄາ 5 ພັນ ແຜ່ນນຶ່ງເນາະ ເຂົາມາຂາຍຫັ່ນເນາະ ຣາຄາມັນສູງຫັ່ນນາ ມີແຕ່ແນະນໍາເຂົາລ້າງມືຫັ້ນແຫຼະ.”

ກ່ຽວກັບເຣື່ອງນີ້ເຈົ້າໜ້າທີ່ ຄະນະສະເພາະກິຈ ສຶກສາທິການແລະກິລາ ແຂວງສວັນນະເຂດ ກໍເຫັນວ່າໂຮງຮຽນໃດກໍບໍ່ມີ ເຄື່ອງແທກ ອຸນຫະພູມ:

“ພາບລວມທີ່ລົງໄປ ສຸ່ມເອົາ ບໍ່ແມ່ນວ່າໄປໝົດດອກ ກໍໄປເຫັນ 15 ເມືອງ ກໍບໍ່ມີຈັກແຫ່ງ ທີ່ມີເຄື່ອງວັດແທກອຸນຫະພູມນັ້ນ ອັນ 1 ມັນກໍ 4-5 ແສນເນາະ ເຣື່ອງຍາມມັນກະບໍ່ໄດ້ເວນຍາມແຫຼະ ເຮັດບົດຣາຍງານໄປແລ້ວ ໃນການຈັດຕັ້ງປະຕິບັດ ຂໍ້ສະດວກຂໍ້ຫຍຸ້ງຍາກກໍມີໝົດ ເຮັດບົດຣາຍງານໄປຫາກະຊວງ.”

ໜັງສືພິມວຽງຈັນທາມ ສະບັບລົງວັນທີ 2 ພຶສພາ ທີ່ຜ່ານມາ ຣາຍງານວ່າ ດຣ. ສີສຸກ ວົງວິຈິດ ຫົວໜ້າກົມສາມັນສຶກສາ ກະຊວງສຶກສາ ທິການແລະກິລາ ໄດ້ຮັບການຣາຍງານ ບັນຫາດັ່ງກ່າວ ຈາກຜແນກ ສຶກສາທິການແລະກິລາ ແຕ່ລະແຂວງ ຮວມທັງນະຄອນຫຼວງວຽງຈັນ ແລ້ວ, ອີກທັງຄະນະສະເພາະກິຈ ໄດ້ແນະນໍາໃຫ້ກະຊວງສຶກສາທິການ ແລະກິລາ ຂຶ້ນແຜນງົບປະມານ ການຈັດຊື້ອຸປກອນ ທີ່ໂຮງຮຽນ ຕ້ອງການ ແລະ ສເນີຕໍ່ຄະນະສະເພາະກິຈ ເພື່ອສນອງອຸປກອນ ໃຫ້ໂຮງຮຽນ ເພື່ອໃຫ້ສືບຕໍ່ ປະຕິບັດມາຕການ ທີ່ວາງອອກ.

ເຖິງຢ່າງໃດກໍຕາມ ທ່ານຮອງສາສດາຈານ ດຣ. ພູທອນ ເມືອງປາກ ຮອງຣັຖມົນຕຣີ ກະຊວງສາທາຣະນະສຸຂ ແລະທັງເປັນຜູ້ປະຈໍາການ ຄະນະສະເພາະກິຈ ເພື່ອປ້ອງກັນ ຄວບຄຸມ ແລະແກ້ໄຂ ການຣະບາດ ຂອງເຊື້ອໄວຣັສໂຄວິດ-19 ກໍເປັນຫ່ວງເປັນໃຍລູກຫຼານ ທີ່ເປັນ ນັກຮຽນ ຈຶ່ງຂໍຮຽກຮ້ອງໃຫ້ ຜູ້ປົກຄອງເດັກ ຄຣູ, ອາຈານ ຈົ່ງເອົາໃຈໃສ່ ເປັນພິເສດ ຕໍ່ລູກຫຼານ:

“ດ້ວຍຄວາມເປັນຫ່ວງເປັນໃຍ ຈຶ່ງຂໍຮຽກຮ້ອງໃຫ້ຜູ້ປົກຄອງ ຜູ້ບໍຣິຫານການສຶກສາ ຄຣູ ອາຈານ ຈົ່ງເອົາໃຈໃສ່ເປັນພິເສດ ຕໍ່ລູກຫຼານຂອງ ພວກເຮົາ. ເພາະວ່າເຂົາເຈົ້ານັ້ນ ບໍ່ຮູ້ຈັກຮັບຜິດຊອບຕໍ່ຕົນເອງ ໃນການປ້ອງກັນ. ມາຕການ ແລະ ວິທີການຕ່າງໆ ຄຳແນະນຳຕ່າງໆນີ້ ເຂົາເຈົ້າອາຈບໍ່ເຂົ້າໃຈໄດ້ໝົດ ແລະ ອາຈບໍ່ມີຄວາມຮັບຜິດຊອບຕົນເອງໄດ້.”

ເປັນເວລາ 52 ມື້ແລ້ວ ທີ່ບໍ່ມີຣາຍງານ ຜູ້ຕິດເຊື້ອໄວຣັສໂຄວິດ-19 ເພີ່ມຂຶ້ນ ໃນລາວ ແລະ ຍັງເຫຼືອຜູ້ທີ່ນອນປິ່ນປົວຢູ່ໂຮງໝໍພຽງ 1 ຄົນ, ເຊິ່ງຄາດວ່າ ຈະໄດ້ອອກໂຮງໝໍ ເພື່ອກັບເມືອເຮືອນໃນມໍ່ໆນີ້. ປັດຈຸບັນ, ການດຳເນີນຊີວິດຂອງຊາວບ້ານ ໃນທົ່ວປະເທດກໍເກືອບວ່າເຂົ້າ ສູ່ພາວະປົກກະຕິແລ້ວ ແລະ ມາຕການຫຼາຍຢ່າງ ກໍໄດ້ຖືກຜ່ອນຜັນໄປຕາມ ເງື່ອນໄຂຂໍ້ສະດວກ ຂອງແຕ່ລະທ້ອງຖິ່ນ.

ເຕັມຫນ້າ