ສະພາ ຂ.ສວັນນະເຂດ ອອກແກ້ ບັນຫາ ໂຮງງານ ຊັນເປເປີ້

ໄມຊູລີ
2019-07-31
ອີແມວລ໌
ຄໍາເຫັນ
Share
ພິມ
ທາງດ້ານໜ້າ ຂອງໂຮງງານຜລິດເຈັ້ຽ ຊັນເປເປີ ເມືອງເຊໂປນ ແຂວງສວັນນະເຂດ
ທາງດ້ານໜ້າ ຂອງໂຮງງານຜລິດເຈັ້ຽ ຊັນເປເປີ ເມືອງເຊໂປນ ແຂວງສວັນນະເຂດ
Screen captured : ໂທຣະພາບເຊໂປນ

ສະພາປະຊາຊົນແຂວງສວັນນະເຂດ ລົງພື້ນທີ່ແກ້ໄຂບັນຫາ ໂຮງງານຊັນເປເປີ ສົ່ງກິ່ນເໝັນກະທົບປະຊາຊົນ ແລະ ພະນັກງານບໍ່ມີມື້ພັກ.

ເມື່ອວັນທີ 19 ກໍຣະກະດາ ທີ່ຜ່ານມາ ສະມາຊິກສະພາປະຊາຊົນ ແຂວງສວັນນະເຂດ ເມືອງເຊໂປນ ໄດ້ລົງພື້ນທີ່ ໄປຍັງໂຮງງານຜລິດ ເຈັ້ຽ ຊັນເປເປີ້ ໂຮນດິ້ງລາວ ຈໍາກັດ (Sun Paper) Holding Lao) ຢູ່ ບ້ານມັ່ນຈິ ເມືອງເຊໂປນ ເພື່ອແກ້ບັນຫາ ໂຮງງານສົ່ງກິ່ນເໝັນ ກະທົບປະຊາຊົນ ພາຍຫຼັງປະຊາຊົນທີ່ຢູ່ໃກ້ໂຮງງານ ໄດ້ຮ້ອງຮຽນໄປຍັງສະພາປະຊາຊົນ ໃຫ້ແກ້ໄຂຍ້ອນໂຮງງານ ດັ່ງກ່າວສົ່ງກິ່ນເໝັນ ນັບແຕ່ວັນທີ 15 ກໍຣະກະດາ ເປັນຕົ້ນມາ, ດັ່ງຊາວບ້ານ ທ່ານນຶ່ງເວົ້າຕໍ່ ວິທຍຸເອເຊັຽເສຣີ ໃນວັນທີ່ 29 ກໍຣະກະດາ ນີ້ວ່າ:

“ກິ່ນເໝັນກໍທັມມະດາຢູ່ ແຂວງລົງມາຫັ້ນນະ ບາງມື້ມັນກໍເໝັນ ເພາະວ່າເຂົາສ້ອມແປງໂຮງງານ ບາງມື້ກໍບໍ່ເໝັນ ຢ້ານທາງເມືອງຫັ້ນແຫຼະ ເພາະວ່າລົມມັນຂຶ້ນໄປທາງຫັ້ນ ປົກກະຕິ ຄັນເຮົາຂ້າມໄປແລ້ວມັນເໝັນເນາະ.”

ປະຊາຊົນທ່ານນີ້ເວົ້າອີກວ່າ ພາຍຫຼັງເຈົ້າໜ້າທີ່ ຄນະສະພາປະຊາຊົນຂັ້ນແຂວງ ໄດ້ລົງພື້ນທີ່ແກ້ໄຂ ເຮັດໃຫ້ກິ່ນເໝັນ ຈາກໂຮງງານ ຫຼຸດຜ່ອນລົງ ແລະ ນໍ້າໃນຫ້ວຍ ອາລ້ອງ ທີ່ຢູ່ແຄມໂຮງງານ ກໍຖືກບໍາບັດ ຟື້ນຟູໃໝ່ ຈົນມີປາມາຢູ່ໄດ້ ຕາມປົກກະຕິແລ້ວ ຈາກທີ່ເຄີຍ ເປັນຫ້ວຍນໍ້າເນົ່າ ແລະມີກິ່ນເໝັນແຮງ ຍ້ອນນໍ້າເສັຽຈາກໂຮງງານ ໄຫລລົງຫ້ວຍ.

ຢ່າງໃດກໍຕາມ ຍານາງ ມະນີຈັນ ຈັນທະນາລີ ສະມາຊິກສະພາປະຊາຊົນ ແຂວງສວັນນະເຂດ ປະຈໍາເມືອງເຊໂປນ ກ່າວທາງໂທຣະພາບ ເຊໂປນວ່າການລົງພື້ນທີ່ ຕິດຕາມແກ້ໄຂບັນຫາເທື່ອນີ້ ຍ້ອນມີຫາງສຽງປະຊາຊົນ ຮ້ອງຮຽນເຣື້ອງກິ່ນເໝັນ ຈາກໂຮງງານຊຶ່ງ ທາງໂຮງງານ ກໍຊິ້ແຈງວ່າ ຈະເລັ່ງແກ້ໄຂບັນຫາ ດັ່ງກ່າວ ໂດຍໄວທີ່ສຸດ ຈະບໍ່ໃຫ້ມີກິ່ນເໝັນຕຶ່ມອີກ.

ໃນຂນະດຽວກັນ ກ່ຽວກັບບັນຫາ ທີ່ພະນັກງານ ໂຮງງານດັ່ງກ່າວ ຮ້ອງຮຽນວ່າ ບໍ່ມີມື້ພັກໃຫ້ແກ່ພວກເຂົາເຈົ້າ ແລະ ບໍ່ຈ່າຍເງິນຕາມ ນະໂຍບາຍ ຂອງບໍຣິສັດນັ້ນ ເຈົ້າໜ້າທີ່ ບໍຣິສັດໄດ້ຊີ້ແຈງວ່າ ທາງບໍຣິສັດ ກໍໄດ້ກໍານົດ ມື້ພັກໃຫ້ພະນັກງານ ເດືອນລະ 4 ມື້ ແລະ ໃຫ້ພັກຕາມວັນ ສໍາຄັນຕ່າງໆ ເປັນຕົ້ນ: ວັນຊາດ, ງານບຸນປີໃໝ່ລາວ ແລະ ວັນກັມມະກອນສາກົນ ແຕ່ຫາກພະນັກງານ ຄົນໃດມາ ເຮັດວຽກໃນມື້ພັກ ກໍຈະໄລ່ເງິນພິເສດໃຫ້ 3 ເທົ່າ ຂອງເງິນຄ່າຈ້າງ ຕໍ່ມື້ນັ້ນອີກ.

ຢ່າງໃດກໍຕາມ ໂຮງງານຜລິດເຈັ້ຽ ຂອງບໍຣິສັດ (Sun Paper Holding) ເປັນບໍຣິສັດຜລິດເຈັ້ຽຣາຍໃຫຍ່ ໃນປະເທດຈີນ, ໂຮງງານ ດັ່ງກ່າວ ໄດ້ສ້າງມົລພິດ ຕໍ່ປະຊາຊົນເມືອງເຊໂປນ ນັບແຕ່ປີ 2018 ເປັນຕົ້ນມາ ຍ້ອນການເຮັດວຽກ ຂອງຣະບົບບໍາບັດ ນໍ້າເສັຽ ບໍ່ມີຄຸນນະພາບພຽງພໍ ຈິ່ງເຮັດໃຫ້ສົ່ງກິ່ນເໝັນ.

ຄໍາເຫັນ (1)
Share

​ຄົນ​ລາວ​ແທ້

ຂໍສະແດງຄວາມຊົມເຊີຍ ທີ່ສະພາແຂວງສະຫວັນນະເຂດ ລົງໄປແກ້ໄຂບັນຫາ. ຫວັງວ່າ ບັນຫາ ທີ່ແກ່ຍາວມາເຖິງປະຈຸບັນນີ້ ຄົງຈະໄດ້ຮັບການແກ້ໄຂ ເພາະວ່າ ຜ່ານມາ ອຳນາດການປົກຄອງທ້ອງຖິ່ນ ກໍໍ່ເຮັດຫຍັງບໍ່ໄດ້ ຄ້າຍກັບວ່າ ໄປນຳເຂົາອ້ອຍຕ້ອຍ ເຮັດໃຫ້ປະຊາຊົນ ລຳບາກ ແລະ ເສຍຜົນປະໂຫຍດໄປຊື່ໆ. ການເປີດກວ້າງໃຫ້ນັກລົງທຶນເຂົ້າມາ ປະຊາຊົນຕ່າງກໍ່ຫວັງວ່າ ຈະໄດ້ຮັບຜົນປະໂຫຍດແລະຊີວິດ ການເປັນຢູ່ທີ່ດີຂຶ້ນ ແຕ່ຊ້ຳພັດກົງກັນຂ້າມ ປານວ່າ ເອົາຕ່າງຊາດມາກົດຂີ່ພວກເຮົາຕື່ມ ພັກລັດອຳນາດການປົກຄອງທ້ອງຖິ່ນ ກົດຂີ່ຂົມເຫງ ປະຊາຊົນພວກເຮົາ ຍັງບໍ່ພໍ. ຄຳວ່າ ປົດປ່ອຍທົ່ວປະເທດ ອອກຈາກສັກດິນາ ແລະ ພວກລ່າເມືອງຂຶ້ນ ມັນໝາຍຄວາມວ່າແນວໃດ ມາເຖິງທຸກມື້ນີ້ ຄືວ່າ ຍັງມີຢູ່ໃນສັງຄົມລາວ. ເພງແດນແຫ່ງອິດສະລະ ທີ່ເປີດຕາມສະຖານີວິດທະຍຸ ແລະ ທໍລະພາບນັ້ນ ການນຳແລະກົມການເມືອງກະຟັງແລະເຂົ້າໃຈຄວາມໝາຍຢູ່ບໍ່ ຄຳວ່າ ຊົນຊາດທັງມວນມີສິດເສລີ ໝາຍວ່າ ແນວໃດ? ຮ່ວມສາມັກຄີ ເປັນພີ່ນ້ອງດຽວ ຕໍ່ສູ້ເດັດດ່ຽວ ສ້າງຊີວິດໃໝ່ ໝາຍຄວາມວ່າ ແນວໃດ? ເມກມືດຜ່ານໄປ ຊີວິດໃໝ໋ເຂົ້າມາແທນທີ່ ດິນແດນແຫ່ງນີ້ ສຸດທີ່ລ້ຳຄ່າ (ລ້ຳຄ່າ ສຳລັບຜູ້ໃດ?) ບັນດານັກຮ້ອງ ກະຮ້ອງຫ້າວໃສ່ດຸດໆ ກະບໍ່ເຂົ້າໃຈຄວາມໝາຍຫຍັງ ຮ້ອງຕົວະກັນຊື່ໆ
ເວົ້າຫລາຍມັນຍາວມັນຍືດ ປານເປົ່າປີ່ໃສຫູງົວ

Aug 01, 2019 12:18 AM

ເຕັມຫນ້າ