ຈີນເຈາະອຸໂມງນໍ້າຫ້ວຍປາມ້ອມ ຂຸ້ນ

ໄຊຍາ
2020-02-25
ອີແມວລ໌
ຄໍາເຫັນ
Share
ພິມ
ສະພາບ ນໍ້າຫ້ວຍປາມ້ອມ ທີ່ປ່ຽນສີ ຍ້ອນເຄມີຈາກ ການເຈາະອຸໂມງ
ສະພາບ ນໍ້າຫ້ວຍປາມ້ອມ ທີ່ປ່ຽນສີ ຍ້ອນເຄມີຈາກ ການເຈາະອຸໂມງ
ຮູບຈາກ : ນັກຂ່າວພົລເມືອງ

ນໍ້າຫ້ວຍປາມ້ອມຂຸ້ນສ້າງຜົລກະທົບໃຫ້ກັບປະຊາຊົນ ໃນພື້ນທີ່ບໍ່ສາມາດອອກໄປ ຫາປາ ແລະ ໃຊ້ນໍ້າໃນຫ້ວຍໄດ້ຍ້ອນກັງວົນຢ້ານວ່າມີ ສານເຄມີປົນເປື້ອນ. ດັ່ງປະຊາຊົນບ້ານຜາຮອມ ເມືອງວັງວຽງແຂວງວຽງຈັນ ທີ່ໄດ້ຮັບຜົລກະທົບກ່າວຕໍ່ນັກຂ່າວ ເອເຊັຽເສຣີໃນວັນທີ 25 ກຸມພາ ວ່າ: ນໍ້າທີ່ໄຫຼມາແຕ່ບ້ານສົມສະຫວາດ ເຊິ່ງເປັນຈຸດບໍຣິສັດຈີນ ກຳລັງຂຸດເຈາະອຸໂມງ ທາງຣົດໄຟ ຫ່າງຈາກບ້ານຜາຮອມຂຶ້ນໄປ ທາງເໜືອ ປະມານ 06 ຫຼັກ ຄາດວ່າເປັນສາເຫດເຮັດໃຫ້ນໍ້າຫ້ວຍປາມ້ອມຂຸ້ນ.

F-Tunnel

"ມັນສິໄປກອງຈັ່ງໃດເຄມີ ເຂົາປ່ອຍມາແຕ່ກາສີເຈາະອຸໂມງ ເຂົາສີດໃສ່ປູນໃຫ້ມັນແຂງ ສະເພາະເຂົາເວົ້າເຈາະອຸໂມງ ທາງຣົດໄຟຫັ້ນ ປາ ລະບໍ່ໄດ້ກິນ ກິນບໍ່ໄດ້."

ໃນຂນະທີ່ຜູ້ປະກອບຮ້ານອາຫານ ໃນເມືອງວັງວຽງກ່າວຕໍ່ ນັກຂ່າວເອເຊັຽເສຣີວ່າ ນໍ້າໃນຫ້ວຍປາມ້ອມ ເກີດເປັນນໍ້າຂຸ້ນ ມາຫຼາຍມື້ແລ້ວ, ດັ່ງໃນວັນທີ 24 ກຸມພາ ຜ່ານມານໍ້າໃນຫ້ວຍຂຸ້ນ ເຖິງຂັ້ນນໍ້າປ່ຽນສີ ເຊິ່ງທາງຮ້ານໄດ້ແຈ້ງຫ້າມ ນັກທ່ອງທ່ຽວ ລົງຫຼິ້ນນໍ້າ:

"ແມ່ນແຫຼະບໍ່ຮູ້ແລ້ວ ເຮົາບໍ່ໄດ້ໃຫ້ເຂົາເຈົ້າລົງຫຼິ້ນນໍ້າ ເຮົາໃຫ້ເຂົາເຈົ້າກິນເຂົ້າທາງເທີງພີ້ ມັນມີທັງທາງຣົດໄຟ ທາງຫຍັງແລ້ວ."

ຜູ້ປະກອບການກ່າວຕື່ມວ່າ ຜ່ານມາຍັງບໍ່ທັນ ເຫັນເຈົ້າໜ້າທີ່ ພາກສ່ວນກ່ຽວຂ້ອງ ລົງມາກວດກາຫ້ວຍປາມ້ອມ ເທື່ອ. ຕໍ່ກໍຣະນີດັ່ງກ່າວ ເຈົ້າໜ້າທີ່ຫ້ອງວ່ການປົກຄອງເມືອງວັງວຽງ ໄດ້ກ່າວຕໍ່ນັກຂ່າວເອເຊັຽເສຣີວ່າ ຍັງບໍ່ທັນຮູ້ເຖິງບັນຫາດັ່ງກ່າວ ແຕ່ຈະແຈ້ງໃຫ້ທາງພາກສ່ວນ ກ່ຽວຂ້ອງ ລົງກວດກາເບິ່ງ:

"ຈັງວ່າເດີ້ ອັນນີ້ເຮົາກາບໍ່ອັນນັ້ນ ເຈົ້າ, ຍັງບໍ່ຮູ້ເທື່ອມີແຕ່ວ່າຢາກໃຫ້ໄປເບິ່ງຫ້ວຍປາມ້ອມ ຊິເບາະ ເຈົ້າ, ສິບອກໜ່ວຍງານກ່ຽວຂ້ອງ."

ສ່ວນເຈົ້າໜ້າທີ່ຜແນກຊັພຍາກອນ ທັມມະຊາດ ແລະ ສິ່ງແວດລ້ອມ ເມືອງວັງວຽງ ກໍໄດ້ຢືນຢັນວ່າ ຍັງບໍ່ທັນຮູ້ວ່າເກີດບັນຫານໍ້າຂຸ້ນທີ່ ຫ້ວຍປາມ້ອມ ວ່າເກີດມາຈາກສາເຫດໃດກັນແທ້.

"ບໍ່ໆ ບໍ່ເຫັນບໍ່ຮູ້ຄືດຽວຍັງບໍ່ເຫັນເຂົາໂພສເຂົາຍັງບໍ່ເຫັນ."

ກ່ອນໜ້ານີ້ໃນວັນທີ 17 ກຸມພາ 2020 ຜ່ານມາໄດ້ເກີດເຫດປາຕາຍຈຳນວນຫຼາຍ ໃນສາຍນໍ້າລີກ ໃນບ້ານວຽງແກ້ວ ແລະ ບ້ານໃກ້ຄຽງ ຂອງ ເມືອງກາສີ ສາເຫດມາຈາກຖັງເຄມີ ທີ່ໃຊ້ໃນການຂຸດເຈາະອຸໂມງ ທາງຣົດໄຟ ລາວ-ຈີນ ຮົ່ວໄຫຼລົງຫ້ວຍ ຫີນຊາຍ ພາຍຫຼັງກວດກາ ພົບສາເຫດ ແລ້ວທາງການລາວໄດ້ປັບໃໝ ບໍຣິສັດ ຊິໂນໄຮໂດຣ ມູນຄ່າ 70 ລ້ານກີບ ແລະ ໃຫ້ຟື້ນຟູສະພາບຫ້ວຍນໍ້າລີກ ກັບຄືນສູ່ ສະພາບປົກກະຕິ. ເຊັ່ນດຽວກັນກັບທ້າຍປີ 2018 ການເຈາະອຸໂມງທາງຣົດໄຟ ກໍໄດ້ສ້າງ ຜົລກະທົບໃຫ້ກັບນໍ້າຊອງ ເຊິ່ງ ເປັນແມ່ນໍ້າທີ່ ດຶງດູດນັກທ່ອງທ່ຽວ ຂອງ ເມືອງວັງວຽງ.

ເຕັມຫນ້າ