ເສັຽຊີວິດ 1 ຄົນ, ຫຼາຍຄົນບາດເຈັບ ຍ້ອນໂຮງງານຊີມັງ ລະເບີດຫິນ

ອຸ່ນ​ແກ້ວ ສຸກ​ສະ​ຫວັນ
2019-10-06
ອີແມວລ໌
ຄໍາເຫັນ
Share
ພິມ
ໂຮງ​ງານ​ຊີ​ມັງຈີນ ລະ​ເບີດ​ຫິນ ຢູ່​ເມືອງ​ນ້ຳ​ບາກ ເຮັດ​ໃຫ້ຊາວ​ບ້ານ​ເສັຽ​ຊີ​ວິດ ແລະ ໄດ້​ຮັບ​ບາດ​ເຈັບ (ວັນ​ທີ 5 ຕຸ​ລາ 2019)
ໂຮງ​ງານ​ຊີ​ມັງຈີນ ລະ​ເບີດ​ຫິນ ຢູ່​ເມືອງ​ນ້ຳ​ບາກ ເຮັດ​ໃຫ້ຊາວ​ບ້ານ​ເສັຽ​ຊີ​ວິດ ແລະ ໄດ້​ຮັບ​ບາດ​ເຈັບ (ວັນ​ທີ 5 ຕຸ​ລາ 2019)
​ຮູບ​ພາບ: ນັກ​ຂ່າວ ພົ​ລ​ເມືອງ

ໂຮງງານຊິມັງ ຂອ​ງຈີນ ຢູ່ບ້ານໂພນມະນີ ເມືອງນ້ຳບາກ ແຂວງຫຼວງພຣະບາງ ໄດ້ເພີ່ມ​ການລະເບີດຫິນ ຢ່າງ​ແຮງ ໃນ​ວັນ​ທີ 5 ຕຸ​ລາ ເຮັດ​ໃຫ້​ຫິນ​ກ້ອນ​ໃຫ​ຍ່-ນ້ອຍ ຟົ້ງ​ກະ​ຈາຍ ເປັນ​ວົງ​ກວ້າງ ເຮັດໃຫ້ ຊາວບ້ານເສັຽຊີວິດ ຄາທີ່ 1 ຄົນ, ບາດເຈັບອີກ ຫຼາຍກ່ວາ 20 ຄົນ ແລະ ບ້ານ​ເຮືອນເສັຽ​ຫາຍຫຼາຍ​ຫລັງ, ອີງ​ຕາມ​ຄຳ​ເວົ້າ ຂອງ​ຊາວ​ບ້ານ ທີ່​ເຫັນ​ເຫດ​ການ ໃນ​ມື້​ວັນ​ທີ 6 ຕຸ​ລາ.

ໃນການລະເບີດຫິນ ຄັ້ງນີ້, ໂຮງງານຊິມັງຂອງຈີນ ໃຊ້ລະເບີດຂນາດໃຫຍ່ ແລະ ຫຼາຍກວ່າ ປົກກະຕິ, ແລະ ໂຮງງານດັ່ງກ່າວ ບໍ່ໄດ້ແຈ້ງເຕືອນ ໃຫ້ປະຊາຊົນຕ​ຣຽມ​ໂຕ ປ້ອງກັນ ແລະ ອົພຍົບ ອອກຈາກ ພື້ນທີ່ສ່ຽງ.

ຊາວບ້ານ ຜູ່ທີ່ຢູ່ໃກ້ໂຮງງານ ໄດ້ກ່າວຕໍ່ ວິ​ທ​ຍຸ ເອເຊັຽ ເສຣີ ໃນວັນທີ 6 ຕຸລາ ວ່າ:

“ທຸກໆມື້ ຫັ້ນປົກກະຕິ 5 ໂມງ ເຂົາກະຈູດ ມື້ວານນີ້ ຫັ້ນມັນແຮງ, ເຂົາໃສ່ ລະເບີດຫຼາຍ ກວ່າ ແຕ່ລະເທື່ອນ່າ.”

ຊາວບ້ານ ທ່ານນີ້ ກ່າວຕື່ມອີກວ່າ:

“ບໍ່ມີການແຈ້ງເຕືອນ ຫຍັງເລີຍນ່າ ການທີ່ ເຂົາຈະລະເບີດຫິນ ຊິອົພຍົບ ຊິເລົ່າ ຊິເຕືອນ ປະຊາຊົນ ບ້ານເມືອງ ປະຊາຊົນ ພະນັກງານ ຫຼືວ່າ ຄົນທີ່ຢູ່ ໃກ້ຄຽງນີ້ ເຂົາບໍ່ໄດ້ແຈ້ງເຕືອນ
ເຮົາຈັກໜ້ອຍ ບໍ່ຮູ້ຊ້ຳ.”

ຊາວບ້ານກ່າວວ່າ ຈຸດທີ່ມີ ການລະເບີດຫິນນັ້ນ ຫ່າງຈາກ ບ້ານໂພນມະນີ ປະມານ 500 ແມັດເທົ່ານັ້ນ ຈຶ່ງເຮັດໃຫ້ ກ້ອນຫິນຟົ້ງໄປໄກ ຕົກໃສ່ ປະຊາຊົນເສັຽຊີວິດ. ໄດ້ບາດເຈັບ ທັງບ້ານເຮືອນໄດ້ຮັບ
ຄວາມເສັຽຫຼາຍຫລັງ.

ຊາວບ້ານໂພນມະນີ ອີກທ່ານນຶ່ງ ກ່າວຕໍ່ ວິ​ທ​ຍຸ ເອເຊັຽ ເສຣີ ໃນວັນທີ 6 ຕຸລາ ວ່າ:

“ໃນ​ຕອນນີ້ ມີ​ຜູ່​ຍິງ ​ເສັຽ​ຊີ​ວິດ 1 ຄົນ, ສ່ວນວ່າ ຜູ່ທີ່ໄດ້ຮັບບາດ ເຈັບນັ້ນ ຍັງບໍ່ຮູ້ວ່າ ຈະເປັນແນວໃດ.”

ປັດຈຸບັນ, ຣັຖບານ ໄດ້ສົ່ງເຈົ້າໜ້າທີ່ ໄປກວດສອບ ຈຸດເກີດເຫດ ແລະ ຍັງບໍ່ທັນມີ ຂໍ້ມູນລະອຽດ ກ່ຽວກັບເຣື່ອງນີ້.

ທ່ານ ຄໍາມະນີ ອິນທິຣາດ, ຣັຖມົນຕຼີກະຊວງພະລັງງານ ແລະ ບໍ່ແຮ່, ໄດ້ກ່າວຕໍ່ ວິ​ທ​ຍຸ ເອເຊັຽ ເສຣີ ໃນວັນທີ 6 ຕຸລາ ວ່າ:

“ໂອ, ດຽວນີ້ ເຮົາກຳລັງ ໃຫ້ຄົນໄປກວດກາເບິ່ງເດີ ບໍ່ທັນໄດ້ມີ ຄຳຕອບສົ່ງມາ ໃຫ້ເຂົາໄປກວດ ກາລະ ມື້ແລງນີ້ ຄືຊິໄດ້.”

ອີງ​ຕາມ​ຣາຍ​ງານ ເບື້ອງ​ຕົ້ນ, ຜູ້ເສັຽຊີວິດ ເປັນຜູ່ຍິງ, ສ່ວນວ່າ ຜູ່ທີ່​ໄດ້ບາດເຈັບນັ້ນ ໄດ້ຖືກສົ່ງ ໄປປິ່ນປົວ ຢູ່ໂຮງໝໍ ແຂວງຫລວງພຣະບາງ, ແຕ່ຈຳນວນ ຜູ່ເສັຽຊີວິດ ແລະ ໄດ້​ຮັບ​ບາດ​ເຈັບ ທີ່​ແທ້​ຈິງ​ນັ້ນ ເຈົ້າໜ້າທີ່ ຍັງບໍ່ທັນ ມີການເປີດເຜີຍເທື່ອ.

ຄໍາເຫັນ (1)
Share

ຄຳ​ເພັດ

ຈາກ ​ນ້ຳ​ບາກ

​ລັ​ດ​ຖະ​ບານ​ສ​ປ​ປ​ລ ​ຕ້ອງ​ຮັບ​ຜິດ​ຊອບ​ເຕັມ​ຯ ​ເພາະ​ລັດ​ຖະ​ບານ​ລາວ ​ເປັນ​ຜູ້​ອາ​ນຸ​ຍາດ​ໃຫ້​ພວກ​ຈີນ ​ມາ​ທຳ​ລາຍ​ພູ​ຜາ​ແລະ​ປ່າ​ໄມ້ ​​ແຕ່​ເໜືອ​ຕ​ລອດ​ໄຕ້. ເຂື່ອນ​ແຕກ​ຢຸ່​ພາກ​ໄຕ້​ກາ​ຍ້ອນ​ທັງ​ລັດ ​ຢາກ​ແຕ່​ໄດ້​ບໍ​ຄຳ​ເນີງ​ຖືງ​ການ​ສູນ​ເສັຽ ​ທີ່​ຈ​ະ​ມີ​ຕໍ່​ປ​ຊ​ຊ​ລາວ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Oct 09, 2019 08:43 AM

ເຕັມຫນ້າ