ສປຊ ໃຫ້ທຶນຊ່ອຍເຫຼືອ ແປງທາງ

ໄຊຍາ
2019-01-29
ອີແມວລ໌
ຄໍາເຫັນ
Share
ພິມ
ຊາວບ້ານຫາດຊຽງດີ ແຂວງຄໍາມ່ວນ ທັງຍິງແລະຊາຍ ອອກແຮງງານ ແປງຫົນທາງ ພາຍຫຼັງທີ່ໄດ້ທຶນ ຈາກ ສະຫະປະຊາຊາຕ ໄປຊື້ດິນມາຖົມທາງ.
ຊາວບ້ານຫາດຊຽງດີ ແຂວງຄໍາມ່ວນ ທັງຍິງແລະຊາຍ ອອກແຮງງານ ແປງຫົນທາງ ພາຍຫຼັງທີ່ໄດ້ທຶນ ຈາກ ສະຫະປະຊາຊາຕ ໄປຊື້ດິນມາຖົມທາງ.
ຮູບພາບອຸປຖັມໂດຍ: ນັກຂ່າວແຂວງຄໍາມ່ວນ

ປະຊາຊົນບ້ານຫາດຊຽງດີ ເມືອງໜອງບົກ ແຂວງຄໍາມ່ວນ ຈໍານວນ 140 ປາຍຄົນ, ສມັກໄປສ້ອມແປງຫົນທາງ ແຕ່ບ້ານຂອງພວກຕົນ ໄປຫາ ບ້ານດົງສະຫງໍາ ທີ່ມີຄວາມຍາວ 1 ກິໂລແມັຕ, ຍ້ອນໄດ້ຮັບເງິນຊ່ອຍເຫຼືອຈາກໂຄງການ ເພື່ອການພັທນາຂອງ ສະຫະປະຊາຊາຕ ຫລື UNDP ເປັນເທື່ອທໍາອິດ ຈໍານວນ 30 ປາຍລ້ານກີບ. ເງິນຈໍານວນດັ່ງກ່າວ ແມ່ນເພື່ອຊື້ດິນຖົມທາງເສັ້ນນີ້ 300 ປາຍຣົດ, ພາຍຫຼັງ ຖືກນໍ້າຖ້ວມໜັກເມື່ອປີກາຍ. ດັ່ງເຈົ້າໜ້າທີ່ຫ້ອງການປົກຄອງ ເມືອງໜອງບົກ ໄດ້ກ່າວຕໍ່ວິທຍຸເອເຊັຽ ເສຣີ ໃນມື້ວັນທີ 22 ມົກກະຣາ ນີ້ວ່າ:

“ຫາຈະໄດ້ຮັບປີນີ້ແຫລະເຈົ້າ, ເປັນຂອງໂຄງການສະຫະປະຊາຊາດ, ມາແກ້ໄຂບັນຫາ ທຶນຊ່່ອຍເຫລືອ, ທຶນຜູ້ຫລັງພັຍພິບັດ ເປັນເງິນ 30 ປາຍລ້ານກີບ, ກໍຊື້ດິນມາຖົມ ແລະໃຫ້ປະຊາຊົນຖົມນໍາ, ເງິນເຮົາມີໜ້ອຍ ເຮົາບໍ່ສາມາດຈ້າງຂະເຈົ້າໄດ້."

ມາເຖິງປະຈຸບັນ, ການສ້ອມແປງທາງນັ້ນ ສຳເຣັຈ 85% ແລ້ວ, ແລະ ຄາດວ່າຈະສໍາເຣັດ ແລະເປີດໃຊ້ໃນໄວໆນີ້. ສ່ວນວ່າທາງດິນແດງ ທີ່ສ້ອມແປງເທື່ອນີ້, ຈະທົນທານໄດ້ສ່ຳໃດນັ້ນ, ເຈົ້າໜ້າທີ່ເມືອງໝອກບົກ ບອກວ່າ ບໍ່ຮັບປະກັນ ແລະ ຫາກປີນີ້ຖືກ ນໍ້າຖ້ວມໜັກຄືປີກາຍ, ທາງກໍຈະເປ່ເພຄືເກົ່າ.

ທ່ານກ່າວຕື່ມອີກວ່າ, ເງິນທີ່ໄດ້ຈາກການຊ່ອຍເຫຼືອຂອງໂຄງການເພື່ອການພັທນາ,ຂອງສະຫະປະຊາຊາຕຈໍານວນທີ່ວ່ານັ້ນ, ກໍບໍ່ພຽງພໍ ເພື່ອປູຢາງເສັ້ນທາງສາຍນີ້. ປະຈຸບັນ, ທາງເມືອງໄດ້ສເນີຂໍງົບປະມານຈາກແຂວງມາສົມທົບແລ້ວ.

“ພວກເຮົາກໍຂໍຄວາມຊ່ວຍເຫລືອຈາກເພິ່ນ ກໍບໍ່ພຽງພໍແຫລະນໍເຈົ້າ, ກໍຍັງມີຫລາຍຈຸດຢູ່ ທີ່ພວກເຮົາພະຍາຍາມສເນີເພິ່ນຢູ່, ເພິ່ນເວົ້າວ່າ ຖ້າເບິ່ງໂຄງການລະຍະສອງ, ເພິ່ນຈະເບິ່ງໂຕນີ້ກ່ອນ ແມ່ນແຫລະ, ໂຕເຮົາກໍາລັງປະຕິບັດຢູ່ນີ້."

ເສັ້ນທາງສາຍນີ້, ມີຄວາມສໍາຄັນຫຼາຍຕໍ່ຊາວບ້ານຫາດຊຽງດີ ແລະ ບ້ານດົງສະຫງໍາ, ຍ້ອນເປັນເສັ້ນທາງທີ່ຊາວບ້ານໄປມາຫາສູ່ກັນ ແລະ ລໍາລຽງຜົລຜລິດ ທັງເຄື່ອງປູກຂອງຝັງ ແລະ ສັດລ້ຽງໄປຂາຍຕາມຕລາດ.

ອີງຕາມຄວາມເວົ້າຂອງເຈົ້າໜ້າທີ່ທ່ານດຽວກັນນີ້, ກ່ອນຈະໄດ້ເງິນຊ່ອຍເຫຼືອຈາກໂຄງການເພື່ອການພັທນາຂອງສຫະປະຊາຊາຕ, ຊາວບ້ານ ໄດ້ພາກັນສ້ອມແປງທາງສາຍນີ້ດ້ວຍຕົນເອງ, ພໍໃຫ້ໄປມາຫາສູ່ກັນໄດ້, ເຖິງຈະມີຂີ້ຝຸ່ນໃນຍາມແລ້ງ ແລະ ເປັນຂີ້ຕົມໃນຍາມຝົນກໍຕາມ.

ເຕັມຫນ້າ