ສູນບັນເທົາທຸກຊົ່ວຄາວ ຂອງຜູ້ ປະສົພພັຍ

ສຸພັດຕາ
2018-07-26
ອີແມວລ໌
ຄໍາເຫັນ
Share
ພິມ
ປະຊາຊົນປະສົພພັຍ ຈາກ ສັນເຂື່ອນເຊປຽນ-ເຊນໍ້ານ້ອຍ ແຕກ ທີ່ ມາພັກເຊົາຢູ່ສູນ ບັນເທົາທຸກຊົ່ວຄາວ ເມືອງປາກຊ່ອງ ແຂວງຈໍາປາສັກ
ປະຊາຊົນປະສົພພັຍ ຈາກ ສັນເຂື່ອນເຊປຽນ-ເຊນໍ້ານ້ອຍ ແຕກ ທີ່ ມາພັກເຊົາຢູ່ສູນ ບັນເທົາທຸກຊົ່ວຄາວ ເມືອງປາກຊ່ອງ ແຂວງຈໍາປາສັກ
RFA/LX

ໃນວັນທີ 25 ກໍຣະກະດາ ປະມານ 17:00 ໂມງແລງ ຕາມເວລາທ້ອງຖິ່ນໃນລາວ, ເຈົ້າໜ້າທີ່ຄນະຮັບຜິດຊອບ ຊ່ອຍເຫຼືອຜູ້ປະສົພພັຍ ນ້ຳຖ້ວມ ທີ່ເຂດເມືອງສນາມໄຊ, ແຂວງອັດຕະປື ໄດ້ຊ່ອຍເຫຼືອປະຊາຊົນ ປະມານ 800 ປາຍຄົນ ໃນ 172 ຄອບຄົວ ໃຫ້ມາອາສັຍ ຢູ່ສູນບັນເທົາທຸກຊົ່ວຄາວ ທີ່ເມືອງປາກຊ່ອງ ແຂວງຈຳປາສັກ ພາຍຫຼັງທີ່ ເຂື່ອນເຊປຽນ-ເຊນ້ຳນ້ອຍ ແຕກ ເມື່ອວັນທີ 23 ກໍຣະກະດາ ຜ່ານມາ. ມີປະຊາຊົນຈາກ 3 ບ້ານ ໃນເຂດເມືອງສນາມໄຊ, ແຂວງອັດຕະປື ທີ່ມາຢູ່ສູນແຫ່ງນີ້. ດັ່ງເຈົ້າໜ້າທີ່ກ່ຽວຂ້ອງ ໄດ້ກ່າວຕໍ່ ເອເຊັຽເສຣີ ຕອນນຶ່ງວ່າ:

“3 ບ້ານ, ບ້ານຫີນລາດ, ບ້ານໄຊດອນໂຂງ ລະກະ ບ້ານໜອງຫີນ ຂຶ້ນກັບເມືອງອັດຕະປື ເມືອງສນາມໄຊ. ດຽວນີ້ມາຢູ່ມັນມີ 3 ຈຸດ, ຈຸດ 1 ມັນຢູ່ໄທ່ຮົ່ວ, ຈຸດ 1 ຢູ່ດາວເຮືອງ ລະຈຸດ 1 ມັນຢູູ່ປາກປ້ອງ, ສາງດາວເຮືອງໂລດໄດ໋ນິ໋. ດຽວນີ້ຈຳນວນພົລນີ້ ປະສານໄດ້, ແຕ່ວ່າແຍກ ຍັງບໍ່ທັນໄດ້ ເຮົາຍັງໄດ້ 800 ຄົນດຽວນີ້. 800 ຄົນມັນຖືກຢູ່ 172 ຄອບຄົວ."

ໃນຂນະດຽວກັນ, ນາງແພດພາກສນາມ ທີ່ສູນບັນເທົາທຸກຊົ່ວຄາວ ນາງນຶ່ງ ກໍໄດ້ກ່າວຕໍ່ຜູ້ສື່ຂ່າວເອເຊັຽເສຣີ ເຊັ່ນດຽວກັນວ່າ ພາຍໃນສູນ ມີເດັກນ້ອຍ ທີ່ຂາດສານອາຫານ ຈຳນວນຫຼາຍ ທີ່ພໍ່ແມ່ໄດ້ພາມາອາສັຍ ຢູ່ສູນບັນເທົາທຸກ ຊົ່ວຄາວນີ້ ມີທັງເດັກອ່ອນ ແລະ ແມ່ລູກອ່ອນ, ເຊິ່ງທາງສູນ ມີຄວາມຕ້ອງການນົມ ເພື່ອຈະບຳລຸງທັງແມ່ແລະລູກນ້ອຍ:

“ແມ່ນ; ເດັກນ້ອຍທີ່ວ່າເຂົາອົພຍົບມາຊິຂາດ ແບບບ້ານນອກມັນຊິຂາດສານອາຫານ ຈັ່ງຊີ້ນ່າ. ຢາກໄດ້ແບບເປັນນົມ ທີ່ວ່າບຳລຸງແມ່ແນ່ ລະກະລູກແດ່, ຊີ້ນ່າ. ເດັກນ້ອຍຊໍ່າຣະດັບວ່າ 2 ປີຂຶ້ນໄປນີ້ກະຫຼາຍ."

ນາງ ກ່າວຕື່ມວ່າ ເດັກອ່ອນບາງຄົນ ຫາກໍ່ເກີດໄດ້ພຽງແຕ່ 2-3 ມື້ ບໍ່ທັນຮອດ 1 ສັປດາກໍມີ ແລະທີ່ໂຊກຮ້າຍໄປກວ່ານັ້ນມີເດັກນ້ອຍຜູ້ນຶ່ງ ອາຍຸພຽງ 8 ເດືອນ ທີ່ພໍ່ແມ່ຂອງນາງໄດ້ຖືກນ້ຳພັດໄປ, ດຽວນີ້ປະຊາຊົນພາຍໃນບ້ານ ເປັນຜູ້ຊ່ອຍກັນເບິ່ງແຍງ ໃນເບື້ອງຕົ້ນ.

ປັດຈຸບັນ, ເຈົ້າໜ້າທີ່ກ່ຽວຂ້ອງ ກໍຍັງສືບຕໍ່ກູ້ພັຍ ແລະ ຊ່ອຍເຫຼືອຊາວບ້ານ ທີ່ຍັງຕິດຄ້າງຕາມ ສະຖານທີ່ຕ່າງໆ ເຂົ້າມາຢູ່ເຂດປອດພັຍ ທີ່ສູນບັນເທົາທຸກ ຊົ່ວຄາວຕລອດເວລາ ແລະ ກໍທະຍອຍມາເລື້ອຍໆ.

ຄໍາເຫັນ (1)
Share

(

I wonder what Laos did to deserve such a criminal government. No words in a dictionary could be strong enough to condemn this barbaric gang of murderers.They stold money from Lao people and now they're going to steal aid from foreign countries for their own benefit. Animals that's what you are Lao leaders!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 01, 2018 06:47 AM

ເຕັມຫນ້າ