ເສັ້ນທາງເປ່ເພ ທັງແລ້ງ ທັງຝົນ

ສຸພັດຕາ
2020-08-14
ອີແມວລ໌
ຄໍາເຫັນ
Share
ພິມ
ຖນົນຫົນທາງ ໃນຄຸ້ມບ້ານເຮືອນ ຢູ່ ນະຄອນຫຼວງວຽງຈັນ
ຖນົນຫົນທາງ ໃນຄຸ້ມບ້ານເຮືອນ ຢູ່ ນະຄອນຫຼວງວຽງຈັນ
RFA/PN

ຊາວບ້ານຫຼາຍຄົນ ໃນເມືອງໄຊທານີ ນະຄອນຫຼວງວຽງຈັນ ຈົ່ມວ່າ ເສັ້ນທາງຣະຫວ່າງ ບ້ານນາທົ່ມ-ບ້ານວຽງແກ້ວ ເປ່ເພໜັກ ເປັນຂຸມ ເປັນບວກ ແລະ ມີນໍ້າຖ້ວມຂັງ ກະທົບຕໍ່ ການສັນຈອນໄປ-ມາ ຂອງຊາວບ້ານ, ດັ່ງເຈົ້າຂອງຮ້ານອາຫານແຫ່ງນຶ່ງ ໃນເມືອງໄຊທານີ ກ່າວຕໍ່ວິທຍຸ ເອເຊັຽເສຣີ ໃນວັນທີ 13 ສິງຫາ ນີ້ວ່າ:

“ຍາມແລ້ງກໍຂີ້ຝຸ່ນ ຍາມຝົນກະເປັນຂຸມເປັນບໍ່ ຂ້ອຍກະຈ້າງຣົດມາຖົມ ຖົມກະ ຝົນຕົກກະເປັນຄືເກົ່າ ໂອ້ລໍາບາກແຫຼະ ຣົດຕໍ່າໄປບໍ່ໄດ້ ເລີ່ມເຂົ້າຝົນມາມັນກໍເປັນ ເປັນມາຫຼາຍເດືອນແລ້ວ ຍ້ອນຣົດຫຼາຍແດ່ ຣົດແກ່ດິນຫຼາຍເນາະ ແກ່ດິນເຮັດທາງຣົດໄຟ ແລ້ວກະທາງບໍ່ໄດ້ ມາຕຖານ ແດ່.”

ທ່ານກ່າວຕື່ມວ່າ ທາງເສັ້ນນີ້ ມີໄລຍະທາງປະມານ 5 ກິໂລແມັດ ເປ່ເພມາຫຼາຍປີແລ້ວ ຍາມແລ້ງກໍມີຂີ້ຝຸ່ນຫຼາຍ, ຍາມຝົນກໍເປັນຂີ້ຕົມ, ທີ່ຜ່ານມາທາງເສັ້ນນີ້ ເປັນທາງປູຢາງໄປ-ມາ ສະດວກສະບາຍ ແຕ່ພໍເມື່ອມີການ ສ້າງທາງຣົດໄຟ ລາວ-ຈີນ ກໍມີຣົດບັນທຸກຂນາດໃຫຍ່ ສັນຈອນໄປມາທຸກມື້ ເຮັດໃຫ້ທາງເປ່ເພ ແຕ່ບໍ່ມີການສ້ອມແປງຄືນ ຈົນເຮັດໃຫ້ທາງເປ່ເພໜັກ ມາຮອດທຸກມື້ນີ້.

ໃນຂນະດຽວກັນ ຊາວບ້ານຜູ້ນຶ່ງ ໃນເມືອງໄຊທານີ ທີ່ໃຊ້ທາງເສັ້ນນີ້ເປັນປະຈໍາ ກໍເວົ້າວ່າ ການສັນຈອນໄປ-ມາ ຜ່ານທາງເສັ້ນນີ້ລໍາບາກ ຫຼາຍ, ໄລຍະຜ່ານ ກໍເຫັນແຕ່ທາງເມືອງ ເອົາດິນມາຖົມ ແລ້ວກໍເກດດິນໃຫ້ພຽງຊື່ໆ ແຕ່ບໍ່ໄດ້ປູຢາງ ມາຮອດຍາມຝົນ ກະເປ່ເພຄືເກົ່າ:

“ທາງມັນຣົດຫຼາຍຫັ້ນນ່າ ສ່ວນໃຫຍ່ແມ່ນຣົດບັນທຸກ ທຸກປີ ສ່ວນຫຼາຍ ມີແຕ່ມາຖົມ ຖົມໃຫ້ເກດຊື່ໆ ແລະກໍເປັນຄືເກົ່າ ທຸກໆໜ້າຝົນເປັນ ແນວນີ້ ໂລດ ກໍລໍາບາກແຫຼະ ຣົດນິ່ມຸ່ນໝົດເລີຍ ແຫຼະນິ່ ກວ່າຈະອອກບ້ານໄດ້ ຈົນໄມ້ໄດ້ຢາກອອກບ້ານ.”

ຊາວບ້ານອີກຄົນນຶ່ງ ໃນເມືອງໄຊທານີ ກໍເວົ້າຄືກັນວ່າ ທາງເສັ້ນນີ້ ເປ່ເພມາຫຼາຍປີແລ້ວ ແລ້ວກໍເຮັດໃຫ້ຫຍຸ້ງຍາກ ໃນການເດີນທາງ ໄປ-ມາ ໂດຍສະເພາະໃນຣະດູຝົນຈະລໍາບາກທີ່ສຸດ ນອກຈາກນີ້ແລ້ວໃນໄລຍະ 2-3 ປີມານີ້ ມີການສ້າງທາງຣົດໄຟລາວ-ຈີນ ກໍມີ ຣົດບັນທຸກຂນາດໃຫຍ່ ຂົນຫິນ,  ຂົນປູນ ສັນຈອນໄປ-ມາທຸກມື້:

“ໂອ່ຍໜັກ ລໍາບາກຫຼາຍ ມັນເປັນຂຸມເປັນບໍ່ ນໍ້າຂັງ ແລ້ວຣົດນ້ອຍແລ່ນບໍ່ໄດ້ ແລ້ວດຽວນີ້ ບໍ່ຮູ້ເລີຍວ່າ ຂຸມໃດມັນເລິກມັນຕື້ນນະ ເສັຍຫາຍ ທຸກປີ ໜ້າຝົນບໍ່ໜ້າຝົນ ກະແບບນີ້ແຫຼະ ຊ່ວງກ່ອນໜ້າຝົນ ມັນມີທາງຣົດໄຟ ລາວ-ຈີນ ຣົດສິບລໍ້ໃຫຍ່ໆ ແກ່ປູນແກ່ດິນ ມາຖົມທາງຣົດໄຟ.”

ຊາວບ້ານຜູ້ນີ້ກ່າວຕື່ມວ່າ ເດືອນກັນຍາ ທີ່ຈະມາເຖິງນີ້ ເດັກນ້ອຍນັກຮຽນ ກໍຈະເປີດສົກຮຽນແລ້ວ ກໍຮູ້ສຶກກັງວົນ ແລະເປັນຫ່ວງໃນການ ສັນຈອນ ຖ້າວ່າທາງຍັງເປັນສະພາບນີ້ຢູ່ ຢ້ານວ່າຈະເກີດອຸບັດຕິເຫດໄດ້.

ກ່ຽວກັບເຣື່ອງດັ່ງກ່າວນີ້ ເຈົ້າໜ້າທີ່ຫ້ອງການໂຍທາທິການແລະຂົນສົ່ງ ເມືອງໄຊທານີ ທ່ານນຶ່ງກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ຮັບຮູ້ແລ້ວວ່າທາງເສັ້ນບ້ານນາທົ່ມ ບ້ານວຽງແກ້ວ ເປ່ເພ ແລະຕອນນີ້ ກໍມີການປະສານງານ ກັບພາກສ່ວນກ່ຽວຂ້ອງ ລົງໄປສ້ອມແປງ ໃນເບື້ອງຕົ້ນແລ້ວ, ດັ່ງທ່ານກ່າວວ່າ:

“ດຽວນີ້ ກໍໄດ້ປະສານງານກັນ ມີແຜນການ ມື້ນີ້ກະໄດ້ເລີ້ມແກ້ໄຂແລ້ວ ໄດ້ເອົາຣົດໄປສ້ອມແຊມແລ້ວ ແກ້ໄຂຊົ່ວຄາວກ່ອນ ຊິໄດ້ປັບປຸງໃຫ້ ໄດ້ຖາວອນ ສໍາລັບຟື້ນຟູ ທາງປູຢາງເນາະ.”

ເມື່ອວັນທີ 19 ກໍຣະກະດາ ຜ່ານມານີ້ ທ່ານບຸນທະວີ ເທບສຸວັນ ນາຍບ້ານ ບ້ານນາທົ່ມ ເມືອງໄຊທານີ ນະຄອນຫຼວງວຽງຈັນ ໄດ້ໃຫ້ ສັມພາດ ຕໍ່ສື່ທ້ອງຖິ່ນ ວ່າ ສາເຫດນຶ່ງ ທີ່ເຮັດໃຫ້ ເສັ້ນທາງເປ່ເພໜັກ ຍ້ອນມີຣົດບັນທຸກ ຂົນຫິນ, ຂົນປູນ ສັນຈອນໄປມາທຸກມື້ ເຊິ່ງໄດ້ ສເນີຜົລກະທົບດັ່ງກ່າວ ໄປຫາຫ້ອງການເມືອງໄຊທານີ ແລະຜແນກໂຍທາທິການແລະຂົນສົ່ງ ນະຄອນຫຼວງວຽງຈັນແລ້ວ ເມື່ອເດືອນ ກໍຣະກະດາຜ່ານມາ ແຕ່ຍັງບໍ່ຮູ້ວ່າ ຈະໄດ້ຮັບການສ້ອມແປງໃນມື້ໃດແທ້.

ເຕັມຫນ້າ