ນ້ຳຂອງປ່ຽນສີ ສັນຍານ ຜິດປົກກະຕິ

ຈຳ​ປາ​ທອງ
2019-12-06
ອີແມວລ໌
ຄໍາເຫັນ
Share
ພິມ
ສະ​ພາບ​ນ້ຳ​ຂອງ ຜິດ​ປົກ​ກະ​ຕິ ກາຍ​ເປັນ​ສີ​ຄາມ ທີີ່ແຂວງນະ​ຄອນ​ພ​ຣະ​ນົມ ປະ​ເທດ​ໄທ​ຍ ເຮັດ​ໃຫ້ຫຼາຍ​ຝ່າຍ​ກັງ​ວົນ
(ຮູບ​ຖ່າຍ​ເມື່ອ ຕົ້ນເດືອນທັນ​ວາ 2019)
ສະ​ພາບ​ນ້ຳ​ຂອງ ຜິດ​ປົກ​ກະ​ຕິ ກາຍ​ເປັນ​ສີ​ຄາມ ທີີ່ແຂວງນະ​ຄອນ​ພ​ຣະ​ນົມ ປະ​ເທດ​ໄທ​ຍ ເຮັດ​ໃຫ້ຫຼາຍ​ຝ່າຍ​ກັງ​ວົນ (ຮູບ​ຖ່າຍ​ເມື່ອ ຕົ້ນເດືອນທັນ​ວາ 2019)
ຂອບ​ໃຈຮູບ​​ຈາກ: ສູນຂ່າວນະຄອນພຣະນົມ

ນັກ​ເຄື່ອນ​ໄຫວ ​ດ້ານ​ສິ່ງ​ແລດ​ລ້ອມ ແລະ ​ນັກ​ວິ​ຊາ​ການໄທຍ ເວົ້າ​ວ່າ ​ນ້ຳ​ຂອງ​ໃສ ​ຜິດ​ປົກ​ກະ​ຕິ ທີ່​ກຳ​ລັງ​ເກີດ​ຂຶ້​ນ ​ຢູ່​ໃນ​ຫຼາຍເຂດ​ແຂວງ ຂອງ​ໄທຍ ແລະ​ ລາວ ຕັ້ງ​ແຕ່​ແຂວງ​ໄຊ​ຍະ​ບູ​ຣີ ລົງ​ໄປ​ເຖິງ ​ແຂວງ​ຈຳ​ປາ​ສັກ ​ເວ​ລາ​ນີ້ ແມ່ນເປັນ​ຍ້ອນ ​​ເຂື່ອນ​ໄຟ​ຟ້າ ​​ກັ້ນ​ແມ່​ນ້ຳ​ຂອງ ຫຼາຍ​ເຂື່ອນ ​ຢູ່​ປະ​ເທດຈີນ ແລະ ​ເຂື່ອນໄຊ​ຍະ​ບູ​ຣີ ​​ໃນ​ລາວ ​ກັກ​ຝຸ່ນ​ຕົມ ແລະ ​ແຮ່​ທາດ ​ທີ່​ອຸ​ດົມ​ໄວ້. ຖ້າ​ຫາກ ​ພາກ​ສ່ວນ​ທີ່​ກ່ຽວ​ຂ້ອງ ຍັງ​ບໍ່​ເລັ່ງ ​ແກ້​ໄຂ​ ເຣື້ອງ​ທີ່​ວ່າ​ນີ້ ​ໂດຍ​ໄວ ກໍ​ຈະ​ເກີດ​ ຜົລ​ກະ​ທົບ ​ຕໍ່​ປາ, ຕໍ່​ຄຸນ​ນະ​ພາບ​ນ້ຳ ແລະ ​ດິນ​ ຢູ່​ແຄມ​ຝັ່ງ ​ແມ່​ນ້ຳ​ຂອງ ຢ່າງ​ຮ້າຍ​ແຮງ​ໃນ​ອະ​ນາ​ຄົດ ​ອັນ​ໃກ້​ນີ້. ດັ່ງ​ທ່ານ ນິ​ວັດ ຣ້ອຍ​ແກ້ວ, ປະ​ທານ​ກຸ່ມ​ ຮັກ​ຊຽງ​ຂອງ ແຂວງ​ຊຽງ​ຣາຍ ​ຂອງ​ໄທຍ ກ່າວ​ຕໍ່​ ວິ​ທ​ຍຸ​ເອ​ເຊັຽ​ເສ​ຣີ ໃນ​ມື້​ວັນ​ທີ 5 ທັນ​ວາ ​ນີ້ວ່າ:

“ມັນກຳລັງ​​ ຈະເປັນສັນຍານ ຊີ້ໃຫ້ເຫັນວ່າ ແມ່ນ້ຳຂອງກຳລັງຈະຣີ່ມ ປ່ຽນແປງແລ້ວ. ຕາມການຄາດການ ກໍຄືຝຸ່ນຕົມ ຫຼືແຮ່ທາດ ທີ່ອຸດົມສົມບູນ ຖືກເຂື່ອນກັກໄວ້. ອັນນີ້ ເປັນສິ່ງທີ່ກຳລັງເກີດຂຶ້ນ. ຖ້ານ້ຳຂອງໃສ ຍ້ອນຝຸ່ນຕົມ ຖືກກັກ, ກໍ​​ໝາຍຄວາມວ່າຄວາມອຸດົມສົມບູນຂອງແມ່ນ້ຳຂອງ ຫາຍໄປແທ້ ຄືກັນກັບ ​​ຜົລການສຶກສາຂອງຄນະກຳມາທິການ ແມ່ນ້ຳຂອງ ຫລື MRC ທີ່ຣະບຸວ່າ ປີ 2040 ຝຸ່ນຕົມຈະຫາຍໄປ ຈາກປາກແມ່ນ້ຳຂອງຢູ່ວຽດນາມ. ນີ້ຄືສັນຍານ ທີ່ບອກວ່າ ນ້ຳໃນແມ່ນ້ຳຂອງຣີ່ມໃສຂຶ້ນ ຄືຝຸ່ນຕົມ ອາ​ເຣີ່ມຫາຍໄປແລ້ວ.”

ດ​ຣ. ເຊົາ​ວະລິດ ວິດ​ທະ​ຍາ​ນັນ, ນັກ​ວິ​ຊາ​ການ​ໄທຍ ​ດ້ານ​ປາ​ແມ່​ນ້ຳ​ຂອງ ກໍ​ເວົ້າ ​ໃນ​ມື້​ດຽວ​ກັນ​ນັ້ນ​ວ່າ ນ້ຳ​ໃນ​ແມ່​ນ້ຳ​ຂອງ​ ໃສ​ຜິດ​ປົກ​ກະ​ຕິ​ ນອກ​ຈາກ​ຈະ​ສົ່ງ ​ຜົລ​ກະ​ທົບ​ ຕໍ່​ປາ​ແລ້ວ, ຍັງ​ເຮັດ​ໃຫ້​ ຕາ​ຝັ່ງ​ແຄມ​ຂອງ ​ເຈື່ອນ​ນຳ​ດ້ວຍ.

“ທ່ານກ່າວ​​ດັ່ງມີເນື້ອໃນວ່າ ນ້ຳໃນແມ່ນ້ຳຂອງ ໃຕ້ເຂື່ອນໄຊຍະບູຣີ ໃສແມ່ນຍ້ອນເຂື່ອນກັກຝຸ່ນຕົມ ທີ່ອຸດົມສົມບູນເອົາໄວ້, ຍ້ອນຄວາມໄວຂອງນ້ຳຫຼ ປ່ຽນແປງ ຈາກການຫຼ​​ປົກກະຕິ ຕາມທັມຊາດ ມາຫຼ​​ຊ້າ ເຮັດໃຫ້ຝຸ່ນຕົມສ່ວນນຶ່ງຕົກລົງໃຕ້ພື້ນນ້ຳ, ຈະເຮັດໃຫ້ດິນຕາຝັ່ງ ເຈື່ອນໄວຂຶ້ນ.”

ແລະ ​ຜູ້​ປະ​ສານ​ງານ​ ເຄືອ​ຂ່າຍ​ແມ່​ນ້ຳ​ຂອງ​ ພາກ​ອີ​ສານ ​ຂອງ​ໄທຍ ຜູ້ບໍ່​ປະ​ສົງ​ ອອກ​ຊື່​ ທ່ານ​ນຶ່ງ ກໍ​ເວົ້າ​ ຄ້າຍ​ຄື​ກັນ​ນັ້ນວ່າ:

“ນ້ຳປ່ຽນສີເຮັດໃຫ້ການວາງໄຂ່ ຂອງປາ ຕ້ອງໄດ້ປັບໂຕ, ກະທົບໃສ່ປາທຸກນິດ, ​ຈະເຮັດໃຫ້ສັດນ້ຳຫຼຸດລົງ ແນ່ນອນ. ການປູກພືດຜັກ ຕາມແຄມຂອງ ບໍ່ໄດ້ ແລະ ອາຈເຖິງຂັ້ນ ​​ແມ່ນ້ຳຂອງ ວິບັດໄປເລີຍ.”

​ພ້ອມ​ກັນ​ນັ້ນ, ເຈົ້າ​ໜ້າ​ທີ່ ​ດ້ານ​ສິ່ງ​ແວດ​ລ້ອມ​ຢູ່ ນະ​ຄອນ​ຫຼວງວຽງ​ຈັນ ​ທ່ານ​ນຶ່ງ ກໍ​ເວົ້າ​ວ່າ ປັດ​ຈຸ​ບັນ ທາງ​ການ​ ຍັງ​ບໍ່​ໄດ້​ວິ​ໃຈ ເຣື້ອງນ້ຳ​ຂອງ​ໃສ, ຍັງ​ລໍ​ຖ້າ​ເບິ່ງ ​ຜົນ​ການ​ວິ​ໃຈ ​ຈາກ​ໄທ​ຢູ່, ແຕ່​ສ່ວນ​ໂຕ​ແລ້ວ​ ຄິດ​ວ່າ ນ້ຳ​ຂອງ​ປ່ຽນ​ສີ ບໍ່​ເປັນ​ເຣື້ອງ​ດີ.

“ບໍ່ຕ້ອງມາຖາມລາວດອກ ລາວບໍ່ຮູ້ ຄັນໄທຍວ່າຈັ່ງ​​ຊັ້ນ ມັນກໍເປັນຈັ່ງຊັ້ນ. ຕາມຄິດ, ທາງໄທ​ຍ ໄດ້ວິໃຈມາແລ້ວ ແມ່ນບໍ່? ເພາະວ່າ ນ້ຳຂອງ ມັນກໍເຊັ່ນດຽວກັນ ມັນກໍອັນດຽວກັນ ນ້ຳອັນດຽວກັນ ແຕ່ກໍຮູ້ສຶກ ໃນທາງລົບ ຮູ້ສຶກວ່າມີຄວາມເປັນຫ່ວງຣື້ອງ ພັຍທັມຊາດ​ເນາະ. ​ມັນເຣີ່ມເຂົ້າສູ່ ໄລຍະວິກິນໍ ມັນກໍຣີ່ມວິກິໄປເລື້ອຍໆ.”

ແລະ​ປະ​ຊາ​ຊົນ​ລາວ ​ທ່ານ​ນຶ່ງ ເວົ້າ​ເຖິງ​ການ​ປ່ຽນ​ແປງ ຂອງ​ນ້ຳ​ໃນ​ແມ່​ນ້ຳ​ຂອງ ໃນ​ປີ 2019 ຕັ້ງ​ແຕ່​ນ້ຳ​ຖ້ວມ ນ້ຳ​ແຫ້ງ​ມາ​ນັ້ນ​ວ່າ:

“ເຮົາກໍຄິດແລ້ວວ່າ ມັນຕ້ອງມີອັນທີ່ປ່ຽນບໍ່ດີ ບໍ່ແມ່ນອັນປ່ຽນທີ່ດີ, ແຕ່ຖາມຄົນສ່ວນຫຼາຍວ່າ ຂະເຈົ້າເຫັນດີບໍ່? ຂະເຈົ້າຈະບອກວ່າບໍ່ເຫັນດີ ຂະເຈົ້າຈະບອກວ່າມັນບໍ່ແມ່ນແລ້ວ ມັນບໍ່ແມ່ນວິຖີ ທາງທັມຊາດແລ້ວ. ຫຼາຍໆຄົນກໍສິມີຄວາມເປັນຫ່ວງ.”

ການ​ປ່ຽນ​ແປງ ​ຂອງ​ແມ່​ນ້ຳ​ຂອງ ທີ່​ນັກ​ວິ​ຊາ​ການ ​ແລະ​ ຜູ້ປົກ​ປ້ອງ ​ສິ່ງ​ແວດ​ລ້ອມ ເວົ້າ​ວ່າ​ເປັນ​ຜົລມາ​ຈາກ ​ເຂື່ອນ​ຈີນ ໃນ​ແມ່​ນ້ຳ​ຂອງ 11 ແຫ່ງ ແລະ​ ເຂື່ອນ​ໄຊ​ຍະ​ບູ​ຣີ ຢູ່​ເມືອງ​ປາກ​ລາຍ ​ຂອງ​ລາວນັ້ນ, ນອກ​ຈາກ ​ຈະ​ສົ່ງ​ຜົລກະ​ທົບ​ ຕໍ່​ພັນ​ປາ​ຫຼຸດ​ລົງ ຍ້ອນ​ຂາດ​ຝຸ່ນ​ຕົມ ແລະ​ແຮ່​ທາດ ​ທີ່​ເປັນ​ສານ​ອາ​ຫານ​ແລ້ວ, ຍັງ​ຈະ​ສົ່ງ​ຜົລ​ ໃຫ້​ເກີດ​ດິນ​ເຈື່ອນ, ບໍ່​ສາ​ມາດ​ປູກ​ພືດ​ຜັກ ຕາມ​ແຄມ​ຂອງ​ໄດ້.

ຄໍາເຫັນ (1)
Share

(

What's the problem ? The blue color for the Mekong is more beautiful than the muddy one. In'it ? Claps claps


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 12, 2019 07:11 AM

ເຕັມຫນ້າ