ບ.ນໍ້າຟ້າ ມີຄົນອອກຕຸ່ມ

ສຸພັດຕາ
2020-05-26
ອີແມວລ໌
ຄໍາເຫັນ
Share
ພິມ
ໂຕຢ່າງຂອງຕຸ່ມ ທີ່ ອອກຕາມຕົນໂຕ ຂອງຊາວບ້ານ ບ້ານນໍ້າຟ້າ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຮັບຜົນກະທົບ ຈາກ ສວນກ້ວຍຈີນ ຖິ້ມຂີ້ເຫຍື້ອ ແລະ ກ່ອງສານເຄມີ ລົງໃສ່ຫ້ວຍນໍ້າເກິ່ງ
ໂຕຢ່າງຂອງຕຸ່ມ ທີ່ ອອກຕາມຕົນໂຕ ຂອງຊາວບ້ານ ບ້ານນໍ້າຟ້າ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຮັບຜົນກະທົບ ຈາກ ສວນກ້ວຍຈີນ ຖິ້ມຂີ້ເຫຍື້ອ ແລະ ກ່ອງສານເຄມີ ລົງໃສ່ຫ້ວຍນໍ້າເກິ່ງ
Citizen journalist

ປະຊາຊົນ ຢູ່ບ້ານນໍ້າຟ້າ ເມືອງຕົ້ນເຜິ້ງ ແຂວງບໍ່ແກ້ວ ປະມານ 80 ຄອບຄົວໄດ້ຮັບຜົນກະທົບ ຈາກສວນກ້ວຍຂອງບໍຣິສັດຊິງເຫີ ຊຶ່ງເປັນ ຂອງນັກລົງທຶນຈີນ ທີ່ຖິ້ມຂີ້ເຫຍື້ອ ແລະ ກ່ອງສານເຄມີເປົ່າ ລົງໃສ່ ຫ້ວຍນໍ້າເກິ່ງ ເຮັດໃຫ້ນໍ້າ ເປິເປື້ອນມີມົລພິດ, ເມື່ອພວກຊາວບ້ານລົງ ອາບນໍ້າ ແລ້ວກໍເປັນຕຸ່ມຄັນ ຕາມຕົນໂຕ, ດັ່ງ ປະຊາຊົນທີ່ໄດ້ຮັບ ຜົລກະທົບ ໄດ້ກ່າວຕໍ່ ວິທຍຸເອເຊັຽເສຣີ ໃນວັນທີ 26 ພຶສພາ ນີ້ວ່າ:

“ຂວດຢາຖິ້ມໃສ່ຢູ່ນໍ້າ ຄັນໝົດເນ່, ເທື່ອຈີນບໍ່ເຂົ້າມາເທື່ຶຶອ ບໍ່ຄັນ, ອາບຈັ່ງໃດກໍບໍ່ຄັນເນ່, ຖິ້ມໃສ່ຂີ້ເຫຍື້ອຢູ່ຫ້ວຍ ມີຂີ້ເຫຍື້ອ ເວລາອາບນໍ້າ ກໍຄັນອາບບໍ່ໄດ້ເນ້, ຄັນເຕັມໂຕ ປະມານອາທິດນຶ່ງບໍ່ຫາຍ ເວລາຄັນ ນອນກາງຄືນກໍບໍ່ຫຼັບ ກະຢາກໄປອາບບ່ອນອື່ນຢູ່ ມັນບໍ່ມີ ມີແຕ່ຫ້ວຍ ນໍ້າເກິ່ງ ບ້ານນໍ້າຟ້ານິ່ແຫຼະ ມີປະມານ 80 ປາຍຄອບຄົວ.”

ໃນຂນະດຽວກັນ ມີຊາວບ້ານອີກຄົນນຶ່ງ ທີ່ໄປອາບນໍ້າ ຢູ່ຫ້ວຍນໍ້າເກິ່ງເປັນປະຈໍາ, ກໍກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ, ບໍ່ວ່າແຕ່ ເດັກນ້ອຍ ຫຼືຜູ້ໃຫຍ່ ທີ່ອາບນໍ້າຫ້ວຍນີ້ ກໍເປັນຕຸ່ມຄັນຕາມຕົນໂຕໝົດ ຍ້ອນສານເຄມີ ຈາກສວນກ້ວຍຈີນ ເວລາຝົນຕົກສານເຄມີ ກໍໄຫຼ ລົງໃສ່ຫ້ວຍ:

“ສວນກ້ວຍກະຄືວ່າ ໃສ່ເຄມີຫຼາຍໂພດແຫຼະ ລະກະກິ່ນເໝັນແດ່ກະມີ ຫຼາຍສົມຄວນ ແຕ່ວ່າເຂດນໍ້າຫ້ວຍນິ່ ກະຄືວ່າບໍ່ສະອາດ ກະຄືວ່າ ເຄມີກະມີຫຼາຍເນາະ ເວລາຝົນຕົກມາກໍໄຫລ ຄືຢູ່ນໍ້າຫ້ວຍ ເດັກນ້ອຍ ຫຼືວ່າຜູ້ໃຫຍ່ ເວລາໄປອາບນໍ້າ ກໍເປັນຕຸ່ມເປັນຄັນເໝິດກໍ້, ເຂົາໄປ ອາບນໍ້ານີ້ ຄືວ່າເປັນຕຸ່ມຄັນນ້ອຍໆເນາະ ແຕ່ວ່າເວລາກາງຄືນມາ ກໍເກີດເປັນຕຸ່ມລະກໍຄັນ ເປັນຕຸ່ມນ້ອຍຫັ່ນນາ ຄືໝາກສຸກ ໝາກໄສ ອາການ ມັນຊໍ່ານີ້ ດຽວນີ້ມານີ້ເດັກນ້ອຍ ມັກລົງນໍ້າຫຼາຍ ບາງທີຕາມັນກໍມັນແດງ.”

ຜູ້ທີ່ມາຈາກຖິ່ນອື່ນ ແລະໄດ້ລົງອາບນໍ້າຫ້ວຍ ດັ່ງກ່າວ ທີ່ບໍ່ປະສົງອອກຊື່ແລະສຽງ ໄດ້ເລົ່າສູ່ ວິທຍຸເອເຊັຽເສຣີ ຟັງວ່າ:

"ເພາະວ່າຕາມທີ່ເບິ່ງນີ້ ສະພາບແວດລ້ອມທາງນັ້ນ ຈາກທີ່ເຄີຍບໍ່ມີຖົງຢາງ ເສດພລາສຕິກເລີຍ ດຽວນີ້ ນໍ້າຫ້ວຍນໍ້າຮ່ອງ ທີ່ຊົນເຜົ່າມູ່ເຊີ ທີ່ຂະເຈົ້າອາສັຍຢູ່ຫັ້ນ ກາຍເປັນມົລພິດໝົດ ຂ້ອຍລົງໄປຂວ່າງແຫ ລົງໄປຫາປາ ລະກະລົງໄປອາບໄປລອຍເບິ່ງ ຮູ້ສຶກວ່າເປັນຕຸ່ມ, ເປັນ ຕຸ່ມລະກໍເກີດຜື່ນເກີດຫຍັງ ສອງສາມມື້ມາແລ້ວ ກໍຍັງບໍ່ເຊົາປານນີ້ ຮູ້ສຶກວ່າຂີ້ເຫຍື້ອ ແລະ ສິ່ງແວດລ້ອມແຖວນັ້ນ ຖືກທໍາລາຍໄປໝົດ ກາຍເປັນປ່າຖົງຢາງກ້ວຍຈີນໝົດ."

ກ່ຽວກັບບັນຫາການຖິ້ມຂີ້ເຫຍື້ອ ແລະ ກ່ອງສານເຄມີ ລົງຫ້ວຍເກິ່ງ ຂອງສວນກ້ວຍຈີນນີ້, ເຈົ້າໜ້າທີ່ທ້ອງຖິ່ນທ່ານນຶ່ງ ກ່າວວ່າເຄີຍສເນີ ເຣື້ອງດັ່ງກ່າວ ຫາຂັ້ນເທິງແລ້ວ ແລະເພິ່ນກໍລົງມາກວດຢູ່ ແຕ່ຈີນບໍ່ ປະຕິບັດຕາມ, ດັ່ງທ່ານກ່າວວ່າ:

“ສເນີຕອນນັ້ນ ໄປປະຊຸມຢູ່ກຸ່ມ ກໍສເນີເຂົາ, ເຂົາກໍມາລະກະບອກວ່າ ຢູ່ນີ້ ຂີ້ເຫຍື້ອແມ່ນສັງເຂົາກະມາຕລອດເນາະ ມາກວດເບິ່ງຢູ່ ເຂົາກໍວ່າ ມັນຖົງສຸບກ້ວຍອິສັງ ໂຟມບໍເຂົານິ່ເກັບກ້ວຍ ເຕັມສີຂຽວເໝິດ ຕາມຫ້ວຍນໍ້າເກິ່ງນິ່ນາ ສີດຢາແມ່ນຫຍັງກ່ອງຢາເຂົາກໍຖິ້ມຈະນີ້ ມາຍຸມະຍະ ເນາະ, ຖິ້ມໄຫຼຕາມນໍ້າມາ ເປິເປື້ອນໂພດ ອາບນໍ້າບໍ່ໄດ້ ຈະນີ້ເນ້.”

ກ່ຽວກັບເຣື້ອງນີ້ ເອເຊັຽເສຣີ ໄດ້ຕິດຕໍ່ໄປຫາ ຜູ້ທີ່ຊາວບ້ານບອກວ່າ ເປັນລ່າມແປພາສາ ປະຈໍາສວນກ້ວຍແຫ່ງນີ້ ຊຶ່ງທ່ານເວົ້າວ່າ:

“ເຮົາຈະໄປລົມບໍຣິສັດ ໃຫ້ຂະເຈົ້າໄດ້ຍິນໄວ້ນໍ້ຊັ້ນໜະ ແຕ່ມັນຝົນຕົກບໍ່ແມ່ນຫຍັງ ນໍ້າໄຫລລົງໄປບໍອັນນັ້ນ ເຮົາກະບໍ່ຮູ້ນໍ້ ອັນນັ້ນຖ້າວ່າ ປ໋ອງຢາແມ່ນຫຍັງ ຖິ້ມລົງນໍ້າໜິ ບໍ່ມີແຫຼະຢູ່ທາງນີ້ໜະ ມີແຕ່ວ່າຈູດຖິ້ມໝົດ ຖ້າສີດຢາແລ້ວ ຂະເຈົ້າກະຈູດຖິ້ມໝົດແລ້ວ ນໍ້ານີ້ມັນຫາກ ຄັນແນວນັ້ນເດີ້ ມັນຫາກຄັນກະມີ ໂຕນ້ອງນິ່ໄປອາບນໍ້າຫ້ວຍນໍ້າຟ້ານິ່ ກະແມ່ນແນວນັ້ນເດີ້ ມີຄັນໂຕ ຄັນເນື້ອຢູ່ ນໍ້າຟ້າ ນໍ້າເກິ່ງນິ່.”

ອີງຕາມຄໍາເວົ້າຂອງນາຍຄຣູ ແລະ ອາຈານ ທີ່ສອນຢູ່ໂຮງຮຽນປະຖົມ ແລະ ມັທຍົມ ທີ່ຢູ່ໃກ້ສວນກ້ວຍ ແຫ່ງນີ້ແລ້ວແມ່ນວ່າ ເລວາທີ່ ຂະເຈົ້າສີດຢາ ກິ່ນເໝັນຂີວ ຂອງສານເຄມີ ພັດມາທາງໂຮງຮຽນ ເດັກນ້ອຍ ນັກຮຽນ ແລະ ຄຣູສອນ ກໍໄດ້ກິ່ນຂີວນັ້ນ ຊຶ່ງອາດເປັນອັນ ຕະຣາຍຕໍ່ສຸຂພາບ. ດັ່ງທ່ານກ່າວວ່າ:

"ເຮັດໄປຂັ້ນເທິງ, ເຮົາກໍສເນີເຂົາແລ້ວເນາະ ເພິ່ນກະມາເບິ່ງຢູ່ ມາເບິ່ງກໍຄືວ່າ ສວນກ້ວຍນີ້ກໍຢາກໃຫ້ຍຸບແດ່ ປະຊາຊົນກໍບໍ່ໃຫ້ເຮັດສວນ ກ້ວຍນີ້ ຄືວ່າເວລາສີດໃບກ້ວຍ ກະຖືວ່າກິ່ນເໝັນຫຼາຍ ລະກໍປິວມາທາງ ໂຮງຮຽນ, ໂຮງຮຽນກະຕິດກັບແຖວສວນກ້ວຍນິ່ແຫຼະ, ນໍ້າຫ້ວຍນິ່ ກະທາງໄປໂຮງຮຽນ ໄປທາງແຄມຫ້ວຍນີ້ຫລະ, ເວລາສີດໃບກ້ວຍ ຖືວ່າກິ່ນເໝັນ ມັນມີເຄມີ ພັດມາທາງໂຮງຮຽນຫຼາຍ ແລະ ກໍຕິດແຄມ ບ້ານແດ່, ສວນກ້ວຍນໜິ ຕິດແຄມບ້ານ ແລະ ເດັກນ້ອຍນັກຮຽນກໍມັກໄປລີ້ ຢູ່ສວນກ້ວຍກະຫຼາຍ ປໍ 5 ຮອດ ມໍ 4."

ກ່ຽວກັບບັນຫາທີ່ຊາວບ້ານນໍ້າຟ້າ ເມືອງຕົ້ນເຜິ້ງ ແຂວງບໍ່ແກ້ວ ກໍາລັງປະເຊີນຢູ່ນີ້ ທາງວິທຍຸເອເຊັຽເສຣີ ຍັງຈະຕິດຕາມ ຂໍຄໍາອະທິບາຍ ຈາກເຈົ້າຂອງສວນກ້ວຍ ໂດຍຜ່ານລ່າມແປພາສາ ປະຈໍາສວນກ້ວຍ ຫາກເປັນໄປໄດ້ ກໍຢາກຂໍຄວາມຮ່ວມມື ເພື່ອແກ້ໄຂບັນຫາທີ່ກ່າວ ມານີ້.

ເຕັມຫນ້າ