ຄົນວຽດນາມລັກຂົນໄມ້ ຢູ່ ມ.ພີນ ຖືກຈັບ

ພູວົງສ໌
2019-08-05
ອີແມວລ໌
ຄໍາເຫັນ
Share
ພິມ
ຣົດແກ່ຄອນເທນເນີ້ ທີ່ບັນທຸກຊຸກເຊື່ອງ ໄມ້ຄະຍຸງໄວ້ທາງໃນ ແລ້ວເອົາເຄື່ອງດື່ມກະທິງແດງ ທັບໄວ້ເພື່ອອໍາພາງ ການກວດຄົ້ນ ແຕ່ກໍໜີບໍ່ພົ້ນ
ຣົດແກ່ຄອນເທນເນີ້ ທີ່ບັນທຸກຊຸກເຊື່ອງ ໄມ້ຄະຍຸງໄວ້ທາງໃນ ແລ້ວເອົາເຄື່ອງດື່ມກະທິງແດງ ທັບໄວ້ເພື່ອອໍາພາງ ການກວດຄົ້ນ ແຕ່ກໍໜີບໍ່ພົ້ນ
Screen captured lao/thai.net video

ເຈົ້າໜ້າທີ່ກອງກວດກາປ່າໄມ້ ແຂວງສວັນນະເຂດ ຈັບຄົນວຽດນາມ 2 ຄົນ ຢູ່ບ້ານເຊທ່າມວກ, ເມືອງພີນ ແຂວງສວັນນະເຂດ ເມື່ອວັນທີ 1 ສິງຫາ ທີ່ຜ່ານມານີ້ ຍ້ອນຊາວວຽດນາມ ກຸ່ມນີ້ ລັກຊຸກເຊື່ອງໄມ້ໄວ້ ໃນຕູ້ຄອນເທ່ນເນີ້ຈຳນວນ 49 ທ່ອນນ້ອຍ ປະມານ 7 ແມັດກ້ອນ ແລ້ວເອົາແຜ່ນເຫຼັກອັດໄວ້ ເພື່ອປິດບັງເຈົ້າໜ້າທີ່, ອີງຕາມຄວາມເວົ້າຂອງ ເຈົ້າໜ້າທີ່ ຜແນກກະສິກັມ ແລະປ່າໄມ້ ແຂວງສວັນນະເຂດ ທ່ານນຶ່ງ ທີ່ໄດ້ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນມື້ວັນທີ 05 ສິງຫາ ນີ້ວ່າ:

“ຄົນຂັບຣົດຫັ້ນແມ່ນຄົນວຽດ ລາວຮັບຈ້າງຂັບຣົດໄມ້ພາຍໃນແຂວງເຂດເຊື່ອມຕໍ່ນີ້ນ່າ. ໄມ້ໃນບ້ານເຮົາ ໄມ້ເຂົາເອົາໄວ້ສືບສວນສອບສວນ ຢູ່ພາຍໃນເມືອງຫັ້ນນ່າ. ສ່ວນຫຼາຍຈະເປັນໄມ້ອັນນັ້ນ ໄມ້ລັກສນະເປັນປັກເກ້ນີ້ນ່າ.”

ທ່ານເວົ້າວ່າ ການສືບສວນສອບສວນເບື້ອງຕົ້ນ ຍັງບໍ່ຮູ້ວ່າ ໄມ້ທັງໝົດນັ້ນໄດ້ມາຈາກແຫຼ່ງໃດ? ແຕ່ຄາດກະວ່າ ໜ້າຈະຖືກລັກລອບຕັດອອກ ມາຈາກປ່າສງວນແຫ່ງຊາຕ ດົງພູວຽງ ພາຍໃນເຂດເມືອງພີນ ແລ້ວກຽມຂົນຍ້າຍອອກໄປ ດ່ານສາກົນລາວບາວ ທີ່ຢູ່ຫ່າງອອກໄປບໍ່ເຖິງ 70 ກິໂລແມັຕ ແລະ ສ່ວນຫຼາຍຈະເປັນໄມ້ແປ້ນ ຫຼືໄມ້ປັກເກ້ເນື້ອດີ ມີຣາຄາສູງ.

ປະຈຸບັນ, ເຈົ້າໜ້າທີ່ກອງກວດກາປ່າໄມ້ ປະຈຳແຂວງສວັນນະເຂດ ພວມດຳເນີນການສືບສວນສອບສວນ ຊາວວຽດນາມທັງ 2 ຄົນ ຢູ່ທີ່ ເມືອງພີນ ວ່າໄດ້ໄມ້ມາຈາກບ່ອນໃດ ແລະ ແມ່ນໃຜເປັນຜູ້ຈ້າງ? ຫາກພົບວ່າ ມີການລັກລອບຂົນໄມ້ ຜິດກົດໝາຍ ແທ້ຈະຖືກປັບໃໝ ແລະ ລົງໂທສຕາມກົດໝາຍ ຢ່າງເດັດຂາດ.

ເມື່ອວັນທີ 27 ກໍຣະກະດາ ທີ່ຜ່ານມານີ້, ກອງກວດກາປ່າໄມ້ປະຈຳແຂວງສວັນນະເຂດ ກໍໄດ້ຈັບຄົນວຽດນາມ 1 ຄົນ ອາຍຸປະມານ 50 ປີ ທີ່ຖືກນາຍທຶນວຽດນາມຈ້າງເງິນ 2 ລ້ານ 5 ແສນກີບ ເພື່ອລັກຂົນໄມ້ 13 ທ່ອນໃຫຍ່ ແລະ ຍັງເຂົ້າລາວແບບບໍ່ ຖືກຕ້ອງ ຕາມຣະບຽບ ແລະ ປະຈຸບັນ ຜູ້ກ່ຽວຍັງຖືກກັກໂຕ ຢູ່ຄ້າຍຄຸມຂັງຫຼັກ 06 ແຂວງສວັນນະເຂດ.

ປະຈຸບັນ, ຄຳສັ່ງເລຂທີ 15/ນຍ ວ່າດ້ວຍ ການເຂັ້ມງວດ ໃນການຄວບຄຸມ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸຣະກິຈ ໄມ້ຂອງ ທ່ານ ທອງລຸນ ສິສຸລິດ, ນາຍົກຣັຖມົນຕຣີລາວ ເມື່ອປີ 2016, ໂດຍຂໍໃຫ້ເຈົ້າໜ້າທີ່ ກອງກວດກາປ່າໄມ້ ປະຈຳທຸກແຂວງ ໃຫ້ ເອົາໃຈໃສ່ໃນການກວດກາ ແລະ ສະກັດກັ້ນຂະບວນການຄ້າ ໄມ້ຜິດກົດໝາຍຂອງກຸ່ມນາຍທຶນ ຢ່າງເຂັ້ມງວດ ແລະ ທີ່ສຳຄັນ ກໍເພື່ອ ປ້ອງກັນບໍ່ໃຫ້ ປ່າໄມ້ຫຼຸດໜ້ອຍຖອຍລົງ.

ຄໍາເຫັນ (1)
Share

(

This is a drop of water in the ocean Laos. In fact, you're already dead in case you might not know it.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 07, 2019 05:51 AM

ເຕັມຫນ້າ