ຊາວວຽງຈັນໂຮມກັນ ພັນ ປາຍຄົນ

ສິດນີ
2020-04-15
ອີແມວລ໌
ຄໍາເຫັນ
Share
ພິມ
ຊາວບ້ານປະມານ ພັນປາຍຄົນ ໂຫ້ກັນໄປຮັບເຄື່ອງ ທີ່ ບໍຣິສັດ ສີສົມບັດ ເຊົ່າສິນເຊື່ອ ບໍຣິຈາກ ຈົນເຮັດໃຫ້ເກີດຄວາມວຸ້ນວາຍ
ຊາວບ້ານປະມານ ພັນປາຍຄົນ ໂຫ້ກັນໄປຮັບເຄື່ອງ ທີ່ ບໍຣິສັດ ສີສົມບັດ ເຊົ່າສິນເຊື່ອ ບໍຣິຈາກ ຈົນເຮັດໃຫ້ເກີດຄວາມວຸ້ນວາຍ
ພາບຈາກ : ນັກຂ່າວພົລເມືອງ

ໃນຕອນເຊົ້າວັນທີ 15 ເມສາ ປີ 2020 ຊາວບ້ານປະມານ ພັນປາຍຄົນໄດ້ໂຫ້ກັນໄປຮັບເຄື່ອງບໍຣິຈາກ ໂດຍບໍຣິສັດສີສົມບັດເຊົ່າສິນເຊື່ອ ຢູ່ບ້ານດອນແດງ ເມືອງຈັນທະບູລີ ນະຄອນຫລວງວຽງຈັນ ແຕ່ມີເຫດ ຄວາມວຸ້ນວາຍເກີດຂື້ນ ຍ້ອນມີຄົນມາເປັນຈຳນວນຫລວງຫລາຍ ຈົນເຮັດໃຫ້ການສັນຈອນແອອັດ ແລະ ຂັດຕໍ່ຄຳສັ່ງຂອງຣັຖບານ ທີ່ພຍາຍາມຫຼຸດຄວາມສ່ຽງ ແລະ ສະກັດກັ້ນການແຜ່ຣະບາດ ຂອງເຊື້ອ ໄວຣັສ ໂຄວິດ-19.

ຊາວບ້ານຜູ້ເຫັນເຫຕການຢູ່ບ້ານດອນແດງ ທ່ານນຶ່ງກ່າວຕໍ່ຜູ້ສື່ຂ່າວວິທຍຸເອເຊັຽເສຣີ ໃນມື້ວັນທີ 15 ເມສາ ນີ້ວ່າໂຕເອງບໍ່ໄດ້ໄປຕໍ່ຄິວເອົາ ຂອງທີີ່ບໍຣິສັດບໍຣິຈາກ ແຕ່ເຫັນມີຄົນມາຢ່າງຫລວງຫລາຍ ສ່ວນໃຫຍ່ ແມ່ນຂີ່ຣົດຈັກມາຕໍ່ຄິວເອົາເຄື່ອງບໍຣິຈາກ ຊື່ງທ່ານເອງກໍຮູ້ສຶກ ເປັນຫ່ວງ:

"ບໍ່ໄດ້ໄປເອົາ ກໍຮູ້ສຶກວ່າຂະເຈົ້າແຈກເຄື່ອງ ກໍມີຫາສຽງຢູ່ ຜູ້ບໍ່ມີຢູ່ມີກິນ ກໍຢາກໄປເອົາເນາະ ແຕ່ວ່າການໄປເອົາ ຢາກມີຄົນຫຼາຍໂພດຫັ້ນ ຫນ່າ ພວກຂີ່ຣົດຈັກຂະເຈົ້າມັກໄປເອົາ."

ຊາວບ້ານດອນແດງອີກທ່ານນື່ງ ກ່າວວ່າ ຖ້າການແຈກເຄື່ອງຊ່ອຍເຫລືອຈາກພາກ ເອກຊົນ ຫາກມີການຈັດຣະບຽບ ເພື່ອປ້ອງກັນການແຜ່ ຣະບາດ ຂອງໂຣຄໄວຣັສໂຄວິດ 19 ກໍຈະເປັນການດີ ເນື່ອງຈາກວ່າ ໃນມື້ເຊົ້ານີ້ ຊາວບ້ານທີ່ມາຮັບເອົາເຄື່ອງບໍຣິຈາກ ບໍ່ໄດ້ຢືນຫ່າງກັນ ຫລາຍ ຊື່ງກໍເປັນການສ່ຽງຕໍ່ການແຜ່ຣະບາດ ຂອງໂຣຄໄວຣັສ ໂຄວິດ-19:

“ຖ້າມີພາກຣັດມາຊ່ອຍຈັດຣະບຽບກໍດີ ແຈກກໍດີຢູ່ ພວກທີ່ປະສົງແຈກກໍດີມ ແຕ່ເຂົາບໍ່ຄິດເຣື້ອງຄົນຊຸມນຸມ ຫັ້ນໜ່າ ກະຢ້ານມີຄວາມສ່ຽງ”

ເຈົ້າຫນ້າທີ່ບໍຣິສັດສີສົມບົດ ເຊື່ອສິນເຊື່ອ ຈຳກັດ ທ່ານນື່ງ ຜູ້ທີ່ຂໍສງວນຊື່ແລະສຽງກ່າວວ່າ ທີມງານຂອງບໍຣິສັດໄດ້ອອກໄປແຈກເຄື່ອງຊ່ອຍ ເຫລືອສຸກເສີນ ຈຳນວນ 1400 ຊຸດ ໃຫ້ກັບຊາວບ້ານທີ່ຫລັ່ງໄຫລ ມາທົ່ວສາຣະທິດໃນໄລຍະການແຜ່ຣະບາດ ຂອງໂຣຄໄວຣັສ ໂຄວິດ-19 ແລະການຄ້າຂາຍບໍ່ດີິ ຮ່ວມທັງບໍ່ມີວຽກເຮັດກງານທຳ ໃນນັ້ນ ປະກອບດ້ວຍ ຫມີ່ໄວໆ, ໄຂ່ໄກ່, ນ້ຳດື່ມ ແລະເຂົ້າສານອາຫານແຫ້ງ ໂດຍ ໃຊ້່ເວລາແຈກເຄື່ອງຂອງດັ່ງກ່າວ ທັງຫມົດ ພາຍໃນ 20 ນາທີ.

ທ່ານເວົ້າວ່າ “ແຈກເພີ່ນຫນ້ອຍນື່ງ ອ້າຍກໍຂ້ຽວເລັ່ງເພາະມັນກໍໂອເຄ ອ້າຍກໍແຈກປະມານ 20 ກວ່ານາທີ ຂ້່ຽວແຈກ ແລ້ວໃຫ້ຄົນຫນີແຍກ ອອກຈາກກັນ ແລະມີມາຕການ ເຈົ້າຫນ້າທີ່ເບີ່ງຊ່ອຍທຸກຢ່າງກໍໂອເຄ.”

ທ່ານສັງເກດເຫັນວ່າ ຊາວບ້ານທີ່ມາຕໍ່ຄິວຮັບເຄື່ອງຂອງບໍຣິຈາກນັ້ນ ຈະບໍ່ໄດ້ເຄືຶ່ອງຄົບທຸກຄົນຍ້ອນວ່າ ຈຳນວນຄົນມີຫຼາຍກວ່າຂອງແຈກ ອີກທັງຊາວບ້ານ ຈຳນວນນື່ງ ເມື່ອໄດ້ເຄື່ອງຂອງແລ້ວ ກໍເອົາໄປໄວ້ຢູ່ຣົດແລ້ວກັບມາລຽນຄິວໃຫມ່ ກໍມີ.

ຕໍ່ເຫດການດັ່ງກ່າວ  ເຈົ້າຫນ້າທີ່ ປກສ ເມືອງຈັນທະບູຣີ ກ່າວວ່າ ພາຍຫລັງໄດ້ຮັບແຈ້ງວ່າ ມີ ປະຊາຊົນຮວມໂຕກັນ ຢູ່ບ້ານດອນແດງ ຢ່າງຫລວງຫລາຍ ເພື່ອໄປເອົາຂອງບໍຣິຈາກ ກໍໄດ້ສົ່ງເຈົ້າຫນ້າທີ່ ໄປ ໂທຣະໂຄ່ງ ບອກປະຊາຊົນວ່າ ຜູ້ໃດໄດ້ແລ້ວກໍໃຫ້ກັບເມືອເຮືອນ ໃຜເຮືອນລາວ ເພື່ອປ້ອງກັນການແຜ່ລາມຂອງ ໂຣຄໄວຣັສໂຄວິດ-19 ພ້ອມທັງຕັກເຕືອນວ່າ ຖ້າຜູ້ໃດຫລືບໍຣິສັດໃດຢາກບໍຣິຈາກເຄື່ອງ ຂອງໃຫ້ຊາວບ້ານກໍຄວນຕິດຕໍ່ໄປຫາ ອຳນາດການປົກຄອງ ແຕ່ລະບ້ານ ຈະເປັນການດີກວ່າ:

“ບໍຣິຈາກແຕ່ລະບ້ານຫ້ັນໃຫ້ບ້ານເພີ່ນຂື້ຶ້ນບັນຊີມາ ໃຫ້ເພີ່ນເອົາເຄື່ອງໄປໃຫ້ນາຍບ້ານແຈກ ແຕ່ລະຄອບຄົວ ຖ້າບໍຣິສັດມີຫລາຍຄົນກໍໃຫ້ ບໍຣິສັດ ໄປຊ່ອຍແຈກນຳບ້ານນັ້ນ.”

ທ່ານກ່າວຕື່ມວ່າ ເຈົ້າຫນ້າທີ່ ປກສ ບໍ່ໄດ້ປັບໄຫມ ບໍຣິສັດ ມີແຕ່ເຮັດບົດບັນທຶກ ຍ້ອນບໍຣິສັດມີເຈຕນາດີ ຊ່ອຍເຫລືອຊາວບ້ານ ແຕ່ໄດ້ຕັກ ເຕືອນ ບໍຣິສັດຊື່ໆວ່າ ຖ້າຫາກຈະບໍຣິຈາກສີ່ງຂອງ ຊ່ອຍຊາວບ້ານ ເທື່ອຫນ້າໃຫ້ໄປພົວພັນກັບອຳນາດການປົກຄອງບ້ານ ເພື່ອໃຫ້ຂອງທີ່ ບໍຣິຈາກນັ້ນ ເຖິງມືປະຊາຊົນຜູ້ທຸກຍາກແທ້ໆ ແລະບໍ່ໃຫ້ເຮັດແບບມື້ນີ້ອີກ ຍ້ອນຂັດຕໍ່ຄຳສັ່ງຂອງນາຍົກຣັຖມົນຕຣີ ເລກທີ 06/ນຍ ວ່າດ້ວຍ ມາຕການສກັດກັ້ນ ການຣະບາດແລະຕ້ານການແຜ່ລາມຂອງໂຣຄໄວຣັສໂຄວິດ-19.

ໃນທີ່ສຸດ ທ່ານ ສເລີມພົລ ສູນວົງສາ ຫົວຫນ້າຜູ້ບໍຣິຫານ ບໍຣິສັດສີສົມບັດ ເຊົ່າສິນເຊື່ອ ຈຳກັດ ໃນນາມຜູ້ຕ່າງຫນ້າບໍຣິສັດ ກໍໄດ້ອອກມາ ສະແດງ ຄວາມຂໍໂທດ ຕໍ່ຣັຖບານ ທີ່ຈັດກິຈກຳດັ່ງກ່າວ ໂດຍທີ່ບໍ່ຄິດວ່າ ຈະມີປະຊາຊົນຫລັ່ງໄຫລມາຮັບເຄື່ອງບໍຣິຈາກຫລາຍປານນີ້.

ເຕັມຫນ້າ