ນັກຮຽນຢູ່ຊົນນະບົດ ຂາດເຂີນ ຫຼາຍຢ່າງ

ມະນີຈັນ
2020-10-02
ອີແມວລ໌
ຄໍາເຫັນ
Share
ພິມ
ນັກຮຽນຊັ້ນປະຖົມ ໃນເຂດຊົນນະບົດ ຂ.ຫຼວງພຣະບາງ
ນັກຮຽນຊັ້ນປະຖົມ ໃນເຂດຊົນນະບົດ ຂ.ຫຼວງພຣະບາງ
ຮູບຖ່າຍເດືອນ ກໍຣະກະດາ 2019 ໂດຍ: ຄຣູອາສາຊັ້ນປະຖົມ ຂ.ຫຼວງພຣະບາງ

ຢູ່ປະເທດລາວ ໂດຍສະເພາະຢູ່ຊົນນະບົດເຊັ່ນຢູ່ 2 ເມືອງຂອງ 2 ແຂວງໃນລາວ ຍັງມີນັກຮຽນທຸກຍາກຫຼາຍ ຊຶ່ງໃນນັ້ນຮວມທັງໂຮງຮຽນ 4 ແຫ່ງຢູ່ບ້ານປາກຂັນ ບ້ານຫ້ວຍເສືອ ບ້ານຜາທອງ ເມືອງນໍ້າບາກ ແຂວງຫລວງພຣະບາງ ແລະບ້ານພູວຽງ ເມືອງຂວາ ແຂວງຜົ້ງສາລີ ມີນັກຮຽນຮວມທັງໝົດ 70 ຄົນ ຍັງຂາດເຂີນເຄື່ອງນຸ່ງຊຸດນັກຮຽນ ອຸປກອນການຮຽນ ແລະ ອາຫານທ່ຽງ.

ສະເພາະແຕ່ບ້ານພູວຽງ ນັກຮຽນຫຍຸ້ງຍາກນໍາເຣື່ອງເຄື່ອງນຸ່ງມາໂຮງຮຽນ ແລະອາຫານທ່ຽງພາຍໃນໂຮງຮຽນ ມີແຕ່ຜັກ ບໍ່ມີຊີ້ນ, ອີງຕາມ ຄໍາເວົ້າຂອງນາຍຄຣູ ໂຮງຮຽນ ປະຖົມສຶກສາ ບ້ານພູວຽງ ເມືອງຂວາ ແຂວງຜົ້ງສາລີ ທີ່ຂໍບໍ່ອອກຊື່ ຕໍ່ RFA ໃນມື້ວັນທີ 1 ຕຸລາ ນີ້:

“ສະເພາະນັກຮຽນທີ່ຂາດເຂີນນີ໋ ຈະມີຈໍານວນ 70 ນ້ອງ ບໍ່ວ່າການນຸ່ງຖື ແລະ ຄອບຄົວ ຂາດເຂີນທີ່ສຸດ. ອາຫານການກິນນີ໋ ບາງມື້ ເຂົາເຈົ້າ ກໍກິນບໍ່ວ່າຈະເປັນຜັກ ເປັນໝີ່ນີ໋ເຣື່ອງຊີ້ນນີ໋ ໂອ໋ ອາດຂ້ອນຂ້າງ ຍາກ ກວ່າສິໄດ້ກິນຊີ້ນນີ໋ ສ່ວນຫລາຍກໍແມ່ນຜັກເນາະ.”

ທ່ານກ່າວເນັ້ນວ່າ ນັກຮຽນທຸກຍາກ 70 ຄົນທີ່ວ່ານັ້ນນັກຮຽນຊາຍ 32 ຄົນ ແລະນັກຮຽນຍິງ 38 ຄົນຍັງຂາດຊຸດນັກຮຽນ ຂາດປຶ້ມຮຽນ ບິກຂຽນ ແລະ ເຄື່ອງໃຊ້ອື່ນໆ ສໍາລັບຮຽນ.

ກ່ຽວກັບເຣື່ອງນີ້ ເຈົ້າໜ້າທີ່ຜແນກສຶກສາທິການ ແລະກິລາແຂວງ ຜົ້ງສາລີ ຜູ້ຂໍສງວນຊື່ກ່າວຕໍ່ RFA ໃນມື້ດຽວກັນນີ້ວ່າ ເວົ້າສະເພາະ ບ້ານພູວຽງ ທີ່ເປັນບ້ານເຕົ້າໂຮມໃໝ່ ຍ້ອນບ້ານເກົ່າແກ່ ດັ້ງເດີມ ບໍ່ມີບ່ອນ ຂຍາຍເຮືອນ, ຊາວບ້ານຈໍານວນນຶ່ງ ພາກັນມາປຸກເຮືອນຢູ່ ບ້ານນີ້ ແລະໃຫ້ລູກຫລານເຂົ້າໂຮງຮຽນ ເຮັດໃຫ້ຄວາມສາມາດ ໃນການຊ່ອຍເຫລືອ ອາຫານທ່ຽງແກ່ນັກຮຽນ ເປັນໄປໄດ້ຍາກຍ້ອນ ປະຊາຊົນ ຍັງບໍ່ມີການຜລິດທີ່ໝັ້ນຄົງ. ງົບປະມານອາຫານທ່ຽງ ຂອງນັກຮຽນ 800 ກີບ ຕໍ່ຄົນຕໍ່ຄາບກໍບໍ່ພຽງພໍ, ເຮັດໃຫ້ອາຫານທ່ຽງ ຂອງນັກຮຽນ ບໍ່ມີທາດບໍາລຸງຄົບໝວດໝູ່ ດັ່ງທີ່ທ່ານກ່າວວ່າ:

”ກໍມື້ນຶ່ງມີແຕ່ 800 ກີບເດ໋ ມັນກໍບໍ່ພໍແຫຼະ ຄັນແທກມັນກໍຮອດຣະດັບ 5-6 ພຸ້ນແຫຼະເພາະວ່າວັສດຸ ຫຼືອາຫານການກິນ ກວ່າສິໄປຮອດ ຫັ້ນມັນກໍບໍ່ແມ່ນງ່າຍເດ໋ ແລະຊຸມຊົນ ປະກອບສ່ວນແລ້ວ ແຕ່ກໍບໍ່ພໍ ເທື່ອ ເພາະເປັນບ້ານເຕົ້າໂຮມ ປະຊາຊົນກໍກໍາລັງ ຕັ້ງຢ້າວຕັ້ງເຮືອນ.”

ແລະຢູ່ໂຮງຮຽນປະຖົມສຶກສາ ບ້ານຜາທອງ ເມືອງນໍ້າບາກ ແຂວງຫລວງພຣະບາງ ຜູ້ປົກ ຄອງນັກຮຽນທ່ານນຶ່ງ ທີ່ບໍ່ປະສົງອອກຊື່ ກໍເວົ້າຕໍ່ RFA ໃນມື້ດຽວກັນນີ້ວ່າທຸກມື້ ຮອດເວລາພັກກິນເຂົ້າທ່ຽງ, ນັກຮຽນ ຈະຕ້ອງຍ່າງກັບບ້ານ ໄປກິນເຂົ້າຢູ່ເຮືອນ ຫລື ຢູ່ໄຮ່, ທີ່ຜ່ານມາ ໄຮ່ກໍຖືກບົ້ງທໍາຣາຍ ເຮັດໃຫ້ປັດຈຸບັນ ບໍ່ມີເຂົ້າພໍກິນ ສໍາລັບຄອບຄົວ. ນັກຮຽນຜູ້ທຸກຍາກ ບໍ່ມີອາຫານການກິນຄົບ 5 ໝວດໝູ່, ສ່ວນໃຫຍ່ ກິນແຕ່ເຂົ້າ ກັບຜັກຕາມຣະດູການ ດັ່ງທີ່ທ່ານກ່າວວ່າ:

“ແຕ່ມັນກໍບໍ່ປົກກະຕິ ຫັ້ນແຫລະ ຊີ້ນໝູຊີ້ນໄກ່ ປະເພດຊີ້ນແຫລະ ເວົ້າເຣື່ອງ ປະເພດຜັກຫັ້ນ ມັນຈະປົກກະຕິຢູ່ ກໍແມ່ນໝາກບວບ ໝາກເຕົ້າ ກິນໜໍ່ກິນຍັງຕາມ ຣະດູການ. ຄືໃຫ້ນຸ່ງຕາມປະເພນີ ຕາມເງື່ອນໄຂ ແຕ່ຈະໃຫ້ມັນພຽງພໍແທ້ ມັນກໍບໍ່ພຽງພໍ ສ່ວນຫລາຍກໍ ບ່ອນການຜລິດກໍຖືກ ຜົລກະທົບ ປີກາຍນີ໋ ເຄື່ອງນຸ່ງຫົ່ມນີ໋ ກໍບໍ່ພຽງພໍປານໃດ.”

ກ່ຽວກັບເຣື່ອງທີ່ວ່ານີ້ ເຈົ້າໜ້າທີ່ຜແນກສຶກສາທິການ ແລະກິລາແຂວງຫລວງພຣະບາງ ຜູ້ຂໍສງວນຊື່ທ່ານນຶ່ງ ເວົ້າຕໍ່ RFA ໃນມື້ວັນທີ 1 ຕຸລານີ້ວ່າ ບໍ່ມີງົບປະມານອາຫານທ່ຽງ ໃຫ້ນັກຮຽນ 800 ກີບຕໍ່ຄົນ ຕໍ່ຄາບ ຫລັງຈາກ ອົງການຈັດຕັ້ງສາກົລ ຢຸດການຊ່ອຍເຫລືອດ້ານ ໂພຊນາການ ສໍາລັບໂຮງຮຽນປະຖົມສຶກສາ ບ້ານປາກຂັນ ບ້ານຫ້ວຍເສືອ ແລະບ້ານຜາທອງ.

ປັດຈຸບັນ ພາກສ່ວນທີ່ກ່ຽວຂ້ອງມີແຕ່ຊຸກຍູ້ ໃຫ້ນັກຮຽນໃນເຂດບ້ານດັ່ງກ່າວ ມາຮຽນເປັນປະຈໍາ, ບໍ່ປະລະການຮຽນ. ເພື່ອແກ້ໄຂບັນຫາ ດັ່ງກ່າວ ທາງໂຮງຮຽນ ໄດ້ສເນີຂໍງົບປະມານຊ່ອຍເຫລືອ ອາຫານທ່ຽງ ໄປແລ້ວ ແຕ່ຂັ້ນເທິງກໍບໍ່ມີງົບປະມານໃຫ້ ຍ້ອນງົບປະມານ ການສຶກສາ ສ່ວນໃຫຍ່ ເອົາໄປຊື້ປຶ້ມແບບຮຽນ ໃຫ້ນັກຮຽນໄດ້ຮຽນຟຣີໝົດ, ເຣື່ອງການກິນການຢູ່ ແລະເຄື່ອງນຸ່ງມາໂຮງຮຽນ ແມ່ນຈໍາເປັນ ຕ້ອງໃຫ້ ຜູ້ປົກຄອງ ນັກຮຽນຮັບຜິດ ຊອບເອົາເອງ ດັ່ງທີ່ທ່ານກ່າວວ່າ.

“ດ້ານໂພສະນາການອາຫານ ກໍຂາດເຂີນ ແລະໂຄງການອາຫານກາງເວັນ ໄດ້ຫົວລະ 800 ກີບບໍ່ມີ ມາຢູ່ເຂດນີ້ ບໍ່ມີແລ້ວງົບປະມານຂອງ ເຮົາ ມີແຕ່ວ່າຊື້ປຶ້ມຕໍາຣາ ແບບຮຽນບໍ່ອັນນັ້ນອັນນີ້ ມີແຕ່ພວກເຮົາ ຣະດົມ ມາເຂົ້າໂຮງຮຽນ ບໍ່ໃຫ້ອອກໂຮງຮຽນ ການກິນການຢູ່ກໍໃຫ້ ເບື້ອງຄອບຄົວ ຮັບຜິດຊອບ.”   

ກ່ຽວກັບເຣື່ອງນີ້ ເຈົ້າໜ້າທີ່ອົງການເພື່ອເດັກນ້ອຍ ຂອງສະຫະປະຊາຊາດ ຫລື UNICEF ລາວ ທ່ານນຶ່ງທີ່ຂໍສງວນຊື່ ກໍກ່າວຕໍ່ RFA ໃນມື້ດຽວກັນນີ້ວ່າ ປີນີ້ ອົງການ UNICEF ລາວ ຍັງສືບຕໍ່ໃຫ້ວິຕາມິນ ອາຫານເສີມ ແກ່ເດັກນ້ອຍ ທີ່ຂາດສານອາຫານ ຢູ່ເຂດຊົນນະບົດ ຊຶ່ງປັດຈຸບັນ ຍັງຢູ່ໃນຂັ້ນຕອນການວາງແຜນ ວ່າ ຈະລົງໄປແຈກຢາຍອາຫານເສີມ ແລະ ຈັດການຝຶກອົບຮົມ ຢູ່ບ່ອນໃດແດ່ເພື່ອໃຫ້ມັນ ກວມທຸກບ່ອນ ທີ່ມີເດັກນ້ອຍ ຂາດສານອາຫານໃນລາວ:

“ໜ່ວຍງານໂພຊນາການ ຫັ້ນ ສ່ວນຫລາຍແມ່ນເຮົາຈະມີອາຫານເສີມ ສໍາເຣັດຮູບເນາະ ຄືຕົວຢ່າງວ່າ ເດັກຂາດສານອາຫານ ຂັ້ນຕໍ່ມາ ຂາດສານ ອາຫານແລ້ວ ມັນຈະມີພວກທີ່ເຂົາເຈົ້າ ເອີ້ນວ່າ  ອາຍດີພິເອບ ມິຫຍັງຫັ້ນນະແຈກຢາຍໃຫ້. ດຽວນີ້ທາງ UNICEF Laos ກໍກໍາລັງເຮັດແຜນນໍາສູນ ໂພຊນາການ ຢູ່ຫັ້ນນະ ວ່າເຮົາສິເຮັດອົບຮົມ ໃຫ້ຈຸດໃດແດ່ແລະກໍໃຫ້ມັນກວມໄປທຸກບ່ອນຫັ້ນນະ.”  

ໂຮງຮຽນປະຖົມສຶກສາ ທັງ 4 ແຫ່ງ ຢູ່ 4 ບ້ານທີ່ເວົ້າມານັ້ນ ເປັນໂຮງຮຽນທີ່ຢູ່ໃກ້ບ້ານຂອງນັກຮຽນ, ນັກຮຽນສາມາດຢ່າງໄປ-ກັບໄດ້. ແຕ່ກໍມີນັກຮຽນຈໍານວນນຶ່ງ ໄດ້ປະລະການຮຽນ ຍ້ອນທຸກຍາກ ອາຍໝູ່ ບໍ່ມີຊຸດນັກຮຽນໃສ່, ບໍ່ມີອຸປກອນການຮຽນ ຄືກັນກັບໝູ່.

ເພື່ອຂໍຮູ້ເຣື່ອງໂຄງການອາຫານທ່ຽງ ສໍາລັບນັກຮຽນຢູ່ລາວ RFA ໄດ້ພະຍາຍາມ ຕິດຕໍ່ໄປຫາສູນໂພສະນາການ ກະຊວງສາທາຣະນະສຸກ ທີ່ອົງການອະນາມັຍໂລກ ໃຫ້ທຶນຊ່ອຍເຫລືອໃນປີນີ້ ແຕ່ກໍບໍ່ສາມາດຕິດຕໍ່ ກັບຜູ້ປະສານງານນັ້ນໄດ້.

ເຕັມຫນ້າ