ແຂວງສວັນນະເຂດ ຣາຍຮັບ ພາດເປົ້າໝາຍ

ໄມຊູລີ
2019-06-25
ອີແມວລ໌
ຄໍາເຫັນ
Share
ພິມ
ເມືອງແກ້ງກອກ ແຂວງ ສວັນນະເຂດ
ເມືອງແກ້ງກອກ ແຂວງ ສວັນນະເຂດ
RFA/SS

ແຂວງສວັນນະເຂດ ຕັ້ງເປົ້າໝາຍ ເກັບຣາຍຮັບ ໃຫ້ໄດ້ 600 ຕຶ້ກີບ ຕາມງົບປະມານ ປີນີ້ແຕ່ມາຮອດ ປັຈຈຸບັນ, ທາງແຂວງສາມາດ ເກັບໄດ້ປະມານ 200 ຕຶ້ ປາຍກີບເທົ່ານັ້ນ, ຊຶ່ງໝາຍຄວາມວ່າ ແຂວງສວັນນະເຂດ ອາດເກັບຣາຍຮັບ ບໍ່ເຖິງ ເປົ້າໝາຍ ທີ່ກໍານົດໄວ້, ອິງຕາມຄໍາເວົ້າຂອງ ເຈົ້າໜ້າທີ່ ຜແນກການເງິນ ແຂວງສວັນນະເຂດ ຕໍ່ວິທຍຸ ເອເຊັຽ ເສຣີ ໃນວັນທີ 25 ມິຖູນາ ນີ້:

“ມາຮອດປີນີ້ ໃຫ້ຮອດ 600 ຕຶ້ກີບ ມັນກໍເກີນຄວາມສາມາດຫັ້ນນະ ບໍ່ຕິດອກ ແຕ່ເຮົາເຍືອງໃຫ້ເຫັນເນາະ ສະພາບການທີ່ວ່າເຮົາປະຕິບັດ ບໍ່ໄດ້ ແຜນຫັ້ນນະ ເພາະວ່າ ເຮົາຄາດຄະເນ ໝົດປີນີ້ ສິໄດ້ປະມານ 542 ເນາະ.”

ທ່ານເວົ້າວ່າ ສາເຫດທີ່ເຮັດໃຫ້ແຂວງ ເກັບຣາຍຮັບ ບໍ່ໄດ້ຕາມເປົ້າ ກໍຍ້ອນວ່າ ມີໜ່ວຍທຸຣະກິດຫລຸດລົງ, ເສຖກິດ ບໍ່ຂຍາຍໂຕ ສ່ົງຜົນໃຫ້ ຣາຍຮັບຈາກທຸຣະກິດ ການຄ້າຫລຸດລົງ 1 ຕຶ້ ປາຍກີບ, ບໍຣິການເຮືຶອນພັກ, ຮ້ານອາຫານ ແລະ ການທ່ອງທ່ຽວ ຫລຸດລົງ 7 ຕຶ້ປາຍກີບ ແລະ ໂຄງການກໍ່ສ້າງຕ່າງໆ ຫລຸດລົງ 16 ຕຶ້ປາຍກີບ.

ເຈົ້າໜ້າທີ່ຜແນກການເງິນ ເວົ້າຕຶ່ມວ່າ ໄລຍະຜ່ານມາ ແຂວງສວັນນະເຂດ ມີຣາຍຮັບ ຈາກການຄ້າໄມ້ ແລະ ຜລິຕພັນ ໄມ້ແປຮູບ ແຕ່ ຮັຖບານລາວ ມີຄໍາສັ່ງເລກທີ 15 ວ່າດ້ວຍ ການຫ້າມຂຸດຄົ້ນໄມ້, ເຄື່ອນຍ້າຍໄມ້ ແລະ ສົ່ງໄມ້ອອກໄປ ຕ່າງງປະເທດ ເຮັດໃຫ້ຣາຍຮັບ ຂອງ ແຂວງຫລຸດລົງນໍາ.

ໃນຂະນະດຽວກັນ, ຍານາງ ສຸວັນເພັງ ບຸບຜານຸວົງ, ສະມາຊິກສະພາ ແຫ່ງຊາດ ເຂດ 13 ແຂວງສວັນນະເຂດ, ສເນີວ່າ ຄວນຈະປັບປຸງ ຣະບຽບການ ໃຫ້ພາກສ່ວນ ທຸຣະກິດ ເຂົ້າມາເສັຽອາກອນ ດ້ວຍຕົວເອງ ບໍ່ແມ່ນລໍຖ້າ ໃຫ້ເຈົ້າໜ້າທີ່ ອາກອນ ລົງໄປເກັບຄື ໄລຍະຜ່ານມາ ເພື່ອປ້ອງກັນຣາຍຮັບ ອາກອນຮົ່ວໄຫລ:

“ເພາະພວກເຮົາ ເຄີຍແຕ່ວ່າ ເຮົາຖ້າຮອດ ຍາມມີພະນັກງານໄປໄລ່ລຽງບໍດຽວນີ້ ເຈົ້າ ເປັນເຈົ້າການ ເຈົ້າ ຕ້ອງໄປຈ່າຍ ໃຫ້ມັນຖືກຕາມ ກົດໝາຍ ແລ້ວຂ້ອຍສິກວດເຈົ້າ ຄັນເຈົ້າຈ່າຍຖືກ ຂ້ອຍຍ້ອງຍໍເຈົ້າ ຖ້າເຈົ້າຈ່າຍຜິດ ຕາມກົດໝາຍກໍານົດ ຂ້ອຍຈະເອົາເຈົ້າໜັກໆ ຈົນມັນ ສິ້ນເນຶ້ອປະດາຕົວ ຄືຫລາຍປະເທດ ເພີ່ນເຮັດ ພວກເຮົາສິເອົາກົນໄກຕົວນີ້.”

ຍານາງ ສຸວັນເພັງ ເວົ້າອີກວ່າ ສໍາລັບພາກສ່ວນ ທຸຣະກິດ ພາຍໃນແຂວງ ຊື່ງກວດເອົາ 40% ຂອງຣາຍຮັບໝົດແຂວງ ຈະຕ້ອງໄດ້ຖືກ ກວດກາວ່າ ມີຫົວໜ່ວຍທຸຣະກິດໃດ ຍັງບໍ່ຈ່າຍ ອາກອນ ໃຫ້ແຂວງ ຫາກບໍ່ຈ່າຍ ຈະຕ້ອງຖຶກລົງໂທດ ຕາມກົດຫມາຍ.

ຕໍ່ບັນຫາດັ່ງກ່າວ ທ່ານສົມດີ ດວງດີ, ຮອງນາຍຍົກຣັຖມົນຕຣີ ແລະ ຣັຖມົນຕຣີ ກະຊວງການເງິນ, ກ່າວຕໍ່ສື່ມວນຊົນລາວ ໃນວັນທີ 24 ມິຖູນານີ້ ໂດຍຣະບຸວ່າ ໃນເມື່ອແຂວງ ສວັນນະເຂດ ເກັບຣາຍໄດ້ ບໍ່ໄດ້ຕາມເປົ້າຄືແນວນັ້ນ ພາກສ່ວນທີ່ກ່ຽວຂ້ອງ ຕ້ອງມີການກວດກາ ຄືນໃໝ່ ໂດຍສເພາະ ພາກສ່ວນທຸຣະກິດ ຂນາດໃຫຍ່, ຂນາດນ້ອຍ ແລະ ທຸຣະກິດ ການຄ້າຂາຍ ນໍາ.

ເຕັມຫນ້າ