ແມ່ຍິງລາວພາກເໜືອໄປ ເຮັດວຽກ ຢູ່ຈີນ

ສຸພັດຕາ
2019-04-11
ອີແມວລ໌
ຄໍາເຫັນ
Share
ພິມ
ດ່ານເຂົ້າອອກສາກົນ ເຂດບໍ່ເຕັນ ແຂວງຫຼວງນໍ້າທາ ທີ່ຊາວລາວໃຊ້ຜ່ານ ເຂົ້າອອກເປັນປະຈໍາ
ດ່ານເຂົ້າອອກສາກົນ ເຂດບໍ່ເຕັນ ແຂວງຫຼວງນໍ້າທາ ທີ່ຊາວລາວໃຊ້ຜ່ານ ເຂົ້າອອກເປັນປະຈໍາ
RFA/PN

ແມ່ຍິງວັຍໜຸ່ມລາວ ຢູ່ແຂວງຫຼວງນໍ້າທາ ຜູ້ທີ່ບໍ່ມີວຽກເຣັດງານທໍາ ມັກໄປເຮັດວຽກຢູ່ປະເທດຈີນ, ຍ້ອນຣາຍໄດ້ດີ- ອີງຕາມຄໍາເວົ້າຂອງ ເຈົ້າໜ້າທີ່ປະຈໍາດ່ານສາກົນ ບໍ່ເຕັນວ່າ: ປັດຈຸບັນ ແມ່ຍິງອາຍຸປະມານ 18 ຫາ 30 ປີ ບໍ່ວ່າຈະຢູ່ເຂດໃນເມືອງ ຫຼື ຊົນນະບົດ ສ່ວນຫຼາຍ ມັກໄປເຮັດວຽກຢູ່ຈີນຍ້ອນວ່າຄ່າຈ້າງສູງ. ການໄປມາກໍງ່າຍພຽງແຕ່ໃຊ້ ປື້ມຜ່ານແດນກໍໄປມາໄດ້, ດັ່ງເຈົ້າໜ້າທີ່ ປະຈໍາດ່ານສາກົນບໍ່ເຕັນ ທ່ານນີ້ ກ່າວຕໍ່ວິທຍຸເອເຊັຍເສຣີ ໃນວັນທີ 7 ເມສາ ນີ້ວ່າ:

“ມີຫຼາຍພວກຂະເຈົ້າໄປເຣັດວຽກຢູ່ຈີນ ສ່ວນຫຼາຍແມ່ນອາຍຸປະມານ 18 ຫາ 30 ນີ້ແລະ ບາງຄົນກະຊອກວຽກເຣັດຢູ່ລາວບໍ່ມີ ບາງຄົນ ກະໄປຢູ່ນໍາ ພີ່ນ້ອງ ຢູ່ເຂດສິບສອງປັນນາ ໃຊ້ແຕ່ປື້ມຜ່ານ ແດນ ທຸກໆ 15 ມື້ ເຂົາກັບມາຈໍ້າກາ ແລ້ວກໍ່ກັບເຂົ້າໄປອີກ.”

ທ່ານກ່າວອີກວ່າ ສຳລັບວຽກງານທີ່ເຂົາເຈົ້າມັກໄປເຮັດຢູ່ ປະເທດຈີນນັ້ນ ສ່ວນຫຼາຍແມ່ນວຽກຕາມຮ້ານອາຫານ ແລະຮ້ານຂາຍເຄື່ອງ ໃນເຂດສິບສອງປັນນາ ຂອງຈີນ ເພາະເຂດດັ່ງກ່າວ ສາມາດ ໃຊ້ແຕ່ປື້ມຜ່ານແດນໃນການເຂົ້າອອກປະເທດ.

ແລະສາເຫດນຶ່ງ ທີ່ແມ່ຍິງລາວມັກໄປເຮັດວຽກຢູ່ຈີນ ກໍແມ່ນຍ້ອນຢູ່ລາວ ບໍ່ມີວຽກ ແລະເຖິງຈະມີວຽກເຮັດ, ແຕ່ຄ່າຈ້າງກໍຕ່ຳບໍ່ກຸ້ມກິນ ໂດຍສະເພາະຜູ້ຍິງທີ່ຮຽນຈົບວິຊາຊີບມາແຕ່ຈີນ ແຕ່ຊອກວຽກ ຢູ່ລາວບໍ່ໄດ້ກໍພາກັນໄປເຮັດວຽກຢູ່ຈີນ ເປັນສ່ວນຫຼາຍ, ດັ່ງນັກຮຽນຜູ້ນຶ່ງ ທີ່ຮຽນຈົບມາແຕ່ຈີນ ແລະຈຳເປັນຕ້ອງກັບໄປ ເຮັດວຽກຢູ່ຈີນ ກ່າວຕໍ່ວິທຍຸເອເຊັຍເສຣີ ໃນມື້ດຽວກັນນັ້ນວ່າ:

“ຢູ່ບ້ານເຮົາມັນບໍ່ມີວຽກເຮັດ ໄປຍື່ນນຳຣັຖກະບໍ່ໄດ້ ເຮັດຢູ່ບ້ານເຮົາຄ່າຈ້າງມັນໜ້ອຍບໍ່ຢາກພໍກຸ້ມກິນແດ່ ເຮັດຢູ່ຈີນຄ່າຈ້າງກະໄຄກວ່າຢູ່ ບ້ານເຮົາ.”

ບັນຫາມີຢູ່ວ່າ ຜູ້ຍິງລາວ ທີ່ໄປເຮັດວຽກຢູ່ປະເທດຈີນ ມີຄວາມສ່ຽງຫຼາຍ ທີ່ຈະຕົກເປັນເຫຍື່ອຂອງການຄ້າມະນຸດ; ຜ່ານມາມີແມ່ຍິງລາວ ຫຼາຍຄົນ ຖືກຕົວະຍົວະຫຼອກລວງໄປຈີນ ແລ້ວຖືກຂາຍໄປ ເປັນໂສເພນີຖືກທໍຣະມານ ແລະຖືກກັກຂັງບໍ່ໃຫ້ໄປໃສ ປື້ມຜ່ານແດນ ແລະ ເອກກະສານຕ່າງໆກໍຖືກຍຶດ, ດັ່ງເຈົ້າໜ້າທີ່ປະຈຳດ່ານ ຜູ້ເກົ່າໄດ້ກ່າວອີກວ່າ:

“ຢາກວ່າສ່ຽງໃດ໋ ສຳລັບຜູ້ຍິງທີ່ໄປເຮັດວຽກຢູ່ຈີນ ເພາະວ່າຜ່ານມາກະມີຫຼາຍກໍຣະນີ ທີ່ເຂົາເຈົ້າເອົາໄປຂາຍ ຫຼາຍຄົນກໍສາມາດນຳກັບ ຄືນມາໄດ້ ແຕ່ຫຼາຍຄົນກໍຊອກບໍ່ເຫັນ ບໍ່ຮູ້ວ່າ ເຂົາຂາຍໄປ ທາງໃດ.”

ກ່ຽວກັບບັນຫານີ້ ເຈົ້າໜ້າທີ່ປະຈຳດ່ານກວດຄົນເຂົ້າເມືອງ ແຂວງຫລວງນໍ້າທາ ກໍໄດ້ຕິດຕາມການເຂົ້າ-ອອກຂອງຄົນເພື່ອປ້ອງກັນ ການຄ້າມະນຸດ.

ຄໍາເຫັນ (1)
Share

(

What kind of jobs Lao women are holding in China? Taking care of China men or cleaning their restrooms?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Apr 15, 2019 05:14 AM

ເຕັມຫນ້າ