ມ.ນາໝໍ້ຈະມີບ້ານຈັດສັນ ໃຫ້ ປະຊາຊົນ: ໂຄງການຣົດໄຟ

ໄມຊູລີ
2019-07-30
ອີແມວລ໌
ຄໍາເຫັນ
Share
ພິມ
ການເຈາະອຸມົງ ທາງຣົດໄຟ ຢູ່ ແຂວງອຸດົມໄຊ
ການເຈາະອຸມົງ ທາງຣົດໄຟ ຢູ່ ແຂວງອຸດົມໄຊ
RFA

ປັຈຈຸບັນ ທາງການເມືອງນາໝໍ້ ແຂວງອຸດົມໄຊ ກໍາລັງກະຕຽມສ້າງບ້ານຈັດສັນ ໃຫ້ປະຊາຊົນ 2 ບ້ານ ທີ່ຈະຖືກຍົກຍ້າຍບ່ອນຢູ່ອາສັຍ ຈາກໂຄງການສ້າງທາງຣົດໄຟ ລາວ-ຈີນ, ຊຶ່ງບ້ານຈັດສັນດັ່ງກ່າວ ຈະສ້າງຂຶ້ນຢູ່ໃນເຂດບ້ານນາໝໍ້ໃຕ້ ແລະ ອີກນຶ່ງແຫ່ງຢູ່ບ້ານນາຄົກ ໂດຍຈະເຣີ້ມລົງມືກໍ່ສ້າງ ພາຍໃນປີນີ້, ດັ່ງເຈົ້າໜ້າທີ່ຫ້ອງການປົກຄອງ ເມືອງນາໝໍ້ ກ່າວຕໍ່ວິທຍຸເອເຊັຽເສຣີ ໃນວັນທີ່ 30 ກໍຣະກະດາ ນີ້ວ່າ:

“ເພິ່ນກໍມີແຜນກະຕຽມຢູ່ ໃນປີນີ້ແຫຼະ ດຽວນີ້ມັນກໍຍັງຢູ່ຂັ້ນຕອນລົງສໍາຣວດ ເກັບກໍາຂໍ້ມູນອິສັງຕ່າງໆຈໍານວນ 14 ປາຍເຮັກຕາຣ໌ ຂຶ້ນກັບ ຄວາມຮັບຜິດຊອບຂອງຣັຖບານ ຈະຕ້ອງໄດ້ແກ້ໄຂ.”

ເຈົ້າໜ້າທີ່ທ່ານນີ້ ກ່າວວ່າ ປັດຈຸບັນ ທ່ານຍັງບໍ່ສາມາດຊີ້ແຈງໄດ້ວ່າ ປະຊາຊົນທີ່ຈະຖືກຍົກຍ້າຍ ໄປຢູ່ບ້ານຈັດສັນນັ້ນ ມີທັງໝົດ ຈັກ ຄອບຄົວແທ້ ຍ້ອນກໍາລັງຢູ່ໃນຂັ້ນຕອນ ສລຸບຂໍ້ມູນກັນຢູ່, ບ້ານຈັດສັນແຫ່ງດັ່ງກ່າວ ເປັນສອງແຫ່ງ ໃນຈໍານວນບ້ານຈັດສັນ ທັງໝົດ 4 ບ້ານ ທີ່ຈະຖືກສ້າງຂຶ້ນ ເພື່ອເປັນບ່ອນຢູ່ໃຫ້ແກ່ ປະຊາຊົນ ທີ່ຖືກຍົກຍ້າຍ ຈາກໂຄງການສ້າງທາງຣົດໄຟລາວ-ຈີນ ຊຶ່ງບ້ານຈັດສັນທີ່ ເຫຼືອອີກ 2 ແຫ່ງ ຈະສ້າງຢູ່ບ້ານນາເຕີຍ ເມືອງຫຼວງນໍ້າທາ ແຂວງຫຼວງນໍ້າທາ, ບ້ານບວມອໍ້ ເມືອງຊຽງເງິນ ແຂວງຫລວງພຣະບາງ.

ທ່ານກ່າວຕື່ມວ່າ ສໍາລັບເຣື້ອງການໃຫ້ຄ່າຊົດເຊີຍ ແກ່ປະຊາຊົນ ເມືອງນາໝໍ້ ທີ່ຖືກກະທົບຈາກໂຄງການຣົດໄຟ ຍັງຢູ່ໃນຂັ້ນຕອນ ລໍຖ້າງົບປະມານ ຈາກຣັຖບານ ເພື່ອນໍາມາເບີກຈ່າຍໃຫ້ປະຊາຊົນ ແຕ່ລະຄອບຄົວ ແລະຍັງບໍ່ແນ່ໃຈວ່າຈະໄດ້ຮັບ ພາຍໃນປີນີ້ຫຼືບໍ ຍ້ອນຕ້ອງລໍຖ້າ ການຊີ້ແຈງຈາກຣັຖບານ ເທົ່ານັ້ນ.

ກ່ຽວກັບເຣື້ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາເຈົ້າໜ້າທີ່ ກົມຣົດໄຟ ເພື່ອຂໍຣາຍຣະອຽດ ຄວາມຄືບໜ້າ ຂອງການຊົດເຊີຍ ແຕ່ບໍ່ມີ ເຈົ້າໜ້າທີ່ ທ່ານໃດ ສະດວກໃຫ້ສັມພາດ.

ມາຮອດປັດຈຸບັນ ໂຄງການສ້າງທາງຣົຖໄຟລາວ-ຈີນ ຄວາມຍາວ 414 ກິໂລແມັດ ມີຄວາມຄຶບໜ້າ 72 ເປີເຊັນແລ້ວ, ຫລ້າສຸດມີ ຣາຍງານວ່າ ຂົວຣົຖໄຟຂ້າມຂອງ ຣະຫວ່າງ ນະຄອນຫລວງພຣະບາງ ຫາເມືອງ ຈອມເພັດ ຄວາມຍາວ 1,458 ແມດ ໄດ້ເຊື່ອມ ຈອດກັນເປັນທີ່ຮຽບຮ້ອຍແລ້ວ ເມື່ອວັນທີ່ 28 ກໍຣະກະດາ ທີ່ຜ່ານມາ.

ເຕັມຫນ້າ