ເຂື່ອນຫຼວງພຣະບາງ ຈະສ້າງໃສ່ ແມ່ນໍ້າຂອງ

ໄຊຍາ
2019-06-18
ອີແມວລ໌
ຄໍາເຫັນ
Share
ພິມ
ສັດລ້ຽງ ຂອງຊາວບ້ານ ໃນເຂດ ທີ່ຈະຖືກຜົນກະທົບ ຈາກການສ້າງເຂື່ອນ ຫຼວງພຣະບາງ
ສັດລ້ຽງ ຂອງຊາວບ້ານ ໃນເຂດ ທີ່ຈະຖືກຜົນກະທົບ ຈາກການສ້າງເຂື່ອນ ຫຼວງພຣະບາງ
RFA/AS

ແຂວງຫຼວງພຣະບາງ ມີໂຄງການຈະສ້າງເຂື່ອນໄຟຟ້າ ໃສ່ແມ່ນໍ້າຂອງ ເຊິ່ງຫ່າງຈາກນະຄອນຫຼວງພຣະບາງພຽງ 20 ກິໂລແມັດ ເຮັດໃຫ້ ຊາວບ້ານທີ່ອາສັຍ ໃນເຂດກໍ່ສ້າງເຂື່ອນດັ່ງກ່າວ ເປັນກັງວົນໃຈ ຍ້ອນຈະຖືກຍົກຍ້າຍ ອອກຈາກຖິ່ນທີ່ຢູ່ດັ້ງເດີມ. ດັ່ງປະຊາຊົນ ຜູ້ທີ່ຈະຖືກ ຜົລກະທົບ ຈາກໂຄງການນີ້ ໄດ້ເວົ້າຕໍ່ຜູ້ສື່ຂ່າວ RFA ວ່າ:

"ເພິ່ນມາເບິ່ງແລ້ວແຕ່ວ່າຍັງຄ່າທົດແທນ ເພິ່ນຍັງໄປຄິດໄລ່ແບບດິນໄຮ່ດິນສວນທົ່ງນາ ແລະໝາໄມ້ກິນໝາກ ດິນຈັບຈອງ ຍັງບໍ່ທັນອອກມາ ເທື່ອ ເພິ່ນຊິໄປຄິດໄລ່ ກາບໍ່ໄດ້ໃຈປານໃດໂອ້ ຢູ່ນີ້ມີຫຍັງກາໄດ້ກິນໝົດ."

ສ່ວນຊາວບ້ານອີກທ່ານນຶ່ງ ທີ່ຈະໄດ້ຖືກຍົກຍ້າຍອອກຈາກໂຄງການດຽວກັນ ໄດ້ເວົ້າຕໍ່ຜູ້ສື່ຂ່າວ RFA ວ່າ; ເຖິງແມ່ນຕົນແລະຊາວບ້ານຫຼາຍ ຄົນ ຈະບໍ່ຢາກຍ້າຍແຕ່ໃນທີ່ສຸດ ກໍຕ້ອງໄດ້ຍ້າຍ ຍ້ອນບໍ່ສາມາດຂັດຄຳສັ່ງ ຂອງຂັ້ນເທິງໄດ້.

"ເຣື່ອງຈິດໃຈແທ້ ກາບໍ່ຢາກຍ້າຍຄືເພີ່ນວ່າຫັ້ນແຫຼະ ແຕ່ໄດ້ຈຳເປັນແທ້ວ່າ ພັກຣັຖຂັ້ນເທິງເພິ່ນເຮັດແທ້ ບ້ານເພີ່ນຍ້າຍບ້ານເຮົາ ບໍ່ຍ້າຍກ່າ ບໍ່ໄດ້ ບ້ານເພີ່ນກະຕັ້ງແຕ່ທ່າຝາງກ້ອງປາກແບງ ລົງມາຈະໄດ້ຖືກຍ້າຍໝົດ ເຮົາກາຈຳເປັນຕ້ອງຍ້າຍ ນຳເພິ່ນ ຂັດເພິ່ນບໍ່ໄດ້."

ທາງເຈົ້າໜ້າທີ່ຜແນກແຮງງານ ແລະ ສວັດດີການສັງຄົມ ແຂວງຫຼວງພຣະບາງ ຊີ້ແຈງຕໍ່ຜູ້ສື່ຂ່າວ RFA ວ່າປັດຈຸບັນ ທາງການໄດ້ກະກຽມ ບ່ອນສ້າງບ້ານຈັດສັນ ໃຫ້ແກ່ຜູ້ຖືກຍົກຍ້າຍ ແຕ່ຍັງປັບເດີ່ນບໍ່ທັນແລ້ວເທື່ອ ແລະບໍ່ຮູ້ວ່າຈະຍົກຍ້າຍເມື່ອໃດ ສ່ວນເຣື່ອງການຊົດເຊີຍກຳລັງ ຢູ່ໃນຂັ້ນຕອນການສຳຣວດ.

"ໂອເພິ່ນໃຫ້ຈຸດຍ້າຍ ເພິ່ນໄປເບິ່ງແລ້ວເດ້ ເພິ່ນໄປຈັດສັນແລ້ວ ເພິ່ນປັບສະຖານທີ່ຍັງບໍ່ທັນແລ້ວເທື່ອ ຍາມໃດຍົກຍ້າຍກະຍັງບໍ່ທັນຮູ້ ຍົກຍ້າຍນີ້ຄືວ່າການສ້າງເຂື່ອນ ມັນໃຫຍ່ຂຶ້ນເມືອໃດ ເພິ່ນກາເຣີ້ມລົງມື ເຣື່ອງທົດແທນນີ້ ຂະເຈົ້າດຽວນີ້ ກຳລັງໃຫ້ ພະນັກງານລົງໄປ ຄິດໄລ່ຄົວເຮືອນເດ້."

ເຈົ້າໜ້າທີ່ເວົ້າຕື່ມວ່າ ໃນເບື້ອງຕົ້ນຍັງບໍ່ທັນຮູ້ຈຳນວນຄອບຄົວ ທີ່ຈະຖືກຍົກຍ້າຍ ຮູ້ພຽງແຕ່ວ່າຈະມີ ປະຊາຊົນຖືກຍົກຍ້າຍ ທັງໝົດຈຳນວນ 6 ບ້ານ.

ຕົວແທນອົງການແມ່ນໍ້າສາກົລ ຍານາງ Maureen Harris ເວົ້າຕໍ່ຜູ້ສື່ຂ່າວ RFA ວ່າຈາກການສຶກສາວິຈັຍ ປະຊາຊົນຈະຖືກຍົກຍ້າຍ ຍ້ອນໂຄງການເຂື່ອນ ດັ່ງກ່າວປະມານ 12 ພັນຄົນ.

"ຈາກການສຶກສາວິຈັຍໃນໄລຍະຜ່ານມາ ພວກເຮົາມີການປະເມີນວ່າ ຈະມີການຍົກຍ້າຍປະຊາຊົນ 12 ພັນຄົນແຕ່ອາດຈະມີການສຶກສາວີິຈັຍ ຄືນໃໝ່ເພື່ອໃຫ້ຂໍ້ມູນ ມີຄວາມຄືບໜ້າ."

ໂຄງການສ້າງເຂື່ອນແມ່ນໍ້າຂອງ ຢູ່ແຂວງຫຼວງພຣະບາງ ເປັນການຮ່ວມທຶນ ໃນນັ້ນມີ ຣັຖບານລາວ, ບໍຣິສັດ ຊໍ ການຊ່າງຂອງໄທ ແລະ ບໍຣິສັດ Petro Vietnam Power Corporation ທີ່ເປັນຂອງຣັຖບານ ວຽດນາມ. ເຂື່ອນໄຟຟ້າແຫ່ງນີ້ ມີກຳລັງ ການຜລິດ 1,410 ເມກະວັດ.

ເຈົ້າໜ້າທີ່ຂອງບໍຣິສັດ ຊໍ ການຊ່າງ ໄດ້ໃຫ້ຂໍ້ມູນ ຕໍ່ຜູ້ສື່ຂ່າວ RFA ວ່າປັດຈຸບັນໂຄງການເຂື່ອນໄຟຟ້າ ຫຼວງພຣະບາງກຳລັງຢູ່ໃນໄລຍະ ການສຳຣວດ ອອກແບບ ແລະ ປະເມີນຜົລກະທົບຕໍ່ ສິ່ງແວດລ້ອມ ແຕ່ຍັງບໍ່ເປີດເຜີຍວ່າຈະເຣີ້ມສ້າງເມື່ອໃດ.

ໂຄງການກໍ່ສ້າງເຂື່ອນໄຟຟ້າ ແຂວງຫຼວງພຣະບາງ ເປັນໂຄງການເຂື່ອນນໍ້າຂອງ ແຫ່ງທີ 5 ຕໍ່ຈາກເຂື່ອນໄຊຍະບູລີ, ເຂື່ອນດອນສະໂຮງ, ເຂື່ອນປາກແບງ ແລະ ເຂື່ອນປາກລາຍ.

ຄໍາເຫັນ (1)
Share

(

Go ahead Lao party-state. Take the land you want from Lao people who were born to serve your interest. Don't listen to the outside world just watch your off-shore bank-accounts. That's all it counts.Claps claps.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 19, 2019 08:05 AM

ເຕັມຫນ້າ