ຕລາດຊັງຈຽງ ວ່າບໍ່ໄດ້ ຊື້ຂາຍ ຊິ້ນສ່ວນ ສັດປ່າ

ມະນີຈັນ
2017-06-08
ອີແມວລ໌
ຄໍາເຫັນ
Share
ພິມ
ຕລາດຊັງຈຽງ ທີ່ ນະຄອນຫຼວງວຽງຈັນ
ຕລາດຊັງຈຽງ ທີ່ ນະຄອນຫຼວງວຽງຈັນ
RFA

ຕລາດຊັງຈຽງ ສູນການຄ້າ China Town ທີ່ນະຄອນຫລວງວຽງຈັນ ປະຕິເສດຂ່າວ ເຣື່ອງການຊື້-ຂາຍ ຜລິຕພັນສັດປ່າ ຜິດກົດໝາຍ ເຊັ່ນເຄື່ອງເອ້ ທີ່ຜລິດຈາກງາຊ້າງ ນໍແຮດ ແລະ ກະດູກເສືອ ເພື່ອຂາຍໃຫ້ ນັກທ່ອງທ່ຽວ ຕ່າງປະເທດ ໂດຍສະເພາະ ນັກທ່ອງທ່ຽວຈີນ. ເຈົ້າໜ້າທີ່ຝ່າຍການຕລາດ ບໍຣິສັດ ຊັງຈຽງ ເວົ້າກ່ຽວກັບ ເຣື່ອງນີ້ວ່າ:

"ບໍຣິສັດເຮົາ ບໍ່ໄດ້ຂາຍພວກນັ້ນ ບໍ່ໆ ຕລາດຂອງເຮົາບໍ່ມີ ຄັນຂາຍເສື້ອຜ້າທົ່ວໄປ ກໍມີຈີນມີລາວ ຢູ່ນີ້້ບໍ່ມີ ເຮົາບໍ່ໄດ້ຂາຍ ຂະເຈົ້າໜ້າຈະ ບໍ່ໄດ້ຂາຍ ແນວນັ້ນ ເຮົາກໍບໍ່ຮູ້ ຄືກັນ".

ແຕ່ເວັບໄຊ Sixth Tone ເປີດເຜີຍວ່າຕລາດ ຊັງຈຽງ ນີ້ບໍ່ເປັນສະຖານທີ່ ແຫ່ງດຽວ ທີ່ຄ້າຂາຍສິນຄ້າ ເຄື່ອງເອ້ ຜລິຕພັນ ສັດປ່າ ຜິດ ກົດໝາຍ ເພາະຍັງພົບ ຢູ່ໃນໂຮງແຮມ ຫລູຫລາໃຈກາງເມືອງ ຫລາຍແຫ່ງ ໃນນະຄອນຫລວງ ວຽງຈັນ. ພ້ອມກັນນັ້ນ ກໍໃຫ້ຄໍາ ແນະນໍາ ລາຍລະອຽດຕ່າງໆ ກັບກຸ່ມຜູ້ຊື້ ແລະ ນັກທ່ອງທ່ຽວ ເພື່ອຫລີກລ່ຽງ ການກວດກາ ຂອງເຈົ້າໜ້າທີ່ພາສີ ໃນສນາມບິນ.

ໜັງສືພິມ New York Time ກໍເປີດເຜີຍວ່າ ໃນປັດຈຸບັນ ຕລາດຊັງຈຽງ ເປັນແຫລ່ງຊື້-ຂາຍ ສິນຄ້າເຄື່ອງເອ້ ຜລິຕພັນສັດປ່າ ຜິດກົດ ໝາຍ ໃຫ້ນັກທ່ອງທ່ຽວ ຕ່າງປະເທດ ໂດຍສະເພາະ ນັກທ່ອງທ່ຽວ ຈາກ ປະເທດຈີນ.

ນອກຈາກຢູ່ນະຄອນຫລວງວຽງຈັນ ແລ້ວ ຢູ່ເຂດ ເສຖກິດພິເສດ ໃນພາກເໜືອຂອງລາວ ກໍເປັນພື້ນທີ່ ຈອດພັກສິນຄ້າ ແລະ ຜລິຕພັນ ສັດປ່າຜິດກົດໝາຍ ເພື່ອຂາຍ ໃຫ້ນັກທ່ອງທ່ຽວ ແລະກຽມສົ່ງອອກໄປ ປະເທດປາຍທາງ ຄືຈີນ ແລະວຽດນາມ.

ເຈົ້າໜ້າທີ່ກອງທຶນສັດປ່າໂລກ WWF Lao ເປີດເຜີຍວ່າ ເນື່ອງຈາກ ເປັນເຂດເສຖກິດພິເສດ ທີ່ຕ່າງປະເທດ ເປັນຜູ້ລົງທຶນ ການເຂົ້າໄປ ກວດກາສິນຄ້າ ຫຼືຜລິຕພັນສັດປ່າ ຜິດກົດໝາຍ ນັ້ນກໍບໍ່ສາມາດເຮັດໄດ້ເຕັມທີ່ ເຖິງແມ່ນວ່າ ສປປລາວ ຈະມີ ກົດໝາຍຄຸ້ມຄອງ ສັດປ່າ ແຕ່ກໍຍັງ ບໍ່ສາມາດ ບັງຄັບໃຊ້ ໃນເຂດເສຖກິດພິເສດ ໄດ້, ເຮັດໃຫ້ພື້ນທີ່ ດັ່ງກ່າວ ກາຍເປັນຈຸດ ທີ່ມີການລັກລອບ ຂົນສິນຄ້າ ຜິດກົດໝາຍ:

"ບາດນີ້ສິນຄ້າ ມັນຜ່ານ ເຮົາບໍ່ສາມາດ ເຣື່ອງກໍາຈັດຂອງການເຮັດ ຂໍ້ກົດໝາຍ ໃນບ້ານເຮົາກໍຄືວ່າ ເຂດເສຖກິດພິເສດ ເສຖກິດພິເສດ ແມ່ນ Golden Triangle Special Zone ນີ້ແຫລະເນາະ ບາດນີ້ມັນ ກໍຈະເປັນຂໍ້ກໍາຈັດ ເຈົ້າໜ້າທີ່ ເນາະ ເຂົ້າໄປ ກ້າວກ່າຍ ຢູ່ໃນ ພື້ນທີ່ດັ່ງກ່າວ ມັນກະເປັນ ຊ່ອງຫວ່າງນຶ່ງ ທີ່ການຂົນສົ່ງ ການລັກລອບ ຂົນສົ່ງ ຍັງເຮັດໄດ້ ຢູ່ຫັ້ນນະ".

ທ່ານເວົ້າວ່າເຈົ້າໜ້າທີ່ WWF ຮ່ວມກັບ ເຈົ້າໜ້າທີ່ຄຸ້ມຄອງ ສັດປ່າ ສປປລາວ ໄດ້ໄປກວດກາ ສັດປ່າ ຕາມສວນສັດຕ່າງໆ ຊຶ່ງພົບເຫັນ ສັດປ່າສງວນຫຼາຍຊນິດ ທີ່ຖືກຂັງໄວ້ ແບບບໍ່ໄດ້ ມາຕຖານ ເຊັ່ນວ່າ ຊ້າງ ເສືອ ແລະລິ່ນ ທີ່ມີການລັກລອບ ຊື້ຂາຍ ເປັນຈໍານວນຫຼາຍ ຂນະທີ່ກຽມແຜນ ທີ່ຈະສ້າງສູນ ຟື້ນຟູສັດປ່າ ທີ່ແຂວງຫລວງພຣະບາງ.

ຂ່າວ Bangkok Post ຣາຍງານວ່າພົບເຫັນ ສັດປ່າສງວນຫຼາຍຊນິດ ໃນພື້ນທີ່ຄາຊີໂນ ເຂດເສຖກິດພິເສດ ສາມຫລ່ຽມຄໍາ ແຂວງບໍ່ແກ້ວ ເຊັ່ນ ເສືອ ໝີ ກວາງ ແລະສັດປ່າຫລາຍຊນິດ ທີ່ຖືກລ້ຽງໄວ້ໃນຄອກ ເພື່ອນໍາມາເປັນ ສິນຄ້າແປຮູບ ຫລືສັດປ່າ ບາງຊນິດຖືກຂ້າ ເພື່ອນໍາ ມາເປັນອາຫານ ຣາຄາແພງ ສໍາລັບ ນັກທ່ອງທ່ຽວ.

ເຕັມຫນ້າ