ຊາວອົພຍົບບໍ່ຢາກຍ້າຍ ໄປບ້ານ ຈັດສັນ

ໄຊຍາ
2018-11-06
ອີແມວລ໌
ຄໍາເຫັນ
Share
ພິມ
ຄຸ້ມບ້ານຈັດສັນໃໝ່ ສໍາລັບປະຊາຊົນ ເມືອງສນາມໄຊ ທີ່ ສູນເສັຽບ້ານເຮືອນ ຍ້ອນເຂື່ອນເຊປຽນແຕກ
ຄຸ້ມບ້ານຈັດສັນໃໝ່ ສໍາລັບປະຊາຊົນ ເມືອງສນາມໄຊ ທີ່ ສູນເສັຽບ້ານເຮືອນ ຍ້ອນເຂື່ອນເຊປຽນແຕກ
RFA/TP

ຊາວບ້ານຜູ້ປະສົພພັຍຈາກ ເຂື່ອນ ເຊປຽນ-ເຊນໍ້ານ້ອຍ ແຕກ ຢູ່ເມືອງສນາມໄຊ ແຂວງອັດຕະປື ຈຳນວນນຶ່ງບໍ່ຕ້ອງການຍ້າຍໄປຢູ່ບ້ານ ຖາວອນໃນເຂດທີ່ທາງການ ຈັດສັນໃຫ້ ຍ້ອນເຂດດັ່ງກ່າວພື້ນທີ່ດິນ ບໍ່ສາມາດປູກຝັງໄດ້ ແລະຢູ່ໄກຈາກບ້ານເກົ່າ ເຖິງ 30 ກິໂລແມັດ; ດັ່ງເຈົ້າໜ້າທີ່ຫ້ອງການປົກຄອງ ເມືອງສນາມໄຊ ແຂວງອັດຕະປື ຜູ້ບໍ່ປະສົງອອກຊື່ກ່າວຕໍ່ວິທຍຸເອເຊັຽເສຣີ ໃນວັນທີ 06 ພຶສຈິກາ ນິ້ວ່າ:

"ປະຊາຊົນສ່ວນນຶ່ງບ້ານທ່າແສງຈັນເຂົາບໍ່ຢາກຍ້າຍ ບ່ອນຖາວອນເຂົາຢາກຍ້າຍໄປຢູ່ແຖວຫ້ວຍຊອຍ ແຖວປີ່ນດົງເດ້ ເຂົາບໍ່ຢາກຍ້າຍໄປ ຢູ່ບ້ານດົກ ເພາະວ່າໄກຈາກບ້ານເຕີບຫ້ັນແຫລະ ມັນເປັນບ່ອນທີ່ຫາກິນຍາກ ການຊອກຫາກິນມັນຍາກ ດິນສວນ ເຮັດເປັນສວນກໍບໍ່ມີ ມັນບໍ່ໄດ້ມໍ່ນໍ້າເດ ບໍ່ມີນໍ້າ."

ທ່ານກ່າວຕື່ມວ່າພື້ນທີ່ທາງການຈັດສັນໃຫ້ ເປັນບ້ານເຮືອນຖາວອນ ຂອງຜູ້ປະສົພພັຍນັ້ນ ຕັ້ງຢູ່ຣະວ່າງເຂດປ່າດົກ ຂອງບ້ານດົກ ແລະ ເຂດປ່າດົງບາກ ບ້ານຫາດຍາວ ໂດຍຈຸດດັ່ງກ່າວແມ່ນເຂດພື້ນທີ່ຫ່າງໄກ ຈາກເຂື່ອນ ແລະ ເປັນເນື້ອທີ່ດິນທີ່ຣັຖ ຍັງບໍ່ໄດ້ໃຊ້ປະໂຫຍດ ຫຍັງເທື່ອ.

ຕໍ່ບັນຫາດັ່ງກ່າວປັດຈຸບັນທາງການ ແລະຊາວບ້ານຍັງໄດ້ປະຊຸມກັນຢູ່ ຍັງບໍ່ທັນໄດ້ຜົລສລຸບອອກມາເທື່ອ ແຕ່ທາງການກ່າວວ່າ ກໍອາດຈະ ຕ້ອງໄດ້ຍ້າຍ ເຖິງວ່າຈະບໍ່ເຫັນດີກໍຕາມ ຍ້ອນວ່າຫາງສຽງສ່ວນຫລາຍ ຂອງຜູ້ປະສົພພັຍເຫັນດີ ກັບການຍ້າຍ ໄປຢູ່ບ່ອນດັ່ງກ່າວ.

"ບ້ານທ່າຫີນ ຫີນລາດ ສະມໍໄຊ ບ້ານໃໝ່ ທີ່ຖືກຜົລກະທົບແຮງ ຫັ້ນນ່າ ປະຊາຊົນສ່ວນນຶ່ງ ເຂົາຍ້າຍແລ້ວເຂົາຍ້າຍ ຈາກໂຮງຮຽນໄປຢູ່ ອັນນັ້ນແລ້ວ ປ່າດົງບາກ ປະຊາຊົນໄປຢູ່ແລ້ວເດ້ ສ່ວນນຶ່ງເຂົາສ້າງແລ້ວເປັນຖາວອນ ເຂົາຍີນດີຢູ່ ຂະເຈົ້າເຫັນດີ ບ້ານເດີມຢູ່ບໍ່ໄດ້ແລ້ວ ເຂົາຢາກຍ້າຍບ່ອນຖາວອນຫ້ັນແຫລະ ຢູ່ແບບຖາວອນເຂົາຢາກມີຄວາມໝັ້ນຄົງຫັ້ນນ່າ."

ເຈົ້າໜ້າທີ່ກ່າວຕອນທ້າຍວ່າ ພື້ນທີ່ທາງການຈັດສັນ ເປັນບ່ອນບ້ານຖາວອນ ຜູ້ປະສົພພັຍຈາກເຫດເຂື່ອນແຕກນັ້ນ ມີຂນາດ 200 ເຮັກຕ້າ ຫລື 1,200ໄຮ່ ສາມາດຮອງຮັບປະຊາຊົນໄດ້ຫລາຍກວ່າ 1000 ຄອບຄົວ ບ່ອນດັ່ງກ່າວ ປັດຈຸບັນ ປະຊາຊົນ ເຣີ່ມຍ້າຍເຂົ້າໄປຢູ່ແລ້ວ ຫລັງຈາກທາງການສ້າງເຮືອນຖາວອນ ຈຳນວນນຶ່ງສຳເຣັດ.

ຄໍາເຫັນ (2)
Share

ເດັກ​ບ້ານ​ນາ

ຈາກ ​ອັດ​ຕະ​ປື

ຢາກໃຫ້ ອີ່ລຸງທອງລຸນ ບອກໃຫ້ ທ່ານ ຄຳມະນີ ເຊົາອະນຸຍາດ ສ້າງເຂື່ອນທັງຫລາຍ ມັນບໍ່ມີຫຍັງດີຈັກຢ່າງເລີຍ ມີແຕ່ສ້າງຄວາມເດືອດຮ້ອນ ແລະ ຫາຍະນະ ໃຫ້ປະຊາຊົນ ບໍ່ວ່າ ຈະເປັນເລື້ອງສູນເສຍບ່ອນທຳມາຫາກິນ ແຕ່ຍັງ ຖືກນ້ຳຖ້ວມ ແລະ ສັງຫານປະຊາຊົນລາວອີກ ກະຊັ້ນ ຊິສ້າງໄປເຮັດຫຍັງເດ້. ເງິນກ້ອງໂຕະ ເງິນນາຍຫນ້າ ໄດ້ຫລາຍ ກໍ່ບໍ່ຄຸ້ມຄ່າ ກັບ ສິ່ງທີ່ເສຍໄປແລະຊີວິດ ທີ່ເສຍໄປ. ພວກເຮົາຖືສາດສະໜາພຸດ ການໂລບເອົາຂອງຄົນອື່ນ ບາບຫນາສາມານແທ້ເດ້ ຂະນ້ອຍ ກະເຫັນ ຜູ້ນຳໄປວັດໃນວັນສິນວັນພະຢູ່ ຈັກນ່ອຍ ກະບຸນທາດຫລວງ ທ່ານຜູ້ນໍາ ກະຊິໄປຕັກບາດອີກ ແຕ່ເປັນຫຍັງ ຄືເຮັດບາບແທ້. ທິດສະດີ ມາກເລນິນ ກະຄືວ່າສອນໃຫ້ເອົາໃຈໃສ່ປະຊາຊົນ, ປະຊາຊົນຕ້ອງມາກ່ອນ. ທິດສະດີ ກໍ່ຄືວ່າ ຮຽນຕະຫລອດ ບາງທ່ານກໍ່ລົງມາເຜີຍແຜ່ ຢູ່ເລີຍໆ ແຕ່ເປັນຫຍັງ ຜູ້ນຳ ບໍ່ພາກັນປະຕິບັດແດ່.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 08, 2018 05:51 AM

ຄຳ

ຈາກ ​ເມືອງ​ໄຕ້

ປະຊາຊົນບໍ່ຢາກຍ້າຍໄປຢູ່ ຍ້ອນວ່າ ປູກຝັງໄດ້ ມັນບໍ່ແມ່ນເລື້ອງແປກປະຫລາດຫຍັງດອກ ເພາະວ່າ ເຂົາເຈົ້າ ມີແຕ່ ຫາກິນດ້ວຍການປູກຝັງເຮັດສວນ ເຮັດວຽກອື່ນບໍ່ເປັນ. ຢູ່ບ່ອນໃໝ່ ກໍບໍ່ມີວຽກຮັບຈ້າງພໍຊິໄດ້ເງິນ ມາຊື້ເຂົ້າກິນ. ເປັນຜູ້ນຳ ແຕ່ບໍ່ຮູ້ຈັກ ວິຊາທຳມາຫາກິນ ຂອງປະຊາຊົນ ໂຕເອງ ຈັກເປັນຜູ້ນຳປະເພດໃດ. ແຫ່ງເຮັດໃຫ້ ພວກເຂົາເຈົ້າທຸກຕື່ມ ລຳບາກຕື່ມ. ລູກໆເດ້ຊິໄປເຂົ້າໂຮງຮຽນຢູ່ໃສ. ເງິນບໍລິຈາກ ກໍໍ່ຫລັງໄຫລເຂົ້າມາ ເປັນຈຳນວນມະຫາສານ ແຕ່ບໍ່ຮູ້ວ່າ ໄປໃສໝົດ ການບໍລິຫານແຈກຍາຍເງິນ ກະບໍ່ເປັນ, ຮູ້ຈັກແຕ່ ບໍລິຫານ ໃສ່ກະເປົາ ໂຕເອງ. ຂໍກະລຸນາ ເອົາເງິນບໍລິຈາກ ມາຍາຍໃຫ້ ພວກປະສົບໄພແດ່ທ້ອນ ຢ່າເອົາເງິນນັ້ນ ໄປກັກໄວ້ເລີຍ. ມັນບໍ່ແມ່ນເງິນພວກທ່ານເດ້ ມັນບາບເດີ ທ່ານເອີຍ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 08, 2018 05:47 AM

ເຕັມຫນ້າ