ການເກັບພາສີນໍາຄົນລາວ ເຮັດວຽກ ຢູ່ໄທ

ອຸ່ນແກ້ວ ສຸກສະຫວັນ
2016-11-02
ອີແມວລ໌
ຄໍາເຫັນ
Share
ພິມ
ຊາວລາວໃນ ແຂວງພາກເໜືອ ທີ່ຂ້າມໄປມາ ຣະຫວ່າງ ໄທ-ລາວ
ຊາວລາວໃນ ແຂວງພາກເໜືອ ທີ່ຂ້າມໄປມາ ຣະຫວ່າງ ໄທ-ລາວ
RFA

ປັດຈຸບັນ ເຈົ້າໜ້າທີ່ ທ້ອງຖິ່ນ ບາງແຂວງ ໄດ້ມີການ ເກັບອາກອນ ຣາຍໄດ້ນຳ ປະຊາຊົນ ຜູ້ທີ່ ໄປເຮັດວຽກ ຢູ່ ປະເທດໄທ ໃນມູລຄ່າ 660 ພັນກີບ ຕໍ່ຄົນ ຕໍ່ປີ. ຕາມການເປີດເຜີຍ ຂອງ ເຈົ້າໜ້າທີ່ ແຂວງ ໄຊຍະບູຣີ ຜູ້ທີ່ບໍ່ປະສົງ ອອກຊື່ ຕໍ່ ເອເຊັຽເສຣີ ໃນວັນທີ 1 ພືສຈິກາ ທີ່ ຜ່ານມາ:

"ຄັນຖ້າສ່ວນໃດ ໄປອອກແຮງງານ ຢູ່ຕ່າງປະເທດ ເຂົາຄິດໄລ່ ລາຍໄດ້ ສ່ວນບຸກຄົນ ເຂົາຈະທຽບ ຄືກັນກັບ ພະນັກງານ ທົ່ວໄປນີ້ນະ ຄືກັບ ຂ້າຣັດຊະການ ທົ່ວໄປນີ້ນະ ຜູ້ນຶ່ງ ປີນຶ່ງ ຖືກຢູ່ 660 ພັນກີບ ຄັນຖ້າວ່າ ບໍ່ມີ ເອກກະສານ ຫຍັງ ໄປແບບ ບໍ່ຖືກຕ້ອງ ຫັ້ນແລ້ວ ແມ່ນ ຈະຄູນ 2 ເທົ່າ ທີ່ວ່າ ບໍ່ມີ ເອກກະສານ ອະນຸຍາດ ໄປຫັ້ນນ່າ ຈະຄູນສອງ ເທົ່າ".

ທ່ານ ອະທິບາຍວ່າ ແຂວງ ໄຊຍະບູຣີ ໄດ້ເລີ້ມເກັບ ອາກອນ ມາຕັ້ງແຕ່ ປີ 2014 ແລ້ວ ໂດຍ ອີງໄສ່ ຄຳສັ່ງ ການເກັບ ອາກອນ ຂອງແຂວງ ແລະ ມີຜົນ ບັງຄັບໃຊ້ ກັບ ປະຊາຊົນ 11 ເມືອງ ທົ່ວແຂວງ. ສຳລັບ ຂັ້ນຕອນ ການເກັບນັ້ນ, ນາຍບ້ານ ຈະເປັນ ຜູ້ເກັບກຳ ຂໍ້ມູນ ແລະ ຜແນກການເງິນ ເມືອງ ຈະເປັນ ຜູ້ລົງມາເກັບ ໂດຍ ສົມທົບ ກັບ ອຳນາດ ການປົກຄອງ ບ້ານ.

ການເງິນເກັບ ອາກອນຣາຍໄດ້ ຈະແບ່ງອອກເປັນ ສອງສ່ວນ ຄື ສ່ວນທີ ນຶ່ງ ແມ່ນ 30 ເປີເຊັນ ຈະນຳໄປເປັນ ງົບປະມານ ຂອງ ເຈົ້າໜ້າທີ່ ທ້ອງຖິ່ນ ໃນບ້ານ ຫລື ເມືອງ ສ່ວນ ທີສອງ ແມ່ນ 70 ເປີເຊັນ ຈະນຳເຂົ້າ ງົບປະມານ ສ່ວນກາງ ຂອງ ຣັຖບານ. ສຳລັບ ຜູ້ທີ່ໄປ ເຮັດວຽກ ຢູ່ໄທ ແລ້ວ ການເກັບ ອາກອນ ຣາຍໄດ້ ມັນກໍສົ່ງ ຜົນກະທົບ ຕໍ່ເຂົາເຈົ້າ, ດັ່ງ ກັມມະກອນ ລາວ ຄົນນຶ່ງ ຜູ້ທີ່ເຮັດວຽກ ຢູ່ໄທ ໄດ້ກ່າວຕໍ່ ເອເຊັຽ ເສຣີ ວ່າ:

"ທາງການລາວ ເພິ່ນກັບຄ່າ ເຂົ້າມາໄທ ນີ້ແຫຼະ ມັນກໍເດືອດຮ້ອນ ແຫຼະ ເດືອດຮ້ອນສຸດໆ ເລີຍລະ ແລ້ວ ທາງບ້ານ ກໍຊິ ເດືອດຮ້ອນ ອີກ ມັນຈະບໍ່ພໍ ຈູນເຈືອ ຄອບຄົວ ຫັ້ນນ່າ ຈິງໆ ກໍຢາກຊິໃຫ້ເພິ່ນ ເກັບໜ້ອຍລົງ ເພາະວ່າ ເຫັນໃຈຄົນ ທີ່ເຂົາ ກ່ອນຊິມາ ຫາງານທຳ ຢູ່ໄທ ກໍຄືມັນ ລຳບາກ ຢູ່ບ້ານເຮົາ ຢູ່ແລ້ວເນາະ ພໍເຂົ້າມາໄທ ມັນກໍລໍາບາກ ເພາະວ່າ ເປັນລູກຈ້າງ ເພິ່ນຫັ້ນນ່າ".

ນອກຈາກນີ້ ແຂວງສາຣະວັນ ກໍມີການ ເກັບອາກອນ ນຳຜູ້ທີ່ ໄປເຮັດວຽກ ຢູ່ ປະເທດໄທ ເຊັ່ນດຽວກັນ ໂດຍ ຈະເກັບມູນຄ່າ ດຽວກັນ ກັບ ຢູ່ແຂວງ ໄຊຍະບູຣີ.

ຄໍາເຫັນ (2)
Share

ບໍ່ຂໍອອກນາມ

ຈາກ vt

ຂໍໃຫ້ທ່ານຜູ້ມີອຳນາດ ຫຼືຜູ້ທີ່ມີໜ້າທີ່ຮັບຜິດຊອບ ໃນການເກັບພາສີກັບແຮງງານລາວ ທີ່ໄປເຮັດວຽກຢູ່ຕ່າງແດນ ຈົ່ງກະລຸນາເຫັນໃຈພວກເຂົາເຈົ້າແດ່ ພວກທ່ານຢ່າລືມໄດ໋ວ່າ ເຂົາເຈົ້າໄປຂາຍແຮງານ ບໍ່ແມ່ນເຂົາໄປເປັນນັກລົງທຶນ ຫຼືພໍ່ຄ້າທີ່ມີກຳໄລ ມາກມາຍກ່າຍກອງ, ຊົ່ວຊິໄດ້ເງິນ 1 ບາດ ໃນແຕ່ລະມື້ ເລືອດຕາແທບອອກ, ຕ້ອງເຮັດວຽກຢ່າງໜັກໜ່ວງ ແຖມຍັງມີຄົນລາວບາງຄົນ ຍັງຖືກເອົາລັດເອົາປຽບ ຈາກນາຍຈ້າງ; ເພາະທຸກຍາກຈຶ່ງໄດ້ບາກບັ່ນອົດທົນໄປ ເພື່ອຄວາມຫວັງອັນນ້ອຍນິດ ທີ່ຈະໃຫ້ຊີວິດຂອງຕົນແລະຄອບຄົວ ໄດ້ຢູ່ດີກິນດີຂື້ນຄືຄົນອື່ນ. ສະນັ້ນພວກທ່ານຄວນ ກະລຸນາເຫັນອົກເຫັນໃຈ ເພື່ອໃຫ້ເງິນແຮງງານ ທີ່ເຫຼືອຈາກການລ້ຽງຊີບ ອັນນ້ອຍນິດໄດ້ໄປຮອດໄປເຖິງ ພໍ່ແມ່ຜູ້ທີ່ຊະລາ ເຊິ່ງລໍຖ້າລູກຖ້າຫຼານ ໄດ້ກັບ ຄືນເຮືອນຄືນຊານ ຂອງພວກເຂົາເຈົ້າ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 03, 2016 01:49 PM

ສະມາຄົມພາກເໜືອ

ຈາກ ໄຊຍະບູລີ

ລັດຖະບານກະຊິຕາຍພ໋ລັດຖະບານ ຈຶ່ງດິ້ນລົນເກັບໄປໝົດ ປະຊາຊົນຊິຕາຍຢູ່ ກະບ໋່ເວັ້ນເພື່ອເອົາປະເທດໄວ້ກອ່ນ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 03, 2016 01:07 PM

ເຕັມຫນ້າ