ໜີ້ສິນສາທາຣະນະ ສປປລາວ ເພີ້ມຂຶ້ນ

ໄຊຍາ
2018-11-05
ອີແມວລ໌
ຄໍາເຫັນ
Share
ພິມ
ນະຄອນຫຼວງວຽງຈັນ ສປປ ລາວ
ນະຄອນຫຼວງວຽງຈັນ ສປປ ລາວ
RFA/SN

ສປປ ລາວ ມີໜີ້ສິນສາທາຣະນະ ເພີ້ມຂຶ້ນສູງກວ່າ 60% ອີງຕາມຂໍ້ມູນ ຂອງກະຊວງການເງິນໃນປີ 2017 – 2018 ລາວ ມີໜີ້ສິນ ສາທາຣະນະ 8,5 ຕື້ໂດລາ ສະຫະຣັຖ ແລະ ຄາດວ່າຈະເພີ້ມຂຶ້ນ ຢ່າງຕໍ່ເນື່ອງ, ດັ່ງເຈົ້າໜ້າທີ່ ສະຖາບັນຄົ້ນຄວ້າເສຖກິຈ ແຫ່ງຊາດ ກ່າວຕໍ່ ວິທຍຸເອເຊັຽເສຣີ ໃນມື້ນີ້ວ່າ:

"ສຳລັບໂຕນີ້ເນາະ ເຮົາກໍຕິດຕາມຢູ່ ເພິ່ນກໍມີການກູ້ຢືມເພີ່ມເຕີມ ດ້ວຍອັດຕຣາຫລາຍເນາະ ເພື່ອມາລົງທຶນໃນໂຄງການ, ຕົວຢ່າງວ່າລົງທຶນ ສ້າງເຂື່ອນໄຟຟ້າເບາະ ກໍເປັນມູນຄ່າຫລາຍ ແຕ່ວ່າມັນມີຣາຍຮັບທີ່ສິໄປ ສຳຣະໜີ້ຂອງຕົວເອງໄດ້ຫັ້ນນ່າ ແຕ່ວ່າໂດຍລວມແລ້ວຫັ້ນ ການເພີ່ມຂຶ້ນຫັ້ນ ກໍເພີ້ມຂຶ້ນໄວເນາະ."

ທ່ານກ່າວຕື່ມວ່າ ປັດຈັຍສຳຄັນ ທີ່ເຮັດໃຫ້ໜີ້ສາທາຣະນະ ມີຈຳນວນເພີ່ມຂຶ້ນຢ່າງວ່ອງໄວ ຍ້ອນວ່າຣັຖບານ ກູ້ຢືມເງິນ ເພື່ອນໍາມາສ້າງ ໂຄງການພັທນາຕ່າງໆ ເປັນຕົ້ນ; ໂຄງການເຂດເສຖກິຈພິເສດ 12 ແຫ່ງ, ໂຄງການເຂື່ອນໄຟຟ້າ 40 ປາຍແຫ່ງ ແລະ ໂຄງການສ້າງທາງ ຣົດໄຟ ລາວ-ຈີນ:

"ແຕ່ວ່າຫລາຍໂຄງການຣັຖກໍບໍ່ໄດ້ລົງ 100% ເນາະ ຣັຖຈະລົງປະມານຢູ່ ຢ່າງໂຄງການເຮັດເຂື່ອນ ຣັຖຈະລົງແບບ Equity ສ່ວນໃດ ສ່ວນນຶ່ງຊື່ໆ ບໍ່ແມ່ນລົງ 100% ແຕ່ວ່າມັນເນື່ອງຈາກ ຫລາຍໂຄງການບວກກັນ ມັນກໍຈະເປັນຈຳນວນຫລາຍ ແຕ່ວ່າ, ບັນດາໂຄງການ ນັ້ນກໍມີ ຕລາດຮອງຮັບຢູ່ແລ້ວເນາະ ແຕ່ວ່າໃນຕໍ່ໜ້າອີກຫ້ັນນ່າ ມັນເປັນຄວາມເປັນຫ່ວງເປັນໃຍ ຍຸທສາດອີກຕໍ່ໜ້າ ອີກຫັ້ນນ່າ."

ໃນຂນະດຽວກັນອົງການ Tris Rating ຂອງປະເທດໄທ ຄາດການວ່າຫຼາຍໂຄງການ ທີ່ຣັຖບານລາວ ກູ້ຢືມເງິນມາລົງທຶນບໍ່ສາມາດ ໃຊ້ໜີ້ຄືນໄດ້ຄົບ ຕາມຈຳນວນ ແລະ ກຳນົດເວລາໄດ້. ປີນີ້ກໍເປັນປີ ທີ່ເຣີ້ມຕົ້ນໃຊ້ໜີ້ຄືນ ເງິນກູ້ຢືມ ໃຫ້ກັບອົງການ ຣະຫວ່າງປະເທດ.

ຜູ້ຊ່ຽວຊານທາງດ້ານການເງິນ ຂອງທະນາຄານໂລກ ປະຈຳ ສປປ ລາວ ເປີດເຜີຍວ່າ ຣັຖບານລາວຍັງຕ້ອງ ປະເຊີນກັບພາວະການເປັນໜີ້ ພາກຣັຖເພີ້ມຂຶ້ນ ຢ່າງຕໍ່ເນື່ອງ ທັງນີ້ໂດຍມີສາເຫດ ມາຈາກການກູ້ຢືມເງິນ ທັງພາຍໃນ ແລະ ຈາກຕ່າງປະເທດ ເພື່ອນຳມາໃຊ້ສຳລັບ ການດຸ່ນດ່ຽງ ທາງດ້ານງົບປະມານ ຣາຍຈ່າຍທີ່ສູງກວ່າ ຣາຍຮັບຂອງຣັຖບານລາວ ໃນແຕ່ລະປີ ໂດຍສະເພາະ ແມ່ນປີ 2016 ນັ້ນ ຖືເປັນປີທຳອິດ ທີ່ໜີ້ສິນຂອງຣັຖບານ ລາວ ມີມູນຄ່າລວມເກີນກວ່າ 60% ຂອງ GDP ແລະ ຄາດວ່າຈະເພີ້ມຂຶ້ນ ເປັນ 65.3% ຂອງ GDP ໃນປີ 2018 ແລະ ສູງກ່ວາ 66% ຂອງ GDP ໃນປີ 2019 ອີກດ້ວຍ.

ຜູ້ຊ່ຽວຊານຂອງທະນາຄານໂລກ ຣະບຸວ່າການກູ້ຢືມເງິນ ຈາກຕ່າງປະເທດ ນັບເປັນສາເຫດສຳຄັນ ທີ່ເຮັດໃຫ້ໜີ້ສິນ ຂອງຣັຖບານລາວ ເພີ້ມຂຶ້ນຢ່າງໄວວາໂດຍໃນປີ 2016 ຣັຖລາວມີໜີ້ຕ່າງປະເທດ ແລະໜີ້ພາຍໃນຄິດເປັນມູນຄ່າລວມເຖິງ 9 ຕື້ 550 ລ້ານໂດລາ ສະຫະຣັຖ ແລະ ເພີ້ມຂຶ້ນເປັນ 10 ຕື້ 530 ລ້ານໂດລາສະຫະຣັຖ ໃນປີ 2017, ສ່ວນປີ 2018 ກໍ່ຄາດວ່າຣັຖບານລາວ ຈະມີໜີ້ສິນເພີ້ມຂຶ້ນຫຼາຍກວ່າ 12 ຕື້ 104 ລ້ານໂດລາ ສະຫະຣັຖ ທັງຍັງຄາດໝາຍວ່າຈະເພີ້ມເປັນ 13 ຕື້ 491 ລ້ານໂດລາ ສະຫະຣັຖ ໃນປີ 2019 ຕາມຣໍາດັບ.

ຄໍາເຫັນ (1)
Share

(

ແນ່ນອນການເປັນຫນີ້ຕ່າງປະເທດນັ້ນ ມັນສູງຂື້ນທຸກໆປີນັບຕັ້ງແຕ່ເພີ່ນເປີດກ້ວາງມາ; ເລື້ອງກູ້ຍືມນັ້ນມັນງ່າຍ ແຕ່ການໄຊ້ຄືນນັ້ນມັນຍາກ ຖ້າລັດທະບານລາວບໍ່ກວດລ້າງ ການສໍ້ລາດບັງຫຼວງ ທີ່ເປັນສິ່ງກີດຂວາງຄວາມຈະເລີນຂອງຊາດ ນັ້ນໄຫ້ໝົດ ໄປຢ່າງສີ້ນເຊີງ ໂດຍບໍ່ໄຫ້ເຫຼືອແມ້ແຕ່ເກັບຄ່າຫາໜໍ່ໄມ້ ກໍບໍ່ໄຫ້ມີມັນຈື່ງສິຊ່ວຍພ່ອນຄາຍຫນີ້ສີນ ໄດ້ໜ້ອຍນຶ່ງແຕ່ມັນສິບໍ່ໝົດໄດ້ ພາຍໃນ 10 ຫາ 20ປີ ດອກຕາບໄດ ທີ່ພວກລົງທືນ ເຂົາບໍ່ໄດ້ເຕັມອັດຕຣາກໍານົດຂອງເຂົ າຫຼືວ່າໝົດອາຍຸປີ ສໍາປະທານ ຂອງເຂົາ ແລະເມື່ອໄດຍັງມີກຸ່ມຂອງພວກເພີ່ນ ກໍຄືຜູ້ມີອໍານາດນັ້ນເອງ ທີ່ມີສ່ວນໄດ້ນໍາພວກທີ່ມາລົງທືນນັ້ນ; ແລະພວກນີ້ຍັງບໍ່ຍຸດຕິການກະທໍາເລົ່າເລົ່ານັ້ນ ໜີ້ສີນກໍຈະທະວີຂື້ນເລີ້ຍໆ ໂດຍບໍ່ຕ້ອງສົງໄສແນ່ນອນ,


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 08, 2018 05:42 AM

ເຕັມຫນ້າ