ນະຄອນຫຼວງ ຄ່າຄອງຊີບ ສູງຂຶ້ນ

ໄມຊູລີ
2019-06-04
ອີແມວລ໌
ຄໍາເຫັນ
Share
ພິມ
ສິນຄ້າປະເພດ ເຄື່ອງສົດ ແລະ ອາຫານແຫ້ງ ທີ່ນໍາເຂົ້າ ໃນແຕ່ລະມື້ ຈາກຝັ່ງໄທ
ສິນຄ້າປະເພດ ເຄື່ອງສົດ ແລະ ອາຫານແຫ້ງ ທີ່ນໍາເຂົ້າ ໃນແຕ່ລະມື້ ຈາກຝັ່ງໄທ
ຮູບພາບຈາກ : ນັກຂ່າວພົລເມືອງ-MP

ປັດຈຸບັນ ຄ່າຄອງຊີບ ຢູ່ນະຄອນຫຼວງວຽງຈັນ ສູງຂຶ້ນ; ສິນຄ້າ ແລະ ອາຫານຫຼາຍຢ່າງແພງຂຶ້ນສອງເທົ່າ ຕົວຢ່າງ: ຜັກຫ້ອມປ້ອມ ແລະ ຫອມບົ່ວ ກໍແພງຂຶ້ນ ຈາກມັດລະ 1 ພັນກີບ ເປັນມັດລະ 2 ພັນກີບ, ອີງຕາມຄໍາເວົ້າ ຂອງປະຊາຊົນຜູ້ນຶ່ງ ໃນ ນະຄອນຫຼວງວຽງຈັນ ຕໍ່ ວິທຍຸເອເຊັຽເສຣີ ໃນວັນທີ 28 ພຶສພາ ນີ້:

“ດຽວນີ້ມັນກໍຂຶ້ນຫຼາຍ ເພາະວ່າເງິນບາດມັນແຂງໂຕຫຼາຍ ໂອ້ມັນກໍຢາກໝົດທຸກອັນນີ້ເດ້ ຜັກ, ພວກຂອງແຫ້ງ ມັນກໍຢາກຂະຢັບຂຶ້ນໝົດ ທຸກອັນ ຄືພວກພິກຢວກແດງ ມັນຈະຂະຢັບຂຶ້ນເກີນ 5 ພັນກີບ ກໍປະມານ 20 ບາດນີ້ລະ ຕໍ່ກິໂລ ຢູ່ລາວ ຄ່າຄອງຊີບ ມັນສູງມາແຕ່ດົນ ແລ້ວເນາະ ກໍຢູ່ກັນໄປແບບນີ້ແຫຼະ ແພງກໍອົດເອົາ.”

ໃນຂນະດຽວກັນ ຊາວບ້ານ ບ້ານຈອມມະນີເໜືອ ຜູ້ນຶ່ງ ກໍຈົ່ມວ່າຢູ່ຕລາດ ຣາຄາປານິນກໍແພງຂຶ້ນຫລາຍ ແຕ່ກ່ອນ ກິໂລລະ 18 ພັນກີບ ແຕ່ດຽວນີ້ ກິໂລລະ 22 ພັນກີບ, ບໍ່ພຽງແຕ່ເທົ່ານັ້ນ ແມ່ນແຕ່ ຣາຄາເຄື່ອງ ອຸປກອນການກໍ່ສ້າງ ກໍແພງຂຶ້ນ ເຊັ່ນດຽວກັນ ເພາະເປັນສິນຄ້າ ນໍາເຂົ້າຈາກໄທ ຕົວຢ່າງ ເຫລັກເສັ້ນ ຕັນນຶ່ງ ຂຶ້ນຈາກ 4 ລ້ານ 8 ແສນກີບ ເປັນ 5 ລ້ານ 2 ກີບ.

ຣາຍງານວ່າ ສໍາລັບສິນຄ້າ ຢູ່ແຂວງສະຫວັນນະເຂດ ແຕ່ວັນທີ 24 ພຶສພາ ຜ່ານມາ ກໍແພງຂຶ້ນເຊັ່ນດຽວກັນ ເປັນຕົ້ນກໍແມ່ນ ຊີ້ນໝູ ເພີ້ມຂຶ້ນກິໂລລະ 45 ພັນກີບ ຈາກ 40 ພັນກີບ ຕໍ່ກິໂລ ແລະ ໝາກນາວ ຈາກ 8 ພັນກີບ ເປັນກິໂລລະ 12 ພັນກີບ.

ຕໍ່ບັນຫານີ້ ເຈົ້າໜ້າທີ່ ອຸດສາຫະກັມ ການຄ້າ ທ່ານນຶ່ງ ກ່າວວ່າ ສິນຄ້າໃນຕລາດນະຄອນຫຼວງວຽງຈັນ ມີຣາຄາແພງຂຶ້ນ ກໍເພາະວ່າ ຣາຄານໍ້າມັນແພງຂຶ້ນ ແລະ ອີກປັດໃຈນຶ່ງ ກໍຍ້ອນວ່າ ຢູ່ນະຄອນຫຼວງວຽງຈັນ ມີປະຊາຊົນ ອາສັຍຢູ່ ຢ່າງໜາແໜ້ນ ເຮັດໃຫ້ການໃຊ້ຈ່າຍ ສູງຂຶ້ນນໍາ:

“ໂຕດຽວ ທີ່ສາມາດ ເຮັດໃຫ້ສິນຄ້າປັບຂຶ້ນ ປັບລົງໄດ້ ກໍຍ້ອນນໍ້າມັນ ກັບອັດຕຣາແລກປ່ຽນ ຂັ້ນນໍ້າມັນຂຶ້ນ ມັນກໍຕ້ອງຂຶ້ນ ບັດມັນລົງ ມັນກໍບໍ່ຢາກລົງ ໃນນະຄອນຫລວງວຽງຈັນ ພົລເມືອງ ມັນກໍໜາແໜ້ນ ຄ່າຄອງຊີບ ບາງເທ່ືອມັນອາຈມີການປັບຂຶ້ນ ມັນກໍກະທົບຫຼາຍຢ່າງ ຕໍ່ສັງຄົມ ພວກການທ່ອງທ່ຽວ ຫາຢູ່ຫາກິນຫຍັງຕ່າງໆ.”

ເຖິງຢ່າງໃດກໍຕາມ ອີງຕາມຂໍ້ມູນ ຜົນສໍາຣວດ ຄ່າຄອງຊີບສາກົນ ພົບວ່າ ນະຄອນຫຼວງວຽງຈັນ ມີຄ່າຄອງຊີບສູງກວ່າ ຢູ່ຮາໂນ່ຍ ປະເທດວຽດນາມ ປະມານ 40% ແລະ ສູງກວ່າ ບາງກອກ ປະເທດໄທ ເກືອບ 20%, ຊຶ່ງບັນຫານີ້ ສົ່ງຜົນກະທົບຕໍ່ ການດໍາຣົງຊີວິດ ຂອງປະຊາຊົນ ແລະ ການທ່ອງທ່ຽວ ພາຍໃນປະເທດ ຢ່າງແນ່ນອນ.

ຄໍາເຫັນ (1)
Share

Anyone

ຈາກ Any city

All produce items mentioned, people can grow themselves(self sufficient).


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]



Jun 12, 2019 09:22 AM

ເຕັມຫນ້າ