ບ້ານມິດສໍາພັນວ່າເງິນ ຊົດເຊີຍ ຖືກຕັດ

ສຸພັດຕາ
2020-05-08
ອີແມວລ໌
ຄໍາເຫັນ
Share
ພິມ
ຖນົນສາຍຫຼັກ ບ້ານມິດສໍາພັນ ເມືອງສນາມໄຊ ແຂວງອັດຕະປື
ຖນົນສາຍຫຼັກ ບ້ານມິດສໍາພັນ ເມືອງສນາມໄຊ ແຂວງອັດຕະປື
ຮູບຈາກ : ນັກຂ່າວພົລມືອງ

ປະຊາຊົນບ້ານມິດສໍາພັນ ເມືອງສນາມໄຊ ແຂວງອັດຕະປື ທີ່ໄດ້ຮັບຄວາມເສັຽຫາຍຈາກ ເຂື່ອນເຊປຽນ-ເຊນໍ້ານ້ອຍແຕກ ຕ່າງກໍບໍ່ເຂົ້າໃຈ ວ່າເປັນຫຍັງ ທາງການຈຶ່ງຕ້ອງຕັດເງິນຄ່າຊົດເຊີຍໄປ 20% ຂອງມູນຄ່າທັງໝົດທີ່ຈະໄດ້ຮັບ, ຜູ້ໄດ້ໜ້ອຍ ຫຼື ໄດ້ຫຼາຍກໍຖືກຕັດໝົດ, ດັ່ງ ປະຊາຊົນ ຢູ່ເມືອງສນາມໄຊ ຜູ້ນຶ່ງກ່າວຕໍ່ວິທຍຸເອເຊັຽເສຣີ ໃນວັນທີ 7 ພຶສພາ ນີ້ວ່າ:

“ເຂົາຕັດ 20% ຂອງມູນຄ່າທີ່ເສັຍຫາຍ ຈັກເຂົາຊິຕັດແບບໃດກະບໍ່ຮູ້ ຈັກເຂົາຊິຕັດແບບໃດ ຈັ່ງໃດຫັ່ນບໍ່ຮູ້ນໍາເຂົາ ຄົນອື່ນເຂົາກະຕັດເບິດ ຂອງອ້າຍນິ່ມັນຖືກ 23 ກວ່າ ແຕ່ວ່າເຂົາຕັດຍັງເຫຼືອແຕ່ 19 ລ້ານ ແຕ່ວ່າເພິ່ນຕັດມາຈັ່ງຊັ້ນລະກະບໍ່ຢາກດີໃຈປານໃດແຫຼະ.”

ຊາວບ້ານອີກຜູ້ນຶ່ງ ທີ່ຈະຖືກຕັດເງິນກໍກ່າວວ່າຕັດ 20% ນີ້ແມ່ນຄວາມຈິງ, ແລະຊາວບ້ານໝົດທຸກຄົນ ກໍໄດ້ເຊັນເອກກະສານນັ້ນໃຫ້ທາງ ການໄປແລ້ວ ແບບບໍ່ມີທາງເລືອກ ເພາະເພິ່ນພຽງແຕ່ບອກໃຫ້ເຊັນ ຮັບຮູ້:

“ຄວາມຈິງ, ຄວາມຈິງໂຕນີ້ບໍ່ຕົວະແຫຼະ ພວກເຮົານີ້ຄັນວ່າ ເປັນແບບນີ້ນິພັກຣັຖ ເຮັດນໍາເຮົາ ພວກເຮົາກະຊິບໍ່ຕາຍບໍ ທຸກກະຕື່ມທຸກ ຍາກຕື່ມ ຍາກອັນໃດກະເບິດນ່າ ຍັງຊິໄປຕັດອີກ ຈໍາເປັນແຫຼະໝູ່ເຊັນກັນ ເໝິດ ພໍ່ກະເຊັນນໍາກັນແຫຼະ ຈໍາເປັນແຫຼະ ເຮົາປະຊາຊົນ ພໍ່ຊິຂັດຜູ້ດຽວ ກະບໍ່ໄດ້ແຫຼະ ຂອງພໍ່ເບື້ອງຕົ້ນເພິ່ນວ່າ 10 ປາຍລ້ານ ບາດມາໂຕຈິງ ມີແຕ່ 7 ລ້ານ 5.”

ຊາວບ້ານຜູ້ນີ້ກ່າວອີກວ່າ ຢ່າງນ້ອຍທາງການ ກໍຄວນມີຄໍາອະທິບາຍ ໃຫ້ປະຊາຊົນຮັບຮູ້ກ່ອນ ວ່າເປັນຫຍັງຈຶ່ງຕັດ ແລະ ຈະຕັດໄປເພື່ອ ຫຍັງ ເອົາໄປພັທນາສ່ວນໃດ. ຊາວບ້ານວ່າຢາກຝາກຂໍ້ຄວາມນີ້ໄປຫາ ຂັ້ນເທິງ ຫຼື ຄະນະໜ່ວຍງານທີ່ຮັບຜິດຊອບ ວ່າ; ເຮັດແບບນີ້ ປະຊາຊົນຜູ້ທຸກຍາກລໍາບາກ ກໍໝົດກໍາລັງໃຈ ແລະ ຮູ້ສຶກວ່າພວກຕົນ ບໍ່ໄດ້ຮັບຄວາມເປັນທັມເລີຍ.

ໃນຂນະດຽວກັນ ປະຊາຊົນ ອີກຜູູ່ນຶ່ງກໍເວົ້າວ່າ:

“ກະຕັດຫັ້ນແຫຼະເນາະ ເວົ້າເຣື່ອງຕັດນິ່ ເພິ່ນຕັດແທ້ໂລດ ປະຊາຊົນນິ່ເວົ້າເບີດບ້ານ ເບິດເມືອງ ຕັດບໍ່ຮູ້ສາເຫດອີກ ຄືອ້າຍວ່າຫັ່ນແຫຼະ ນ້ອງສາວ ຫັ້ນເງິນຄ່າເຄື່ອງ 2 ແສນປາຍ ກະຍັງຕັດຫັ້ນນ່າ ມັນເງິນ ໜ້ອຍດຽວ ຈັກຊິເຮັດສັງ ສັງບໍ່ເລີຍລະກະແລ້ວ ບໍ່ຕ້ອງໃຫ້ນ່າ ເງິນໜ້ອຍດຽວຍັງຊິຕັດ ບໍ່ຕ້ອງໃຫ້ກະໄດ້ ບ້ານໂລດ ບ້ານໂລດ ຕັ້ງບ້ານໂລດ ໂຕນີ້ແມ່ນບ້ານ.”

ກ່ຽວກັບເຣື້ອງດ່ັງກ່າວນີ້ ວິທຍຸເອເຊັຽເສຣີ ໄດ້ຕິດຕໍ່ສອບໄປຍັງນາຍບ້ານ ບ້ານມິດສໍາພັນ ທ່ານໄດ້ກ່າວກ່ຽວກັບເຣື້ອງນີ້ວ່າ:

“ຊັກເປີເຊັນນິ່ ຂ້າພະເຈົ້າເອງໃນນາມນາຍບ້ານເນາະ ຂ້າພະເຈົ້າບໍ່, ບໍ່ໆຮູ້ ບໍ່ເຫັນ, ບໍ່ໄດ້ເຮັດເດີ້ໂຕນີ້ເດີ້ ຈັ່ງວ່າຄົນອື່ນບໍ່ຈັກຕັດ 20% ນິ່ ຖືວ່າ ທາງໂຄງການ ເພິ່ນເອງມື້ນັ້ນກະໄດ້ລວມກັນຢູ່ຫ້ອງວ່າການ ບ້ານນິ່ບໍ່ໄດ້ຫັກ 20% ແລ້ວແຕ່ເພິ່ນຊິເຫັນໃຈ ບ້ານນິ່ມີແຕ່ວ່າຊິຂໍນໍາ ຄ່າເອກກະສານຫັ່ນ ແຕ່ບໍ່ຮູ້ວ່າຊິກໍານົດທໍ່ໃດທໍ່ໃດ ບໍ່ໄດ້ຄາດໝາຍວ່າທໍ່ນີ້ພັນ ທໍ່ນັ້ນພັນ ແຕ່ໄດ້ລົມຂະເຈົ້າຄັນໄດ້ມາໃຫ້ກິນນໍ້າ ກິນໃນແນ່ ຫຼືວ່າໃຫ້ຄ່າເອກກະສານ ເຮົາແນ່ ເຮົາກະເປັນຜູ້ປ້ອງກັນເຮົາວ່າ.”

ຢ່າງໃດກໍຕາມເຖິງແມ່ນວ່າ ເງິນຄ່າຊົດເຊີຍຈະຍັງບໍ່ໄດ້ຮັບເທື່ອ ແລະຄໍາເວົ້າຂອງນາຍບ້ານ ກໍເປັນຄືດັ່ງທີ່ທ່ານກ່າວມານີ້, ປະຊາຊົນທີ່ ໄດ້ເຊັນເອກກະສານໄປແລ້ວນັ້ນ ກໍຍັງຢາກໄດ້ຄໍາອະທິບາຍ ຈາກຂັ້ນເມືອງ ຫຼືຂັ້ນແຂວງວ່າຕັດເງິນ 20% ຂອງມູນຄ່າຄວາມເສັຽຫາຍ ທັງໝົດນັ້ນ ແມ່ນສົມຄວນແລະຍຸຕິທັມ ຫຼືບໍ່? ສໍາລັບປະຊາຊົນທີ່ກໍາລັງດີ້ນຮົນ ເພື່ອຄວາມຢູ່ລອດ ໃນແຕ່ລະມື້.

ຄໍາເຫັນ (1)
Share

LaoGuy

The governor's wife still need a nice car and on top of that his second wife and third wife would want one too so it has to be done this way. On top of that the guys who bring to money to pay to the poor people still need commission or bonus to pay for his luxury cars and houses too. Just let those corrupted bastards do or else all you guys will have to go to jail and get nothing at the end.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 13, 2020 02:15 PM

ເຕັມຫນ້າ