ຜູ້ຊາຍຈີນຕິດປະກາດ ຢາກໄດ້ ເມັຽລາວ

ໄມຊູລີ
2019-06-03
ອີແມວລ໌
ຄໍາເຫັນ
Share
ພິມ
ຫ້ອງການປາບປາມ ຢາເສພຕິດແລະອາຊຍາກັມ ຂອງອົງການສະຫະປະຊາຊາຕ ໄດ້ອອກໂຄສະນາ ຕ້ານການຄ້າມະນຸສ ທຸກຮູປແບບ
ຫ້ອງການປາບປາມ ຢາເສພຕິດແລະອາຊຍາກັມ ຂອງອົງການສະຫະປະຊາຊາຕ ໄດ້ອອກໂຄສະນາ ຕ້ານການຄ້າມະນຸສ ທຸກຮູປແບບ
UNODC

ໃນວັນທີ 29 ພຶສພາ ນີ້ ມີຜູ້ຊາຍຄົນຈີນ ອາຍຸ 40 ປີ ໄດ້ຕິດໃບປິວ ຫຼື ໃບປະກາດ ຢູ່ຕາມໂຮງຮຽນຕ່າງໆ ໃນນະຄອນຫຼວງວຽງຈັນ ຊຶ່ງ ໃນໃບປະກາດນັ້ນ ເວົ້າວ່າ ຕົນເອງເປັນ ນັກທຸຣະກິຈຈີນ, ຍັງໂສດ ບໍ່ມີຄອບຄົວ, ຢາກໄດ້ເມັຽ ຄົນລາວ ອາຍຸຣະຫວ່າງ 17 ປີ ຫາ 23 ປີ ພ້ອມທັງໃຫ້ ເບີໂທຣະສັບ ຕິດຕໍ່ກັບຜູ້ກ່ຽວນໍາດ້ວຍ. ຕໍ່ ກໍຣະນີດັ່ງກ່າວ ເຈົ້າໜ້າທີ່ປົກປ້ອງການຄ້າມະນຸດ ໃນນະຄອນຫຼວງວຽງຈັນ ທ່ານນຶ່ງ ກ່າວຕໍ່ວິທຍຸເອເຊັຽເສຣີໃນມື້ວັນທີ 30 ພຶສພາ ນີ້ວ່າ ການກະທໍາຄືແນວນັ້ນ ເຂົ້າຂ່າຍ ການຄ້າມະນຸດ:

“ແຈກໃບປິວນັ້ນ ເຮົາເຫັນແລ້ວເນາະ ເຂົ້າຂ່າຍຂອງການຄ້າມະນຸດ ເບິ່ງຮູບການຂອງມັນ ເປັນວິທີແບບໃໝ່ເນາະ ແຕ່ກີ້ແມ່ນເປັນການ ຊອກຫາຄົນ ໃຫ້ເປັນເມັຽຂອງຄົນຈີນ ມາຂໍເອົາເມັຽລາວ ມີຄ່າດອງ 40 ລ້ານ ເບາະ 30 ລ້ານຫັ້ນ ສັງຄົມຮັບຮູ້ຫຼາຍ ກະປ່ຽນຮູບການ ມາແບບນີ້ຕື່ມ.”

ທີ່ຜ່ານມາ ມີແມ່ຍິງລາວ ອາຍຸຣະຫວ່າງ 17 ປີ ຫາ 25 ປີ ຫຼາຍຄົນຖືກຕົວະຍົວະ ໄປປະເທດຈີນ ຍ້ອນຢາກໄດ້ເງິນມາ ຊ່ອຍເຫຼືອ ຄອບຄົວ ໂດຍຈະມີນາຍໜ້າ ເຂົ້າມາຕິດຕໍ່ກັບຄອບຄົວ ວ່າຂໍໄປແຕ່ງດອງ ກັບຄົນຈີນ ຫຼື ຂໍຮັບໄປເປັນລູກບຸນທັມ, ດັ່ງທ່ານ ກ່າວວ່າ:

“ຜ່ານມານັ້ນຖືກຫຼອກໄປຫຼາຍເນາະ ລັກສນະແຕ່ງງານແອບແຝງ ເອົາໄປເປັນລູກລ້ຽງ ຄວາມຈິງ ແມ່ຍິງລາວ ຄວາມຮັບຮູ້ເທົ່າເຖິງການ ຄຶດວ່າໄປປະເທດເຂົາ ຈະໄດ້ດີ ມີເງິນມີຄໍາ ສິໄດ້ມາລ້ຽງຄອບຄົວ ແລະ ກໍຈະມີເງິນຊື້ຣົດຊື້ຫຍັງ ແຕ່ຄວາມຈິງແລ້ວ ບໍ່ແມ່ນ ໄປຮອດພຸ້ນ ສຸດທ້າຍເຂົາເອົາໄປຂາຍຕໍ່.”

ກ່ຽວກັບການຕິດໃບປິວ ຫຼື ໃບປະກາດ ທີ່ຜູ້ຊາຍຄົນຈີນ ຄົນດັ່ງກ່າວ ຕິດຕາມໂຮງຮຽນຕ່າງໆ ໃນນະຄອນຫຼວງວຽງຈັນ ນັ້ນ, ທາງ ສະຖານທູດຈີນ ປະຈໍາລາວ ບໍ່ຮັບຮູ້, ຕ້ອງໃຫ້ເຈົ້າໜ້າຕໍາຣວດ ທີ່ກ່ຽວຂ້ອງເປັນຜູ້ກວດສອບ ແລ້ວ ຈຶ່ງຣາຍງານໄປຫາ ສະຖານທູດ ຕາມຂັ້ນຕອນ.

ເຖິງຢ່າງໃດກໍຕາມ ໃນວັນທີ 27 ເມສາ ທີ່ຜ່ານມາ ມີແມ່ຍິງລາວຄົນນຶ່ງ ທີ່ຕົກເປັນເຫຍື່ອ ຂອງການຄ້າມະນຸດ ໄປຈີນ ໄດ້ກ່າວຕໍ່ ວິທຍຸເອເຊັຽເສຣີ ວ່າ, ນາງ ຖືກຕົວະໄປຂາຍ ໃຫ້ຄົນຈີນ ທີ່ຕ້ອງການຢາກໄດ້ເມັຽ ເປັນຄົນລາວ ໂດຍມີນາຍໜ້າ ເຂົ້າມາຕິດຕໍ່ວ່າ ເມື່ອໄປຈີນແລ້ວ ຈະໄດ້ເຮັດວຽກດີ ແລະ ໄດ້ເງິນເດືອນ ເດືອນລະ 1 ພັນຢວນ ຂຶ້ນໄປ. ຖ້າຢາກກັບບ້ານມື້ໃດກໍກັບໄດ້ ແຕ່ຄວາມຈິງ ບໍ່ເປັນຄືແນວນັ້ນ. ນາງຖືກຕົວະໄປຂາຍໃຫ້ຄົນຈີນ ແລະ ປັດຈຸບັນ ນາງໄດ້ຮັບການຊ່ອຍເຫຼືອ ກັບຄືນລາວແລ້ວ.

ເຕັມຫນ້າ