ຂ.ຫຼວງນໍ້າທາ ຈີນປິດກິຈການ ຊົ່ວຄາວ

ສິດນີ
2020-04-03
ອີແມວລ໌
ຄໍາເຫັນ
Share
ພິມ
ຫ້າງຮ້ານຄ້າ ຂອງນັກທຸຣະກິດຈີນ ຢູ່ ບໍ່ເຕັນ ແຂວງຫຼວງນໍ້າທາ
ຫ້າງຮ້ານຄ້າ ຂອງນັກທຸຣະກິດຈີນ ຢູ່ ບໍ່ເຕັນ ແຂວງຫຼວງນໍ້າທາ
RFA

ນັກທຸຣະກິຈຈີນ ທີ່ເຂົ້າມາຄ້າຂາຍ ຢູ່ແຂວງຫຼວງນໍ້າທາ ຈຳນວນນຶ່ງ ໄດ້ປິດກິຈການ ຂອງພວກເຂົາຊົ່ວຄາວ ບໍ່ວ່າຈະເປັນ ຮ້ານຂາຍເຄື່ອງ ຕາມທ້ອງຕລາດ, ຮ້ານອາຫານ ລວມໄປເຖິງບ້ານພັກ ແລະ ໂຮງແຮມ ຈຳນວນນຶ່ງ ແລ້ວພາກັນທະຍອຍເດີນທາງກັບບ້ານ, ພາຍຫຼັງທີ່ ຣັຖບານ ໄດ້ອອກແຈ້ງການ ໃນການຕ້ານການຣະບາດ ຂອງເຊື້ອໄວຣັສ ໂຄວິດ-19, ເຊິ່ງພວມມີການແຜ່ຣະບາດ ໃນປະເທດລາວ ແລະ ໄດ້ອອກແຈ້ງການ ປິດດ່ານເຂົ້າ-ອອກ ທົ່ວປະເທດ ເຮັດໃຫ້ບັນຍາກາດ ໃນການຄ້າຂາຍພາຍໃນແຂວງງຽບເຫງົາ. ດັ່ງແມ່ຄ້າຜູ້ນຶ່ງ ທີ່ຂາຍ ເຄື່ອງ ຢູ່ຕລາດແຂວງຫຼວງນໍ້າທາ ໄດ້ກ່າວຕໍ່ຜູ້ສື່ຂ່າວ ວິທຍຸ ເອເຊັຽເສຣີ ໃນມື້ວັນທີ 31 ມີນາ ນີ້ວ່າ:

“ດຽວນີ້ຮ້ານໝວດນີ້ ປິດໝົດແລ້ວ, ທັງຮ້ານລາວຮ້ານຈີນ. ບໍ່ມີແລ້ວຄົນໄປຕລາດ ກໍຄົນຂາຍ ກໍບໍ່ມີ. ພວກຄົນຈີນນີ້ ສ່ວນຫຼາຍເຂົາກັບໄປ ບ້ານໝົດແລ້ວ, ແຕ່ໄດ້ຍິນວ່າ ເປັນພຍາດນີ້ ເຂົາບໍ່ໄດ້ມາຂາຍເຄື່ອງ ບໍ່ມີຄົນຮອດໄປຕລາດ ແລະ ກໍບໍ່ມີຄົນໄປຊື້-ໄປຂາຍອີ່ສັງ.”

ການແຜ່ຣະບາດຂອງເຊື້ອໄວຣັສ ໂຄວິດ-19 ນີ້, ທາງຣັຖບານລາວ ກໍອອກຄຳສັ່ງ ຫ້າມປະຊາຊົນທົ່ວໄປ ອອກຈາກບ້ານ, ຍົກເວັ້ນມີຄວາມ ຈຳເປັນ ຕາມທີ່ທາງການ ໄດ້ກຳນົດໄວ້ເທົ່ານັ້ນ ຈຶ່ງສາມາດອອກໄດ້. ສ່ວນພະນັກງານ ອົງການຈັດຕັ້ງຂອງຣັຖ ແມ່ນໃຫ້ມີການຜັດປ່ຽນກັນ ມາປະຈໍາການ ເພື່ອຫຼີກເວັ້ນການແຜ່ຣະບາດ ຂອງເຊື້ອໄວຣັສດັ່ງກ່າວ. ດັ່ງເຈົ້າໜ້າທີ່ ແຂວງຫຼວງນ້ຳທາ ທ່ານນຶ່ງໄດ້ກ່າວຕໍ່ ຜູ້ສື່ຂ່າວ ເອເຊັຽເສຣີ ໃນມື້ດຽວກັນນີ້ວ່າ:

“ວຽກ ໃຜຢາກເອົາມາເມືອເຮັດຢູ່ເຮືອນກະໄດ້. 2-3 ມື້ 4-5 ມື້ ໄປກະໄດ້, ເອົາເອກະສານ ມາເຮັດຢູ່ເຮືອນກະແລ້ວໂອ. ແບບລັກສນະໄປ ເບິ່ງ ຫ້ອງການ ໄປຍາມຊື່ໆ ບໍ່ມີວຽກ ກໍດົນໆໄປກະໄດ້ ໄປຢາມໄປຫຼິ້ນ. ອື່, ເຂົາແຈ້ງແນວນັ້ນໂອ, ນາຍົກແຈ້ງແນວນັ້ນໂອ.”

ຕໍ່ສະພາບດັ່ງກ່າວ ເຮັດຊາວຈີນຈຳນວນຫຼາຍ ທີ່ເຂົ້າມາລົງທຶນ ຄ້າຂາຍຢູ່ໃນແຂວງຫຼວງນໍ້າທາ ປິດກິຈການຊົ່ວຄາວ ແລ້ວກັບບ້ານ ຍ້ອນ ການຄ້າຂາຍ ໃນໄລຍະນີ້ ບໍ່ມີປະຊາຊົນໄປຊື້ສິນຄ້າ.

ນອກຈາກ ທຸຣະກິຈ ຂອງຄົນຈີນແລ້ວ, ທຸຣະກິຈຂອງຄົນລາວ ກໍໄດ້ຮັບຜົລກະທົບເຊັ່ນກັນ, ເປັນຕົ້ນແມ່ນ ບ້ານພັກ, ຮ້ານອາຫານຕ່າງໆ ກໍ່ປິດກິຈການຊົ່ວຄາວ ເຊັ່ນດຽວກັນ. ບັນດາຕລາດ ພາຍໃນແຂວງ ຫຼວງນໍ້າທາ, ທາງການອະນຸຍາດໃຫ້ ເປີດແຕ່ຕລາດ ທີ່ຂາຍພືດຜັກ ແລະ ຜລິຕພັນການກະເສຕ ເທົ່ານັ້ນ.

ການອອກມາຕການ ແລະ ຂໍ້ຫ້າມຕ່າງໆ ທີ່ຣັຖບານໄດ້ແຈ້ງອອກມານັ້ນ, ແມ່ນມີກຳນົດເຣີ່ມຈັດຕັ້ງປະຕິບັດ ນັບແຕ່ວັນທີ 1 ເມສາ ຈົນຮອດວັນທີ 21 ເມສາ ປີ 2020 ນີ້ ແລະ ແຂວງຫຼວງນ້ຳທາເອງ ກໍພວມປະຕິບັດຢ່າງເຂັ້ມງວດ.

ເຕັມຫນ້າ