ດິນບ້ານນາໂນກຳລັງ ຫາລື ໄກ່ເກັ່ຽ

ໄຊຍາ
2019-03-26
ອີແມວລ໌
ຄໍາເຫັນ
Share
ພິມ
ຊາວບ້ານຜູ້ທີ່ລໍຖ້າ ໃຫ້ທາງການ ຈັດສັນທີ່ດິນທົດແທນໃຫ້ ຕັ້ງແຕ່ 10 ກວ່າປີຜ່ານມາ ຈົນຕັດສິນໃຈ ອອກເງິນກັນຈ້າງຣົດດຸດ ມາບຸກເບີກທີ່ດິນເອງ
ຊາວບ້ານຜູ້ທີ່ລໍຖ້າ ໃຫ້ທາງການ ຈັດສັນທີ່ດິນທົດແທນໃຫ້ ຕັ້ງແຕ່ 10 ກວ່າປີຜ່ານມາ ຈົນຕັດສິນໃຈ ອອກເງິນກັນຈ້າງຣົດດຸດ ມາບຸກເບີກທີ່ດິນເອງ
ຮູບພາບຈາກ : ນັກຂ່າວພົລເມືອງ

ການແກ້ໄຂບັນຫາຂໍ້ຂັດແຍ່ງທີ່ດິນ ຢູ່ບ້ານ ນາໂນ ເມືອງໄຊເສດຖາ ນະຄອນຫລວງວຽງຈັນ ກຳລັງຢູ່ໃນຂັ້ນຕອນ ການເກັ່ຍເພື່ອຈັດສັນ ທີ່ດິນໃຫ້ປະຊາຊົນ ຜູ້ໄດ້ຮັບຜົລກະທົບຫລາຍຄອບຄົວ ຈາກ ຟາມໄກ່ດົງໂດກ ພາຍຫລັງທີ່ຄນະກັມມະການ ຈັດສັນ ທີ່ດິນ ໄດ້ປະຊຸມກັນ ເມື່ອທ້າຍອາທິດຜ່ານມາ. ດັ່ງເຈົ້າໜ້າທີ່ ເມືອງໄຊເສດຖາ ກ່າວຕໍ່ ວິທຍຸ ເອເຊັຍເສຣີ ເມື່ອວັນທີ 25 ມີນາ ວ່າ:

"ຍັງ, ຍັງ, ຍັງກຳລັງອັນນັ້ນກັນຢູ່, ເວົ້າກັນຢູ່, ລົມກັນຢູ່ນີ້ ສິຮູ້ເຣື່ຶອງວ່າມັນເປັນແນວໃດ ກະຍັງບໍ່ທັນຣະອຽດປານໃດນະ, ປົກກະຕິຄືເກົ່າ ຫັ້ນແຫລະ."

ສ່ວນທີ່ດິນຕອນທີ່ປະຊາຊົນ ໄດ້ຮັບຜົລກະທົບບຸກເບີກນັ້ນ, ຕອນນີ້ໄດ້ຢຸດເຊົາການບຸກເບີກໄປແລ້ວ, ເພື່ອລໍຖ້າຈົນກວ່າວ່າຈະໄດ້ຂໍ້ສລຸບ ທີ່ເປັນເອກກະພາບກັນໃນໄວໆ ນີ້.

ໃນຂນະທີ່ ອາທິດຜ່ານມາ ທ່ານ ພຸດທະພອນ ໂຄດປັນຍາ ຮອງເຈົ້າເມືອງໄຊເສດຖາ ໄດ້ອອກມາຊີ້ແຈງ ກໍຣະນີ ຂໍ້ຂັດແຍ່ງທີ່ດິນ ທີ່ ບ້ານນາໂນ ເມືອງໄຊເສດຖາ ນະຄອນຫລວງວຽງຈັນ ຕໍ່ຊື່ມວນຊົນວ່າ:

"ການທີ່ ໄດ້ຮັບດິນຊົດເຊີຍ ທີ່ຖືກຜົບກະທົບ ຈາກໂຄງການຣັຖນັ້ນຕ້ອງແມ່ນ ອົງການຣັຖ ເປັນຜູ້ນຳພາບຸກເບີກ ແລະແບ່ງປັນຈັດສັນໃຫ້ ບໍ່ແມ່ນຜູ້ທີ່ຖືກຊົດເຊີຍ ຈະເຕົ້າໂຮມກັນແລ້ວ ລົງມາບຸກເບີກແບ່ງປັນກັນເອງ ໂດຍເຮັດໃຫ້ກະທົບເຖິງຂອບເຂດ ດິນ ຜູ້ອື່ນທີ່ໄດ້ກັມມະສິດ ນຳໃຊ້ດິນ ຖືກຕ້ອງຕາມກົດໝາຍ."

ຮອງເຈົ້າເມືອງກ່າວຕື່ມວ່າ: ປັດຈຸບັນປະຊົນຈຳນວນດັ່ງກ່າວ ໄດ້ລົງບຸກເບີກດິນ ເອົາເອງໄປແລ້ວຈຳນວນ 15 ເຮັກຕ້າ ເຊິ່ງບໍ່ຮູ້ເຂດແດນ ທີ່ຣັຖຊົດເຊີຍໃຫ້. ຈື່ງໄປກວມເອົາດິນ ຂອງ ປກສ 05 ເຮັກຕ້າ ແລະ ປະຊາຊົນ ທີ່ມີໃບຕາດິນ ຂອບທອງ 05 ເຮັກຕ້າ.

ດັ່ງນັ້ນກຸ່ມປະຊາຊົນດັ່ງກ່າວ ທີ່ນຳເອົາຣົດເຂົ້າໄປບຸກເບີກທີ່ດິນ ແມ່ນບໍ່ໄດ້ຮັບອະນຸຍາດ ຈາກທາງການ ເຊິ່ງຖືວ່າກຳລັງຣະເມີດຕໍ່ກົດໝາຍ.  ສະນັ້ນ ທາງເມືອງໄຊເສດຖາ ຈຶ່ງປະກາດໃຫ້ຢຸດຕິ ການບຸກເບີກເນື້ອທີ່ດິນ ຕອນດັ່ງກ່າວ ໂດຍທາງເມືອງ ໄຊເສດຖາ ຂໍເວລາ 30 ວັນ ເພື່ອໄກ່ເກັ່ຍບັນຫາຂໍ້ຂັດແຍ່ງທີ່ດິນ.

ເຕັມຫນ້າ