ເຂື່ອນນໍ້າອ້າວຍັງບໍ່ຈ່າຍ ຊົດເຊີຍ ເຕັມສ່ວນ

ອຸ່ນແກ້ວ ສຸກສະຫວັນ
2020-06-11
ອີແມວລ໌
ຄໍາເຫັນ
Share
ພິມ
ບ້ານເຮືອນຂອງປະຊາຊົນ ເມືອງທ່າໂທມ ແຂວງໄຊສົມບູນ ໄດ້ຮັບຜົລກະທົບ ເຂື່ອນນໍ້າອ້າວ ແຕກ ເມື່ອປີ 2017
ບ້ານເຮືອນຂອງປະຊາຊົນ ເມືອງທ່າໂທມ ແຂວງໄຊສົມບູນ ໄດ້ຮັບຜົລກະທົບ ເຂື່ອນນໍ້າອ້າວ ແຕກ ເມື່ອປີ 2017
ນັກຂ່າວພົລເມືອງ

ຊາວບ້ານຫຼາຍຄົນ ຢູ່ເມືອງທ່າໂທມ ແຂວງໄຊສົມບູນ ບໍ່ພໍໃຈວ່າ ການຊົດເຊີຍໃຫ້ແກ່ຜູ້ທີ່ໄດ້ຮັບ ຜົນກະທົບຈາກເຫດການ ເຂື່ອນນ້ຳອ້າວ ມີຄວາມຊັກຊ້າ ຍັງບໍ່ທັນສຳເຣັດ ເຖິງວ່າເຫດການເຂື່ອນນ້ຳອ້າວແຕກ ແຕ່ວັນທີ່ 11 ກັນຍາ 2017 ຊຶ່ງຜ່ານໄປເປັນເວລາ 3 ປີ ແລ້ວ. ຊາວບ້ານຢູ່ເມືອງທ່າໂທມ ໄດ້ກ່າວຕໍ່ເອເຊັຽເສຣີ ໃນວັນທີ 11 ມິຖູນາ ວ່າ:

"ຈັ່ງວ່າເນາະ ການເສັຍຫາຍຫັ້ນນະ ແມ່ນມີຄວາມຈິງແທ້ ກໍຍາກໃຫ້ມາຊົດເຊີຍເນາະ ຜູ້ເສັຍຫາຍກະເສັຍຫາຍແທ້ຫັ້ນນະ ເພິ່ນກະເກັບກຳ ຂໍ້ມູນຣະອຽດແລ້ວເດ້ ກະເຫັນເພິ່ນມາເກັບກຳຂໍ້ມູນຫຼາຍຢູ່."

ການຊົດເຊີຍຍັງບໍ່ທັນສຳເຣັດ 100 ເປີເຊັນ, ແລະ ຊາວບ້ານກໍຢາກໃຫ້ຊົດເຊີຍໄວໆ, ຊາວບ້ານອີກທ່ານນຶ່ງ ໄດ້ກ່າວຕໍ່ເອເຊັຽເສຣີ ວ່າ:

"ເຂື່ອນໂຕແຕກຫັ້ນ ຄັນວ່າມັນເປັນໄປໄດ້ ກໍຢາກໃຫ້ຊົດເຊີຍໄວໆ ຊາວບ້ານ ຫັ້ນກໍແບບເຮັດໄຮ່ເຮັດນາ ເປັນອາຊີບນະ."

ຊາວບ້ານອີກສ່ວນນຶ່ງ ທີ່ມີດິນນາຖືກຜົນກະທົບ ຈາກເຂື່ອນແຕກ ກໍໄດ້ຮັບຄ່າຊົດເຊີຍໄປແລ້ວ ແຕ່ກໍບໍ່ພໍໃຈກັບຄ່າຊົດຊົດ ດັ່ງທ່ານກ່າວວ່າ:

"ເອີໃຫ້ແລ້ວ ເຂົາໃຫ້ແຕ່ 5 ລ້ານປາຍ ບໍ່ພໍໃຈປານໃດແຫຼະ ພໍໃຈເຂົາໃຫ້ເທົ່ານັ້ນແຫຼະ ນາ ກຳລັງໝານເບາະ ຕອນຫັ້ນຖືກຖ້ວມຫັ້ນນະ 5-6 ຄົນ ຫັ້ນເບາະໄດ້, ຍັງມີຫຼາຍໃດ໋ ເຂົາບໍ່ທັນໄດ້ໝົດ."

ເອເຊັຽເສຣິ ໄດ້ຕິດຕໍ່ຫາ ບໍຣິສັດບໍ່ທອງ ອິນເຕີກຣຸບ ຜູ້ທີ່ເປັນເຈົ້າຂອງໂຄງການ ເຂື່ອນໄຟຟ້ານ້ຳອ້າວ ຢູ່ເຂດເມືອງຜາໄຊ ແຂວງຊຽງຂວາງ ເພື່ອຄວາມຄວາມຄືບໜ້າ ເລື່ອງຄ່າຊົດເຊີຍ ແຕ່ເຈົ້າໜ້າທີ່ບໍຣິສັດ ບໍ່ສະດວກໃຫ້ຂໍ້ມູນ.

ມາເຖີງປັດຈຸບັນ ການຈ່າຍຄ່າຊົດເຊີຍສ່ວນທີ່ເຫຼືອ ໃຫ້ຊາວບ້ານຍັງບໍ່ທັນສຳເຣັດເທື່ອ ແລະ ຍັງບໍ່ມີຄວາມຄືບໜ້າຈາກບໍຣິສັດ. ເຈົ້າໜ້າທີ່ ແຂວງໄຊສົມບູນ ຜູ້ຮັບຜິດຊອບເລື່ອງຄ່າຊົດເຊີຍ ໄດ້ກ່າວຕໍ່ເອເຊັຽ ເສຣີ ວ່າ:

"ເຂື່ອນນ້ຳອ້າວ ຍັງຄືເກົ່າ ຫວ່າງສອງທິດຫຼັງນີ້ ເພິ່ນໄດ້ໄປປະຊຸມຢູ່ ແຂວງຊຽງຂວາງ ແຕ່ວ່າ ຍັງບໍ່ທັນໄດ້ເວົ້າຫຍັງກັນເທື່ອ ວ່າເຮັດຈັ່ງໃດ ແຕ່ວ່າ ການຊົດເຊີຍແທ້ ບໍ່ມີຫຼະ ຍັງບໍ່ທັນໄດ້ຍິນຄັກ."

ມີປະຊາຊົນ 60 ຄອບຄົວ ຢູ່ 8 ບ້ານ ທີ່ຂຶ້ນກັບເມືອງທ່າໂທມ ທີ່ລໍຖ້າການຊົດເຊີຍ ຈາກບໍຣິສັດ ຍ້ອນຖືກຂີ້ຕົມຖົມນາ ແລະ ຊັບສິນ ເຊັ່ນ: ເຮືອນ, ພາຫະນະ, ເຄຶ່ອງໃຊ້ ທີ່ໄດ້ຮັບຄວາມເສັຽຫາຍປະມານ 60% ກ່ອນໜ້ານີ້ ກໍມີຂ່າວວ່າ ບໍຣິສັດນີ້ ໄດ້ຊົດເຊີຍຄວາມເສັຍຫາຍແບບ ບໍ່ເປີດເຜີຍມູລຄ່າ ໃຫ້ປະຊາຊົນທີ່ໄດ້ຮັບຜົນກະທົບ ທັງໝົດ 100% ນັ້ນໄປແລ້ວ ປະມານ 30 ຄອບຄົວ.

ເຂື່ອນນ້ຳອ້າວ ມີກຳລັງການຜລິດ 15 ເມກະວັດ ໄດ້ພັທນາແລ້ວ ໄຟຟ້າຂາຍໃຫ້ ຣັຖວິສາຫະກິດໄຟຟ້າລາວ ຕັ້ງແຕ່ເດືອນຕຸລາ ປີ 2019, ຈົນມາເຖິງປັດຈຸບັນ ຫລັງຈາກ ບໍຣິສັດ ບໍ່ທອງ ອິນເຕີກຣຸບ ໄດ້ສ້າງເຂື່ອນ ໂຕໃໝ່ໃນຕົ້ນປີ 2019 ເພື່ອທົດແທນເຂື່ອນເກົ່າທີ່ແຕກ, ອີງຕາມຂໍ້ມູນຈາກເຈົ້າໜ້າທີ່ ຜແນກພະລັງງານ ແລະ ບໍ່ແຮ່ ແຂວງຊຽງຂວາງ.

ເຕັມຫນ້າ