ຫຼວງນ້ຳທາ ຊົດເຊີຍທາງຣົດໄຟ ຍັງບໍ່ແຈບໃຈ

ອຸ່ນແກ້ວ ສຸກສະຫວັນ
2020-08-04
ອີແມວລ໌
ຄໍາເຫັນ
Share
ພິມ
ສໍານັກງານປົກຄອງ ແຂວງ ຫຼວງນໍ້າທາ
ສໍານັກງານປົກຄອງ ແຂວງ ຫຼວງນໍ້າທາ
RFA/LX

ໃນ​ວັນ​ທີ 30 ກໍ​ຣະ​ກະ​ດາ 2020 ຄ​ນະ​ໄກ່​ເກ່ຽ ​ຜົລ​ກະ​ທົບ ​ໂຄງ​ການ​ທາງ​ຣົດ​ໄຟ ​ລາວ-ຈີນ ປະ​ຈຳ​ແຂວງ​ຫຼວງ​ນ້ຳ​ທາ ລົງ​ພື້ນ​ທີ່ ໂອ້​ລົມ​ກັບ​ປະ​ຊາ​ຊົນ ທີ່​ຖືກຜົລ​ກະ​ທົບ ຈາກ​ການກໍ່​ສ້າງ ສະ​ຖາ​ນີຣົດ​ໄຟ ​ນາ​ເຕີຍ ແລະ ສະ​ຖາ​ນີບໍ່​ເຕັນ ກ່ຽວ​ກັບ​ຄ່າ​ຊົດ​ເຊີຍ ແລະ ສ້າງ​ເຮືອນ​ຈັດ​ສັນ ​ໃຫ້​ຊາວ​ບ້ານ. ເຈົ້າ​ໜ້າ​ທີ່ ທີ່ກ່ຽວ​ຂ້ອງ ​ທ່ານ​ນຶ່ງ ໄດ້​ກ່າວ​ຕໍ່​ເອ​ເຊັຽ​ເສ​ຣີ ໃນ​ວັນ​ທີ 31 ກໍ​ຣະ​ກະ​ດາ ວ່າ:

"ເອີ​ ສະ​ຖານ​ນີ 2 ບ່ອນ ກຳ​ລັງ​ລົງ​ໄປ​ເວົ້າ ​ນຳ​ປະ​ຊາ​ຊົນ ຂໍ​ພື້ນທີ່ນຳ​ເພິ່ນ ​ເຮັດ​ສະ​ຖາ​ນີ. ຄັນ​ວ່າ​ສຳ​ເຣັດ 100 ນີ້, ພວກ​ເຮົາ​ຊິ​ເຣີ່ມ​ວາງ​ຣາງ ແລ້ວ​ກໍ​ຕິດ​ຕັ້ງ ​ຣະບົບໄຟ​ໂຕ​ນັ້ນ, ເຂົາ​ເອີ້ນ​ວ່າ ຊ່ວງ​ສັນ​ຍາ​ທີ 2,  ແຕ່​ວ່າທັງ​ໝົດ ກະ​ຊິ​ໃຫ້​ສຳ​ເຣັດ ຕາມ​ແຜນ​ຫັ້ນ​ແຫຼະ."

ທ່ານກ່າວ​ຕື່ມ​ວ່າ ມາ​ຮອດ​ປັດ​ຈຸ​ບັນ ວຽກ​ງານກໍ່​ສ້າງ ​ທາງ​ຣົດໄຟ ລາວ-ຈີນ ຢູ່​ແຂວງ​ຫຼວງ​ນ້ຳ​ທາ ມີ​ຄວາມ​ຄືບ​ໜ້າ 96 ເປີ​ເຊັນ ຄາດ​ວ່າ ​ຈະ​ສຳ​ເຣັດ​ ກ່ອນ​ເດືອນ​ພຶສ​ຈິ​ກາ ປີ 2021 ຢ່າງ​ແນ່ນອນ, ແຕ່​ທ່ານ ບໍ່​ໃຫ້​ສາ​ມາດ ໃຫ້ຣາຍ​ລະ​ອຽດ ​ເພີ່ມ​ຕື່ມ ກ່ຽວ​ກັບ​ການ​ຊົດ​ເຊີຍ ​ໃຫ້​ແກ່​ປະ​ຊາ​ຊົນ ​ທີ່​ໄດ້​ຮັບ​ຜົລ​ກະ​ທົບ.

ທັງ​ເຈົ້າ​ໜ້າ​ທີ່ ແລະ ຊາວ​ບ້ານ ​ຜູ້​ທີ່​ໄດ້​ຮັບ​ຜົລ​ກະ​ທົບ ຍັງ​ບໍ່​ສາ​ມາດຕົກ​ລົງ​ ເຣື່ອງ​ລາ​ຄາ​ກັນ​ໄດ້ ໃນ​ບາງ​ຈຸດ, ຊາວ​ແຂວງ​ຫຼວງ​ນ້ຳ​ທາ ທ່ານ​ນຶ່ງ ໄດ້​ກ່າວ​ຕໍ່​ເອ​ເຊັຽ​ເສ​ຣີ ວ່າ:

"ເຂົາ​ມາມື້ວ​ານນີ້​ແລ້ວ ເຂົາ​ມາ​ເບິ່ງວ່າ ​ມູລ​ຄ່າ​ ຂອງ​ເຮົາ ດິນ​ເຮົາ​ ຖືກ​ເທົ່າ​ໃດ ເຮືອນ​ເຮົາ ຖືກ​ເທົ່າ​ໃດ? ຄັນ​ເຮົາ​ເຫັນ​ດີແລ້ວ​ ກໍ​ໃຫ້​ເຊັນ​ໃຫ້​ເຂົາ. ມື້​ວານນີ້ ບໍ່​ໄດ້​ເຊັນ, ແຕ່​ວ່າ ມັນ​ຍັງ​ຄ້າງ​ຄາ​ກັນ ​ໜ້ອຍ​ນຶ່ງ  ເຄັຽ​ກັນ​ບໍ່​ທັນ​ແລ້ວ."

ຊາວ​ແຂວງ​ຫຼວງ​ນ້ຳ​ທາ ທ່ານນີ້ ກ່າວ​ອີກວ່າ ຄອບ​ຄົວ ​ຂອງ​ທ່ານ ບໍ່​ໄດ້ຢູ່​ໃນ 37 ຄອບ​ຄົວ​ ທີ່​ໄດ້​ຮັບ​ເຮືອນ​ຈັດ​ສັນ ພ້ອມ​ດ້ວຍ​ ເງິນ​ຄ່າ​ຊົດ​ເຊີຍ ຈາກ​ໂຄງ​ການນີ້ ຍ້ອນ​ວ່າ ໄດ້​ຕັດ​ສິນ​ໃຈ​ແລ້ວ ວ່າ​ຈະ​ບໍ່​ເອົາ​ເຮືອນ​ຈັດ​ສັນ, ໂດຍ​ໄດ້​ສເນີ ໃຫ້​ໂຄງ​ການ ​ນຳ​ມູລ​ຄ່າ ຂອງ​ເຮືອນ​ຈັດ​ສັນ ໄປ​ບວກ​ເພີ່ມ ກັບ​ເງິນ​ຄ່າ​ຊົດ​ເຊີຍ ແລະ ຄາດ​ວ່າ ຊາວ​ບ້ານ​ ຈະ​ຖືກ​ຍົກ​ຍ້າຍ ​ພາຍ​ໃນ​ເດືອນ​ສິງ​ຫານີ້.

ເອ​ເຊັຽ​ເສ​ຣີ ໄດ້​ພະ​ຍາ​ຍາມ​ ຕິດ​ຕໍ່​ຫາ​ຊາວ​ບ້ານ 37 ຄອບ​ຄົວ, ແຕ່​ຍັງ​ບໍ່​ສາ​ມາດ​ຕິດ​ຕໍ່​ໄດ້.

ໃນ​ວັນ​ທີ 30 ກໍ​ຣະ​ກະ​ດາ ປີ 2020, ທ່ານ ທອງ​ແດງ ສິດ​ທິ​ສົນ, ຫົວ​ໜ້າ​ຄ​ນະ​ໄກ່​ເກ່ຽ ຜົລ​ກະ​ທົບ​ ໂຄງ​ການ​ທາງ​ຣົດໄຟ ​ລາວ-ຈີນ ປະ​ຈຳ​ແຂວງ​ຫຼວງ​ນ້ຳ​ທາ ໄດ້​ກ່າວ​ຕໍ່ ​ໜັງ​ສື​ພິມ​ວຽງ​ຈັນ​ທາມສ໌ ວ່າ: “ປັດ​ຈຸ​ບັນ​ ພວກ​ເຮົາ ​ກຳ​ລັງ​ກະ​ກຽມ ສ້າງ​ບ່ອນ​ພັກ​ຊົ່ວ​ຄາວ ໃຫ້​ແກ່​ຊາວ​ບ້ານ 37 ຄອບ​ຄົວ ທີ່​ອາ​ສັຍ​ຢູ່ ​ໃກ້​ການ​ກໍ່​ສ້າງ ​ສະ​ຖານ​ນີຣົດ​ໄຟ. ຫຼັງ​ຈາກ​ນັ້ນ, ຈະ​ສ້າງ​ເຮືອນ​ຫຼັງ​ໃໝ່ ໃຫ້​ເຂົາ​ເຈົ້າ ​ຕາມ​ພາຍ​ຫລັງ.”

ຊາວແຂວງ​ຫຼວງ​ນ້ຳ​ທາ ທ່ານ​ນຶ່ງ ໄດ້​ກ່າວ​ວ່າ:

"ເອີ ກໍ​ກຳ​ລັງ​ສ້າງ​ ຢູ່​ຫັ້ນ​ແຫຼະ ທາງ​ຣົດ​ໄຟ ເປັນ​ທ່ອນ ເປັນທ່ອນນ່າ. ດຽວນີ້, ມັນ​ຢູ່​ແຕ່​ຈີນ​ ໄປ​ວຽງ​ຈັນ​ນີ້​ຍັງ, ຍັງ​ແຕ່​ຫຼວງ​ພຣະ​ບາງ ​ໄປ. ບໍ່ ບໍ່ໄດ້​ໄປ​ໃດ ພໍ່​ໄປ​ບໍ່​ໄດ້​ແລ້ວ ພໍ່​ເຖົ້າ​ແລ້ວ."

ສະ​ຖານີ​ຣົດ​ໄຟ​ບໍ່​ເຕັນ ເປັນ​ສະ​ຖາ​ນີ​ຣົດ​ໄຟ ​ໃນ​ລາວ ສະ​ຖາ​ນີ​ທຳ​ອິດ ທີ່​ເຊື່ອມ​ຕໍ່​ຊາຍ​ແດນ ລາວ-ຈີນ ທີ່​ຜ່ານ​ອຸ​ໂມງ​ຣົດ​ໄຟ ​ມິ​ຕ​ພາບ ​ລາວ-ຈີນ ທີ່​ມີ​ຄວາມ​ຍາວ 9 ກິ​ໂລ​ແມັຕ.

ໃນ​ວັນ​ທີ 17 ກໍ​ຣະ​ກະ​ດາ ທີ່​ຜ່ານ​ມາ, ທ່ານ ບຸນ​ຈັນ ສິນ​ທະ​ວົງ, ຣັ​ຖ​ມົນ​ຕຣີ ກະ​ຊວງ​ໂຍ​ທາ​ທິ​ການ ແລະ ຂົນ​ສົ່ງ ໃນ​ຖາ​ນະ​ ຮອງຫົວ​ໜ້າ​ຊີ້​ນຳ​ລວມ ໂຄງ​ການກໍ່​ສ້າງ​ ທາງ​ຣົດ​ໄຟ​ ລາວ-ຈີນ ພ້ອມ​ດ້ວຍ​ເຈົ້າ​ໜ້າ​ທີ່ ​ແຂວງ​ຫຼວງ​ນ້ຳ​ທາ ແລະ ບໍ​ຣິ​ສັດ​ທາ​ງ​ຣົດ​ໄຟ ​ລາວ-ຈີນ ຈຳ​ກັດ ໄດ້​ປະ​ຊຸມ​ ປຶກ​ສາ​ຫາ​ລື ກ່ຽວ​ກັບ​ ການ​ກຳ​ນົດ​ ປັກ​ຫຼັກດິນ​ຈັດ​ສັນ ​ຂອບ​ເຂດ 80 ເຮັກ​ຕ້າຣ ເພື່ອ​ສ້າງ​ເຮືອນ​ຈັດ​ສັນ ​ໃຫ້​ປ​ະ​ຊາ​ຊົນ, ການ​ແກ້​ໄຂ​ ຄ່າ​ຊົດ​ເຊີຍ ແກ່​ປະ​ຊາ​ຊົນ ​ແຂວງຫຼວງ​ນ້ຳ​ທາ ​ຈຳ​ນວນ 37 ຄອບ​ຄົວ ທີ່​ຖືກ​ຈຸດ​ ແລວ​ທາງ​ຣົດ​ໄຟ ແລະ ສະ​ຖາ​ນີ​ຣົດໄຟ, ໂດຍ​ຈະ​ເລັ່ງ​ແກ້​ໄຂ ​ພາຍ​ໃນ​ເດືອນ​ກໍ​ຣະ​ກະ​ດາ, ແຕ່​ມາ​ຮອດ​ປັດ​ຈຸ​ບັນ  ຍັງ​ແກ້​ໄຂ ​ບໍ່​ທັນ​ສຳ​ເຣັດ.

ມາຮອດເດືອນທັນວາ ປີ 2019, ປະຊາຊົນ ຊາວຫຼວງນ້ຳທາ ຜູ້ທີ່ຖືກ ຜົລກະທົບ ຈາກໂຄງການ ທາງຣົດໄຟ ລາວ-ຈີນ ໄດ້ຮັບຄ່າຊົດເຊີຍ ໄປແລ້ວ 200 ປາຍຄອບຄົວ ເປັນເງິນທັງໝົດ ປະມານ 100 ຕື້ປາຍກີບ.

ແຂວງຫຼວງນ້ຳທາ ມີຜູ້ຖືກໂຄງການນີ້ ທັງຫມົດ 400 ຄອບຄົວ ຄິດເປັນມູລຄ່າ ການຊົດເຊີຍ ທັງຫມົດ ປະມານ 250 ປາຍຕື້ກີບ.

ບ້ານທີ່ໄດ້ຮັບຜົລກະທົບ ຢູ່ແຂວງຫຼວງນ້ຳທາ ມີ 4 ບ້ານ ຄື: ບ້ານບໍ່ເຕັນ, ບ້ານຕີນຕົກ, ບ້ານບໍ່ປຽດ ແລະ ບ້ານນາເຕີຍ, ມີ​ເຮືອນປະ​ຊາ​ຊົນ 150 ຫຼັງ ໄດ້​ຮັບ​ຜົລ​ກະ​ທົບ, ດິນປຸກສ້າງ 200 ຕອນ ຮວມ 30 ເຮັກຕ້າຣ, ດິນສວນ, ດິນນາ ແລະ ດິນອື່ນໆ 90 ຕອນ ຮວມ 45 ເຮັກຕ້າຣ.

ໂຄງການກໍ່ສ້າງ ທາງຣົດໄຟ ລາວ-ຈີນ ມີຄວາມຍາວ 409 ກິໂລແມັຕ, ແຕ່ສ​ະເພາະ​ທາງ​ຣົດ​ໄຟ ຕັດ​ຜ່ານ​ ແຂວງຫຼວງນໍ້າທາ ມີຄວາມຍາວທັງໝົດ ເກືອບ 17 ກິ​ໂລ​ແມັຕ, ສ້າງຂົວໃໝ່ 7 ແຫ່ງ ແລະ ເຈາະ ອຸໂມງ 3 ແຫ່ງ.

ເຕັມຫນ້າ