ຄົນງານລາວກັບຈາກໄທ ຈະໄດ້ເງິນ ວ່າງງານ

ສຸພັດຕາ
2020-04-30
ອີແມວລ໌
ຄໍາເຫັນ
Share
ພິມ
ຖ່າຍຮູບເມື່ອ: ວັນທີ 31 ເດືອນມີນາ 2020. ກຸ່ມຄົນງານລາວ ຈຳນວນປະມານ 30 ປາຍຄົນ ທີ່ພວມຂົນເຄື່ອງຂອງ ຕຣຽມເດີນທາງ ກັບເມືອເຮືອນ ທີ່ປະເທດລາວ ພາຍຫຼັງທີ່ນັ່ງຣົດໄຟ ຂະບວນຂາຂຶ້ນ ໝາຍເລຂ 133 ຈາກນະຄອນຫຼວງບາງກອກ ມາເຖິງສະຖານີ ຣົດໄຟໜອງຄາຍ.
ຖ່າຍຮູບເມື່ອ: ວັນທີ 31 ເດືອນມີນາ 2020. ກຸ່ມຄົນງານລາວ ຈຳນວນປະມານ 30 ປາຍຄົນ ທີ່ພວມຂົນເຄື່ອງຂອງ ຕຣຽມເດີນທາງ ກັບເມືອເຮືອນ ທີ່ປະເທດລາວ ພາຍຫຼັງທີ່ນັ່ງຣົດໄຟ ຂະບວນຂາຂຶ້ນ ໝາຍເລຂ 133 ຈາກນະຄອນຫຼວງບາງກອກ ມາເຖິງສະຖານີ ຣົດໄຟໜອງຄາຍ.
ຖ່າຍຮູບໂດຍ: ພະນັກງານ ການຣົດໄຟ ແຫ່ງປະເທດໄທຍ

ຄົນງານລາວ ທີ່ເຮັດວຽກຢູ່ໄທ ແລ້ວສົ່ງເງິນສົມທົບເຂົ້າກອງທຶນ ປະກັນສັງຄົມໄທ ຢ່າງຕໍ່າ 6 ເດືອນ, ແລ້ວ ທຸຣະກິຈຕ່າງໆ ປິດກິຈການ ຊົ່ວຄາວ ຕາມຄໍາສັ່ງຂອງຣັຖບານໄທ ເຊັ່ນ: ບາ, ຮ້ານອາຫານ, ຟີສເນັສ ຫຼື ທຸຣະກິຈ ອອກກໍາລັງກາຍ ແລະ ຮ້ານນວດແຜນບູຮານ ໃນນະຄອນບາງກອກ ແລະແຂວງໃກ້ຄຽງ ຄົນງານລາວທີ່ເຮັດໃນວຽກທຸກກິຈ ຕ່າງໆນີິ້ສາມາດ ມາຂໍຮັບຜົລປະໂຫຍດ ທົດແທນໄດ້ ທີ່ ສໍານັກງານປະກັນສັງຄົມຂອງໄທ ທຸກແຫ່ງທົ່ວປະເທດ, ອີງຕາມຄໍາເວົ້າຂອງ ເຈົ້າໜ້າທີ່ສໍານັກງານ ປະກັນສັງຄົມໄທ ຕໍ່ວິທຍຸເອເຊັຽເສຣີ ໃນວັນທີ 30 ເມສາ ນີ້:

"ເບີກໄດ້ ຄືຄົນໄທເລີຍເນາະ ຣັຖສັ່ງໃຫ້ປິດ ກໍຕ້ອງມາເບີກຄ່າຢຽວຢາ ຫຼືຄ່າທົນແທນໄດ້ສົ່ງເງິນ 6 ເດືອນ ຄືກັນເນາະ ເພາະວ່າ ຖ້າຂຶ້ນ ປະກັນສັງຄົມໄດ້ ສະແດງວ່າ ເຂົາເຈົ້າມາຖືກກົດໝາຍເນາະ.”

ທ່ານກ່າວຕື່ມວ່າ ການຂໍສິດ ຮັບຄ່າຈ້າງວ່າງງານນັ້ນ, ຄົນງານລາວແລະນາຍຈ້າງ ຕ້ອງໄປຍື່ນເອກກະສານພ້ອມກັນ ແລະຕ້ອງມີເອກສານ ຄົບຖ້ວນ ໂດຍຄົນງານລາວ ຈະໄດ້ຄ່າຈ້າງວ່າງງານເນື່ອງຈາກ ຜົລກະທົບຈາກການແຜ່ຣະບາດຂອງເຊື້ອໄວຣັສໂຄວິດ-19 ຈໍານວນຮ້ອຍ ລະ 62 ຂອງຄ່າຈ້າງຣາຍວັນ ໃນໄລຍະຢຸດງານ ແຕ່ບໍ່ໃຫ້ຮັບເກີນ 90 ວັນ.

ສ່ວນຄົນງານລາວ ຜູ້ໃດວ່າງງານ ຍ້ອນລາອອກ ກໍຈະໄດ້ສິດຮັບເງິນຮ້ອຍລະ 45 ຂອງຄ່າຈ້າງໃຫ້ຮັບບໍ່ເກີນ 90 ວັນ, ຫາກຄົນງານລາວ ຜູ້ໃດຖືກເຊົາຈ້າງ ແລ້ວວ່າງງານ ກໍຈະໄດ້ຮັບສິດ ຮັບເງິນຮ້ອຍລະ 70 ຂອງຄ່າຈ້າງ ໃຫ້ຮັບບໍ່ເກີນ 200 ວັນ, ໂດຍໃຫ້ຄົນງານລາວດັ່ງ ກ່າວຕິດຕໍ່ຂຶ້ນທະບຽບວ່າງງານ ຢູ່ສໍານັກງານຈັດຫາງານ ຂອງໄທ ທົ່ວປະເທດ, ດັ່ງເຈົ້າໜ້າທີ່ ກົມຈັດຫາງານ ໃນໄທ ກ່າວວ່າ:

“ແມ້ນ ລາອອກ ຫຼືວ່າຖືກວ່າເຊົາຈ້າງ ໄປຍື່ນເອກກະສານ ເອົາສໍາເນົາບັດປະຊາຊົນ ຫຼືສໍາເນົາໜ້າປື້ມທະນາຄານ ຄັດຕິດມາທີ່ກົມຈັດຫາ ງານແບບລາອອກ ມາຂຶ້ນກັບບ່ອນນີ້.”

ເຈົ້າໜ້າທີ່ທ່ານນີ້ ກ່າວຕື່ມວ່າ ສິ່ງສໍາຄັນທີ່ຄົນງານລາວ ຈະຕ້ອງປະຕິບັດ ພາຍຫຼັງ ຍື່ນເອກກະສານຮຽບຮ້ອຍແລ້ວນັ້ນຄືຈະຕ້ອງໄດ້ຣາຍ ງານໂຕຢູ່ສໍານັກງານຈັດຫາງານ ທົ່ວປະເທດພາຍໃນ 30 ມື້ ແລະ ຕ້ອງມາຣາຍງານໂຕຕາມຕາຕະລາງນັດ ທຸກຄັ້ງ ເພື່ອຮັບເງິນຄ່າ ຈ້າງວ່າງງານ ຢ່າງຕໍ່ເນື່ອງ.

ໃນຂນະດຽວກັນ ຄົນງານລາວ ທີ່ປະກອບອາຊີບຊ່າງໄມ້ຢູ່ບາງກອກ ຜູ້ນຶ່ງກ່າວວ່າ ໄດ້ຍິນຂ່າວວ່າ ກອງທຶນປະກັນສັງຄົມໄທ ຈະຈ່າຍຄ່າ ຈ້າງວ່າງງານ ໃຫ້ຄົນງານລາວ ທີ່ເຮັດວຽກຢູ່ໄທ ກໍຮູ້ສຶກດີໃຈນໍາໝູ່ ທີ່ທາງການໄທ ບໍ່ແບ່ງແຍກສັນຊາດ ເນື່ອງຈາກໄລຍະນີ້ ຫຼາຍຄົົນ ຕົກງານ ຍ້ອນຜົລກະທົບ ຈາກການແຜ່ຣະບາດຂອງໄວຣັສໂຄວິດ-19, ແຕ່ກໍຮູ້ສຶກເສັຍດາຍ ທີີ່ໂຕເອງ ແລະຄົນງານລາວ ຈໍານວນນຶ່ງ ບໍ່ໄດ້ ເຂົ້າກອງທຶນປະກັນສັງຄົມ ຍ້ອນວ່ານາຍຈ້າງ ບໍ່ພາໄປເຮັດ:

“ກໍດີໃຈຢູ່ຫັ້ນແຫຼ້ວ ເພາະວ່າທຸກຄົນເດືອດຮ້ອນເນາະ ຊ່ວງນີ້ງານການກໍບໍ່ໄດ້ເຮັດ ມັນຄົນລະປະເທດກັນເນາະຂ້າພະເຈົ້າກໍຮູ້ສຶກເສັຍ ດາຍນັ້ນແຫຼະ ເພາະຕອນນັ້ນ ບອກໃຫ້ເຖົ້າແກ່ໄປຍື່ນ ເຖົ້າແກ່ກະບໍ່ຢາກ ຍື່ນ ຢ້ານເຂົາມາກວດມາກາ ລາວວ່ານະ.”

ໃນຂນະທີ່ ຄົນງານລາວທີ່ມີອາຊີບຂາຍເຝີ ແລະຂາຍປີ້ງໄກ່ ຢູ່ແຂວງອຸບົນຣາຊທານີ ກໍຮູ້ສຶກດີໃຈນໍາຄົນງານລາວ ທີ່ໄດ້ສິດຮັບຄ່າຈ້າງ ວ່າງງານຈາກປະກັນສັງຄົມໄທ ເນື່ອງຈາກໄລຍະນີ້ ເປັນໄລຍະເຄີຟິວ ຂອງໄທ ເຮັດໃຫ້ຄົນງານລາວ ຈໍານວນນຶ່ງທີ່ເຮັດວຽກຢູ່ສະຖານ ບັນເທີງ ຕົກງານຫຼາຍທີ່ສຸດ, ແຕ່ກໍຮູ້ສຶກເສັຍດາຍ ທີ່ໂຕເອງ ບໍ່ໄດ້ເຂົ້າກອງທຶນປະກັນສັງຄົມຂອງໄທມາໄດ້ 3 ປີ ແລ້ວ ຍ້ອນວ່າຍາມ ໄປປິ່ນປົວ ຢູ່ໂຮງໝໍ ແລ້ວໄປຂໍຕໍ່ປະກັນສັງຄົມ ເຈົ້າໜ້າທີ່ບອກວ່າ ຣັຖບານໄທ ບໍ່ມີນະໂຍບາຍ ຂາຍປະກັນສັງຄົມ ໃຫ້ແຮງງານຕ່າງ ດ້າວແລ້ວ, ຂນະທີ່ໂຕເອງແລະແມ່ ກໍເຂົ້າມາເຮັດວຽກຢູ່ໄທ ແບບຖືກຕ້ອງຕາມ ກົດໝາຍ ແລະມີເອກກະສານຖືກຕ້ອງທຸກຢ່າງ:

“ກໍດີໃຈຢູ່ ເພາະວ່າຮ້ານຄ້າຮ້ານອາຫານ ເຂົາບໍ່ທັນໄປປິດເທື່ອ ເຂົາຣະງັບຈາກໂຄວິດນີ້ນະ ຜ່ານໄປປີນຶ່ງ ນ້ອງວ່າຈະໄປຕໍ່ປະກັນນີ້ຈະ ຣັຖບານບໍ່ທັນອອກປະກາດວ່າ ໃຫ້ຂາຍປະກັນສັງຄົມໃຫ້ຕ່າງດ້າວ ກໍຮູ້ສຶກເສັຍດາຍຢູ່ ເມື່ອຍາມເປັນໄຂ້ເປັນໜາວ ຍາມເຮົາບໍ່ມີເງິນ ສໍາຮອງນະ.”

ໃນການປະກາດໃຫ້ເງິນຊ່ອຍເຫຼືອຄົນງານລາວ ທີ່ເຮັດວຽກຢູ່ໄທຄັ້ງນີ້ ບໍ່ໝາຍຄວາມວ່າທຸກຄົນຈະໄດ້ຮັບ ແຕ່ຕ້ອງເປັນໄປຕາມເງື່ອນໄຂ ທີ່ທາງການໄທ ວາງອອກ. ເປັນຕົ້ນວ່າ ຄົນງານທີ່ເຂົ້າມາເຮັດວຽກຢູ່ໄທ ແລ້ວບໍ່ເຂົ້າກອງທຶນ ປະກັນສັງຄົມ ຍ້ອນວ່າເຂົ້າມາເຮັດວຽກ ແບບໃຊ້ວິຊາຂອງນັກທ່ອງທ່ຽວ ກໍຈະບໍ່ໄດ້ສິດ ຮັບຄ່າຈ້າງວ່າງງານ ຈາກປະກັນສັງຄົມໄທ ແຕ່ຢ່າງໃດ, ເນື່ອງຈາກວ່າ ສິດດັ່ງກ່າວ ແມ່ນເປັນຜົລ ປະໂຫຍດທົດແທນ ຂອງຄົນງານລາວ ທີ່ເຂົ້າມາເຮັດວຽກຢູ່ໄທ ແບບຖືກກົດໝາຍ ຄືມີ MOU, ມີ Work Permit, ມີ Passport ແລະມີບັດສີບົວ ຄັກແນ່.

ເຖິງຢ່າງໃດກໍດີ ຄົນງານລາວທີ່ເຮັດວຽກຢູ່ໄທ ທີ່ໄດ້ກັບເມືອປະເທດລາວແລ້ວ ແຕ່ໄດ້ສົ່ງເງິນສະສົມເຂົ້າກອງທຶນປະກັນສັງຄົມຢ່າງຕໍ່າ 6 ເດືອນ ແລະນາຍຈ້າງຢຸດກິຈການຊົ່ວຄາວ ຕາມຄໍາສັ່ງຂອງ ຣັຖບານ ນັ້ນ, ຍັງສາມາດໄດ້ຮັບສິດ ຮັບເງິນວ່າງງານ ຈາກປະກັນສັງຄົມ ຮ້ອຍລະ 62 ຂອງຄ່າຈ້າງຄືກັນ, ແຕ່ມີເງື່ອນໄຂວ່າ ນາຍຈ້າງ ແລະຄົນງານ ຕ້ອງມາຍື່ນເອກກະສານ ຄືກັບຜູ້ອື່ນ ຢູ່ທີ່ສໍານັກງານຈັດ ຫາງານ ທົ່ວປະເທດ ພາຍໃນ 2 ປີ.

ອີງຕາມຂໍ້ມູນຈາກກົມຈັດຫາງານ, ກະຊວງແຮງງານຂອງໄທ ເມື່ອເດືອນມີນາ ປີ 2020 ຣະບຸວ່າ ມີຄົນງານລາວ ທີ່ມາເຮັດວຽກຢູ່ໄທ ຕາມສັນຍາ MOU ຢ່າງຖືກຕ້ອງຕາມກົດໝາຍ ມີຈໍານວນຫຼາຍເຖິງ 204,000 ປາຍຄົນ.

ເຕັມຫນ້າ