ຜູ້ຫາເຊົ້າກິນຄໍ່າຂໍຮ້ອງ ຊ່ອຍເຫຼືອ

ໄຊຍາ
2020-04-22
ອີແມວລ໌
ຄໍາເຫັນ
Share
ພິມ
ຄົນງານລາວ ໃນນະຄອນຫຼວງວຽງຈັນ
ຄົນງານລາວ ໃນນະຄອນຫຼວງວຽງຈັນ
RFA/LX

ກຳມະກອນຣາຍວັນ ຜູ້ຫາເຊົ້າກິນຄໍ່າ ພະນັກງານຢູ່ໃນຣະບົບ ແລະນອກຣະບົບທີ່ບໍ່ມີວຽກເຮັດ ໃນໄລຍະພຍາດໂຄວິດ-19 ຣະບາດນີ້ຕ້ອງ ປະເຊີນກັບບັນຫາຊີວິດທີ່ລຳບາກ ທັງອາຫານການກິນ, ຄ່າເຊົ່າຫ້ອງ ແຖວ, ຄ່ານໍ້າ-ຄ່າໄຟຟ້າ, ຄ່າຜ່ອນຣົດ, ຈ່າຍສິນເຊື່ອ ແລະ ຄ່າຄອງ ຊີບຕ່າງໆ. ສ່ວນຜູ້ທີ່ຢູ່ຕ່າງແຂວງ ບໍ່ມີເງິນຈ້າງຣົດກັບບ້ານຕົນເອງ ຍ້ອນຖືກເລີກຈ້າງກະທັນຫັນ.

ຕໍ່ບັນຫາດັ່ງກ່າວຜູ້ຫວ່າງງານ ໄດ້ກ່າວຕໍ່ ເອເຊັຽເສຣີ ໃນວັນທີ 22 ເມສາ ວ່າ ຮຽກຮ້ອງມາຍັງຣັຖບານໃຫ້ ຊ່ອຍເຫລືອຢ່າງເລັ່ງດ່ວນ ເນື່ອງຈາກສະພາບຊີວິດການເປັນຢູ່ ລຳບາກຫລາຍຕ້ອງຢືມເງິນພີ່ນ້ອງ ມາຊື້ກິນ ແຕ່ຜູ້ກ່ຽວກາບໍ່ກ້າ ເວົ້າຢ້ານວ່າຖືກ ຕັ້ງຂໍ້ຫາຕໍ່ຕ້ານ ຣັຖບານ.

"ອົດໆຢາກໆຫັ້ນແຫຼະ ຢືມພີ່ຢືມນ້ອງມາກິນ ພາກຣັຖຂັ້ນເທິງເພິ່ນກາບໍ່ເວົ້າບໍ່ວ່າຫຍັງ ວ່າທີ່ຊ່ອຍເລຫືຜູ້ທີ່ຕົກອັບ ກາມີແຕ່ວ່າໂຕໃຜໂຕມັນ ຄັນວ່າຊິແຈກນີ້ແຈກນັ້ນ ກໍຄືວ່າບໍ່ເຫັນແຈກຈັກເທື່ອ ແທ້ຈິງກາຢາກ ໃຫ້ຊ່ອຍເຫລືອຫັ້ນແຫລະ ຄັນເຮົາເອີ່ຍກັບເພິ່ນ, ເພິ່ນກາຊິວ່າເຮົາ ຕໍ່ຕ້ານເພິ່ນ."

ໃນຂນະທີ່ປະຊາຊົນຜູ້ປະເຊີນກັບບັນຫາວິກີດທາງການເງິນ ກ່າວວ່າປັດຈຸບັນກໍຍັງບໍ່ເຫັນທາງການ ມີນະໂຍບາຍຊ່ອຍເຫຼືອ ເຊິ່ງຕ້ອງຊ່ອຍ ໂຕເອງ, ຕົນເອງກໍມີໜີ້ສິນ ທີ່ຕ້ອງຈ່າຍທະນາຄານ ທີ່ກູ້ຢືມມາແຕ່ ທະນາຄານ ໃຫ້ຈ່າຍແຕ່ດອກເບັ້ຍ ແຕ່ຂັ້ນຕອນແລ່ນ ເອກກະສານ ຫຍຸ້ງຍາກຫລາຍ.

"ຄ່າເຮົາຢືມທະນາຄານເພິ່ນກາວ່າຈະໃຫ້ຈ່າຍດອກເບັ້ຍ 3 ເດືອນ ບໍ່ໄດ້ເຮັດງ່າຍຄືແນວນັ້ນ ຕ້ອງໄດ້ໄປຂຶ້ນສານ ມີຄວາມຫຍຸ້ງຍາກຫຼາຍ ໂອ້ຍຢ່າລະວ່າ ໂອ້ຍກາຈະຕາຍແຫລະເນາະ ຈັ່ງຈະວ່າຈັ່ງໃດຄັນມັນ ບໍ່ມີຜູ້ມາຊ່ອຍໄດ້ ຈະເຮັດຈັ່ງໃດເກັບກິນນຳທົ່ງໄຮ່ທົ່ງນານີ້ແຫຼະ."

ທ່ານໄດ້ກ່າວຕື່ມວ່າ ທາງການກໍບອກວ່າຈະຊ່ອຍຫລຸດຜ່ອນຄ່າໄຟຟ້າ ລົງເຄິ່ງນຶ່ງໃຫ້ປະຊາຊົນ ແຕ່ຄ່າໄຟຟ້າເດືອນມີນາ ເພີ່ມຂຶ້ນສອງເທົ່າ. ຖ້າມກາງສະພາບບັນຫາຫຍຸ້ງຍາກ ກໍຢາກຮຽກຮ້ອງໃຫ້ຣັຖບານ ຊ່ອຍເຫລືອ ເພາະບໍ່ມີເງິນຈ່າຍຄ່າໜີ້ສິນແລ້ວ.

ຕໍ່ບັນຫານດັ່ງກ່າວເຈົ້າໜ້າທີ່ກະຊວງແຮງງານ ແລະສວັດດີການສັງຄົມ ໄດ້ໃຫ້ເຫດຜົລວ່າ ແຜນການຊ່ອຍເຫຼືອ ທຸກກຸ່ມຄົນທີ່ໄດ້ຮັບຄວາມ ເດືອດຮ້ອນ ນີ້ຍັງບໍ່ສາມາດຕອບໄດ້ ຈະຊ່ອຍເຫຼືອແບບໃດກຳລັງ ສຶກສາຂໍ້ມູນຢູ່ເພາະຍັງ ບໍ່ສາມາດສລຸບໂຕເລກໄດ້ເທື່ອວ່າມີປະມານ ເທົ່າໃດ ທີ່ໄດ້ຮັບຄວາມເດືອດຮ້ອນ.

"ຣັຖບານເພິ່ນມີແຕ່ດຽວນີ້ ເພິ່ນກຳລັງຄົ້ນຄວ້າ ນະໂຍບາຍຍັງບໍ່ຮູ້ຣາຍລະອຽດ ເທື່ອເນາະຄົ້ນຄວ້າໝົດທຸກ ກຸ່ມຄົນຫັ້ນແຫຼະ ຄົ້ນຄວ້າກຸ່ມທີ່ ຢູ່ໃນຣະບົບ ປະກັນສັງຄົມ ກຸ່ມແຮງງານໃນຣະບົບ ກຸ່ມທີ່ປະກອບ ອາຊີບອິສຣະ ມີໜ່ວຍງານສະເພາະກິດຄົ້ນຄວ້າຢູ່ ດຽວນີ້ມັນບໍ່ທັນເປັນ ນິຕິກັມເທື່ອ ມັນເລີຍເວົ້າບໍ່ໄດ້ ມັນບໍ່ທັນເປັນມະຕິດອອກມາເທື່ອ."

ສ່ວນເຈົ້າໜ້າທີ່ຂອງນະຄອນຫລວງ ໄດ້ໃຫ້ຄວາມເຫັນຕໍ່ສະພາບການ ດັ່ງກ່າວວ່າ ປັດຈຸບັນ ທາງການເລັ່ງແກ້ໄຂບັນຫາ ພຍາດໂຄວິດ-19 ກ່ອນສ່ວນການຊ່ອຍເຫລືອ ກຸ່ມຄົນທີ່ໄດ້ຮັບຄວາມເດືອດຮ້ອນນັ້ນ ທາງການຍັງຄົ້ນຄວ້າຢູ່.

"ໂຕນີ້ເພິ່ນກາມີແຜນຊ່ອຍເຫລືອຢູ່ ເພາະວ່າຕອນນີ້ພວກເຮົາເລັ່ງໃສ່ການແກ້ໄຂ ສະພາບໂຄວິດ ນີິ້ເພາະວ່າມີແຮງງານລາວ ໄປເຮັດວຽກຢູ່ ໄທເປັນຈຳນວນຫລາຍ ເພິ່ນກາຫຼັ່ງໄຫຼກັບເຂົ້າມາບ້ານເພິ່ນ ກໍຍັງສິ ຄົ້ນຄວ້າກັນຢູ່ກອງປະຊຸມ ຫຼັງຈາກແລ້ວໂຄວິດເພິ່ນຈະເຮັດແນວໃດຕໍ່."

ຕໍ່ການແກ້ໄຂບັນຫາຜົລກະທົບພຍາດໂຄວິດ-19 ທ່ານ ສອນໄຊ ສີພັນດອນ ຮອງນາຍົກຣັຖມົນຕຼີ ໄດ້ກ່າວໃນກອງປະຊຸມຄນະສະເພາະກິດ ເມື່ອວັນທີ 20 ເມສາ ວ່າຕອນນີ້ຕ້ອງເນັ້ນໜັກໃສ່ ຊ່ອຍເຫລືອ ກຸ່ມແຮງງານທີ່ໄດ້ຮັບຜົລກະທົບ ຢ່າງໜັກໜ່ວງ ທັງໃນຣະບົບປະກັນສັງຄົມ ແລະ ນອກຣະບົບປະກັນສັງຄົມ, ແຮງງານອາຊີບ ແລະ ແຮງງານອິສຣະ ເນື່ອງຈາກວ່າໂຮງຈັກໂຮງງານ ໄດ້ປິດຊົ່ວຄາວອັນ ໄດ້ສົ່ງຜົລ ກະທົບ ຕໍ່ຜູ້ຫາເຊົ້າກິນຄໍ່າ ແຕ່ຍັງບໍ່ທັນໄດ້ກຳນົດ ມາຕການຣະອຽດວ່າຈະຊ່ອຍໃນຮູບແບບໃດ.

ໃນສ່ວນຂອງຜົລກະທົບ ທາງເສຖກິດກໍມີການຍົກເວັ້ນອາກອນຣາຍໄດ້ ເງິນເດືອນຂອງຜູ້ອອກແຮງງານ ທັງພາກຣັຖ ແລະເອກກະຊົນທີ່ມີ ຣາຍຮັບຫ້າລ້ານ ລົງມາໃນໄລຍະເວລາ ສາມເດືອນ, ຍົກເວັ້ນການ ເກັບອາກອນຣາຍໄດ້ ທຸຣະກິດຂນາດນ້ອຍສາມເດືອນ, ຍົກເວັ້ນພາສີ -ອາກອນ ຄ່າທຳນຽມຕ່າງໆ ໃນການນໍາເຂົ້າສິນຄ້າການແພດ, ເລື່ອນການສຳຣະອາກອນ ທຸຣະກິດທ່ອງທ່ຽວສາມເດືອນ, ຜ່ອນຜັນການ ສຳຣະຄ່າໄຟຟ້າ-ຄ່ານໍ້າ ໃນຄົວເຮືອນ ແລະ ພາກທຸຣະກິດ ແລະ ໃຫ້ທະນາຄານປັບຫລຸດ ອັດຕຣາດອກເບັ້ຍ ແລະ ສນອງເງິນກູ້ໃຫ້ ປະຊາຊົນ ໃນອັດຕຣາດອກເບັ້ຍຕໍ່າ.

ເຕັມຫນ້າ